.

*ଆସନ୍ତୁ ପଢିବା ଆଜିର ପୌରାଣିକ କାହାଣୀ*

*ଅଭିଶପ୍ତ ଦ୍ୱାରପାଳ, ଦ୍ଵିତୀୟ ଅଧ୍ୟାୟ*

*!! ଭାଗ - ୧୨ !!*

*ଡା.କୃପାସିନ୍ଧୁ ମିଶ୍ର*

✤●○●○●○✤‼️✤○●○●○●✤

*ସୌଜନ୍ୟ: ଆଧ୍ୟାତ୍ମ ଜଗତ ହ୍ବାଟ୍ସଆପ୍ ଗୃପ୍*

✤●○●○●○✤♾️✤○●○●○●✤

*══━━━━✥◈❤️◈✥━━━━══*

ତ୍ରିଲୋଚନଙ୍କୁ ପ୍ରସନ୍ନ ହେବାର ଦେଖି ରାବଣ ନିଜର ଅଭିପ୍ରାୟ ପ୍ରକାଶ କଲେ Ι ସେ କହିଲେ, "ପ୍ରଭୁ, ମୋର କିଛି ଆବଶ୍ୟକ ନାହିଁ Ι ଆପଣଙ୍କୁ ପ୍ରତିଦିନ ଦେଖିବା ଇଛାରେ ମୁଁ ଏ ଅପରାଧ କରିଛି Ι ମୋ ମାତା ମଧ୍ୟ ଆପଣଙ୍କର ପୂଜାରିଣୀ Ι ମୋତେ ଆପଣ ନିଜ ସଦୃଶ ଏକ ଆତ୍ମ ଲିଙ୍ଗ ପ୍ରଦାନ କରନ୍ତୁ Ι ପ୍ରଭୁ ଶଙ୍କର ତତ୍କ୍ଷଣାତ କହିଦେଲେ, "ତଥାସ୍ତୁ, କିନ୍ତୁ ଗୋଟିଏ ସର୍ତ୍ତ, ସେହି ଲିଙ୍ଗକୁ ପଦବ୍ରଜରେ ନେଇ ଯିବାକୁ ହେବ ଏବଂ କୌଣସି ପରିସ୍ଥିତିରେ ଲିଙ୍ଗକୁ ତଳେ ଥୋଇବ ନାହିଁ Ι"

ରାବଣ କୈଳାଶ ପର୍ବତକୁ ଉଠାଇ ଆଣିବାକୁ ଯିବା ସମ୍ବାଦ ନାରଦ ସ୍ଵର୍ଗପୁରରେ ପହଞ୍ଚାଇ ଦେଇଥିଲେ Ι ଦେବତାମାନେ ପରିସ୍ଥିତି ଉପରେ ନଜର ରଖିଥିଲେ Ι ମହେଶ୍ଵରଙ୍କର ଆତ୍ମଲିଙ୍ଗ ଲଙ୍କାରେ ସ୍ଥାପିତ ହେବା ପରେ ଲଙ୍କା ନଗରୀ ଓ ଲଙ୍କାପତି ରାବଣ ଅଜେୟ ହୋଇଯିବେ ବୋଲି ସେମାନେ ଜାଣିଥିଲେ Ι ତେଣୁ ସେମାନେ ଉପାୟ ଚିନ୍ତା କଲେ ଯେପରି ଦଶାନନ ସେ ଲିଙ୍ଗକୁ ଲଙ୍କାକୁ ନେଇ ନ ପାରନ୍ତୁ Ι ସେମାନେ ଗଣେଶଙ୍କ ଶରଣାପନ୍ନ ହେଲେ Ι ସେଦିନ ଗଣେଶ ମା ପାର୍ବତୀଙ୍କୁ ଲଡୁ ମାଗି ମାଗି ଥକି ଯାଇଥାନ୍ତି, କିନ୍ତୁ ଲଡୁ ମିଳୁ ନ ଥାଏ Ι ମା’ଙ୍କ ଉପରେ ରାଗି ମୁହ ଫୁଲେଇ ବସିଥାନ୍ତି Ι ଦେବତାମାନେ ଲଡୁ ଭେଟି ନେଇ ପହଞ୍ଚିଗଲେ Ι ପ୍ରଭୁ ଲମ୍ବୋଦର ସେତକ ପ୍ରଥମେ ଉଦରସ୍ଥ କଲାପରେ ଦେବତାମାନେ ସେମାନଙ୍କ ସମସ୍ୟା ଜଣାଇଲେ Ι ଗଜାନନ କହିଲେ," ଦେଖ, ପିତାଙ୍କ ନିକଟରେ ଏ କଥା କେହି କହିବ ନାହିଁ Ι ନହେଲେ ସେ ମୋତେ ଶାସ୍ତି ଦେବେ Ι ସେତେବେଳେ ମୁଁ କହିଦେବି ଯେ, ଆପଣମାନେ ମୋତେ ଶିଖାଇ ଏ କାମ କରାଇଛନ୍ତି Ι” ଦେବତାମାନେ କହିଲେ, "ଆପଣ ଆମକୁ ଏତେବଡ ବିପଦରୁ ରକ୍ଷା କରିବେ, ଆମେ ପ୍ରଭୁ ଭୋଳାନାଥଙ୍କୁ ଏ ବିଷୟ ଜଣାଇବା ପ୍ରଶ୍ନ ଉଠୁଛି କାହିଁକି ?” ଶ୍ରୀଗଣେଶଙ୍କର ଯାତ୍ରାର ଶ୍ରୀଗଣେଶ ହେଲା Ι ବ୍ରାହ୍ମଣ ବାଳକଟିଏ ହୋଇ ସେ ରାବଣ ପଛେ ପଛେ ଅନୁସରଣ କଲେ Ι ପଥ ମଧ୍ୟରେ ସନ୍ଧ୍ୟା ହେଲା Ι ରାବଣ ସମୁଦ୍ର କୂଳରେ ନିତ୍ୟକର୍ମ ଓ ସନ୍ଧ୍ୟା ତର୍ପଣ ଆଦି କରିବା ପାଇଁ ଲିଙ୍ଗକୁ କାହା ହାତରେ ଦେବେ ବୋଲି ଆଗକୁ ପଛକୁ ଚାହିଁଲେ Ι ପଛରୁ ଆସୁଥିବା ବ୍ରାହ୍ମଣ ବାଳକଟିଏ ଦେଖି ସେ ତାଙ୍କୁ ପାଖକୁ ଡାକିଲେ ଓ ନିଜର ପରିଚୟ ଦେଲେ Ι ଗଣେଶ କହିଲେ, "ତୁମେ ଲଙ୍କପତି ରାବଣ ହେଲେ କେତେ, ସୁରପତି ଇନ୍ଦ୍ର ହେଲେ କେତେ, ମୋ ବାଟ ଛାଡ, ମୁଁ ଶୀଘ୍ର ଘରେ ନ ପହଞ୍ଚିଲେ, ମୋ ପିତା ଉମାପତି ମୋତେ ବହୁତ ରାଗିବେ Ι" ରାବଣ ତାଙ୍କୁ ଅନେକ ଅନୁନୟ ବିନୟ କରି ଏବଂ ନାନା ପ୍ରଲୋଭନ ଦେଖାଇ ସେ ସନ୍ଧ୍ୟା ସାରି ଆସିବା ପର୍ଯ୍ୟନ୍ତ ଲିଙ୍ଗଙ୍କୁ ଧରି ରଖିବାକୁ ରାଜି କରାଇଲେ ଏବଂ ଆଦୌ ତଳେ ରଖିବେ ନାହିଁ ବୋଲି ସତର୍କ କରାଇ ଦେଲେ Ι ବିଘ୍ନେଶ୍ୱର ଲିଙ୍ଗଟି ତାଙ୍କ ହସ୍ତରୁ ନେଇ ନିଜ ହସ୍ତରେ ଧରିବାକ୍ଷଣି ଝୁଙ୍କି ପଡିଲେ Ι"ଓଃ, କି ଭାରି, ଦେଖ, ମୋର ସର୍ତ୍ତଟିଏ ଅଛି Ι ମୋତେ ବେଶୀ କଷ୍ଟ ହେଲେ ମୁଁ ତମକୁ ଡାକିବି Ι ତିନି ଥର ଡାକିବା ଭିତରେ ଯଦି ତୁମେ ନ ଆସିବ ,ମୁଁ ୟାକୁ ତଳେ ଥୋଇଦେବି, ରାଜି ?" ସାମାନ୍ୟ ବାଳକ. ସେ କଣ ଜାଣେ ରାବଣ ମହିମା ! ଅଗତ୍ୟା ରାବଣଙ୍କୁ ରାଜି ହେବାକୁ ପଡିଲା Ι ସେ ସନ୍ଧ୍ୟା ବନ୍ଦନା ଆଦି ସାରିବା ଭିତରେ ବିନାୟକ ତିନିଥର ଡାକିବା କାମ ସାରିଦେଲେ Ι ଶେଷଥର ଡାକ ଶୁଣିପାରିଲେ ଦଶଗ୍ରୀବ Ι ଦ୍ରୁତ ଗତିରେ ଆସୁଁ ଆସୁଁ ସେ ଶୁଣିଲେ, "ତିନିଥର ହେଇଗଲା Ι ମୁଁ ଆଉ ସମ୍ଭାଳି ପାରୁନାହିଁ Ι ଏଇ ରହିଲା Ι" ରାବଣ "ରହ, ରହ", କହୁଁ କହୁଁ ଗଣପତି ଲିଙ୍ଗକୁ ତଳେ ଏକପ୍ରକାର ପୋତିଦେଇ ଦୌଡିଲେ Ι ରାବଣ ତାଙ୍କୁ ଧରି ଶାସ୍ତି ଦେବା ପ୍ରୟାସଟିଏ କରିଥିଲେ କିନ୍ତୁ ସେ ବାଳକ କ୍ଷଣକ ମଧ୍ୟରେ ଅନ୍ତର୍ହିତ ହୋଇ ଯାଇଥିଲେ Ι ନିରୁପାୟ ହୋଇ ରାବଣ ସେ ଲିଙ୍ଗକୁ ଭୂମି ଉପରୁ ଉଠାଇବା ପାଇଁ ଚେଷ୍ଟା କଲେ Ι ତାଙ୍କର ସମସ୍ତ ଶକ୍ତି ପ୍ରୟୋଗ କରି ଉତ୍ପାଟନ କରିବାକୁ ଚେଷ୍ଟା କଲାରୁ ସେ ଲିଙ୍ଗ ବାଙ୍କି ଯାଇ ଗୋକର୍ଣ୍ଣାକୃତି [ଗୋରୁ କାନ ଆକୃତିର] ହୋଇଗଲା କିନ୍ତୁ ଉଠିଲା ନାହିଁ Ι ନିଜେ ରାବଣ ତାଙ୍କୁ ମହାବଳ ବୋଲି ଘୋଷଣା କଲେ ଏବଂ ସେହିଠାରେ ସେ ଲିଙ୍ଗଙ୍କୁ ପ୍ରତିଷ୍ଠା କରି ଲଙ୍କାକୁ ଫେରିଗଲେ Ι ସେ ସ୍ଥାନର ନାମ ହେଲା ମହାବଳେଶ୍ଵର ଏବଂ ସେହି ଲିଙ୍ଗ ଗୋକର୍ଣ୍ଣେଶ୍ୱର ନାମରେ ପୂଜିତ ହେବାରେ ଲାଗିଲେ Ι ଏବେ ମହାବଳେଶ୍ୱର କର୍ଣାଟକର ଉତ୍ତର କନ୍ନଡ଼ ଜିଲ୍ଲାରେ ପ୍ରସିଦ୍ଧ ଶୈବ ପୀଠଭାବରେ ଭକ୍ତମାନଙ୍କୁ ଆକର୍ଷିତ କରୁଛି Ι

[କ୍ରମଶଃ]

✿❁❣️༒ *ଜୟ ଶ୍ରୀ ରାମ*༒ ❣️❁✿

*=≠≠=====ଆଜି ପାଇଁ ସମାପ୍ତ==≠====*

🏵️🏵️🙏 *ଶୁଭ ରାତ୍ରି* 🙏🏵️🏵️

ଆଜିର ପୌରାଣିକ କାହାଣୀ ଅଭିଶପ୍ତ ଦ୍ୱାରପାଳ, ଦ୍ଵିତୀୟ ଅଧ୍ୟାୟ ଭାଗ - ୧୨

ଆଜିର ପୌରାଣିକ କାହାଣୀ ଅଭିଶପ୍ତ ଦ୍ୱାରପାଳ, ଦ୍ଵିତୀୟ ଅଧ୍ୟାୟ ଭାଗ - ୧୨