ଭାରତ ଏକ ଗ୍ରାମୀଣ ପ୍ରିୟ ତଥା କୃଷି ପ୍ରଧାନ ଦେଶ। ଜନସଂଖ୍ୟାର ଅର୍ଦ୍ଧାଧିକ ଲୋକେ ଗ୍ରାମାଞ୍ଚଳରେ ବସବାସ କରନ୍ତି। ପ୍ରାୟତଃ ପୁରୁଷ ପ୍ରଧାନ ଓ ଶାସିତ ସମାଜ ଥିବାରୁ ବିଶେଷ କରି ଗ୍ରାମାଞ୍ଚଳରେ ପୁରୁଷ ମାନେ କୃଷି, ରୋଜଗାର ଓ ବ୍ୟବସାୟ ନିମନ୍ତେ ଦେଶ,ବିଦେଶ,ସହର ଓ ଦୂରକୁ ଯାତ୍ରା କରନ୍ତି। ତେଣୁ ମହିଳା ମାନେ ହିଁ ଘର ତଥା ପରିବାର ପ୍ରତି ଦାୟିତ୍ୱବୋଧ ରୁହନ୍ତି। ନିଜ କାମ ସହ ଘର କାମ, ଚାଷ କାମ, ପିଲାଙ୍କ କାମ ସହ ଘର ଓ ପାଖ ଅଞ୍ଚଳର ସ୍ଵଚ୍ଛତା ଉପରେ ମହିଳା ମାନେ ହିଁ କାର୍ଯ୍ୟ କରିଥାନ୍ତି। ବିଶେଷ କରି ଗ୍ରାମୀଣ ଭାରତରେ ମହିଳା ସ୍ଵଚ୍ଛତା ଏକ ବଡ ସଫଳତା ପାଲଟିଛି ବର୍ତମାନ ସମୟରେ। ମହିଳା ମାନେ ନିଜର ଶାରୀରିକ, ମାନସିକ, ଋତୁସ୍ରାବ ଜନିତ ସ୍ଵଚ୍ଛତା ଉପରେ ସଚେତନତା ହେଲେଣି। ତା ସହିତ ମହିଳା ମାନେ ନିଜ ଘର, ବାରି, ଦାଣ୍ଡ ଦୁଆର ସହ ଗ୍ରାମ୍ୟ ପରିବେଶକୁ ସ୍ବଚ୍ଛତା ରଖିବାକୁ ମିଳିତ ପ୍ରୟାସ ଜାରି ରଖିଛନ୍ତି। ପ୍ରଥମତଃ ଗ୍ରାମାଞ୍ଚଳରେ ଋତୁସ୍ରାବ ସମୟରେ ମହିଳା ମାନଙ୍କୁ ବେଶ୍ କଷ୍ଟ ଭୋଗିବାକୁ ପଡୁଥିଲା। ଘରେ ଛିଣ୍ଡା କପଡା ଆଦି ବ୍ୟବହାର କରୁଥିଲେ ଯାହା ସେମାନଙ୍କର ସ୍ବାସ୍ଥ୍ୟ ଓ ସ୍ବଚ୍ଛତା ବିଗୁଡ଼ିଥିବା ଉଦାହରଣ ରହିଛି। ଏନେଇ ମହିଳା ମାନେ ଲାଜ ସରମ କରି ଲୁଚାଇ ନିଜକୁ ଅସହଜ ମନେ କରୁଥିଲେ। ଏବେ ସେମାନେ ସଚେତନ ନାଗରିକ ହେବା ସହ ସୁସ୍ଥ ଜୀବନ ଶୈଳୀ ପାଇଁ ନାପକୀନ ବ୍ୟବହାର କରିବା ସହ ଅନ୍ୟ ମାନଙ୍କୁ ସଚେତନ କରୁଛନ୍ତି। ସରକାର ଓ ସ୍ବାସ୍ଥ୍ୟ ବିଭାଗ ପକ୍ଷରୁ ମଧ୍ଯ ସ୍ୱଚ୍ଛ ଓ ସୁସ୍ଥ ଋତୁସ୍ରାବ ସମୟ ପାଇଁ ସବୁ ସୁବିଧା ଗ୍ରାମାଞ୍ଚଳରେ ଘରେ ଘରେ ଅଙ୍ଗନବାଡ଼ି ଓ ଆଶା ଦିଦି ମାନଙ୍କ ଜରିଆରେ ସଖି ହୋଇ ପହଁଚି ପାରିଛି।

ଦ୍ଵିତୀୟରେ ଗ୍ରାମ୍ୟ ପରିବେଶ ଅତ୍ୟନ୍ତ ଅସୁସ୍ଥ ଥିଲା , ଗ୍ରାମରେ ମହିଳା ସଶକ୍ତିକରଣ ଓ ମହିଳା ଗ୍ରୁପ, ଗାଁ କଲ୍ୟାଣୀ ସମିତି ଜରିଆରେ ଗାଁ ରାସ୍ତା ଘାଟ, ଖାଲଖମା, ପୋଖରୀ ଆଦିରେ ସ୍ବଚ୍ଛତା ଓ ସଫେଇ କରିବାରେ ସେମାନେ ଅଗ୍ରଣୀ ଭୂମିକା ଗ୍ରହଣ କରିବା ଦେଖିବାକୁ ମିଳୁଛି। ନିଜ ଘର ଅଗଣାକୁ ପ୍ରତିଦିନ ଝାଡୁ ମାରିବା ସଫା କରିବା କେବଳ ମହିଳା ମାନେ ହିଁ କରନ୍ତି। ତେଣୁ ପ୍ରକୃତ ସ୍ଵଚ୍ଛତାର ପ୍ରତୀକ ହିଁ ମହିଳା। ସେମାନେ ଘର ଠୁ ଆରଂଭ କରି ନିଜ ନିଜର ଗାଁ ମଧ୍ଯ ସ୍ବଚ୍ଛତା ରଖି ଉଦାହରଣ ସୃଷ୍ଟି କରିଛନ୍ତି।

ତେଣୁ ଗ୍ରାମୀଣ ଭାରତରେ ମହିଳା ସ୍ବଚ୍ଛତା ଏକ ଆଦର୍ଶ ଓ ପ୍ରଶଂସନୀୟ କାର୍ଯ୍ୟ ଭାବେ ସମ୍ମାନ ପାଇଛି। ମହିଳା ମାନେ ହିଁ ନିଜର, ନିଜ ପରିବାରର ସହିତ ନିଜ ଗାଁ ପରିବେଶକୁ ସ୍ବଚ୍ଛତା ଆଣି ଦେଶର ବିକାଶରେ ମୂଲ୍ୟବାନ ଶ୍ରମଦାନ କରିପାରିବେ ଏହା ଆମକୁ ସମ୍ମାନ ଦେବାକୁ ପଡ଼ିବ।

ଜ୍ଞାନ ରଞ୍ଜନ ବିଶ୍ଵାଳ

ସାମ୍ବାଦିକ, ସମାଜିକକର୍ମୀ

କୋଣାର୍କ,ପୁରୀ

ମୋ- ୯୧୭୮୦୫୦୭୦୩

#ଗ୍ରାମୀଣ ଭାରତରେ ମହିଳା ସ୍ବଚ୍ଛତା

ମହିଳା ହିଁ ସ୍ୱଚ୍ଛତାର ପ୍ରତୀକ