.

*ଆସନ୍ତୁ ପଢିବା ଆଜିର ପୌରାଣିକ କାହାଣୀ*

*ଅଭିଶପ୍ତ ଦ୍ୱାରପାଳ, ଦ୍ଵିତୀୟ ଅଧ୍ୟାୟ*

*!! ଭାଗ - ୧୫ !!*

*ଡା.କୃପାସିନ୍ଧୁ ମିଶ୍ର*

✤●○●○●○✤‼️✤○●○●○●✤

*ସୌଜନ୍ୟ: ଆଧ୍ୟାତ୍ମ ଜଗତ ହ୍ବାଟ୍ସଆପ୍ ଗୃପ୍*

✤●○●○●○✤♾️✤○●○●○●✤

*══━━━━✥◈❤️◈✥━━━━══*

ଥରେ ଅଯୋଧ୍ୟାକୁ ଶନିଦଶା ପଡିଲା Ι ରାଜ୍ୟରେ, ଅନାବୃଷ୍ଟି, ଦୁର୍ଭିକ୍ଷ, ଭୂମିକମ୍ପ ଓ ନାନା ସ୍ଥାନରେ ଅଗ୍ନ୍ୟୁତ୍ପାତ ଆଦି ହେବାରେ ଲାଗିଲା Ι ରାଜା ଦଶରଥ ରାଣୀମାନଙ୍କ ମେଳରେ ଭୋଗବିଳାସରେ ଲିପ୍ତ ରହି ରାଜ୍ୟଶାସନ ବିଷୟ ମନ୍ତ୍ରୀମାନଙ୍କ ହାତରେ ଛାଡିଦେଇଥାନ୍ତି Ι ମନ୍ତ୍ରୀମାନେ ତାଙ୍କୁ ସମସ୍ୟାମାନଙ୍କ ବିଷୟରେ ଅବଗତ କରାଇବାକୁ ଚେଷ୍ଟା କରୁଥାନ୍ତି, କିନ୍ତୁ 'ଆପଣ ସେ ସବୁ ସମାଧାନ କରନ୍ତୁ' କହି ରାଜା ଟାଳି ଦେଉଥାନ୍ତି Ι ଥରେ ଦେବର୍ଷି ନାରଦ ଅଯୋଧ୍ୟାକୁ ଆସିଥିଲେ Ι ଦଶରଥଙ୍କ ରାଜସଭାରେ ମନ୍ତ୍ରୀ ଓ ପରାମର୍ଶଦାତାଭାବରେ ନିଯୁକ୍ତ ବଶିଷ୍ଠ, ଜାବାଳି, ବାମଦେବ ଆଦି ଋଷିଗଣ ତାଙ୍କୁ ରାଜ୍ୟର ଦୁର୍ଦ୍ଦଶା ଓ ରାଜାଙ୍କର ରାଜ୍ୟଶାସନରେ ନିଷ୍କ୍ରିୟତା ବିଷୟ ଆଲୋଚନା କଲେ ଏବଂ ଭବିଷ୍ୟତରେ ଘଟିବାକୁ ଯାଉଥିବା ଭୀଷଣ ଦୁର୍ବିପାକର ଆଶଙ୍କା ମଧ୍ୟ ବ୍ୟକ୍ତ କଲେ Ι ନବର ଦ୍ଵାରରେ ‘ନାରାୟଣ, ନାରାୟଣ’ ଶବ୍ଦ ଶୁଣି ଦଶରଥ ବାହାରକୁ ଆସି ନାରଦଙ୍କୁ ପାଦ୍ୟ, ଅର୍ଘ୍ୟ ଦେଇ ପୂଜା କଲେ ଓ ରାଜନବର ମଧ୍ୟକୁ ଆସି ଆସନ ଗ୍ରହଣ କରିବାକୁ ଅନୁରୋଧ କଲେ Ι କିନ୍ତୁ ନାରଦ କପଟ କ୍ରୋଧର ଅଭିନୟ କରି ତାଙ୍କୁ ଭର୍ତ୍ସନା କଲେ Ι ସେ କହିଲେ," ଆପଣ ମହାନ୍ ସୂର୍ଯ୍ୟ ବଂଶର ସୁଯୋଗ୍ୟ ଦାୟାଦ ବୋଲି ଭାବି ମୁଁ ସଙ୍ଖୋଳି ଆସିଥିଲି Ι କିନ୍ତୁ ଆପଣ ଏ ପବିତ୍ର ରଘୁବଂଶର ସମ୍ମାନକୁ ରସାତଳରେ ନିକ୍ଷେପ କରିଛନ୍ତି Ι ରମଣୀମାନଙ୍କ ମେଳରେ ରହି ଆପଣ ପ୍ରଜାଙ୍କ ସୁଖ ଦୁଃଖ ଭୁଲିଯାଇଛନ୍ତି Ι ମନ୍ତ୍ରୀମାନଙ୍କ ପରାମର୍ଶକୁ ଆଡେଇ ଯାଇଛନ୍ତି Ι ରାଜ୍ୟରେ ହାହାକାର ପଡ଼ିଗଲାଣି Ι କେବଳ ମନୁଷ୍ୟ ନୁହେଁ, ମନୁଷ୍ୟେତର ପ୍ରାଣୀମାନଙ୍କର ମଧ୍ୟ ପ୍ରାଣ ସଙ୍କଟରେ Ι ରାଜ୍ୟ ତ୍ୟାଗ କରି ପ୍ରଜାମାନେ ଅନ୍ୟ ରାଜ୍ୟକୁ ଯିବାରେ ଲାଗିଛନ୍ତି Ι ଏପରି ଦାୟିତ୍ୱହୀନ, ଉତ୍ ଶୃଙ୍ଖଳ ରାଜାଙ୍କର ଆତିଥ୍ୟ ଗ୍ରହଣ କରିବା ପାପ Ι ମୁଁ ଚାଲିଲି Ι" ଦଶରଥ ନାରଦଙ୍କ ପଦ ଧାରଣ କରି ଅନୁରୋଧ କଲେ,"ମୋତେ ମନ ଇଚ୍ଛା ତିରସ୍କାର କରନ୍ତୁ ମୁନିବର Ι କିନ୍ତୁ ଗୋଟିଏ କଥା କହିଯାଆନ୍ତୁ Ι ମୋର ସ୍ୱର୍ଗ ତୂଲ୍ୟ ଅଯୋଧ୍ୟା ପୁରୀରେ ଏ ବ୍ୟୁତ୍ପାତ ହେବାର ମୂଳ କାରଣ କଣ ?" ନାରଦ କହିଗଲେ, "ଶନିଙ୍କର କୁଦୃଷ୍ଟି ପ୍ରଭାବରେ ଏ ସବୁ ହେଉଛି ରାଜନ୍ Ι ପାରିବେ ଯଦି ନିଜ ରାଜ୍ୟକୁ ରକ୍ଷା କରନ୍ତୁ Ι" ଦଶରଥଙ୍କର ନିଦ୍ରା ଭଗ୍ନ ହେଲା Ι ସେ ସ୍ଵର୍ଗପୁରୀ ଯାତ୍ରା କଲେ Ι ଦେବରାଜ ଇନ୍ଦ୍ର ତାଙ୍କର ବନ୍ଧୁ ଥିଲେ Ι ସେ ଶନିଙ୍କୁ ଭେଟି ପ୍ରତିକାର ଲୋଡ଼ିବା ପାଇଁ ପରାମର୍ଶ ଦେଲେ Ι ଶନି ଦଶରଥଙ୍କ ‘ଯୁଦ୍ଧମ୍ ଦେହି’ ଡାକରା ଶୁଣି ବାହାରକୁ ଆସିଲେ Ι ତାଙ୍କର ଦୃଷ୍ଟି ପଡିବା କ୍ଷଣି ଦଶରଥଙ୍କର ରଥର ଅଶ୍ଵମାନେ ଜଳିଗଲେ Ι ରଥ ପୋଡିଗଲା Ι ଦଶରଥ ଶୂନ୍ୟମଣ୍ଡଳରୁ ଖସିବାକୁ ଲାଗିଲେ Ι ତଳେ ପଡିବା ଅର୍ଥ ମୃତ୍ୟୁ ଅନିବାର୍ଯ୍ୟ ଥିଲା Ι ଏହି ସମୟରେ ସେହି ମାର୍ଗ ଦେଇ ଉଡିଯାଉଥିବା ପକ୍ଷୀରାଜ ଗରୁଡଙ୍କ ପୁତ୍ର ଜଟାୟୁ, ସ୍ୱର୍ଗରୁ ଖସୁଥିବା ଅଯୋଧ୍ୟା ନରପତିଙ୍କୁ ନିଜ ପୃଷ୍ଠ ଉପରେ ଆଶ୍ରୟ ଦେଲେ ଓ ସ୍ଵର୍ଗପୁରରେ ଇନ୍ଦ୍ରଙ୍କ ନିକଟରେ ଉପସ୍ଥିତ କରାଇଲେ Ι ଦଶରଥ ଦଶ ଦିଗପାଳଙ୍କୁ ସାକ୍ଷୀ ରଖି ଜଟାୟୁଙ୍କ ସହ ମିତ୍ରତା ସ୍ଥାପନ କଲେ Ι ଉଭୟ ପରସ୍ପରକୁ ଆଲିଙ୍ଗନ କରି ସତ୍ୟ କଲେ ଯେ ଯାବଜ୍ଜୀବନ ଏ ମିତ୍ରତାର ବନ୍ଧନ ଅତୁଟ ରହିବ Ι ଇନ୍ଦ୍ର ଶନିଙ୍କ ସମ୍ମୁଖକୁ ନ ଯାଇ ତାଙ୍କ ପୃଷ୍ଠ ପଟରେ ରହି ନିଜ ସମସ୍ୟା ଜଣାଇବାକୁ ଦଶରଥଙ୍କୁ ପରାମର୍ଶ ଦେଲେ Ι ସେ କିଛି ସମୟ ପାଇଁ ଚକ୍ଷୁ ମୁଦ୍ରିତ କରିବାପାଇଁ ଶନିଙ୍କୁ ଅନୁରୋଧ କଲେ Ι ଉଭୟଙ୍କ ମଧ୍ୟରେ ସୌହାର୍ଦ୍ଦ୍ୟପୂର୍ଣ୍ଣ ବାତାବରଣ ମଧ୍ୟରେ ଆଲୋଚନା ହେଲା Ι ଶନି ସୂର୍ଯ୍ୟଙ୍କ ପୁତ୍ର ଥିଲେ ଏବଂ ସୂର୍ଯ୍ୟ ବଂଶରେ ଜନ୍ମ ହୋଇଥିଲେ ଦଶରଥ Ι କ୍ରୋଧ ପରିହାର କରି ଦଶରଥ ଶନିଙ୍କ ସ୍ତବ କରି ତାଙ୍କୁ ତୁଷ୍ଟ କଲେ Ι ଶନିଦେବ ବର ଦେଲେ ଯେ ଅଯୋଧ୍ୟା ଉପରେ ସେ କେବେ ବି କୁଦୃଷ୍ଟି ପକାଇବେ ନାହିଁ Ι ସଙ୍ଗେ ସଙ୍ଗେ ଶନିଙ୍କ ପ୍ରସନ୍ନ ଦୃଷ୍ଟିର ସୁଫଳ ମିଳିଲା Ι ଅଯୋଧ୍ୟାର ଚିତ୍ରପଟ ବଦଳିଗଲା Ι ପୁନର୍ବାର ଧନ ଧାନ୍ୟ ଗୋପଲକ୍ଷ୍ମୀରେ ଅଯୋଧ୍ୟା ହସି ଉଠିଲା Ι

[କ୍ରମଶଃ]

✿❁❣️༒ *ଜୟ ଶ୍ରୀ ରାମ*༒ ❣️❁✿

*=≠≠=====ଆଜି ପାଇଁ ସମାପ୍ତ==≠====*

🏵️🏵️🙏 *ଶୁଭ ରାତ୍ରି* 🙏🏵️🏵️

ଆଜିର ପୌରାଣିକ କାହାଣୀ ଅଭିଶପ୍ତ ଦ୍ୱାରପାଳ, ଦ୍ଵିତୀୟ ଅଧ୍ୟାୟ ଭାଗ - ୧୫

ଆଜିର ପୌରାଣିକ କାହାଣୀ ଅଭିଶପ୍ତ ଦ୍ୱାରପାଳ, ଦ୍ଵିତୀୟ ଅଧ୍ୟାୟ ଭାଗ - ୧୫