ଏଥର ଫଗୁଣେ ବାଜିବ ଲୋ ବାଜା

ତୁ ହବୁ ମୋ ରାଣୀ ମୁଁ ହେବି ତୋ ରାଜା।

ତୋ ପାଖରେ ମନ ଯେବେ ଗଲା ଅଟକି

ଫୁଲ ପରି ଚାରିପାଖ ଯାଏ ମହକି।

ତୋ ବିନା ମୁଁ ନାହିଁ

ତୁ ଖରା ମୁଁ ଛାଇ।

ମନ ସିନା ଉଡ଼ି ବୁଲେ ଡେଇଁ ଆକାଶ

ତୋ ପାଖରେ ଆସି ବାଟ ହୁଏରେ ଶେଷ।

ତୁ ମେଘ ନା ମାଘ ନା ମେଘ ମଲ୍ହାର

କମିବନି ଥମିବନି ଆମ ପ୍ରେମ ଜୁଆର।

ଶ୍ରାବଣ କହିଚି ତୋର ପାଉଁଜି ହେବ

ଛମ୍ ଛମ୍ ତୋ ପାଦରେ ରହି ବାଜିବ।

ମାଟି ଲାଗୁଥିବ ମୋତିଝରା

ଖରା ଲାଗୁଥିବ ହୀରା ହୀରା

ଆକାଶର ସେଇ ଚାନ୍ଦ ତାରା

ଆଞ୍ଜୁଳିରେ ଆମ ଦେବେ ଧରା।

ଇନ୍ଦ୍ରଧନୁ ସାତ ରଙ୍ଗ ଭରିବ ତୋ ଅଙ୍ଗରେ

ଚଗଲି ବନ ଝରଣା ଝରିବ ତୋ ଚାଲିରେ।

ପ୍ରଜାପତିଙ୍କର ଭିଡ଼ ଲାଗିବ ତୋ ପାଖରେ

ଗୋଲାପର ବର୍ଷା ହବ ତୋ ଚଲା ବାଟରେ।

ଜ୍ୟୋତ୍ସ୍ନା ତୁ ରୂପସୀ ଚାନ୍ଦର

ବାସ୍ନା ତୁ ରଜନୀଗନ୍ଧାର।

ତୁ ମୋର ସଞ୍ଜ ତାରା

ଶୀତରେ ଛାଇ ଖରା।

ବାଦଲରେ ଭାସି ଭାସି ମେଘ ସାଥେ ହସି ହସି

ମନେ ମନେ ଟିକେ ହସି ତାରା ଗଣୁଥାଏ ବସି।

ଚାନ୍ଦଟା ଲୁଚେ ଯେମିତି ବଉଦ ଫାଙ୍କ ଭିତରେ

ସରମି ଯାଉଚୁ ସେମିତି ଆଜି ଦେଖିଲେ ମତେ ପାଖରେ।

ସପନର ନୂଆ ପକ୍ଷୀକୁ ଦେଇଚୁ ତୁ ଯେବେ ଡେଣା

ସେବେଠାରୁ ଯାହା ଜାଣି ମୁଁ ପ୍ରେମିକରେ ହେଲି ଗଣା।

ଏଇ ଛିଟା ଛିଟା ମେଘ ଏଇ ମିଠା ମିଠା ପାଗ

ଏ କି ହେଲାରେ ସଂଯୋଗ ମୁଁ ଭୁଲିଯାଏ ଦିଗ।

ମୁକ୍ତା ବିନା ଶାମୁକା କି ରହିପାରେ

ଭିଜିଗଲି ଭିଜିଗଲି ତୋ ପ୍ରେମ ବର୍ଷାରେ।

ତୁ ବରଷି ଯା ମେଘଟିଏ ହେଇ

ଦେ ମତେ ଟିକେ ରଙ୍ଗରେ ଭିଜେଇ।

ତତେ ଛୁଇଁ ପବନଟା ମତେ ଯେବେ ଦେଲା ଛୁଇଁ

ମୋ ଦେହରେ ବାସ୍ନା ତୋର ଗଲା ସବୁ ବୋଳି ଦେଇ।

ପ୍ରେମ ତୋର ଲାଗେ ମତେ ମୃଗତୃଷ୍ନା ରେ

ତଥାପି ମୁଁ ହଜିଯାଏ ସେଇ ବାସ୍ନାରେ।

ହୃଦୟର ପାଣିପାଗ

ବଦଳେଇ ଦିଏ ଦିଗ।

ପ୍ରେମର ଏ ଜଳବାୟୁ

ରଖେଇ ଦଉନି ଆଉ।

ମାଟିରେ ବି ଥାଇ ଛୁଇଁ ମୁଁ ଗଲି ଆକାଶ

ଭିଡ଼ରେ ମୁଁ ପାଇ ତା ଦେହର ସ୍ପର୍ଶ।

ତୋଫା ତୋଫା ତୋ ଚେହେରା କୁହୁକର ଯାଦୁ କରେ

ଫିକା ଫିକା ମୋ ଜୀବନେ ଇନ୍ଦ୍ରଧନୁ ରଙ୍ଗ ଭରେ।

ତୁ ମୋର ପ୍ରେମ ପକ୍ଷୀ ମୁଁ ଆକାଶ

ଆମ ପ୍ରେମ କାହାଣୀର ନାହିଁରେ ଶେଷ।

କାଲିଠୁ ଛୁଇଁଛି ତତେ ପହିଲି ଷୋହଳ

ଦେହ ତୋର ବାସି ଯାଏ ବଉଳ ବଉଳ।

ଜୀବନ ଥିଲା ମୋ ଶୂନଶାନ ମରୁଭୂଇଁ

ତୋ ପ୍ରେମ ଛୁଆଁରେ ହରା ଭରା ଗଲି ହେଇ।

ତୋ ମିଠା ନଜରରେ ବନ୍ଦୀ ହେଇଗଲା ପରେ

ଜାଣିଲି ଯେ ସାଗର ହଜିଛି ତୋ ନୀଳ ଆଖିରେ।

ଭସା ମେଘ ଥିଲି ମୁଁ ବର୍ଷିଗଲି

ଧୀରେ ଧୀରେ ମୁଁ ତୋର ହେଇଗଲି।

ତୁ ଶ୍ରାବଣ ରେ ମେଘ ତୁହାକୁ ତୁହା

ତୁ ବୈଶାଖର ଖରା ଲାଗୁ ମହୁଆ।

ତୁ ବସନ୍ତର ଫଗୁ ଲାଗୁ ଫଗୁଣ

ତୁ ସପନରେ ପ୍ରେମ କଲୁ ଛ ଗୁଣ।

ନାଲି ନାଲି ଓଢଣୀ ତୋ ଦିଶେ ଝିଲିମିଲି

ଲାଗୁଚି ଫଗୁଣ ଆଣିଛି ରଙ୍ଗୋଲି।

ଲକ୍ଷେ ଫଗୁଣରେ କବରୀ ସଜେଇ

ପ୍ରୀତି ଶ୍ରାବଣରେ ଦଉଚୁ ଭିଜେଇ।

ଛୁଇଁଦେଲେ ତୁହି, ସତେ ମୋର ଦେହେ, ଚୋରା ଚଇତି ଯାଏ ଛୁଇଁ

ମୁଁ ଛୁଇଁଦେଲେ, ଲାଜରେ ଲାଜରେ, ତୋ ଆଖିପତା ଯାଏ ନଇଁ।

ରଙ୍ଗ ତୋର ରକ୍ତ ମନ୍ଦାର ମୁହଁ ପୂର୍ଣ୍ଣ ଶଶୀ

ଆଖି ତୋର ନୀଳ ସାଗର ଓଠ ତୋର ବଂଶୀ।

ତୁ ଆସିଲେ ସୂର୍ଯ୍ୟ ଚନ୍ଦ୍ର ଜାଳନ୍ତି ବତୀ

ତୋ ପଣତେ ନିଇତି ଖେଳେ ମୋ ମଧୁ ରାତି।

ସପନର ନଇକୂଳେ, ବସିଛି ମୁଁ ତତେ ଚାହିଁ

ତୁ ଆସିଲେ, ତୋ କାନରେ, ମନ କଥା ଦେବି ମୁଁ କହି।

ମେଘକୁ କହିଚି ବରଷା ଦବ

ଫଗୁଣ ତୋ ଦେହେ ରଙ୍ଗ ଢ଼ାଳିବ।

ସଜେଇ ରଖିଛି ଗୋଲାପ ହେନା ମଲ୍ଲି

ପ୍ରିୟା ମୋର କେବଳ ତୁ ଆସିବୁ ବୋଲି।

ଭ୍ରମର ତୋ ପାଇଁ ଗୀତ ଗାଇବ

ଅଳସ ନିଦରେ ଶୁଆଇ ଦବ।

ଛୋଟ ଛୋଟ ସ୍ୱପ୍ନର, କାଠି କୁଟା ନେଇ, ଘରଟିଏ ତୋଳି ଦବା,

ମିଞ୍ଜି ମିଞ୍ଜି ସଞ୍ଜ ତାରା, ଆଣିକି ସାଉଁଟି, ଅଗଣାରେ ସଜେଇବା।

ପ୍ରକୃତି ଓ ଆମ ପ୍ରେମ

ପ୍ରକୃତିକୁ ନେଇ ମୋ ପ୍ରିୟା ପାଇଁ ଲେଖିଥିବା କବିତା