୧)

ସବୁଥର ରଥ ରେ କାଳିଆ ଉଦ୍ଦେଶ୍ୟ ରେ କାଳିଆ ପାଇଁ ବାଡ଼ିରୁ ନଡିଆ ଟିଏ ପଠାନ୍ତି ସୌଦାମିନୀ । ଏଥର ବି ସାହି ଲୋକ ଙ୍କ ହାତରେ ପଠେଇଲେ ନଡ଼ିଆ ଆଉ କାଳିଆକୁ ସୁମରି ହଜାରେ ଦୁଃଖ ଜଣେଇ ମୁଣ୍ଡିଆ ଟିଏ ମାରିଲେ । ଘର ଭିତରକୁ ଆସି ଫୋନ୍ ଧରି କଲ୍ ଲଗେଇଲେ । ବହୁତ୍ କଷ୍ଟ ରେ ଏ ଯନ୍ତ୍ର ର ଫନ୍ଦି ଫିକର ସବୁ ଶିଖେଇ ଦେଇଛି ସେ ହିସାବରେ ଝିଆରୀ ସୋନି । ଫୋନ୍ କଲେ ସୌଦାମିନୀ , ସେପଟୁ ଉତ୍ତର ଆସୁ ଆସୁ ଅଭିମାନରେ କହି ଉଠିଲେ ," ତୁ କେବେ ଆସିବୁ ରେ ? ତୁ ଆସିଲେ ପୁରୀ ଯିବାରେ କାଳିଆ ।"

୨)

ଇଉରୋପ ର କେଉଁ ଗୋଟେ ଅନାମଧେୟ ଛୋଟ କମ୍ପାନୀ ରେ କାମ କରି ନିଜ ପଢା ଖର୍ଚ୍ଚ ବହନ କରେ ସୁନିଲ୍। ପଢା ଟେବୁଲ୍ ପାଖରେ ହଉ କି ଶୋଇବା ଖଟ ପାଖରେ ସବୁ ଆଡ଼େ ମହାପ୍ରଭୁ ଙ୍କ ଫଟୋ କାନ୍ଥରେ ଲାଗିଥାଏ । ପଣପଣ ବିଦେଶୀ ଭିଡ଼ ରୁ ବାହାରି ତା ଓଡ଼ିଆ ମନ ଟା କେବେକେବେ ଯାଇ ପହଞ୍ଚେ ଶ୍ରୀମନ୍ଦିର ରେ । ଅଜାଣତେ କହିଉଠେ ," କେବେ ତୋ ପାଖକୁ ଡାକିନେବୁ ରେ କାଳିଆ ?"

୩)

୫/୬ ବର୍ଷ ଓଡ଼ିଶାରେ ରହିଲା ବେଳେ ରୁମମେଟ୍ ପାଖରୁ ଓଡ଼ିଆ ଶିଖିଥିଲେ ସିଦ୍ଧାର୍ଥ । ଓଡ଼ିଆ ଖାଦ୍ୟ ପ୍ରତି ଭଲ ପାଇବା ଆଉ ଜଗନ୍ନାଥଙ୍କ ପ୍ରତି ପ୍ରୀତି ତାଙ୍କ ମନଟାକୁ ଓଡ଼ିଆ ସଜେଇଦେଇଥିବାର ସେ ଅନୁଭବ କରନ୍ତି । ଏବେ ପୁଣି କେତେ ବର୍ଷ ପରେ ସେ କାମରେ ଆସିଛନ୍ତି ପୁରୀ । ସଅଳ କାମ ସାରି ଟିକେ ମହାପ୍ରଭୁଙ୍କୁ ଯାଇ ଦର୍ଶନ କରି ଆସିବା କଥା ଭାବିଲେ ସେ । କିନ୍ତୁ କୌଣସି କାରଣରୁ ତାଙ୍କୁ କାମ ସାରି ପୁଣି ଜଲଦି କୋଚି ଫେରିଯିବାକୁ ପଡିଲା । ମନ ରେ କୋହ ଉଠିଲା, ବାଷ୍ପରୁଦ୍ଧ କଣ୍ଠ ରେ କହିଲେ ," ଏତେ ପାଖରୁ ମତେ ଫେରେଇଦେଲୁ ରେ କାଳିଆ ।"

କାଳିଆ

ତିନୋଟି ସ୍କେଚ୍