କିଛି ମନର କଥା।

ମିଶିଛି ପୁଲକ ସହ ବ୍ୟଥା।

ଆମ ଜନ୍ମଭୂମି ଭାରତରେ ସାଧାରଣତନ୍ତ୍ର ଦିବସ ବଡ଼ ଧୂମଧାମରେ ପାଳନ କରାଯାଏ। ଏହି ଜାତୀୟ ମହୋତ୍ସବର ସୁନ୍ଦର ସାଜସଜ୍ଜା ପଛପଟେ ଲୁଚି ରହିଥାଏ କେତେ ଅନ୍ଧାର! ସେଦିନ ଥିଲା ୧୯୫୦ ମସିହା ଜାନୁଆରୀ ୨୬ । କାର୍ଯ୍ୟକାରୀ ହୋଇଥିଲା ଦେଶର ନୂତନ ସମ୍ଵିଧାନ। ସେଇ ସମ୍ବିଧାନ ବାରମ୍ବାର ସଂଶୋଧନ ହୋଇ ଏବେ ବିକୃତ। ନାଗରିକ ବିଶେଷ କରି ମହିଳାମାନଙ୍କ ସ୍ବଚ୍ଛନ୍ଦ ସାମାଜିକ ଜୀବନ ଗୁରୁତର ସଙ୍କଟର ସମ୍ମୁଖୀନ। ଛାତ୍ରୀ ବିଶେଷ କରି ଶିକ୍ଷାର୍ଥୀ ଓ କର୍ମଜୀବୀ ଯୁବତୀମାନେ ଅତ୍ୟନ୍ତ ଅସୁରକ୍ଷିତ। ସରକାର ବଦଳିଲେ ଅନେକ ସମୟରେ ବଦଳି ଯାଉଛି ଆଇନର ତର୍ଜମା, ନିୟମର ପରିସୀମା। ଦେଶର ସମୂହ ସମ୍ପତ୍ତି ଓ ପ୍ରାକୃତିକ ସମ୍ପଦ ସହଜରେ ବୃହତ କର୍ପୋରେଟ୍ ସଂସ୍ଥାମାନଙ୍କ ହାତକୁ ଚାଲି ଯାଉଛି। ଦେଶକୁ କାଙ୍ଗାଳ କରୁଥିବା ଲୋକେ ଦେଶସେବକ ବୋଲାଇ ଛାତି ଫୁଲେଇ ବୁଲୁଛନ୍ତି । ଭିନ୍ନମତ ପୋଷଣ କରୁଥିବା ବୁଦ୍ଧିଜୀବୀଙ୍କୁ ସମାଲୋଚନା କରା ଯାଉଛି। ନିଜ ଭିଟାମାଟି, ଜମି, ଜଳ ଓ ଜଙ୍ଗଲର ସୁରକ୍ଷା ପାଇଁ ସଂଗ୍ରାମ କରୁଥିବା ଲୋକେ ଦମନଲୀଲାର ଶୀକାର ହେଉଛନ୍ତି। ଅଥଚ ସରକାରୀ ସହାୟତାରେ ଦେଶର ସକଳ ସମ୍ପଦ ଓ ସୁବିଧା ଭୋଗ କରି ବ୍ୟକ୍ତିଗତ ସମ୍ପତ୍ତି ବଢ଼ାଇ ଚାଲିଥିବା ବ୍ୟକ୍ତିମାନେ ପରମ ଦେଶଭକ୍ତ ସାଜିଛନ୍ତି। ସାଧାରଣ ଜନତାଙ୍କ ଆର୍ଥିକ ସ୍ଥିତି ବିପର୍ଯ୍ୟସ୍ତ ହୋଇ ଚାଲିଥିବା ବେଳେ ଜିଡିପି ଅଭିବୃଦ୍ଧିର ଲୋଭନୀୟ ଛବି ଦେଖା ଯାଉଛି। ମୌଳିକ ସ୍ବାସ୍ଥ୍ୟ ସେବା ଅଭାବରୁ ଗରିବ ଲୋକ ଜୀବନ ହରାଉଛନ୍ତି, କୋଟି କୋଟି ମଧ୍ୟବିତ୍ତ ଦାରିଦ୍ର୍ୟ ଭିତରକୁ ଠେଲି ହୋଇ ଯାଉଛନ୍ତି। ତଥ୍ୟ କହୁଛି ଆମ ଦେଶରେ ଧନୀ ଓ ଗରିବଙ୍କ ମଧ୍ୟରେ ତାରତମ୍ୟ ବଢ଼ିବାରେ ଲାଗିଛି । ଶାସନ ଓ ପ୍ରଶାସନରେ ସାଧାରଣ ଲୋକଙ୍କର ଭୂମିକା ରହୁ ନଥିବାରୁ ଗୋଟିଏ ପଟେ ଧନକୁବେରଙ୍କ ପାଇଁ ଉଜ୍ଜ୍ବଳ ଭାରତ ଚକମକ୍ କରୁଥିବା ବେଳେ କୋଟି କୋଟି କୃଷକ ଓ ଶ୍ରମିକଙ୍କ ପାଇଁ ଦେଶ ଅନ୍ଧକାର ଆଛନ୍ନ ହୋଇ ଯାଇଛି।

ସମାଜରେ ଧାର୍ମିକ ମୌଳବାଦ, ଜାତିଭେଦ ଓ ଅନ୍ଧବିଶ୍ୱାସ ବଢାଉଥିବା ଶକ୍ତି ଆଗକୁ ମାଡି ଚାଲିଥିବା ବେଳେ ମହିଳା ଓ ଶିଶୁମାନଙ୍କ ଉପରେ ଆକ୍ରମଣ ବଢି ଚାଲିଛି ।

ଏହି ପରିପ୍ରେକ୍ଷୀରେ ଗଣତାନ୍ତ୍ରିକ ବିଧିବ୍ୟବସ୍ଥା ଓ ଧର୍ମନିରପେକ୍ଷ ନୀତିର ସୁରକ୍ଷା ଆମ ଯୁବ ସମାଜ ପାଇଁ ସବୁଠୁ ବଡ ଆହ୍ବାନ ପାଲଟିଛି। ଆମେମାନେ ବର୍ତ୍ତମାନ ଏକ ସ୍ବାଧୀନ, ସାର୍ବଭୌମ, ଗଣତାନ୍ତ୍ରିକ ସମାଜବାଦୀ ରାଷ୍ଟ୍ରର ନାଗରିକ ବୋଲି ମନେ କରି ଖୁସି ମନାଉଛେ। ବାସ୍ତବରେ କିନ୍ତୁ ଏହା ସତ୍ୟ ନୁହେଁ ଅର୍ଦ୍ଧସତ୍ୟ, କାରଣ ସାମାଜିକ ବୈଷମ୍ୟ ଓ ଭେଦଭାବ ବିରୋଧରେ ସଂଘର୍ଷ ଏବେ ମଧ୍ୟ ସରିନାହିଁ। ଏକ ଶୋଷଣମୁକ୍ତ ରାଷ୍ଟ୍ର ଗଠନର ସ୍ବପ୍ନ ଏପର୍ଯ୍ୟନ୍ତ ସାକାର ହୋଇ ପାରିନାହିଁ। ସମସ୍ତଙ୍କ ପାଖରେ ମୌଳିକ ସେବା ପହଞ୍ଚିବା ଏବେ ବି ସୁନିଶ୍ଚିତ ହୋଇ ପାରିନାହିଁ। ଏବେ ବି ସଞ୍ଜ ନ‌ଇଁଲେ ନାରୀଟିଏ ଏକାକୀ ପଦାକୁ ବାହାରିବା ପାଇଁ ପାରୁନାହିଁ। ଡିଜିଟାଲ କ୍ଷେତ୍ରରେ ଦେଶ ବ୍ୟାପକ ସଫଳତା ପାଇଲାଣି। ମହାକାଶ ଗବେଷଣାରେ ଉଲ୍ଲେଖନୀୟ ସଫଳତା ହାସଲ କରି ଭାରତ ବିଶ୍ବ ସ୍ତରରେ ବିପୁଳ ପ୍ରଶଂସା ସାଉଁଟିଲାଣି। ତଥାପି ଅନେକ ଲୋକ ସେମିତି ଭଙ୍ଗା କୁଡିଆରେ ସଢୁଛନ୍ତି। ସହର ସବୁ ଝଲସୁ ଥିବାବେଳେ ବଣପାହାଡ଼ ଘେରା ଅଞ୍ଚଳରେ ବାସ କରୁ ରହୁଥିବା ଲୋକଙ୍କ ଜୀବନଶୈଳୀ ବଦଳି ନାହିଁ। ସବୁ ବର୍ଗର ସାଧାରଣ ଲୋକଙ୍କ ସମାନୁପାତିକ ବିକାଶ ସୁନିଶ୍ଚିତ ହୋଇ ପାରିଲେ ହିଁ, ସାଧାରଣତନ୍ତ୍ର ଶବ୍ଦର ମହତ୍ବ ପ୍ରତିପାଦନ ହୋଇ ପାରିବ। ହଜାର ହଜାର ସଂଗ୍ରାମୀ ଜୀବନ ଦେଇ ଦେଶକୁ ସ୍ବାଧୀନ କରିଥିଲେ। ସ୍ବଦେଶୀ ଚେତନା ସମ୍ବଳିତ ନୂତନ ସମ୍ବିଧାନ ପ୍ରଣୀତ ହୋଇଥିଲା। ମହନୀୟା ମାତୃଭୂମିର ଗାରିମା ଓ ଗୌରବ ରକ୍ଷା ପାଇଁ ସମସ୍ତେ ମହାଭାରତୀୟ ଚେତନାରେ ଉଦ୍‌ବୁଦ୍ଧ ହୋଇ ନିରନ୍ତର ଉଦ୍ୟମ କରିବା ଆବଶ୍ୟକ।

@ଅଢ଼େଇଗୁଣ୍ଡି, କାନପୁର , କଟକ, ଓଡିଶା

ମୋ- ୯୩୪୮୦୪୨୦୬୬

ନିଆରା ସାଧାରଣତନ୍ତ୍ର

ବଦଳୁଛି ସମୟ, ବଦଳୁଛି ଶାସନ