ଅଫିସରୁ ଫେରି ଜୋତାଟା ଖୋଲିବାକୁ ଯାଉଛି ଶ୍ରୀମତୀ ଦଉଡି଼ଆସି କହିଲେ, "ହଇ ହୋ, ଆଜି ରିକି କ'ଣ କରିଛି ଜାଣିଛ?" ମୁଁ ଭାବିଲି, "ରିକି ତ' ଆମର ବୁଝିବା ଶୁଝିବା ପିଲା।କ'ଣ ଏମିତି କରିଦେଇଛି ସେ?" କିନ୍ତୁ ମୁହଁ ଖୋଲି ପଚାରିଲି, "କ'ଣ କରିଛି ସେ?" "ଜାଣିଛ ଆଜି ତା' କୋଚିଂକ୍ଲାସରେ ଗୋଟେ ଝିଅକୁ ସମସ୍ତଙ୍କ ଆଗରେ ପ୍ରପୋଜ କରିଛି ସେ" ଗୋଟିଏ ନିଶ୍ୱାସରେ କହିଗଲେ ଶ୍ରୀମତୀ। ଧଡ଼କିନି ରହିଗଲା ମୋ ଛାତି ଆଉ ଢୋ କିନି ଶବ୍ଦଟିଏ ହେଲା। ମୁଁ ଚାରିଆଡକୁ ଚାହିଁ ଦେଖିଲି ଶ୍ରୀମତୀ ଛଡା ଆଉ କେହି ସେଠି ନାହିଁ। କହିଲି, "ହଉ ହଉ। ଚା କପେ ନେଇକି ଆସ। ବସିକି ଶୁଣିବି କ'ଣ ହେଇଛି।"

ମୁଁ ଲୁଗା ବଦଳିବା ଭିତରେ ମୋ ପାଇଁ ଚା ବନେଇବାକୁ ଦୁଇଘଣ୍ଟା ନେଉଥିବା ଶ୍ରୀମତୀ ମୋର ବାସ୍ ଦୁଇମିନିଟରେ ଗରମ ଗରମ ଚା କପ୍ ଧରି ଠିଆ ହେଇଥିଲେ। ମୁଁ ତାଙ୍କ ହାତରୁ ଚା' ଟା ନେଇ ସୋଫାରେ ବସିପଡି ପଚାରିଲି, "ହଁ, କଣ କହୁଥିଲ ତମେ?"

ଶ୍ରୀମତୀ ମୋ ପାଖେ ବସିପଡି କହିଲେ, "ମୁଁ ସବୁବେଳେ ତୁମକୁ କହୁଛି ନା ରିକି କଥା ତମେ ଜମା ବୁଝୁନ। ଦେଖ ଆଜି ସେ କି କାଣ୍ଡଟେ ନ କଲା!! ତା' କ୍ଳାସମେଟ କଉ ଝିଅକୁ ଆଜି ସମସ୍ତଙ୍କ ଆଗରେ ପ୍ରପୋଜ କରିଛି। ବଣ୍ଟି ବି ସେଠିଥିଲା। ସେ ଆସି ତା' ମାଙ୍କୁ କହିଲା। ତା' ମା ଏବେ ମତେ ଫୋନ୍ କରିଥିଲେ।"

"ସେ ଝିଅଟି କଣ ଉତ୍ତର ଦେଲା? ହଁ ନା ନାଇଁ?" ମୁଁ ଚୁପଚାପ ପ୍ରଶ୍ନ କଲି।

ଶ୍ରୀମତୀ ମୋ ପ୍ରଶ୍ନ ଶୁଣି ମତେ ଏମିତି ଦେଖିଲେ ଯେମିତି ମୁଁ ଅନ୍ୟ କେଉଁ ଗ୍ରହର ପ୍ରାଣୀ। ରାଗିକି କହିଲେ, "ତୁମ ମୁଣ୍ଡ କଣ ଖରାପ ହେଇଯାଇଛି? ତମେ ରିକିକୁ ଫୋନ୍ କରି ଘରକୁ ନ ଡାକି ଏ ବାଜେ କଥାଗୁଡା କଣ ପଚାରୁଛ?"

ମୁଁ କିନ୍ତୁ ତାଙ୍କ କଥା ନ ଶୁଣି ପୁଣି ଶାନ୍ତ କଣ୍ଠରେ ପଚାରିଲି, " କଣ ହେଲା ତା'ପରେ? କୁହ ସେ ଝିଅ କଣ ଉତ୍ତର ଦେଲା?"

ବୋଧହୁଏ ମୋ କଣ୍ଠରେ ଜୋର ଥିଲା, ଶ୍ରୀମତୀ ମତେ କିଛି ସମୟ ଚାହିଁଲେ ଆଉ ମୁହଁ ମୋଡି ଉତ୍ତର ଦେଲେ, "ହଁ କହିଲା କୁଆଡେ ସେ ଝିଅ ରିକିକୁ।" ତାଙ୍କ କଥା ଶୁଣି ମୋ ମୁହଁରେ ଚେନାଏ ହସ ଖେଳିଗଲା। ରିକି ତା'ହେଲେ ଜିତିଗଲା!! କେମିତି କହିବି ଯେ ରିକି ବହୁତ ଭାଗ୍ୟଶାଳୀ! କେମିତି କହିବି ଯେ ସବୁ ପ୍ରପୋଜର ଉତ୍ତର ସବୁ ସମୟରେ ହଁ ନଥାଏ, ବହୁତ ସମୟରେ ଉତ୍ତରଟା ନା ଥାଏ ଆଉ ଥରେଥରେ ଥାଏ ଗୋଟିଏ ଶକ୍ତ ଚଟକଣି।ମୋ ଅଜାଣତରେ ମୋ ହାତଟା ମୋ ଗାଲ ଉପରକୁ ଚାଲିଗଲା। ଭାବିଲି କଥାଗୁଡା ଶ୍ରୀମତୀଙ୍କୁ କହିବି। କିନ୍ତୁ ତା'ପରେ ଭାବିଲି ଥାଉ। ଜୀବନରେ କିଛି କିଛି କଥା ନିଜ ମନ ଭିତରେ ହିଁ ସମାଧି ନେଇଗଲେ ସେଇଟା ସମସ୍ତଙ୍କ ସ୍ୱାସ୍ଥ୍ୟ ପାଇଁ ହିତକର।