ଚୋର ଚତୁର ମଣି ଚାତୁରୀ ପଣ ଜାଣି

ଚଣ୍ଡିଏ ଚକ୍ର ରଚିଛନ୍ତି

ଚେଳ ଚୋର ବୋଲିଣ ଚିତ୍ତ ଚୋର ପ୍ରମାଣ

ଚାରୁ ଡୋରରେ ଚଳାବନ୍ତି

ହେ ନୀଳାଦ୍ରିଶ !!

ଚର୍ଚ୍ଚରୀ ଚହଟା ଚହଳ

ଚାରଣ ଚାର ମାଳମାଳ

ଚକ୍ର ଚଣ୍ଡ ହେବାକୁ ଚଳି ଦକ୍ଷିଣୁ ତାକୁ

ଚରଣାୟୁଧ କଲ କୀଳ ।।

ଭାବାର୍ଥ :- ହେ ଚୋର ଯାର ଶିଖାମଣି ତୁମ୍ଭର ଏ ପ୍ରକାର ଚତୁରତା ଜାଣି ଚଣ୍ଡିଏ (ଅଷ୍ଟଚଣ୍ଡୀ) ଏକ ଚକ୍ରାକାର ବ୍ୟୁହ ରଚନା କରି ରକ୍ଷାକରି ଅଛନ୍ତି ଅର୍ଥାତ୍ ସ୍କନ୍ଦ ପୁରାଣାଦିରେ ବର୍ଣ୍ଣିତ ହୋଇଛି ଯେ ଷୋଡ଼ଶ ପୁତ୍ରୀ, ଚଣ୍ଡରୂପା, ବାରାହୀ, ବାସେଳୀ, ସପ୍ତଭଗ୍ନୀ, ଲମ୍ବାଦେବୀ (ଆଲାମ ଚଣ୍ଡୀ), ହରଚଣ୍ଡୀ, ଅର୍ଦ୍ଧଶୋଷିଣୀ, ଏହି ଅଷ୍ଟଶକ୍ତି ବିଶିଷ୍ଟ ଚକ୍ର ଶ୍ରୀ ମହାପ୍ରଭୁଙ୍କ ରକ୍ଷୟତ୍ରୀ ରୂପରେ ରହିଅଛନ୍ତି। ଆପଣ ଗୋପାଙ୍ଗନା ମାନଙ୍କର ବସ୍ତ୍ର ଓ ଭକ୍ତଜନ ମାନଙ୍କର ଚିତ୍ତକୁ ଚୋରାଇଥିବା ଅପରାଧରେ ଆପଣଙ୍କୁ ଭକ୍ତଜନମାନେ ପାଟ ଡୋରରେ ବାନ୍ଧି ଦଣ୍ଡ ଦେଉଅଛନ୍ତି। ସେତେବେଳେ ଚାର୍ଚ୍ଚରୀ ବାଦ୍ୟ ଦ୍ୱାରା ଚାରଣ, ଚାର ମାନଙ୍କ ଦ୍ଵାରା ଏହା ଘୋଷଣା କରାଯାଏ। ଆପଣଙ୍କର ସୁଦର୍ଶନ ଚକ୍ରର ତେଜ ପ୍ରଖର ହେବାରୁ ତାହାଙ୍କ ତେଜରେ ଆପଣଙ୍କ ଶ୍ରୀଚରଣ ପାଖକୁ ନ ଯାଇ ପାରିବାରୁ ଆପଣ ଦୁଃଖିତ ହୋଇ (ଚଳି) ତାଙ୍କୁ ଦକ୍ଷିଣ ହସ୍ତରୁ କାଢିଦେଇ ସେହି ତେଜସ୍କର ବର୍ତ୍ତୁଳ ରଥଚକ୍ର ପରି ସୁଦର୍ଶନଙ୍କୁ କୀଳ ବା ସ୍ତମ୍ଭ ପରିକରି (ବାମ ଦିଗରେ) ସ୍ଥାପନ କରିଅଛ।ପୁରାଣ ପୁରୁଷୋତ୍ତମ। ଭକ୍ତଜନଙ୍କ ପାଇଁ ସୁଦର୍ଶନଙ୍କର ତେଜକୁ ହରଣକରି ତାହାଙ୍କୁ ଆହ୍ଲାଦିନୀ ଶକ୍ତି ରୂପରେ ପ୍ରେମ ଭାବରେ ରାଧାଷ୍ଟମୀ ଦିନ ରାଧାଭାବରେ ଉପାସନା କରାଯିବା ଜଗନ୍ନାଥ ମନ୍ଦିରର ବିଶେଷତ୍ତ୍ୱ ଅଟେ।

କବି ଉପେନ୍ଦ୍ର ଭଞ୍ଜଙ୍କ ବିରଚିତ ଶ୍ରୀ ନୀଳାଦ୍ରିଶ ଚଉତିଶା ଭାଗ ୬

କବି ସମ୍ରାଟ ଉପେନ୍ଦ୍ର ଭଞ୍ଜଙ୍କ ବିରଚିତ ଶ୍ରୀ ନୀଳାଦ୍ରିଶ ଚଉତିଶା ଭାଗ ୬