__________

-୧-

ଅନତିଦୂରେ ଶୁଭେ,

କିଏ ଡାକେ ପ୍ରତିମା ନାୟକ ମତେ ?

କାହିଁକି ଏ ସମ୍ବୋଧନ ??

ଶୁଣିବିନି ଆଉ, ମୁଁ ନୁହେଁ ପ୍ରତିମା,

ମୂର୍ତ୍ତିମନ୍ତ, ଜୀବନ୍ତ ମୁଁ, ରକ୍ତ ମାଂସେ ଗଢ଼ା ମୋର

ଜୀଅନ୍ତା ନାରୀର ଶରୀର

ଖାକି ନୁହେଁ ମୋର ପୋଷାକ,

ରଙ୍ଗବେରଙ୍ଗ କାମକରା

ସାଦାସିଧା, ଜରିଲଗା, ଦେଶୀ ଓ ବିଦେଶୀ

ଫେଣ୍ଟାଫେଣ୍ଟି ପରିଧାନେ ମୁଁ ଏବେ ସୁନ୍ଦର ।

-୨-

ସୁନ୍ଦରୀ ପାର୍ଲରର ଛୁଆଁରେ ମୋ ଚେହେରା

ବ୍ରଣ ଆଉ ବୟସର ରେଖା ଶୂନ୍ୟ

ଚହଟ ଚିକ୍କଣ, ଚିର ଯୌବନା ମୁଁ

ବେଶ୍ ମନୋଲୋଭା ।

ଚା ଦାଗ ଆଉ ନାହିଁ, କେଉଁ କାଳୁ ଫିକା ପଡ଼ି

ଉଭେଇ ଗଲାଣି, ସଫାସୁତୁରା, ମଣ୍ଡଦିଆ,

ଇସ୍ତ୍ରି କରା ଜାମାରେ ମୋ କ୍ରିଜ୍‌ଟିଏ ନାହିଁ

ଜମାରୁ ପ୍ରଦୂଷିତା, ପରିତ୍ୟକ୍ତା ନାୟିକା ମୁଁ ନୁହେଁ

ମୁଁ ତୁମର ସ୍ୱପ୍ନର ଈପ୍ସିତ ନାୟିକା ।

-୩-

ହେ ଚିନ୍ତାନାୟକମାନେ !

ତୁମ ଚିନ୍ତା ଏଥର ବଦଳାଇ ଦିଅ,

ମୁଁ ଶକ୍ତି, ପ୍ରଚଣ୍ଡ ବି, ମୋତେ ଆଉ ଦୟା କର ନାହିଁ

ମୁଁ ନୁହେଁ ତୁମର ଦୟାର ପାତ୍ର,

ବୁଝିବାର ଚେଷ୍ଟା କର

ତର୍ଜନୀଟା ମୋ' ଆଡ଼କୁ ଦେଖେଇଛ ସିନା

ବାକିତକ ତୁମ ପଟେ, ଭୁଲ୍‌ ଠିକ୍ ସମାଧାନ କର

ତୁମର ଏ ଦୟନୀୟ ସ୍ଥିତି ମତେ ବିଚଳିତ କରେ ।

-୪-

ମୁଁ ପୂରା ଠିକ୍ ଠାକ୍,

ମୋ ଇଙ୍ଗିତ ଅପେକ୍ଷାରେ,

ମୋ' ଇଙ୍ଗିତ ଅପେକ୍ଷାରେ ସମାଜରେ ପ୍ରତିଷ୍ଠିତ,

ଲାଞ୍ଛିତ ଓ କଳଙ୍କିତ କେଉଁ ଆବହମାନ କାଳରୁ

ସବୁ ପୁରୁଷ ମୋର ପରିଚିତ ।

ବିଶ୍ଵାସ ହେଉନି ଯଦି ଇତିହାସ ଦେଖ

ତାଙ୍କ ରଙ୍ଗଢଙ୍ଗ ଏବେ ଚକିତ କଲାଣି ମତେ

ପରିସ୍ଥିତି ଅନୁଯାୟୀ ଏଣ୍ଡୁଅଟେ ପରି ,

ଏ ସମାଜ ରୂପ ବଦଳାଏ

ଦିନ-ରାତି, ପ୍ରିୟା-ପ୍ରୀତି,

ସବୁ ଖାଲି ଚହଲା ପାଣିର ଗାର ।

-୫-

ପାପ-ପୁଣ୍ୟ ଦୁନିଆରେ କିଣା-ବିକା ହୁଏ

ଶୁଣ !

ଶୁଣ !

ପଣ୍ୟ ଖାଲି ମୁଁ ନୁହେଁ

ପଣ୍ୟଦ୍ରବ୍ୟ ଏଠି ସବୁ, ଦୁର୍ଲ୍ଲଭ ମଣିଷ ଶରୀର

ଆଉ ସେଇ ସବୁ ଅସମାପ୍ତ କାହାଣୀର

ମୁଁ ହିଁ ଆରମ୍ଭ, ମୁଁ ହିଁ ଆରମ୍ଭ ।

ମୁଁ ମୂଳ ନାୟିକା ସବୁ କାହାଣୀର ।

ଓଡ଼ିଶା ରାଜ୍ୟ ମୁକ୍ତ ବିଶ୍ୱବିଦ୍ୟାଳୟ, ମୁଖ୍ୟ କାର୍ଯ୍ୟାଳୟ, ସମ୍ବଲପୁର

ବିଭାଗୀୟ ମୁଖ୍ୟ (ଓଡ଼ିଆ)

କୁଲିତାପଡ଼ା,ମୋଦିପଡ଼ା

ସମ୍ବଲପୁର

ପିନ୍ କୋଡ଼-୭୬୮୦୦୨

ଯୋଗାଯୋଗ -୭୯୭୮୮୬୪୬୧୨

{ମୁଁ ନାୟିକା}

କବୟିତ୍ରୀ - ଡକ୍ଟର ଶ୍ରୀମତୀ ସଙ୍ଗୀତା ନାଏକ (ପୁରୋହିତ) __________