©ବିଦ୍ୟାଧର ପଣ୍ଡା

ରସୁଣ ଆମ ହାଣ୍ଡିଶାଳର ସ୍ଥାୟୀ ବାସିନ୍ଦା।ସନ୍ତୁଳା ହେଉ କି ମସଲା-କଷା, ସବୁ ବ୍ୟଞ୍ଜନ ପ୍ରସ୍ତୁତିରେ ରସୁଣ ଲୋଡ଼ା। ସନ୍ତୁଳା ପରି ଭାରତୀୟ ବ୍ୟଞ୍ଜନରେ ରସୁଣ ଛୁଙ୍କ ଅପରିହାର୍ଯ୍ୟ। ଓଡ଼ିଶାରେ ତ ରସୁଣ ନ ହେଲେ ନ ଚଳେ। ସମସ୍ତ ଏସୀୟ ରାଷ୍ଟ୍ରରେ ରସୁଣ ବିଭିନ୍ନ ବ୍ୟଞ୍ଜନରେ ଲାଗେ। ଜାପାନ, ଚୀନ୍ ଓ ନେପାଳରେ ରସୁଣ ଅଧିକ ଜନପ୍ରିୟ। କେବଳ ଏସିଆ ନୁହେଁ, ଇଉରୋପରେ ବି ରସୁଣ ଲୋକପ୍ରିୟ। ଭୁମଧ୍ୟସାଗରୀୟ ଜଳବାୟୁରେ ଥିବା ରାଷ୍ଟ୍ର ଇଟାଲୀରେ ରସୁଣ ଖୁବ୍ ଆଦୃତ। ସାରା ବିଶ୍ବରେ ଅତ୍ୟନ୍ତ ଲୋକପ୍ରିୟ ସ୍ବାଦିଷ୍ଟ ଖାଦ୍ୟ ପିଜ୍ଜା ପ୍ରସ୍ତୁତିରେ ରସୁଣର ସ୍ଥାନ ସ୍ବତନ୍ତ୍ର।

ରସୁଣ ବି ଘର ବଇଦଙ୍କ ପ୍ରିୟ। କଞ୍ଚା ରସୁଣ ଦୁଇଚାରି କୋଲ ନିୟମିତ ଖାଇଲେ ସମସ୍ତଙ୍କ ରୋଗ ପ୍ରତିରୋଧକ ଶକ୍ତି ବୃଦ୍ଧି ପାଇଥାଏ।

ଯୁବପିଢ଼ି ଓ ବୟସ୍କ ଲୋକେ ନିୟମିତ କଞ୍ଚା ରସୁଣ ଖାଇଲେ ଥଣ୍ଡା,ସର୍ଦ୍ଦି ପାଖ ମାଡ଼ି ନ ଥାଏ। ଖାଲିପେଟରେ ରସୁଣ ଖାଇଲେ ପେଟର ଚର୍ବି କମେ। ଉଚ୍ଚ ରକ୍ତଚାପ ରୋଗୀଙ୍କ ପାଇଁ ରସୁଣଯୁକ୍ତ ଖାଦ୍ୟ ଭଲ। ଭଲକଥା ଯେ, ଏବେ ମଧ୍ୟ ଗାଁଗହଳିରେ ଲୋକେ ରସୁଣ ଛେଚାକୁ ବିଭିନ୍ନ ବ୍ୟଞ୍ଜନରେ ଉପଯୋଗ କରନ୍ତି। ଏବେ ଅଧିକରୁ ଅଧିକ ଲୋକ ବିଭିନ୍ନ ରୋଗରେ ଆକ୍ରାନ୍ତ ହେବା ପରେ ସନ୍ତୁଳା ପରି ସରଳ ବ୍ୟଞ୍ଜନ ଖାଇବାକୁ ପସନ୍ଦ କରୁଛନ୍ତି।

ପାଠକମାନେ ହୁଏତ ଜାଣି ନଥିବେ ଯେ, ‘ଗାର୍ଲିକ୍ ରାଇସ୍’ ଜାପାନର ଏକ ଅତ୍ୟନ୍ତ ଲୋକପ୍ରିୟ ଖାଦ୍ୟ। ଏହି ଭାତରେ ରସୁଣ ଅଧିକ ପରିମାଣରେ ବ୍ୟବହାର ହୁଏ। ଭାତହାଣ୍ଡି ଚୂଲା ଉପରେ ବସିଥିବାବେଳେ ଖଣ୍ଡମଣ୍ଡଳ ତାହାର ବାସ୍ନାରେ ମହକି ଉଠେ। ଜାପାନର ଅଧିକାଂଶ କର୍ମଜୀବୀ ନିୟମିତ ଗାର୍ଲିକ୍ ରାଇସ୍ ଖାଉଥିବାରୁ ସେମାନଙ୍କ ଓଜନ ନିୟନ୍ତ୍ରଣରେ ରହିଥାଏ। ରସୁଣ ଚର୍ବି ନାଶକ ହୋଇଥିବାରୁ ହୃଦ୍‌ରୋଗରୁ ସୁରକ୍ଷା ପାଇଁ ତରକାରିରେ ରସୁଣ ବ୍ୟବହାର କରିବା ଉଚିତ। ଭିଟାମିନ୍ ସି, ବି-୬, ମାଙ୍ଗାନିଜ୍ ଭରପୂର ରସୁଣ ବ୍ୟବହାର ଦ୍ଵାରା ହଜମ କ୍ଷମତା ବଢ଼େ।

ଆଣ୍ଟିଅକ୍ସିଡାଣ୍ଟ ଭରପୂର ରସୁଣକୁ ବ୍ୟଞ୍ଜନରେ ଉପଯୋଗ କଲେ ବୟସ୍କ ପିଢ଼ିଙ୍କୁ ଆଲଜିମର୍ସ ଓ ଡିମେନ୍‌ସିୟା ପରି ମାରାତ୍ମକ ମାନସିକ ରୋଗ ହେବାର ଆଶଙ୍କା କମିଥାଏ। ତେଣୁ ଗନ୍ଧ ସାମାନ୍ୟ ଉତ୍କଟ ହେଲେ ମଧ୍ୟ ରସୁଣକୁ ହତାଦର କରନ୍ତୁ ନାହିଁ।

ଅଢ଼େଇଗୁଣ୍ଡି, କାନପୁର,କଟକ

ଓଡ଼ିଶା, ପିନ୍ - ୭୫୪୦୩୭

ମୋ- ୯୩୪୮୦୪୨୦୬୬

bidyapctc@gmail.com

ରସୁଣ ଆମର ବନ୍ଧୁ

ଦେଶବିଦେଶ ସବୁଠି ଲୋଡ଼ା