ଗୋଵିଂଦ ଦାମୋଦର ସ୍ତୋତ୍ରମ୍

ଅଗ୍ରେ କୁରୂଣାମଥ ପାଂଡଵାନାଂ

ଦୁଃଶାସନେନାହୃତଵସ୍ତ୍ରକେଶା ।

କୃଷ୍ଣା ତଦାକ୍ରୋଶଦନନ୍ୟନାଥା

ଗୋଵିଂଦ ଦାମୋଦର ମାଧଵେତି ॥ 1॥

ଶ୍ରୀକୃଷ୍ଣ ଵିଷ୍ଣୋ ମଧୁକୈଟଭାରେ

ଭକ୍ତାନୁକଂପିନ୍ ଭଗଵନ୍ ମୁରାରେ ।

ତ୍ରାୟସ୍ଵ ମାଂ କେଶଵ ଲୋକନାଥ

ଗୋଵିଂଦ ଦାମୋଦର ମାଧଵେତି ॥ 2॥

ଵିକ୍ରେତୁକାମା କିଲ ଗୋପକନ୍ୟା

ମୁରାରିପାଦାର୍ପିତଚିତ୍ତଵୃତ୍ତିଃ ।

ଦଧ୍ୟାଦିକଂ ମୋହଵଶାଦଵୋଚଦ୍

ଗୋଵିଂଦ ଦାମୋଦର ମାଧଵେତି ॥ 3॥

ଉଲୂଖଲେ ସଂଭୃତତଂଡୁଲାଂଶ୍ଚ

ସଂଘଟ୍ଟୟଂତ୍ୟୋ ମୁସଲୈଃ ପ୍ରମୁଗ୍ଧାଃ ।

ଗାୟଂତି ଗୋପ୍ୟୋ ଜନିତାନୁରାଗା

ଗୋଵିଂଦ ଦାମୋଦର ମାଧଵେତି ॥ 4॥

କାଚିତ୍କରାଂଭୋଜପୁଟେ ନିଷଣ୍ଣଂ

କ୍ରୀଡାଶୁକଂ କିଂଶୁକରକ୍ତତୁଂଡମ୍ ।

ଅଧ୍ୟାପୟାମାସ ସରୋରୁହାକ୍ଷୀ

ଗୋଵିଂଦ ଦାମୋଦର ମାଧଵେତି ॥ 5॥

ଗୃହେ ଗୃହେ ଗୋପଵଧୂସମୂହଃ

ପ୍ରତିକ୍ଷଣଂ ପିଂଜରସାରିକାଣାମ୍ ।

ସ୍ଖଲଦ୍ଗିରାଂ ଵାଚୟିତୁଂ ପ୍ରଵୃତ୍ତୋ

ଗୋଵିଂଦ ଦାମୋଦର ମାଧଵେତି ॥ 6॥

ପର୍ୟ୍ୟଂକିକାଭାଜମଲଂ କୁମାରଂ

ପ୍ରସ୍ଵାପୟଂତ୍ୟୋଽଖିଲଗୋପକନ୍ୟାଃ ।

ଜଗୁଃ ପ୍ରବଂଧଂ ସ୍ଵରତାଲବଂଧଂ

ଗୋଵିଂଦ ଦାମୋଦର ମାଧଵେତି ॥ 7॥

ରାମାନୁଜଂ ଵୀକ୍ଷଣକେଲିଲୋଲଂ

ଗୋପୀ ଗୃହୀତ୍ଵା ନଵନୀତଗୋଲମ୍ ।

ଆବାଲକଂ ବାଲକମାଜୁହାଵ

ଗୋଵିଂଦ ଦାମୋଦର ମାଧଵେତି ॥ 8॥

ଵିଚିତ୍ରଵର୍ଣାଭରଣାଭିରାମେ-

ଽଭିଧେହି ଵକ୍ତ୍ରାଂବୁଜରାଜହଂସି ।

ସଦା ମଦୀୟେ ରସନେଽଗ୍ରରଂଗେ

ଗୋଵିଂଦ ଦାମୋଦର ମାଧଵେତି ॥ 9॥

ଅଂକାଧିରୂଢଂ ଶିଶୁଗୋପଗୂଢଂ

ସ୍ତନଂ ଧୟଂତଂ କମଲୈକକାଂତମ୍ ।

ସଂବୋଧୟାମାସ ମୁଦା ୟଶୋଦା

ଗୋଵିଂଦ ଦାମୋଦର ମାଧଵେତି ॥ 10॥

କ୍ରୀଡଂତମଂତର୍ଵ୍ରଜମାତ୍ମଜଂ ସ୍ଵଂ

ସମଂ ଵୟସ୍ୟୈଃ ପଶୁପାଲବାଲୈଃ ।

ପ୍ରେମ୍ଣା ୟଶୋଦା ପ୍ରଜୁହାଵ କୃଷ୍ଣଂ

ଗୋଵିଂଦ ଦାମୋଦର ମାଧଵେତି ॥ 11॥

ୟଶୋଦୟା ଗାଢମୁଲୂଖଲେନ

ଗୋକଂଠପାଶେନ ନିବଧ୍ୟମାନଃ ।

ରୁରୋଦ ମଂଦଂ ନଵନୀତଭୋଜୀ

ଗୋଵିଂଦ ଦାମୋଦର ମାଧଵେତି ॥ 12॥

ନିଜାଂଗଣେ କଂକଣକେଲିଲୋଲଂ

ଗୋପୀ ଗୃହୀତ୍ଵା ନଵନୀତଗୋଲମ୍ ।

ଆମର୍ଦୟତ୍ପାଣିତଲେନ ନେତ୍ରେ

ଗୋଵିଂଦ ଦାମୋଦର ମାଧଵେତି ॥ 13॥

ଗୃହେ ଗୃହେ ଗୋପଵଧୂକଦଂବାଃ

ସର୍ଵେ ମିଲିତ୍ଵା ସମଵାୟୟୋଗେ ।

ପୁଣ୍ୟାନି ନାମାନି ପଠଂତି ନିତ୍ୟଂ

ଗୋଵିଂଦ ଦାମୋଦର ମାଧଵେତି ॥ 14॥

ମଂଦାରମୂଲେ ଵଦନାଭିରାମଂ

ବିଂବାଧରେ ପୂରିତଵେଣୁନାଦମ୍ ।

ଗୋଗୋପଗୋପୀଜନମଧ୍ୟସଂସ୍ଥଂ

ଗୋଵିଂଦ ଦାମୋଦର ମାଧଵେତି ॥ 15॥

ଉତ୍ଥାୟ ଗୋପ୍ୟୋଽପରରାତ୍ରଭାଗେ

ସ୍ମୃତ୍ଵା ୟଶୋଦାସୁତବାଲକେଲିମ୍ ।

ଗାୟଂତି ପ୍ରୋଚ୍ଚୈର୍ଦଧି ମଂଥୟଂତ୍ୟୋ

ଗୋଵିଂଦ ଦାମୋଦର ମାଧଵେତି ॥ 16॥

ଜଗ୍ଧୋଽଥ ଦତ୍ତୋ ନଵନୀତପିଂଡୋ

ଗୃହେ ୟଶୋଦା ଵିଚିକିତ୍ସୟଂତୀ ।

ଉଵାଚ ସତ୍ୟଂ ଵଦ ହେ ମୁରାରେ

ଗୋଵିଂଦ ଦାମୋଦର ମାଧଵେତି ॥ 17॥

ଅଭ୍ୟର୍ଚ୍ୟ ଗେହଂ ୟୁଵତିଃ ପ୍ରଵୃଦ୍ଧ-

ପ୍ରେମପ୍ରଵାହା ଦଧି ନିର୍ମମଂଥ ।

ଗାୟଂତି ଗୋପ୍ୟୋଽଥ ସଖୀସମେତା

ଗୋଵିଂଦ ଦାମୋଦର ମାଧଵେତି ॥ 18॥

କ୍ଵଚିତ୍ ପ୍ରଭାତେ ଦଧିପୂର୍ଣପାତ୍ରେ

ନିକ୍ଷିପ୍ୟ ମଂଥଂ ୟୁଵତୀ ମୁକୁଂଦମ୍ ।

ଆଲୋକ୍ୟ ଗାନଂ ଵିଵିଧଂ କରୋତି

ଗୋଵିଂଦ ଦାମୋଦର ମାଧଵେତି ॥ 19॥

କ୍ରୀଡାପରଂ ଭୋଜନମଜ୍ଜନାର୍ଥଂ

ହିତୈଷିଣୀ ସ୍ତ୍ରୀ ତନୁଜଂ ୟଶୋଦା ।

ଆଜୂହଵତ୍ ପ୍ରେମପରିପ୍ଲୁତାକ୍ଷୀ

ଗୋଵିଂଦ ଦାମୋଦର ମାଧଵେତି ॥ 20॥

ସୁଖଂ ଶୟାନଂ ନିଲୟେ ଚ ଵିଷ୍ଣୁଂ

ଦେଵର୍ଷିମୁଖ୍ୟା ମୁନୟଃ ପ୍ରପନ୍ନାଃ ।

ତେନାଚ୍ୟୁତେ ତନ୍ମୟତାଂ ଵ୍ରଜଂତି

ଗୋଵିଂଦ ଦାମୋଦର ମାଧଵେତି ॥ 21॥

ଵିହାୟ ନିଦ୍ରାମରୁଣୋଦୟେ ଚ

ଵିଧାୟ କୃତ୍ୟାନି ଚ ଵିପ୍ରମୁଖ୍ୟାଃ ।

ଵେଦାଵସାନେ ପ୍ରପଠଂତି ନିତ୍ୟଂ

ଗୋଵିଂଦ ଦାମୋଦର ମାଧଵେତି ॥ 22॥

ଵୃଂଦାଵନେ ଗୋପଗଣାଶ୍ଚ ଗୋପ୍ୟୋ

ଵିଲୋକ୍ୟ ଗୋଵିଂଦଵିୟୋଗଖିନ୍ନାମ୍ ।

ରାଧାଂ ଜଗୁଃ ସାଶ୍ରୁଵିଲୋଚନାଭ୍ୟାଂ

ଗୋଵିଂଦ ଦାମୋଦର ମାଧଵେତି ॥ 23॥

ପ୍ରଭାତସଂଚାରଗତା ନୁ ଗାଵସ୍-

ତଦ୍ରକ୍ଷଣାର୍ଥଂ ତନୟଂ ୟଶୋଦା ।

ପ୍ରାବୋଧୟତ୍ ପାଣିତଲେନ ମଂଦଂ

ଗୋଵିଂଦ ଦାମୋଦର ମାଧଵେତି ॥ 24॥

ପ୍ରଵାଲଶୋଭା ଇଵ ଦୀର୍ଘକେଶା

ଵାତାଂବୁପର୍ଣାଶନପୂତଦେହାଃ ।

ମୂଲେ ତରୂଣାଂ ମୁନୟଃ ପଠଂତି

ଗୋଵିଂଦ ଦାମୋଦର ମାଧଵେତି ॥ 25॥

ଏଵଂ ବ୍ରୁଵାଣା ଵିରହାତୁରା ଭୃଶଂ

ଵ୍ରଜସ୍ତ୍ରିୟଃ କୃଷ୍ଣଵିଷକ୍ତମାନସାଃ ।

ଵିସୃଜ୍ୟ ଲଜ୍ଜାଂ ରୁରୁଦୁଃ ସ୍ମ ସୁସ୍ଵରଂ

ଗୋଵିଂଦ ଦାମୋଦର ମାଧଵେତି ॥ 26॥

ଗୋପୀ କଦାଚିନ୍ମଣିପଂଜରସ୍ଥଂ

ଶୁକଂ ଵଚୋ ଵାଚୟିତୁଂ ପ୍ରଵୃତ୍ତା ।

ଆନଂଦକଂଦ ଵ୍ରଜଚଂଦ୍ର କୃଷ୍ଣ

ଗୋଵିଂଦ ଦାମୋଦର ମାଧଵେତି ॥ 27॥

ଗୋଵତ୍ସବାଲୈଃ ଶିଶୁକାକପକ୍ଷଂ

ବଧ୍ନଂତମଂଭୋଜଦଲାୟତାକ୍ଷମ୍ ।

ଉଵାଚ ମାତା ଚିବୁକଂ ଗୃହୀତ୍ଵା

ଗୋଵିଂଦ ଦାମୋଦର ମାଧଵେତି ॥ 28॥

ପ୍ରଭାତକାଲେ ଵରଵଲ୍ଲଵୌଘା

ଗୋରକ୍ଷଣାର୍ଥଂ ଧୃତଵେତ୍ରଦଂଡାଃ ।

ଆକାରୟାମାସୁରନଂତମାଦ୍ୟଂ

ଗୋଵିଂଦ ଦାମୋଦର ମାଧଵେତି ॥ 29॥

ଜଲାଶୟେ କାଲିୟମର୍ଦନାୟ

ୟଦା କଦଂବାଦପତନ୍ମୁରାରିଃ ।

ଗୋପାଂଗନାଶ୍ଚୁକ୍ରୁଶୁରେତ୍ୟ ଗୋପା

ଗୋଵିଂଦ ଦାମୋଦର ମାଧଵେତି ॥ 30॥

ଅକ୍ରୂରମାସାଦ୍ୟ ୟଦା ମୁକୁଂଦଶ୍-

ଚାପୋତ୍ସଵାର୍ଥଂ ମଥୁରାଂ ପ୍ରଵିଷ୍ଟଃ ।

ତଦା ସ ପୌରୈର୍ଜୟସୀତ୍ୟଭାଷି

ଗୋଵିଂଦ ଦାମୋଦର ମାଧଵେତି ॥ 31॥

କଂସସ୍ୟ ଦୂତେନ ୟଦୈଵ ନୀତୌ

ଵୃଂଦାଵନାଂତାଦ୍ ଵସୁଦେଵସୂନୂ । (ସୂନୌ)

ରୁରୋଦ ଗୋପୀ ଭଵନସ୍ୟ ମଧ୍ୟେ

ଗୋଵିଂଦ ଦାମୋଦର ମାଧଵେତି ॥ 32॥

ସରୋଵରେ କାଲିୟନାଗବଦ୍ଧଂ

ଶିଶୁଂ ୟଶୋଦାତନୟଂ ନିଶମ୍ୟ ।

ଚକ୍ରୁର୍ଲୁଠଂତ୍ୟଃ ପଥି ଗୋପବାଲା

ଗୋଵିଂଦ ଦାମୋଦର ମାଧଵେତି ॥ 33॥

ଅକ୍ରୂରୟାନେ ୟଦୁଵଂଶନାଥଂ

ସଂଗଚ୍ଛମାନଂ ମଥୁରାଂ ନିରୀକ୍ଷ୍ୟ ।

ଊଚୁର୍ଵିୟୋଗତ୍ କିଲ ଗୋପବାଲା

ଗୋଵିଂଦ ଦାମୋଦର ମାଧଵେତି ॥ 34॥

ଚକ୍ରଂଦ ଗୋପୀ ନଲିନୀଵନାଂତେ

କୃଷ୍ଣେନ ହୀନା କୁସୁମେ ଶୟାନା ।

ପ୍ରଫୁଲ୍ଲନୀଲୋତ୍ପଲଲୋଚନାଭ୍ୟାଂ

ଗୋଵିଂଦ ଦାମୋଦର ମାଧଵେତି ॥ 35॥

ମାତାପିତୃଭ୍ୟାଂ ପରିଵାର୍ୟମାଣା

ଗେହଂ ପ୍ରଵିଷ୍ଟା ଵିଲଲାପ ଗୋପୀ ।

ଆଗତ୍ୟ ମାଂ ପାଲୟ ଵିଶ୍ଵନାଥ

ଗୋଵିଂଦ ଦାମୋଦର ମାଧଵେତି ॥ 36॥

ଵୃଂଦାଵନସ୍ଥଂ ହରିମାଶୁ ବୁଦ୍ଧ୍ଵା

ଗୋପୀ ଗତା କାପି ଵନଂ ନିଶାୟାମ୍ ।

ତତ୍ରାପ୍ୟଦୃଷ୍ଟ୍ଵାଽତିଭୟାଦଵୋଚଦ୍

ଗୋଵିଂଦ ଦାମୋଦର ମାଧଵେତି ॥ 37॥

ସୁଖଂ ଶୟାନା ନିଲୟେ ନିଜେଽପି

ନାମାନି ଵିଷ୍ଣୋଃ ପ୍ରଵଦଂତି ମର୍ତ୍ୟାଃ ।

ତେ ନିଶ୍ଚିତଂ ତନ୍ମୟତାଂ ଵ୍ରଜଂତି

ଗୋଵିଂଦ ଦାମୋଦର ମାଧଵେତି ॥ 38॥

ସା ନୀରଜାକ୍ଷୀମଵଲୋକ୍ୟ ରାଧାଂ

ରୁରୋଦ ଗୋଵିଂଦଵିୟୋଗଖିନ୍ନାମ୍ ।

ସଖୀ ପ୍ରଫୁଲ୍ଲୋତ୍ପଲଲୋଚନାଭ୍ୟାଂ

ଗୋଵିଂଦ ଦାମୋଦର ମାଧଵେତି ॥ 39॥

ଜିହ୍ଵେ ରସଜ୍ଞେ ମଧୁରପ୍ରିୟା ତ୍ଵଂ

ସତ୍ୟଂ ହିତଂ ତ୍ଵାଂ ପରମଂ ଵଦାମି ।

ଆଵର୍ଣୟେଥା ମଧୁରାକ୍ଷରାଣି

ଗୋଵିଂଦ ଦାମୋଦର ମାଧଵେତି ॥ 40॥

ଆତ୍ୟଂତିକଵ୍ୟାଧିହରଂ ଜନାନାଂ

ଚିକିତ୍ସକଂ ଵେଦଵିଦୋ ଵଦଂତି ।

ସଂସାରତାପତ୍ରୟନାଶବୀଜଂ

ଗୋଵିଂଦ ଦାମୋଦର ମାଧଵେତି ॥ 41॥

ତାତାଜ୍ଞୟା ଗଚ୍ଛତି ରାମଚଂଦ୍ରେ

ସଲକ୍ଷ୍ମଣେଽରଣ୍ୟଚୟେ ସସୀତେ ।

ଚକ୍ରଂଦ ରାମସ୍ୟ ନିଜା ଜନିତ୍ରୀ

ଗୋଵିଂଦ ଦାମୋଦର ମାଧଵେତି ॥ 42॥

ଏକାକିନୀ ଦଂଡକକାନନାଂତାତ୍

ସା ନୀୟମାନା ଦଶକଂଧରେଣ ।

ସୀତା ତଦାକ୍ରଂଦଦନନ୍ୟନାଥା

ଗୋଵିଂଦ ଦାମୋଦର ମାଧଵେତି ॥ 43॥

ରାମାଦ୍ଵିୟୁକ୍ତା ଜନକାତ୍ମଜା ସା

ଵିଚିଂତୟଂତୀ ହୃଦି ରାମରୂପମ୍ ।

ରୁରୋଦ ସୀତା ରଘୁନାଥ ପାହି

ଗୋଵିଂଦ ଦାମୋଦର ମାଧଵେତି ॥ 44॥

ପ୍ରସୀଦ ଵିଷ୍ଣୋ ରଘୁଵଂଶନାଥ

ସୁରାସୁରାଣାଂ ସୁଖଦୁଃଖହେତୋ ।

ରୁରୋଦ ସୀତା ତୁ ସମୁଦ୍ରମଧ୍ୟେ

ଗୋଵିଂଦ ଦାମୋଦର ମାଧଵେତି ॥ 45॥

ଅଂତର୍ଜଲେ ଗ୍ରାହଗୃହୀତପାଦୋ

ଵିସୃଷ୍ଟଵିକ୍ଲିଷ୍ଟସମସ୍ତବଂଧୁଃ ।

ତଦା ଗଜେଂଦ୍ରୋ ନିତରାଂ ଜଗାଦ

ଗୋଵିଂଦ ଦାମୋଦର ମାଧଵେତି ॥ 46॥

ହଂସଧ୍ଵଜଃ ଶଂଖୟୁତୋ ଦଦର୍ଶ

ପୁତ୍ରଂ କଟାହେ ପ୍ରତପଂତମେନମ୍ ।

ପୁଣ୍ୟାନି ନାମାନି ହରେର୍ଜପଂତଂ

ଗୋଵିଂଦ ଦାମୋଦର ମାଧଵେତି ॥ 47॥

ଦୁର୍ଵାସସୋ ଵାକ୍ୟମୁପେତ୍ୟ କୃଷ୍ଣା

ସା ଚାବ୍ରଵୀତ୍ କାନନଵାସିନୀଶମ୍ ।

ଅଂତଃ ପ୍ରଵିଷ୍ଟଂ ମନସା ଜୁହାଵ

ଗୋଵିଂଦ ଦାମୋଦର ମାଧଵେତି ॥ 48॥

ଧ୍ୟେୟଃ ସଦା ୟୋଗିଭିରପ୍ରମେୟଃ

ଚିଂତାହରଶ୍ଚିଂତିତପାରିଜାତଃ ।

କସ୍ତୂରିକାକଲ୍ପିତନୀଲଵର୍ଣୋ

ଗୋଵିଂଦ ଦାମୋଦର ମାଧଵେତି ॥ 49॥

ସଂସାରକୂପେ ପତିତୋଽତ୍ୟଗାଧେ

ମୋହାଂଧପୂର୍ଣେ ଵିଷୟାଭିତପ୍ତେ ।

କରାଵଲଂବଂ ମମ ଦେହି ଵିଷ୍ଣୋ

ଗୋଵିଂଦ ଦାମୋଦର ମାଧଵେତି ॥ 50॥

ଭଜସ୍ଵ ମଂତ୍ରଂ ଭଵବଂଧମୁକ୍ତ୍ୟୈ

ଜିହ୍ଵେ ରସଜ୍ଞେ ସୁଲଭଂ ମନୋଜ୍ଞମ୍ ।

ଦ୍ଵୈପାୟନାଦ୍ୟୈର୍ମୁନିଭିଃ ପ୍ରଜପ୍ତଂ

ଗୋଵିଂଦ ଦାମୋଦର ମାଧଵେତି ॥ 51॥

ତ୍ଵାମେଵ ୟାଚେ ମମ ଦେହି ଜିହ୍ଵେ

ସମାଗତେ ଦଂଡଧରେ କୃତାଂତେ ।

ଵକ୍ତଵ୍ୟମେଵଂ ମଧୁରଂ ସୁଭକ୍ତ୍ୟା

ଗୋଵିଂଦ ଦାମୋଦର ମାଧଵେତି ॥ 52॥

ଗୋପାଲ ଵଂଶୀଧର ରୂପସିଂଧୋ

ଲୋକେଶ ନାରାୟଣ ଦୀନବଂଧୋ ।

ଉଚ୍ଚସ୍ଵରୈସ୍ତ୍ଵଂ ଵଦ ସର୍ଵଦୈଵ

ଗୋଵିଂଦ ଦାମୋଦର ମାଧଵେତି ॥ 53॥

ଜିହ୍ଵେ ସଦୈଵଂ ଭଜ ସୁଂଦରାଣି

ନାମାନି କୃଷ୍ଣସ୍ୟ ମନୋହରାଣି ।

ସମସ୍ତଭକ୍ତାର୍ତିଵିନାଶନାନି

ଗୋଵିଂଦ ଦାମୋଦର ମାଧଵେତି ॥ 54॥

ଗୋଵିଂଦ ଗୋଵିଂଦ ହରେ ମୁରାରେ

ଗୋଵିଂଦ ଗୋଵିଂଦ ମୁକୁଂଦ କୃଷ୍ଣ ।

ଗୋଵିଂଦ ଗୋଵିଂଦ ରଥାଂଗପାଣେ

ଗୋଵିଂଦ ଦାମୋଦର ମାଧଵେତି ॥ 55॥

ସୁଖାଵସାନେ ତ୍ଵିଦମେଵ ସାରଂ

ଦୁଃଖାଵସାନେ ତ୍ଵିଦମେଵ ଗେୟମ୍ ।

ଦେହାଵସାନେ ତ୍ଵିଦମେଵ ଜାପ୍ୟଂ

ଗୋଵିଂଦ ଦାମୋଦର ମାଧଵେତି ॥ 56॥

ଦୁର୍ଵାରଵାକ୍ୟଂ ପରିଗୃହ୍ୟ କୃଷ୍ଣା

ମୃଗୀଵ ଭୀତା ତୁ କଥଂ କଥଂଚିତ୍ ।

ସଭାଂ ପ୍ରଵିଷ୍ଟା ମନସା ଜୁହାଵ

ଗୋଵିଂଦ ଦାମୋଦର ମାଧଵେତି ॥ 57॥

ଶ୍ରୀକୃଷ୍ଣ ରାଧାଵର ଗୋକୁଲେଶ

ଗୋପାଲ ଗୋଵର୍ଧନ ନାଥ ଵିଷ୍ଣୋ ।

ଜିହ୍ଵେ ପିବସ୍ଵାମୃତମେତଦେଵ

ଗୋଵିଂଦ ଦାମୋଦର ମାଧଵେତି ॥ 58॥

ଶ୍ରୀନାଥ ଵିଶ୍ଵେଶ୍ଵର ଵିଶ୍ଵମୂର୍ତେ

ଶ୍ରୀଦେଵକୀନଂଦନ ଦୈତ୍ୟଶତ୍ରୋ ।

ଜିହ୍ଵେ ପିବସ୍ଵାମୃତମେତଦେଵ

ଗୋଵିଂଦ ଦାମୋଦର ମାଧଵେତି ॥ 59॥

ଗୋପୀପତେ କଂସରିପୋ ମୁକୁଂଦ

ଲକ୍ଷ୍ମୀପତେ କେଶଵ ଵାସୁଦେଵ ।

ଜିହ୍ଵେ ପିବସ୍ଵାମୃତମେତଦେଵ

ଗୋଵିଂଦ ଦାମୋଦର ମାଧଵେତି ॥ 60॥

ଗୋପୀଜନାହ୍ଲାଦକର ଵ୍ରଜେଶ

ଗୋଚାରଣାରଣ୍ୟକୃତପ୍ରଵେଶ ।

ଜିହ୍ଵେ ପିବସ୍ଵାମୃତମେତଦେଵ

ଗୋଵିଂଦ ଦାମୋଦର ମାଧଵେତି ॥ 61॥

ପ୍ରାଣେଶ ଵିଶ୍ଵଂଭର କୈଟଭାରେ

ଵୈକୁଂଠ ନାରାୟଣ ଚକ୍ରପାଣେ ।

ଜିହ୍ଵେ ପିବସ୍ଵାମୃତମେତଦେଵ

ଗୋଵିଂଦ ଦାମୋଦର ମାଧଵେତି ॥ 62॥

ହରେ ମୁରାରେ ମଧୁସୂଦନାଦ୍ୟ

ଶ୍ରୀରାମ ସୀତାଵର ରାଵଣାରେ ।

ଜିହ୍ଵେ ପିବସ୍ଵାମୃତମେତଦେଵ

ଗୋଵିଂଦ ଦାମୋଦର ମାଧଵେତି ॥ 63॥

ଶ୍ରୀୟାଦଵେଂଦ୍ରାଦ୍ରିଧରାଂବୁଜାକ୍ଷ

ଗୋଗୋପଗୋପୀସୁଖଦାନଦକ୍ଷ ।

ଜିହ୍ଵେ ପିବସ୍ଵାମୃତମେତଦେଵ

ଗୋଵିଂଦ ଦାମୋଦର ମାଧଵେତି ॥ 64॥

ଧରାଭରୋତ୍ତାରଣଗୋପଵେଷ

ଵିହାରଲୀଲାକୃତବଂଧୁଶେଷ ।

ଜିହ୍ଵେ ପିବସ୍ଵାମୃତମେତଦେଵ

ଗୋଵିଂଦ ଦାମୋଦର ମାଧଵେତି ॥ 65॥

ବକୀବକାଘାସୁରଧେନୁକାରେ

କେଶୀତୃଣାଵର୍ତଵିଘାତଦକ୍ଷ ।

ଜିହ୍ଵେ ପିବସ୍ଵାମୃତମେତଦେଵ

ଗୋଵିଂଦ ଦାମୋଦର ମାଧଵେତି ॥ 66॥

ଶ୍ରୀଜାନକୀଜୀଵନ ରାମଚଂଦ୍ର

ନିଶାଚରାରେ ଭରତାଗ୍ରଜେଶ ।

ଜିହ୍ଵେ ପିବସ୍ଵାମୃତମେତଦେଵ

ଗୋଵିଂଦ ଦାମୋଦର ମାଧଵେତି ॥ 67॥

ନାରାୟଣାନଂତ ହରେ ନୃସିଂହ

ପ୍ରହ୍ଲାଦବାଧାହର ହେ କୃପାଲୋ ।

ଜିହ୍ଵେ ପିବସ୍ଵାମୃତମେତଦେଵ

ଗୋଵିଂଦ ଦାମୋଦର ମାଧଵେତି ॥ 68॥

ଲୀଲାମନୁଷ୍ୟାକୃତିରାମରୂପ

ପ୍ରତାପଦାସୀକୃତସର୍ଵଭୂପ ।

ଜିହ୍ଵେ ପିବସ୍ଵାମୃତମେତଦେଵ

ଗୋଵିଂଦ ଦାମୋଦର ମାଧଵେତି ॥ 69॥

ଶ୍ରୀକୃଷ୍ଣ ଗୋଵିଂଦ ହରେ ମୁରାରେ

ହେ ନାଥ ନାରାୟଣ ଵାସୁଦେଵ ।

ଜିହ୍ଵେ ପିବସ୍ଵାମୃତମେତଦେଵ

ଗୋଵିଂଦ ଦାମୋଦର ମାଧଵେତି ॥ 70॥

ଵକ୍ତୁଂ ସମର୍ଥୋଽପି ନ ଵକ୍ତି କଶ୍ଚିଦ୍-

ଅହୋ ଜନାନାଂ ଵ୍ୟସନାଭିମୁଖ୍ୟମ୍ ।

ଜିହ୍ଵେ ପିବସ୍ଵାମୃତମେତଦେଵ

ଗୋଵିଂଦ ଦାମୋଦର ମାଧଵେତି ॥ 71॥

ଇତି ଶ୍ରୀବିଲ୍ଵମଂଗଲାଚାର୍ୟଵିରଚିତଂ ଶ୍ରୀଗୋଵିଂଦଦାମୋଦରସ୍ତୋତ୍ରଂ ସଂପୂର୍ଣମ୍ ।

ଗୋଵିଂଦ ଦାମୋଦର ସ୍ତୋତ୍ରମ୍ (Gobind Damodar Strotra in Odia/Oriya)

ଗୋଵିଂଦ ଦାମୋଦର ସ୍ତୋତ୍ରମ୍