ଶ୍ରୀଗୋପାଲାଷ୍ଟକମ୍

ଶ୍ରୀ ଗଣେଶାୟ ନମଃ ॥

ଯସ୍ମାଦ୍ୱିଶ୍ୱଂ ଜାତମିଦଂ ଚିତ୍ରମତର୍କ୍ୟଂ ଯସ୍ମିନ୍ନାନନ୍ଦାତ୍ମନି ନିତ୍ୟଂ ରମତେ ବୈ ।

ଯତ୍ରାନ୍ତେ ସଂୟାତି ଲୟଂ ଚୈତଦଶେଷଂ ତଂ ଗୋପାଲଂ ସନ୍ତତକାଲଂ ପ୍ରତି ବନ୍ଦେ ॥ ୧॥

ଯସ୍ୟାଜ୍ଞାନାଜ୍ଜନ୍ମଜରାରୋଗକଦମ୍ବଂ ଜ୍ଞାତେ ଯସ୍ମିନ୍ନଶ୍ୟତି ତତ୍ସର୍ୱମିହାଶୁ ।

ଗତ୍ୱା ଯତ୍ରାୟାତି ପୁନର୍ନୋ ଭବଭୂମିଂ ତଂ ଗୋପାଲଂ ସନ୍ତତକାଲଂ ପ୍ରତି ବନ୍ଦେ ॥ ୨॥

ତିଷ୍ଠନ୍ନନ୍ତର୍ୟୋ ଯମୟତ୍ୟେତଦଜସ୍ରଂ ଯଂ କଶ୍ଚିନ୍ନୋ ବେଦ ଜନୋଽପ୍ୟାତ୍ମନି ସନ୍ତମ୍ ।

ସର୍ୱଂ ଯସ୍ୟେଦଂ ଚ ବଶେ ତିଷ୍ଠତି ବିଶ୍ୱଂ ତଂ ଗୋପାଲଂ ସନ୍ତତକାଲଂ ପ୍ରତି ବନ୍ଦେ ॥ ୩॥

ଧର୍ମୋଽଧର୍ମେଣେହ ତିରସ୍କାରମୁପୈତି କାଲେ ଯସ୍ମିନ୍ମତ୍ସ୍ୟମୁଖୈଶ୍ଚାରୁଚରିତ୍ରୈଃ ।

ନାନାରୂପୈଃ ପାତି ତଦା ଯୋଽବନିବିମ୍ବଂ ତଂ ଗୋପାଲଂ ସନ୍ତତକାଲଂ ପ୍ରତି ବନ୍ଦେ ॥ ୪॥

ପ୍ରାଣାୟାମୈର୍ଧ୍ୱସ୍ତସମସ୍ତେନ୍ଦ୍ରିୟଦୋଷା ରୁଧ୍ୱା ଚିତ୍ତଂ ଯଂ ହୃଦି ପଶ୍ୟନ୍ତି ସମାଧୌ ।

ଜ୍ୟୋତୀରୂପଂ ଯୋଗିଜନାମୋଦନିମଗ୍ନାସ୍ତଂ ଗୋପାଲଂ ସନ୍ତତକାଲଂ ପ୍ରତି ବନ୍ଦେ ॥ ୫॥

ଭାନୁଶ୍ଚନ୍ଦ୍ରଶ୍ଚୋଡୁଗଣୈଶ୍ଚୈବ ହୁତାଶୋ ଯସ୍ମିନ୍ନୈବାଭାତି ତଡିଚ୍ଚାପି କଦାପି ।

ଯଦ୍ଭାସା ଚାଭାତି ସମସ୍ତଂ ଜଗଦେତତ୍ ତଂ ଗୋପାଲଂ ସନ୍ତତକାଲଂ ପ୍ରତି ବନ୍ଦେ ॥ ୬॥

ସତ୍ୟଜ୍ଞାନଂ ମୋଦମବୋଚୁର୍ନିଗମା ଯଂ ଯୋ ବ୍ରହ୍ମେନ୍ଦ୍ରାଦିତ୍ୟଗିରୀଶାର୍ଚିତପାଦଃ ।

ଶେତେଽନନ୍ତୋଽନନ୍ତତନାବମ୍ବୁନିଧୌ ଯସ୍ତଂ ଗୋପାଲଂ ସନ୍ତତକାଲଂ ପ୍ରତି ବନ୍ଦେ ॥ ୭॥

ଶୈବାଃ ପ୍ରାହୁର୍ୟଂ ଶିବମନ୍ୟେ ଗଣନାଥଂ ଶକ୍ତିଂ ଚୈକେଽର୍କଂ ଚ ତଥାନ୍ୟେ ମତିଭେଦାତ୍ ।

ନାନାକାରୈର୍ଭାତି ଯ ଏକୋଽଖିଲଶକ୍ତିସ୍ତଂ ଗୋପାଲଂ ସନ୍ତତକାଲଂ ପ୍ରତି ବନ୍ଦେ ॥ ୮॥

ଶ୍ରୀମଦ୍ଗୋପାଲାଷ୍ଟକମେତତ୍ ସମଧୀତେ ଭକ୍ତ୍ୟା ନିତ୍ୟଂ ଯୋ ମନୁଜୋ ବୈ ସ୍ଥିରଚେତାଃ ।

ହିତ୍ୱା ତୂର୍ଣଂ ପାପକଲାପଂ ସ ସମେତି ପୁଣ୍ୟଂ ବିଷ୍ଣୋର୍ଧାମ ଯତୋ ନୈବ ନିପାତଃ ॥ ୯॥

ଇତି ଶ୍ରୀପରମହଂସସ୍ୱାମିବ୍ରହ୍ମାନନ୍ଦବିରଚିତଂ ଶ୍ରୀ ଗୋପାଲାଷ୍ଟକଂ ସମ୍ପୂର୍ଣମ୍ ॥