ରାଷ୍ଟ୍ର ନିର୍ମାଣ ତଥା ରାଷ୍ଟ୍ରକୁ ସନ୍ତୁଳନ ଦେବାପାଇଁ ସୃଷ୍ଟି କରାଯାଇଥିବା ପ୍ରଶାସନ ପ୍ରଣାଳୀକୁ ସମ୍ବିଧାନ କୁହାଯାଏ ଯାହାକୁ ଏକ ଲିଖିତ ରୂପ ଦିଆଯାଇ ସମାଜ ପ୍ରତି ନ୍ୟାୟ ପ୍ରଣାଳୀକୁ ପ୍ରଚଳନ କରାଯାଏ | ପୃଥିବୀର ୧୯୫ଟି ଦେଶ ଏବଂ ସାତ ମହାଦେଶ ମଧ୍ୟରେ ପ୍ରତ୍ୟେକଙ୍କର ନ୍ୟାୟ ଏବଂ ପ୍ରଶାସନ ବ୍ୟବସ୍ଥା ଭିନ୍ନଭିନ୍ନ | ଏଥିମଧ୍ୟରୁ ଭାରତ ଦେଶର ସମ୍ବିଧାନ ପୃଥିବୀର ସର୍ବବୃହତ ଲିଖିତ ସମ୍ବିଧାନ |ଏହା ଭାରତ ପରି ଏକ ଜନବହୁଳ ରାଷ୍ଟ୍ରକୁ ସମ୍ପୂର୍ଣ୍ଣତାର ସହ ଚଳେଇବାକୁ ସମର୍ଥ | ଅନେକ ଦେଶୀ ରାଜ୍ୟ ଯାହା ରାଜାଙ୍କ ଦ୍ୱାରା ପ୍ରଶାସିତ ଅଞ୍ଚଳ ଗୁଡିକରୁ ଏକ ସୁଦୃଢ ରାଷ୍ଟ୍ର ଗଠନ ଏବଂ ସମସ୍ତଙ୍କୁ ସନ୍ତୁଳିତ କରିବାପାଇଁ ଗଠିତ ସମ୍ବିଧାନର କଳ୍ପନାଠାରୁ ଜନ୍ମ ତଥା ସମ୍ପ୍ରତି ଏହାର ବ୍ୟବହାର ଏକ ଜଟିଳ ମାର୍ଗ ଦେଇ ଗତି କରିଛି |

ଭାରତ ଭୂଖଣ୍ଡର ହୃଦୟ ଦେଶରେ ସତ୍ତା ପାଇଁ ଅନେକ ଯୁଦ୍ଧ ହୋଇଛି ଯାହା ଇତିହାସ ପୃଷ୍ଠାକୁ ରକ୍ତାକ୍ତ କରିଛି | ସମୟାନୁସାରେ ଅନେକ ରାଜବଂଶ ଆସିଛନ୍ତି ଏବଂ ନିଜକୁ ଇତିହାସରେ ପ୍ରତିଷ୍ଠିତ କରିଛନ୍ତି | ଦେଶ ଏବଂ ରାଜ୍ୟ ଗୁଡିକ ଅନେକ କିଛି ବଞ୍ଚିଛନ୍ତି ସଂଭ୍ରାନ୍ତ ଜୀବନ ଠାରୁ କ୍ରୁରତା ଯାଏଁ | ରାଜବଂଶ ଶାସନର ଅନ୍ତ ବ୍ରିଟିଶ ଶାସନ କାଳରେ ହୋଇଥିଲା |ଭାରତ ଭୂଖଣ୍ଡକୁ ବ୍ୟବସାୟ ପାଇଁ ଆସିଥିବା ଇଷ୍ଟ ଇଣ୍ଡିଆ କମ୍ପାନୀ ସୁବର୍ଣ୍ଣ ଭାରତବର୍ଷକୁ ଦେଖି ଏହାର ପ୍ରଭୁତ୍ୱ କାମନା କରିଥିଲା | ଇଷ୍ଟ ଇଣ୍ଡିଆ କମ୍ପାନୀ ଠାରୁ ସତ୍ତା ବ୍ରିଟିଶ ରାଜ ହାତକୁ ଚାଲିଯିବା ପରେ ଏହା ଭାରତ ବର୍ଷରେ ଅନ୍ୟାୟକୁ ଦ୍ବିଗୁଣିତ କରିଥିଲା | କିନ୍ତୁ ଅନ୍ତରେ ଭାରତ ସ୍ୱାଧୀନତା ପାଇଥିଲା | କିନ୍ତୁ ଏହା ବିଭାଜିତ ହୋଇଯାଇଥିଲା | ଯେପରି ହେଉ ରାଷ୍ଟ୍ର ନିର୍ମାଣ ହୋଇଥିଲା | ଏହାର ସମ୍ବିଧାନ ମଧ୍ୟ ସୃଷ୍ଟି ହୋଇଥିଲା | ଏହାର ଜନ୍ମକୁ ନେଇ କିଛି ତଥ୍ୟ ଯାହା ଆଲୋଚନା ଯୋଗ୍ୟ |

ସମ୍ବିଧାନ ସଭାର ୩ବର୍ଷରେ ଘଟିଥିବା ଅନେକ ଯୁକ୍ତିତର୍କ, ପ୍ରସ୍ତାବ ଏବଂ ଅନୁଛେଦକୁ ସମ୍ମିଳିତ କରି ସମ୍ବିଧାନର ସୃଷ୍ଟି | ସମ୍ବିଧାନର ନିର୍ମାଣ ଅନ୍ତରେ ଲେଖାହେଲା ଆମ ଉଦ୍ଦେଶ୍ୟ ଯାହା ସମ୍ବିଧାନରେ ସର୍ବପ୍ରଥମେ ଆସେ | ସମ୍ବିଧାନ ଯଦି ଏକ ରାଜନୈତିକ ନିୟମ ପ୍ରଣାଳୀ ହୁଏ ତାହେଲେ ଉଦ୍ଦେଶ୍ୟ ଏହାର ଦର୍ଶନୀକ ଦୃଷ୍ଟିକୋଣ | ସମ୍ବିଧାନ ସଭାର ମୂଳ ଭିତ୍ତିଭୂମି ପଣ୍ଡିତ ଜବାହରଲାଲ ନେହେରୁ ସମ୍ବିଧାନ ସଭାର ପଞ୍ଚମ ଦିବସରେ ରଖିଥିଲେ | ଯାହା, ଭାରତକୁ ସ୍ୱାଧୀନତା ସେତେବେଳେ ମିଳିବ ଯେତେବେଳେ ଏହା ଜନତାଙ୍କ ପାଇଁ ଉତ୍ସର୍ଗୀକୃତ ରହିବ | ଏହାର ଉଦ୍ଦେଶ୍ୟ ଭାରତର ଜନତାଙ୍କୁ ସାମାଜିକ, ନୈତିକ, ବିଶ୍ୱାସ, ମତ୍ତ,ପୂଜା, ଚାକିରୀ ତଥା ସମ୍ପୂର୍ଣ ମୌଳିକ ଅଧିକାର ଦିଆଯାଇ ପାରିବ |ପ୍ରତ୍ୟେକ ଜାତି ଧର୍ମ ବର୍ଣ୍ଣ ନିର୍ବିଶେଷରେ ସମସ୍ତଙ୍କୁ ସମାନତା ଦିଆଯିବ |ସେତେବେଳେ ସମ୍ବିଧାନ ସଭାର ମତାମତ ଏବଂ ବିଚାର ଦ୍ୱାରା ଏହାର ଉଦ୍ଦେଶ୍ୟ ମେ 1949ରେ ରଖାଗଲା | ଏହା ଡ୍ରାଫଟିଙ୍ଗ କମିଟିର ଅଧ୍ୟକ୍ଷ ଭୀମ ରାଓ ଆମ୍ବେଦକର ସାହେବଙ୍କ ଦ୍ୱାରା ଘୋଷଣା ହୋଇଥିଲା | ଏହା ମଧ୍ୟ ଅନେକ ଯୁକ୍ତତର୍କର ସାମ୍ନା କରିଥିଲା କିନ୍ତୁ ଶେଷରେ ଏହା ପରିତ ହେଲା |

ବିଶ୍ୱର ସର୍ବବୃହତ ଲିଖିତ ସମ୍ବିଧାନର କଳ୍ପନା କରି ଏହାକୁ ଲିଖିତ ରୂପ ଦେବାପାଇଁ 3ବର୍ଷ ସମୟ ଲାଗିଥିଲା | ଏହା କେବଳ ଏକ ବହି କିମ୍ବା ଗ୍ରନ୍ଥ ନୁହେଁ ବରଂ ଏହା ଥିଲା ଏକ ନୂତନ ରାଷ୍ଟ୍ରର, ଏକ ନୂତନ ସମାଜର ଏବଂ ଏକ ନୂତନ ସଂସ୍କୃତିର | ଡିସେମ୍ବର 1946 ରେ ଯେତେବେଳେ ଏହାକୁ ରୂପ ଦେବାକୁ ପ୍ରାରମ୍ଭ ହୋଇଥିଲା, ପ୍ରକୃତରେ ଏହାର ମୂଳଦୁଆ ଅନେକ ଆଗରୁ ରଖାଯାଇଥିଲା |1857 କ୍ରାନ୍ତି ସମୟର ବିପ୍ଲବୀମାନେ ହିନ୍ଦୁସ୍ତାନର ଏକ ସ୍ୱତନ୍ତ୍ର ସମ୍ବିଧାନର କଳ୍ପନା କରିଥିଲେ | ସେମାନଙ୍କ ବିପ୍ଳବ ବନ୍ଦ କରିଦିଆଗଲା କିନ୍ତୁ ସ୍ୱାଧୀନ ଭାରତରେ ତାଙ୍କ ପକାଉଥିବା ମୂଳଦୁଆ ମୁଣ୍ଡଟେକିଥିଲା |

ମହାତ୍ମାଗାନ୍ଧୀଙ୍କ ତତ୍ତ୍ୱବଧାନରେ ଇତିହାସରେ ଆମକୁ ଏକ ନୂତନ ଭାରତ ଗଢ଼ିବାର ସ୍ଥିତି ମିଳିଥିଲା | କଂଗ୍ରେସ ନେତା ଏବଂ ବରିଷ୍ଠ ଓକିଲ ମୋତିଲାଲ ନେହେରୁ 1928 ମସିହାରେ ଏକ ରିପୋର୍ଟ ବନାଇଥିଲେ ଯାହାକୁ ନେହେରୁ ରିପୋର୍ଟ କିମ୍ବା ସ୍ୱରାଜ ସମ୍ବିଧାନ କୁହାଯାଏ | ତାଙ୍କପରେ ପଣ୍ଡିତ ଜବାହରଲାଲ ନେହେରୁ ଭାରତର ସମ୍ବିଧାନ ସ୍ବପ୍ନକୁ ଅଧିକ ଦୃଢ କରିଥିଲେ |ଏହାର ପ୍ରତିଉତ୍ତରରେ ବ୍ରିଟିଶ ସରକାର 1935ରେ ଏକ ଗଭର୍ଣ୍ଣମେଣ୍ଟ ଅଫ ଇଣ୍ଡିଆ ଆକ୍ଟ ପରିତ କରିଥିଲେ |ଯାହା ଜାତୀୟ କଂଗ୍ରେସ ଏବଂ ମୁସଲିମ ଲିଗ ମଧ୍ୟରେ ଦୂରତ୍ୱ ବଢ଼ାଇଥିଲା |

ଏହା ମଧ୍ୟରେ ଦ୍ଵିତୀୟ ବିଶ୍ୱଯୁଦ୍ଧ ପ୍ରାରମ୍ଭ ହୋଇଗଲା | ଏହି ସମୟରେ 1945 ମସିହାରେ ଡ଼. ତେଜବାହାଦୂର ସପ୍ରୁ ଦଳ ସହ କଥାବାର୍ତ୍ତା କରି ସମ୍ବିଧାନର ଏକ ଛାଞ୍ଚ ତିଆରି କରିବାକୁ ଚେଷ୍ଟା କରିଥିଲେ |ଏପଟେ ଆଜାଦ ହିନ୍ଦ ଫୌଜ ଏବଂ ସେପଟେ ଭାରତ ଛାଡ ଆନ୍ଦୋଳନ ପାଇଁ ବ୍ରିଟିଶ ମାନଙ୍କର ଅନନ୍ତ ସମୟ ଯାଏଁ ଭାରତ ଉପରେ ରାଜୁତି କରିବାର ସ୍ବପ୍ନ ନଷ୍ଟ ହୋଇଯାଇଥିଲା |ପ୍ରଧାନମନ୍ତ୍ରୀ Sir Winston Leonard Spencer Churchill ଯୁଦ୍ଧ ଜିତିଯାଇଥିଲେ କିନ୍ତୁ ନିର୍ବାଚନ ହାରିଯାଇଥିଲେ | ନୂତନ ପ୍ରଧାନମନ୍ତ୍ରୀ Clement Attlee ଭାରତର ନୂତନ ସମ୍ବିଧାନ ଉପରେ ଶୀଘ୍ର ଆଲୋଚନା ପ୍ରସ୍ତାବ ରଖିଲେ | ଏହାକୁ ନେଇ ତାଙ୍କର ୩ ଜଣିଆ କ୍ୟାବିନେଟ ମନ୍ତ୍ରୀଙ୍କୁ ଭାରତ ପଠାଗଲା | ଏହାକୁ କୁହାଯାଏ କ୍ୟାବିନେଟ ମିଶନ | ଏହାପରେ ଭାରତର ପ୍ରତ୍ୟେକ ସ୍ଥାନରୁ ଦିଗଜ ବିଦ୍ୱାନଙ୍କୁ ନେଇ ଏକ ବୈଠକ ହେଲା | ଏଥିରେ କଂଗ୍ରେସ, ମୁସଲିମଲିଗ ଏବଂ ରାଜକୀୟ ରିୟାସତ ତଥା ବିଭିନ୍ନ ସମ୍ପ୍ରଦାୟର ଲୋକ ଉପସ୍ଥିତ ଥିଲେ | ମହମ୍ମଦ ଅଲ୍ଲୀ ଜିନ୍ନା ଭାରତର ମୁସଲିମ ସମ୍ପ୍ରଦାୟର ଅଞ୍ଚଳ ଗୁଡିକରେ ଭିନ୍ନ ସମ୍ବିଧାନ ଏବଂ ଭାରତର ଅନ୍ୟ ଅଞ୍ଚଳ ଗୁଡିକରେ ଭିନ୍ନ ସମ୍ବିଧାନ |କଂଗ୍ରେସକୁ ଏପରି ଅନେକ ସମ୍ବିଧାନ ପସନ୍ଦ ନଥିଲା |ଏଥିରେ ଇଂରେଜଙ୍କର ସ୍ୱାର୍ଥ ଥିଲା, ଯାହା ସାମ୍ପ୍ରଦାୟିକ ହିଂସାକୁ ବଢ଼ାଉଥିଲା |ସେମାନେ ଭାରତ ଛାଡିଯିବା ପୂର୍ବରୁ ଏକ ଦୁର୍ବଳ ରାଷ୍ଟ୍ରନେତା ହାତରେ ଦେଶକୁ ଛାଡି ଯିବାପାଇଁ ଚାହୁଁଥିଲେ | ଏ ମଧ୍ୟରେ ମୁସଲିମ ଲିଗରେ ଜିନ୍ନାଙ୍କ ଦ୍ୱାରା ପାକିସ୍ତାନ ଗଠନର ପ୍ରସ୍ତାବ ପରିତ ହେଲା | ଏସବୁ ମଧ୍ୟରେ ନେହେରୁ ଏବଂ ଜିନ୍ନାଙ୍କ ମଧ୍ୟରେ ମତଭେଦ ଦୁଇଟି ସାମ୍ପ୍ରଦାୟିକା ମତଭେଦ ଭାବରେ ଅଗ୍ରମୁଖା ହେଲା |

ନେହେରୁ ଇଂରେଜଙ୍କ ସହ ସ୍ୱାଧୀନତା ବିଷୟରେ ଅନେକ କଥାବାର୍ତ୍ତା ହେବାପରେ କୌଣସି ସମାଧାନ ନବାହାରିବାରୁ ସେ ଇଂଲଣ୍ଡ ଯାଇ ସେଠାରେ ଅନ୍ତିମ ଚେତାବନୀ ଦେଇ ଭାରତ ଫେରିଆସିଲେ | ଭାରତ ଆସିବାର ୩ଦିନ ମଧ୍ୟରେ ସାମ୍ବିଧାନିକ ସଭାର ମିଳନ ନିଶ୍ଚିତ ହେଲା |9 ଡିସେମ୍ବର 1946 ଦିନ ପ୍ରଥମ ଥର ପାଇଁ ସମ୍ବିଧାନ ସଭା ପ୍ରାରମ୍ଭ ହେଲା | ମୁସଲିମ ଲିଗ ଏହାର ସମ୍ପୂର୍ଣ ବହିଷ୍କାର କରିଥିଲା | ଭାରତକୁ ଏକ ନୂତନ ରୂପରେଖ ଦେବାପାଇଁ ସେଠାରେ ସମସ୍ତ ମହତ୍ୱପୂର୍ଣ ଲୋକ ଉପସ୍ଥିତ ଥିଲେ | କିନ୍ତୁ ସେଠାରେ ମହମ୍ମଦ ଅଲ୍ଲୀ ଜୀନ୍ନା ଏବଂ ମହାତ୍ମାଗାନ୍ଧୀ ଉପସ୍ଥିତ ନଥିଲେ | ସମ୍ବିଧାନ ସଭା ଡ଼. ସଚ୍ଚିଦାନନ୍ଦ ସିହ୍ନାଙ୍କୁ କାର୍ଯ୍ୟକାରୀ ଅଧ୍ୟକ୍ଷ ଭାବରେ ବାଛିଲେ | ତାଙ୍କ ତତ୍ୱାବଧାନରେ ସମସ୍ତ ସଦସ୍ୟ ଶପଥ ନେଲେ |ଏହାପରେ ସଭାର ମୁଖ୍ୟ ଅଧକ୍ଷ ଭାବରେ ଡ଼. ରାଜେନ୍ଦ୍ର ପ୍ରସାଦଙ୍କୁ ବଛାଗଲା | ଏହାପରେ ଭାରତର ଅକ୍ଷୁର୍ଣ୍ଣତା, ଅଖଣ୍ଡତା ତଥା ସ୍ୱତନ୍ତ୍ରତା ଠାରୁ ଆରମ୍ଭକରି ନୂତନ ଭାରତରେ ସମସ୍ତଙ୍କ ସମାନତା ଏବଂ ଏକତା ପର୍ଯ୍ୟନ୍ତ ସମସ୍ତକଥା ପଣ୍ଡିତ ଜବାହରଲାଲ ନେହେରୁ ଉପସ୍ଥାପନା କରିଥିଲେ |13 ଡିସେମ୍ବରରେ ନେହେରୁ ଆମ ସମ୍ବିଧାନର ମୂଳଦୁଆ ପକେଇଥିଲେ କିନ୍ତୁ 14 ଡିସେମ୍ବରରେ ଜିନ୍ନା ପୁରା ସମ୍ବିଧାନ ସଭା ଉପରେ ପ୍ରଶ୍ନଚିହ୍ନ ଲଗାଇଦେଇଥିଲେ | ଏହାପରେ ଡ଼. ଜୟକର ଜୟକର ଅବଜେକ୍ଟିବ ରିଜଲୁସନକୁ ସ୍ଥଗିତ କଲେନି ଏବଂ 22ଜାନୁୟାରୀକୁ ସମ୍ବିଧାନ ସଭାର ପ୍ରଥମ ମହତ୍ତ୍ୱପୂର୍ଣ୍ଣ ପ୍ରସ୍ତାବ ପରିତ ହୋଇଗଲା |ଜିନ୍ନା ସମ୍ବିଧାନ ସଭା ଆସିବା ଦୂରର କଥା ସମ୍ପୂର୍ଣ ସମ୍ବିଧାନ ସଭାକୁ ଭିତ୍ତିହୀନ ଆଖ୍ୟା ଦେଲେ |ଏପଟେ ରିୟସତ ରାଜବଂଶ ମାନେ ନେହେରୁଙ୍କର ପ୍ରଥମ ପ୍ରସ୍ତାବରେ ଭୟାତୁରା ହୋଇଯାଇଥିଲେ | 1947 ପ୍ରାରମ୍ଭରେ ଜନତା ସମ୍ବିଧାନ ସଭା ଉପରେ ନିଜର ବିଶ୍ୱାସ ଜାହିର କରୁଥିଲେ |

ଏଥିମଧ୍ୟରେ Clement Attleeଙ୍କର ଭାରତର ସ୍ୱାଧୀନତାକୁ ନେଇ ଏକ ବଡ ବୟାନ ଆସିଲା | ଯାହା ଭାରତୀୟ ସଂଗଠନ ମାନଙ୍କ ମତଭେଦକୁ ଇଙ୍ଗିତ କରୁଥିଲା | ଇଂରେଜ ଶାସନର ଅନ୍ତପରେ ଏହାର ପରବର୍ତ୍ତୀ ଶାସନଭାର ଭାରତୀୟଙ୍କ ଉପରେ ଦିଆଯିବ | ଯାହା ନୂତନ ଭାଇସରାୟ ମାଉଣ୍ଟବ୍ୟାଟେନ ଭାରତ ଆସି ଏହା ଉପରେ କାର୍ଯ୍ୟପ୍ରାରମ୍ଭ କରିଥିଲେ |ସେ ଭାରତ ଆସିବା ପରେ ପ୍ରଥମେ ସମସ୍ତଙ୍କ ସହ ସାକ୍ଷାତ କରିଥିଲେ |

କଂଗ୍ରେସ ଏବଂ ମୁସଲିମଲିଗକୁ ଏକତ୍ର କରିବା ଖୁବ କଷ୍ଟକର କାର୍ଯ୍ୟ ଥିଲା | ଏପ୍ରିଲ ମାସର ଶେଷରେ ଯେତେବେଳେ ଆସେମ୍ବଲିର ଦ୍ଵିତୀୟ ଅଧିବେଶନ ଆରମ୍ଭ ହେଲା ଅନେକ ରାଜ ରିୟସତ ସେଠାରେ ଏକତ୍ର ହୋଇସାରିଥିଲେ |ତଥାପି ସ୍ଥିତି ଖୁବ ଖରାପ ଥିଲା | ଜିନ୍ନା ସାହେବ ନିଜର ଜିଦି ପୁରାକରିବା ପାଇଁ ଦୃଢ ନିଶ୍ଚିତ ହୋଇସାରିଥିଲେ | ଏସବୁକୁ ଦୃଷ୍ଟିରେ ରଖି ଭାଇସରାୟ ସାହେବ ଭାରତର ବିଭାଜନ କଥାକୁ ସାମ୍ନାକୁ ଆଣିଲେ |

ଜୁନ ମାସ 3 ତାରିଖରେ ମାଉଣ୍ଟବ୍ୟାଟେନ ଭାରତ ବିଭାଜନର ଦୃଢ ମନ୍ତବ୍ୟ ରେଡ଼ିଓ ଏବଂ ଖବରକାଗଜରେ ଦେଲେ | ଜନମାନସରେ ଶୋକର ଛାୟା ଖେଳିଗଲା | ଜୁଲାଇ ମାସ 14ତାରିଖରେ ପୁଣି ଆଉଥରେ ଆସେମ୍ବଲ୍ଲୀ ବସିଲା | କିନ୍ତୁ ଖୁସିର କଥା ଏଥିରେ ମୁସଲିମ ଲିଗର ସଦସ୍ୟ ମଧ୍ୟ ଉପସ୍ଥିତ ଥିଲେ, ଯେଉଁମାନେ ବିଭାଜନରେ ଭାରତ ପକ୍ଷରେ ରହିଯାଇଥିଲେ |ବିଭାଜନରେ ପୂର୍ବ ପାକିସ୍ତାନ (ବାଂଲାଦେଶ) ଏବଂ ପାକିସ୍ତାନ ଅଲଗା ହୋଇଯାଇଥିଲେ | ଆସେମ୍ବଲିକୁ ନୂତନ ଭାବରେ ଅନେକ ସଦସ୍ୟ ନିର୍ବାଚିତ ହୋଇ ଆସିଥିଲେ | ଏଥିରେ ଦେଶର ପତାକା ସର୍ବ ସମ୍ମତି କ୍ରମେ ଗ୍ରହଣ କରାଗଲା |

ସମ୍ବିଧାନ ସଭାର ପଞ୍ଚମ ଅଧିବେଶନ ଆରମ୍ଭ ହେବାକୁ ଥିଲା 1947 ମସିହା ଅଗଷ୍ଟ ମାସ 15 ତରିଖର ଐତିହାସିକ ଦିବସରେ କିନ୍ତୁ ଏହା 14ତାରିଖ ସନ୍ଧ୍ୟାରୁ ହିଁ ଆରମ୍ଭ ହୋଇଯାଇଥିଲା | ମଧ୍ୟରାତ୍ର 1947 ମସିହା 14-15 ତାରିଖରେ ଦେଶ ଖୁସିରେ ବିଭୋର ହୋଇଉଠିଲା | ସମ୍ବିଧାନ ସଭା ସମସ୍ତ ସହିଦଙ୍କୁ ଶ୍ରଦ୍ଧାଞ୍ଜଳି ଅର୍ପଣ ପୂର୍ବକ ସ୍ୱାଧୀନତାର ଅପୂର୍ଵ ଆନନ୍ଦକୁ ଉପଭୋଗ କରୁଥିଲା | ଏହା ଖୁବ ଭାବବିହ୍ଵଳର ସମୟ ଥିଲା |କିନ୍ତୁ ବିଭାଜନ ନିଶ୍ଚିତ ଭାବରେ ଦୁଃଖ ଦେଇଥିଲା | ବିଭାଜନ ନିଆଁ ଏବେ ମଧ୍ୟ ସମସ୍ତଙ୍କ ମନରେ ଥିଲା | ସମସ୍ତେ ସ୍ୱତନ୍ତ୍ର ଭାରତର ପାଇଁ ଶପଥ ନେଲେ | ଏହାପରେ ସୁଚେତା କ୍ରୀପଲାନି “ସାରେ ଜାହାସେ ଆଚ୍ଛା”ଗାନ କରିବା ସହିତ ଜାତୀୟ ପତାକାକୁ ସମ୍ମାନ ଦେଇଥିଲେ | ଏହାପରେ ଜାତୀୟ ସଙ୍ଗୀତ ଗାନ କରାଗଲା |ସ୍ୱାଧୀନତା ଦିବସରେ ସମସ୍ତେ ଦିଲ୍ଲୀରେ ଥିଲେ କିନ୍ତୁ ମହାତ୍ମାଗାନ୍ଧୀ କଲକାତାରେ ହେଉଥିବା ଦଙ୍ଗା ରୋକିବାରେ ଲାଗିଥିଲେ |

ସ୍ୱାଧୀନତାର ସ୍ୱାଦ ଏବଂ ବିଭିନ୍ନ ସ୍ଥାନରେ ହିଂସା, ଦଙ୍ଗା ଗୁଡିକ ସମାନ୍ତରାଳ ଭାବରେ ଚାଲିଥିଲା | ତଥାପି ସମସ୍ତ ପରିସ୍ଥିତିକୁ ସାମ୍ନା କରି ଧିରେ ଧିରେ ସମ୍ବିଧାନ ରଚନା ହୋଇଥିଲା | ଏହା ୩ ବର୍ଷ ସମୟ ଲାଗିଥିଲା |ଏହା 26 ନଭେମ୍ବର 1949କୁ ସମ୍ପୂର୍ଣ ହୋଇଥିଲା ଏବଂ 26 ଜାନୁୟାରୀ 1950 ମସିହାରେ ଲାଗୁ ହୋଇଥିଲା |ଏହା ମୂଳତଃ 22 ଭାଗ 395 ଅନୁଛେଦ ଏବଂ 8 କାର୍ଯ୍ୟସୂଚୀ ନେଇ ଗଠିତ ହୋଇଥିଲା | ବର୍ତ୍ତମାନ ଏହା 25ଭାଗ ଏବଂ 12 କାର୍ଯ୍ୟସୂଚୀ | ସମୟକ୍ରମେ ସମାଜର ନବୀନତାକୁ ପୃଷ୍ଟିକରି ନୂତନ ନିୟମ ପ୍ରଣୟନ ହେଉଛି |ଏହି ଦିବସକୁ ମନେରଖିବାପାଇଁ 26 ନଭେମ୍ବର ସମ୍ବିଧାନ ଦିବସ ପାଳନ କରାଯାଏ |

ଭାରତବର୍ଷର ଅକ୍ଷୁର୍ଣ୍ଣତା ସଦା କାମନା |🇮🇳

ବନ୍ଦେ ମାତରଂ 🙏🏻

ବିଶ୍ୱର ସର୍ବବୃହତ ଲିଖିତ ସମ୍ବିଧାନର କାହାଣୀ |

.