ଆଈ : ହଇଲୋ ମାନି ,କାଲି ସକାଳୁ ଜଲଦି ଉଠିବୁ । କାଲି ଦିନ ସାରା ନ ଖାଇକି ରହିବୁ ,କାଲି ପରା ଜାଗର , ଶିବରାତ୍ରି।

ମାନିନୀ : କଣ ପାଇଁ ଲୋ ,କାଲି ରହିଲେ କଣ ହେବ ? ମୁଁ ନ ଖାଇକି ରହିପାରିବିନି ।

ଆଈ : ଛି...ସେମିତି କହିବୁନି ।ଜାଣିଛୁ , ଶିବଙ୍କୁ ପତି ରୂପେ ପାଇବା ପାଇଁ ପାର୍ବତୀ କେତେ ତପସ୍ୟା କରିଥିଲେ ।ତୁ ବି କାଲି ପୂଜା କରେ ,ସେମିତି ବର ତତେ ମିଳିବ ।

ମାନିନୀ : ନାଲୋ....ମୋର ଶିବ କଣ ହେବେ ...

ଆଈ : ଜାଣିଛୁ ,ଶିବ ହଉଛନ୍ତି ଶ୍ରେଷ୍ଠ ପୁରୁଷ । ରୂପ ଗୁଣରେ ଶ୍ରେଷ୍ଠ ।ସେ ସତ୍ୟ ,ସୁନ୍ଦର । ସବୁଠୁ ବଡ଼ ,ତାଙ୍କ ସ୍ତ୍ରୀ ପ୍ରତି ତାଙ୍କ ସମର୍ପଣ ।

ମାନିନୀ :ସ୍ତ୍ରୀ ପ୍ରତି ସମର୍ପଣ .....ସେଇଟା କଣ ଲୋ....

ଆଈ : ଦେବୀ ଶକ୍ତି ଅନେକ ଜନ୍ମ ନେଇଛନ୍ତି , ବହୁତ ଥର ସେ ମରିଛନ୍ତି,କିନ୍ତୁ ଶିବ ବର୍ଷ ବର୍ଷ ତାଙ୍କୁ ପ୍ରତୀକ୍ଷା କରିଛନ୍ତି ,ଅନେକ ବିରହ ସହିଛନ୍ତି। ଜନ୍ମଜନ୍ମର ଅପେକ୍ଷା ପରେ ସେ କେବଳ ପାର୍ବତୀଙ୍କର ହିଁ ହୋଇଛନ୍ତି ।

ଜାଣିଛୁ ,କେତେ ସ୍ତ୍ରୀ ତାଙ୍କୁ ନିଜ ସ୍ବାମୀ ରୂପେ ଗ୍ରହଣ କରିବାକୁ ପୂଜା କରିଛନ୍ତି ,କିନ୍ତୁ ସେ ପାର୍ବତୀଙ୍କ ସ୍ଥାନ କାହାକୁ ଦେଇନାହାନ୍ତି ।

ତତେ ଏମିତି ସ୍ବାମୀ ଦରକାର ନାହିଁ କି , ଯିଏ କେବଳ ତୋର ହେଇକି ରହିବ ?

ମାନିନୀ : ହଁ ମୋର ବର ତ ମୋର ହେଇକି ହିଁ ରହିବ ,ମୁଁ ତାଙ୍କୁ ଆଉ କୁଆଡେ ଦେଖିବାକୁ ବି ଦେବିନି ।କିନ୍ତୁ ମୁଁ ତାଙ୍କ ପାଇଁ ଉପବାସ କରି ପାରିବିନି ।

ଆଈ : ଯା ତୁ ଗୋଟେ ହୁଣ୍ଡିଟା,କେତେ ବୁଝେଇବି ତତେ ...କରିଲେ ଭଲ ବୋଲି କହୁଛି...

(ସେହି ସମୟରେ ମାନସ(ଯାହା ସହ ମାନିନୀର ବିବାହ ଠିକ ହୋଇଥିଲା)ର କଲ୍ ଆସିଲା।)

କଲ୍ ଆସିବା ଦେଖି ଆଈ କହିଲା ,ଖାଲି ଘଣ୍ଟା ଘଣ୍ଟା କଥା ହେଲେ କଣ ହେବ ,ଗୋଟେ ଦିନ ତ ତାର ପାଇଁ ଭୋକରେ ସମ୍ଭାଳି ପାରିବୁନି ।

ମାନିନୀ: ରହିବିଲୋ ଆଈ ,କିନ୍ତୁ କେବଳ ଶିବଙ୍କ ଭଳି ମୋର ମାନସ ହୁଅନ୍ତୁ ବୋଲି ନୁହଁ ,ମୁଁ ବି ତାଙ୍କ ପାଇଁ ପାର୍ବତୀ ଭଳି ହେବା ପାଇଁ ଉପବାସ କରିବି । ସବୁବେଳେ ମୋ ମନରେ କେବଳ ସେ ହିଁ ରୁହନ୍ତୁ ଆଉ ତାଙ୍କ ସୁଖୀ କରିବା ପାଇଁ ମତେ ସେ ଶକ୍ତି ଦିଅନ୍ତୁ ବୋଲି କରିବି ।ସେ ଯେମିତି ହୁଅନ୍ତୁ ,ମୋର ହେଇକି ରୁହନ୍ତୁ ଓ ମୁଁ ତାଙ୍କର ହେଇକି ରହିବି ।ଠିକ୍ ତୋର ଆଉ ମୋର ଅଜାଙ୍କ ଭଳି ।

ଆଈ : ହଇଲୋ ,ତୁ କେବେଠୁ ଏତେ ବଡ ବଡ କଥା ଜାଣିଲୁଣି । ହଉ ହଉ ,ଯା... ସେ ଅପେକ୍ଷା କରିଥିବ...କଥା ହୋଇଯା....

✍🏻ଅଂଶୁମାନ ମହାନ୍ତି

ତା ୯-୩-୨୦୨୪ ରିଖ

ମହାଶିବରାତ୍ରୀ ,କିଛି ପରମ୍ପରା ,କିଛି ଚିନ୍ତାଧାରା ,କିଛି ବିଶ୍ବାସ

କେବଳ ଶିବଙ୍କ ଭଳି ମୋର ସେ ହୁଅନ୍ତୁ ବୋଲି ନୁହଁ ,ମୁଁ ବି ତାଙ୍କ ପାଇଁ ପାର୍ବତୀ ଭଳି ହେବା ପାଇଁ ଉପବାସ କରିବି