ॐ ମଧୁରମୃଦୁଲଚିତ୍ତଃ ପ୍ରେମମାତ୍ରୈକବିତ୍ତଃ

ସ୍ଵଜନରଚିତବେଷଃ ପ୍ରାପ୍ତଶୋଭାବିଶେଷଃ ।

ବିବିଧମଣିମୟାଲଙ୍କାରବାନ୍ ସର୍ଵକାଲଂ

ସ୍ଫୁରତୁ ହୃଦି ସ ଏବ ଶ୍ରୀଲଗୋପାଲଦେବଃ ॥ ୧॥

ନିରୁପମଗୁଣରୂପଃ ସର୍ଵମାଧୁର୍ୟଭୂପଃ

ଶ୍ରିତତନୁରୁଚିଦାସ୍ୟଃ କୋଟିଚନ୍ଦ୍ରସ୍ତୁତାସ୍ୟଃ ।

ଅମୃତବିଜୟିହାସ୍ୟଃ ପ୍ରୋଚ୍ଛଲଚ୍ଚିଲ୍ଲିଲାସ୍ୟଃ

ସ୍ଫୁରତୁ ହୃଦି ସ ଏବ ଶ୍ରୀଲଗୋପାଲଦେବଃ ॥ ୨॥

ଧୃତନବପରଭାଗଃ ସବ୍ୟହସ୍ତସ୍ଥିତାଗଃ

ପ୍ରକଟିତନିଜକକ୍ଷଃ ପ୍ରାପ୍ତଲାବଣ୍ୟଲକ୍ଷଃ ।

କୃତନିଜଜନରକ୍ଷଃ ପ୍ରେମବିସ୍ତାରଦକ୍ଷଃ

ସ୍ଫୁରତୁ ହୃଦି ସ ଏବ ଶ୍ରୀଲଗୋପାଲଦେବଃ ॥ ୩॥

କ୍ରମବଲଦନୁରାଗସ୍ଵପ୍ରିୟାପାଙ୍ଗଭାଗ

ଧ୍ଵନିତରସବିଲାସଜ୍ଞାନବିଜ୍ଞାପିହାସଃ ।

ସ୍ମୃତରତିପତିୟାଗଃ ପ୍ରୀତିହଂସୀତଡାଗଃ

ସ୍ଫୁରତୁ ହୃଦି ସ ଏବ ଶ୍ରୀଲଗୋପାଲଦେବଃ ॥ ୪॥

ମଧୁରିମଭରମଗ୍ନେ ଭାତ୍ୟସବ୍ୟେଽବଲଗ୍ନେ

ତ୍ରିବଲିରଲସବତ୍ତ୍ଵାତ୍ୟସ୍ୟ ପୁଷ୍ଟାନତତ୍ଵାତ୍ ।

ଇତରତ ଇହ ତସ୍ୟା ମାରରେଖେବ ରସ୍ୟା

ସ୍ଫୁରତୁ ହୃଦି ସ ଏବ ଶ୍ରୀଲଗୋପାଲଦେବଃ ॥ ୫॥

ବହତି ବଲିତହର୍ଷଂ ବାହୟଂଶ୍ଚାନୁବର୍ଷଂ

ଭଜତି ଚ ସଗଣଂ ସ୍ଵଂ ଭୋଜୟନ୍ ଯୋଽର୍ପୟନ୍ ସ୍ଵମ୍ ।

ଗିରିମୁକୁଟମଣିଂ ଶ୍ରୀଦାମବନ୍ମିତ୍ରତାଶ୍ରୀଃ

ସ୍ଫୁରତୁ ହୃଦି ସ ଏବ ଶ୍ରୀଲଗୋପାଲଦେବଃ ॥ ୬॥

ଅଧିଧରମନୁରାଗଂ ମାଧବେନ୍ଦ୍ରସ୍ୟ ତନ୍ଵଂ-

ସ୍ତଦମଲହୃଦୟୋତ୍ଥାଂ ପ୍ରେମସେବାଂ ବିବୃଣ୍ଵନ୍ ।

ପ୍ରକଟିତନିଜଶକ୍ତ୍ୟା ବଲ୍ଲଭାଚାର୍ୟଭକ୍ତ୍ୟା

ସ୍ଫୁରତୁ ହୃଦି ସ ଏବ ଶ୍ରୀଲଗୋପାଲଦେବଃ ॥ ୭॥

ପ୍ରତିଦିନମଧୁନାପି ପ୍ରେକ୍ଷ୍ୟତେ ସର୍ଵଦାପି

ପ୍ରଣୟସୁରସଚର୍ୟା ଯସ୍ୟ ବର୍ୟା ସପର୍ୟା ।

ଗଣୟତୁ କତି ଭୋଗାନ୍ କଃ କୃତୀ ତତ୍ପ୍ରୟୋଗାନ୍

ସ୍ଫୁରତୁ ହୃଦି ସ ଏବ ଶ୍ରୀଲଗୋପାଲଦେବଃ ॥ ୮॥

ଗିରିଧରବରଦେବସ୍ୟାଷ୍ଟକେନେମମେବ

ସ୍ମରତି ନିଶି ଦିନେ ବା ଯୋ ଗୃହେ ବା ବନେ ବା ।

ଅକୁଟିଲହୃଦୟସ୍ୟ ପ୍ରେମଦତ୍ଵେନ ତସ୍ୟ

ସ୍ଫୁରତୁ ହୃଦି ସ ଏବ ଶ୍ରୀଲଗୋପାଲଦେବଃ ॥ ୯॥

ଇତି ଶ୍ରୀବିଶ୍ଵନାଥଚକ୍ରବର୍ତିଠକ୍କୁରବିରଚିତସ୍ତବାମୃତଲହର୍ୟାଂ ଶ୍ରୀଗୋପାଲଦେବାଷ୍ଟକଂ ସମ୍ପୂର୍ଣମ୍ ।

🙏🏻

ଶ୍ରୀଗୋପାଲଦେବାଷ୍ଟକମ୍