.

*ଆସନ୍ତୁ ପଢିବା ଆଜିର ପୌରାଣିକ କାହାଣୀ*

*ଅଭିଶପ୍ତ ଦ୍ୱାରପାଳ, ଦ୍ଵିତୀୟ ଅଧ୍ୟାୟ*

*!! ଭାଗ - ୧୬ !!*

*ଡା.କୃପାସିନ୍ଧୁ ମିଶ୍ର*

✤●○●○●○✤‼️✤○●○●○●✤

*ସୌଜନ୍ୟ: ଆଧ୍ୟାତ୍ମ ଜଗତ ହ୍ବାଟ୍ସଆପ୍ ଗୃପ୍*

✤●○●○●○✤♾️✤○●○●○●✤

*══━━━━✥◈❤️◈✥━━━━══*

କେକୟରାଜ ଅଶ୍ଵପତିଙ୍କର କୈକେୟୀଙ୍କ ବ୍ୟତୀତ ଯୁଦ୍ଧଜିତ ନାମରେ ଗୋଟିଏ ପୁତ୍ର ଥିଲା Ι ରାଜା ଅଶ୍ଵପତି ଜଣେ ସନ୍ୟାସୀଙ୍କ ସେବା କରି ତାଙ୍କଠାରୁ ଏକ ବିଶିଷ୍ଟ ବିଦ୍ୟା ଶିକ୍ଷା କରିଥିଲେ Ι ସେ ପଶୁ ପକ୍ଷୀଙ୍କ ଭାଷା ବୁଝି ପାରୁଥିଲେ Ι କିନ୍ତୁ ସନ୍ୟାସୀ ତାଙ୍କୁ ସତର୍କ କରାଇ ଦେଇଥିଲେ ଯେ ଯଦି ସେ କେବେ ସେମାନଙ୍କଠାରୁ ଶୁଣିଥିବା କଥା କାହା ନିକଟରେ ବ୍ୟକ୍ତ କରିଦିଅନ୍ତି, ତେବେ ତାଙ୍କର ମୃତ୍ୟୁ ହେବ Ι ଥରେ ରାଣୀଙ୍କ ସହ ରାଜଉଦ୍ୟାନରେ ଭ୍ରମଣ କରୁଁ କରୁଁ ସେ ହଂସ ହଂସୀ ଦୁଇଟିଙ୍କର ପ୍ରେମାଳାପ ଶୁଣି ହସି ଦେଲେ Ι ସେ ‘କାହିଁକି ହସିଲେ’ କହିବା ପାଇଁ ରାଣୀ ଅନୁରୋଧ କଲେ Ι ରାଜା କହିଲେ, "ମୋତେ ତାହା ପଚାର ନାହିଁ Ι ତାହା କହିଲେ ମୋର ମୃତ୍ୟୁ ହେବ Ι" କିନ୍ତୁ ରାଣୀ ସେ କଥାକୁ ପରିହାସ ମନେ କରି ବାରମ୍ବାର ଅନୁରୋଧ କଲେ , ହଂସ ଦମ୍ପତିଙ୍କର ବାକ୍ୟାଳାପ ବିଷୟରେ ଜାଣିବା ପାଇଁ Ι ଅଶ୍ଵପତି ଭୀଷଣ ରୁଷ୍ଟ ହେଲେ Ι "ମୋର ମୃତ୍ୟୁର ସମ୍ଭାବନା ଅଛି, ଏହା ଜାଣି ମଧ୍ୟ ତୁମେ ଜିଦ୍ ଧରି ବସିଛ ସେମାନଙ୍କ କଥା ଶୁଣିବା ପାଇଁ ? ଯାଅ, କେବଳ ମୋ ରାଜ୍ୟରୁ ନୁହେଁ, ମୋ ଜୀବନରୁ ମଧ୍ୟ ତୁମକୁ ନିର୍ବାସିତ କରୁଛି Ι" ସେହି ଦିନଠାରୁ କୈକେୟୀଙ୍କ ମାତା ତାଙ୍କ ପିତ୍ରାଳୟରେ ଅବଶିଷ୍ଟ ଜୀବନ ଅତିବାହିତ କଲେ Ι ମାତୃହୀନା କୈକେୟୀଙ୍କ ଲାଳନ ପାଳନର ଦାୟିତ୍ୱ ନେଲେ ମନ୍ଥରା ନାମ୍ନୀ ଦାସୀ Ι ବାଲ୍ୟକାଳରୁ ଜନନୀର ମମତା ଦେଇ ସେ କୈକେୟୀଙ୍କୁ ବଢ଼ାଇଥିଲେ Ι ବିବାହ ପରେ ଶ୍ୱଶୁରାଳୟ ଯାତ୍ରା ସମୟରେ କୈକେୟୀଙ୍କ ସହ ମନ୍ଥରା ମଧ୍ୟ ଅଯୋଧ୍ୟା ଯାତ୍ରା କରିଥିଲେ ଏବଂ ତାଙ୍କ ଅନୁରୋଧ କ୍ରମେ ସେ ସବୁଦିନ ପାଇଁ ତାଙ୍କ ସହ ରହିଗଲେ Ι

କୈକେୟୀ ସୁନ୍ଦରୀ ଥିଲେ Ι ଚତୁରୀ ଥିଲେ Ι ରାଜକନ୍ୟା ହେଲେ ମଧ୍ୟ ଯୁଦ୍ଧ ବିଦ୍ୟା ଓ ସାରଥୀଙ୍କ ପରି ରଥ ଚାଳନା କୌଶଳ ଶିକ୍ଷା କରିଥିଲେ Ι ଥରେ ଶମ୍ବରାସୁର ନାମକ ଦୈତ୍ୟ ସ୍ୱର୍ଗ ଆକ୍ରମଣ କରିଦେଲା Ι ସେତେବେଳେ ଦଶରଥ ଓ ଦେବରାଜଙ୍କ ମଧ୍ୟରେ ଯୁଦ୍ଧ ପାଇଁ ମୈତ୍ରୀ ଚୁକ୍ତି ଥାଏ Ι ଇନ୍ଦ୍ରଙ୍କ ଆମନ୍ତ୍ରଣ କ୍ରମେ ଦଶରଥ ସ୍ୱର୍ଗକୁ ଯୁଦ୍ଧ ଯାତ୍ରା କଲେ Ι କୈକେୟୀଙ୍କ ଆଗ୍ରହ କ୍ରମେ ଦଶରଥ ତାଙ୍କୁ ସାଙ୍ଗରେ ନେଇଗଲେ Ι ଯୁଦ୍ଧରେ ଦଶରଥଙ୍କ ଅସ୍ତ୍ରାଘାତରେ ଶମ୍ବରାସୁରର ମୃତ୍ୟୁ ହେଲା Ι କିନ୍ତୁ ସେ ପ୍ରୟୋଗ କରିଥିବା ଶର ଦ୍ୱାରା ଦଶରଥ ସାଂଘାତିକ ଭାବରେ ଆହତ ହୋଇ ରଥ ଉପରେ ଟଳି ପଡିଲେ Ι କୈକେୟୀ ବିଚକ୍ଷଣ ସାରଥୀ ଭଳି ରଥକୁ ଯୁଦ୍ଧ ଭୂମିରୁ ଦୂରକୁ ନେଇଗଲେ ଓ ତାଙ୍କ କ୍ଷତର ଉପଚାର କରି କ୍ଷତରୁ ରକ୍ତପ୍ରବାହ ବନ୍ଦ କରିଦେଲେ Ι ତ୍ୱରିତ୍ ଚିକିତ୍ସା ଯୋଗୁଁ ଦଶରଥଙ୍କର ପ୍ରାଣ ବଞ୍ଚିଗଲା Ι ସେ କୈକେୟୀଙ୍କୁ ବର ଯାଚିଲେ Ι କିନ୍ତୁ କୈକେୟୀ କହିଲେ,"ଏବେ ମୋର କିଛି ମାଗିବାର ନାହିଁ ମହାରାଜ Ι ଆପଣ ପ୍ରଥମେ ସୁସ୍ଥ ହୁଅନ୍ତୁ Ι ପରେ ମୋର ଆବଶ୍ୟକ ହେଲେ ମୁଁ ଯାହା ହେଲେ ମାଗିବି Ι ରାଜା ଦଶରଥ କୈକେୟୀଙ୍କ ପ୍ରତି ଅତ୍ୟଧିକ ଆସକ୍ତ ହେବାର କାରଣ ଥିଲା Ι କୈକେୟୀ ଅତ୍ୟନ୍ତ ପତିଭକ୍ତା ଥିଲେ Ι ତାଙ୍କର ପତିସେବା ସମ୍ପର୍କରେ ରୋଚକ କାହାଣୀଟିଏ ଅଛି Ι ଥରେ ଦଶରଥଙ୍କର ନାସାରେ (କେତେକଙ୍କ ମତରେ ଅଜାଗାରେ) ବିଷାକ୍ତ ଵ୍ରଣଟିଏ ହେଲା Ι ପ୍ରସିଦ୍ଧ ଚିକିତ୍ସକମାନେ ତାର ପ୍ରତିକାର କରିପାରିଲେ ନାହିଁ Ι ଯନ୍ତ୍ରଣାରେ ଦଶରଥ ବ୍ୟାକୁଳ ହେଉଥାନ୍ତି Ι ତାଙ୍କର ମିତ୍ର ଇନ୍ଦ୍ର ଏ ସମ୍ବାଦ ପାଇ ସ୍ୱର୍ଗ ବୈଦ୍ୟ ବିଶେଷଜ୍ଞ ଧନ୍ଵନ୍ତରୀଙ୍କୁ ପ୍ରେରଣ କଲେ Ι ସେ ପରୀକ୍ଷା ନିରୀକ୍ଷା କରି ପ୍ରତିକାରର ଗୋଟିଏ ମାତ୍ର ଉପାୟ ଅଛି ବୋଲି ଘୋଷଣା କଲେ Ι ଵ୍ରଣଟି ପାଚିଯାଇଥିଲା Ι ସେଠାରେ ଅସ୍ତ୍ରୋପଚାର ସମ୍ଭବ ନ ଥିଲା Ι କେହି ଜଣେ ତାକୁ ଶୋଷିନେଇ ପୂଜ ରକ୍ତ ସବୁ ବାହାର କରିଦେଲେ ବ୍ରଣ ଶୁଖିଯିବ ଏବଂ ରାଜା ଦଶରଥ ସୁସ୍ଥ ହୋଇ ଉଠିବସିବେ ବୋଲି ସେ ମତ ଦେଲେ Ι କାଳ ବିଳମ୍ବ ନ କରି କୈକେୟୀ ମନରେ କୌଣସି ବିକାର ନ ଧରି ସେ ବ୍ରଣକୁ ଶୋଷି ସଫା କରିଦେଲେ Ι ସୁସ୍ଥ ହେଲେ ଦଶରଥ Ι କୈକେୟୀଙ୍କର ଅବଦାନର ପ୍ରତିଦାନ ଦେବା ପାଇଁ ସେ ତାଙ୍କୁ କିଛି ମାଗିବା ପାଇଁ ଅନୁରୋଧ କଲେ Ι କୈକେୟୀ ଦ୍ଵିତୀୟ ବାର ସେହି ଏକା ଉତ୍ତର ଦେଲେ Ι "ମାଗିନେବି ଆବଶ୍ୟକ ହେବ ଯେବେ ମୋର Ι”

[କ୍ରମଶଃ]

✿❁❣️༒ *ଜୟ ଶ୍ରୀ ରାମ*༒ ❣️❁✿

*=≠≠=====ଆଜି ପାଇଁ ସମାପ୍ତ==≠====*

🏵️🏵️🙏 *ଶୁଭ ରାତ୍ରି* 🙏🏵️🏵️

ଆଜିର ପୌରାଣିକ କାହାଣୀ ଅଭିଶପ୍ତ ଦ୍ୱାରପାଳ, ଦ୍ଵିତୀୟ ଅଧ୍ୟାୟ ଭାଗ - ୧୬

ଆଜିର ପୌରାଣିକ କାହାଣୀ ଅଭିଶପ୍ତ ଦ୍ୱାରପାଳ, ଦ୍ଵିତୀୟ ଅଧ୍ୟାୟ ଭାଗ - ୧୬