© ବିଦ୍ୟାଧର ପଣ୍ଡା।

ବର୍ତ୍ତମାନ କୃତ୍ରିମ ପ୍ରଜ୍ଞା ବା ଆର୍ଟିଫିସିଆଲ୍ ଇଣ୍ଟେଲିଜେନ୍ସ ହେଉଛି ସବୁଠାରୁ ଅଧିକ ଚର୍ଚ୍ଚିତ ଶବ୍ଦ। ଅନେକ ଲୋକ ଏହାକୁ ପ୍ରଶଂସା କରୁଥିବାବେଳେ ଅନେକ ସନ୍ଦେହପୂର୍ଣ୍ଣ ଚକ୍ଷୁରେ ଦେଖୁଛନ୍ତି। ଏହା ଅତ୍ୟନ୍ତ ସ୍ପଷ୍ଟ ଯେ କୃତ୍ରିମ ପ୍ରଜ୍ଞା (ଏଆଇ) କୌଣସି କାର୍ଯ୍ୟକୁ ସହଜରେ ସମାପ୍ତ କରିବାକୁ ଯଥେଷ୍ଟ ଶକ୍ତିଶାଳୀ। ଏହା ମଧ୍ୟ କ୍ରୋଧ ବା ଉତ୍ତେଜନା ପ୍ରକାଶ ନ କରି କୌଣସି କାମକୁ ବାରମ୍ବାର କରିବା ପାଇଁ ପ୍ରସ୍ତୁତ। ଆଗକୁ ବୈଜ୍ଞାନିକମାନେ ହୁଏତ ଏଆଇ ଚାଳିତ ଯନ୍ତ୍ରରେ ଭାବନା ଯୋଡ଼ି ପାରନ୍ତି କିନ୍ତୁ ମଣିଷର ଆବେଗ ଓ ସମ୍ବେଦନଶୀଳତା ସହିତ ଯନ୍ତ୍ର-ମଣିଷ ମେଳ ଖାଇବା ଏତେ ସହଜ ନୁହେଁ। ଆଣବିକ ଯୁଦ୍ଧ ଆଶଙ୍କାରେ ଜର୍ଜରିତ ବିଶ୍ବ ଯଦି ଆଗାମୀ ଦିନରେ ଯୁଦ୍ଧକ୍ଷେତ୍ରରେ କୃତ୍ରିମ ବୁଦ୍ଧିର ଯନ୍ତ୍ର ନିୟୋଜିତ ହୁଅନ୍ତି କ’ଣ ହେବ? ସାଧାରଣ କମ୍ପ୍ୟୁଟର୍ ବି ମଣିଷଠାରୁ ଅତ୍ୟନ୍ତ ଦ୍ରୁତ ଗତିରେ କାମ କରି ପାରନ୍ତି । ତେଣୁ ମଣିଷ କଦାପି ଏଆଇ-ଯୁକ୍ତ କଥାକୁହା ମେସିନ୍ ସହିତ ମେଳ ଖାଇ ପାରିବ ନାହିଁ । ସେହିପରି କୃତ୍ରିମ ପ୍ରଜ୍ଞାର ଯନ୍ତ୍ର, ଯୁଦ୍ଧର ଆଶଙ୍କା ପ୍ରକାଶ ପାଇବାବେଳେ ଶାନ୍ତି କଥାବାର୍ତ୍ତା ଆରମ୍ଭ କରିବା ପାଇଁ ଚିନ୍ତା କରି ପାରିବ ନାହିଁ କିମ୍ବା ଯୁଦ୍ଧ ପରେ ଅସ୍ତ୍ରବିରତି ପାଇଁ ବାଟ ଛାଡିବ ନାହିଁ। ଯେତେବେଳେ ବିଶ୍ବ ପରମାଣୁ ଯୁଦ୍ଧ ପରି ବିପଦର ସମ୍ମୁଖୀନ ହେବ, ସେତେବେଳେ ଉତ୍ତେଜନା ବୃଦ୍ଧି ପାଇବ। ଅଗତ୍ୟା ଏଥିରୁ ମୁକୁଳିବା ପାଇଁ ବାଟ ନିଶ୍ଚୟ ଖୋଜାଯିବ। ସେତେବେଳେ ଏଆଇ ତାହା କରିପାରିବେ କି? ପ୍ରକୃତରେ ଯନ୍ତ୍ର ପକ୍ଷରେ ଏହା କରିବା ସଂପୂର୍ଣ୍ଣ ଅସମ୍ଭବ। ତ୍ବରିତ କାର୍ଯ୍ୟ ପାଇଁ କୃତ୍ରିମ ପ୍ରଜ୍ଞା ଏକ ଉତ୍ତମ ସାଧନ ବା ଉପାୟ ହୋଇପାରେ କିନ୍ତୁ ଏହା ମଧ୍ୟ ସାମାଜିକ ସଙ୍ଘାତ ସୃଷ୍ଟି କରିପାରେ।

ଭାଗବତରେ ଗୋଟିଏ କଥା ଅଛି:-

ବୁଝି ବିଚାରି କାର୍ଯ୍ୟ କଲେ,

ପ୍ରମାଦ ନ ପଡ଼‌ଇ ଭଲେ।

ଏହି ପରିପ୍ରେକ୍ଷୀରେ, ବୈଜ୍ଞାନିକମାନେ ବିକାଶର ସୁନ୍ଦର ଚେହେରା ତଳେ ବିନାଶ କେମିତି ଛପି ରହିପାରେ, ସେଥିପ୍ରତି ଦୃଷ୍ଟି ଦେଇ ଆଗକୁ ବଢ଼ିବା ଉଚିତ, କାରଣ ଏଆଇ ପରିଚାଳିତ ଯନ୍ତର ପୁରୁଷ ବା ନାରୀସୁଲଭ ଭାବନା ନଥିବାରୁ ଏହାର ଆଚରଣରେ ମଧ୍ୟ ଅସ୍ବାଭାବିକତା ରହିପାରେ।

*****

@ ଅଢେଇଗୁଣ୍ଡି, କାନପୁର, କଟକ ପିନ୍-୭୫୪୦୩୭

ମୋ- ୯୩୪୮୦୪୨୦୬୬

bidyapctc@gmail.com

କୃତ୍ରିମ ପ୍ରଜ୍ଞା

ଆମ ସୃଷ୍ଟି ଆମ ଆଗରେ