*ଜୟ ଶ୍ରୀ ଜଗନ୍ନାଥ ମହାପ୍ରଭୁ*

*ପ୍ରଶ୍ନ* : ଭଗବାନଙ୍କୁ କ'ଣ ମାଗିବା ଉଚିତ୍ ?

ମନୁଷ୍ୟର ବିଷୟ ଉପଭୋଗ ନିମନ୍ତେ ଲାଳସା ଓ ଈଶ୍ୱରଙ୍କୁ ମାଗିବାର ଅଭୀପ୍ସା କେବେ ଅନ୍ତ ହୁଏ ନାହିଁ। ଅନେକ ସମୟରେ ଆମେ ଭାବି ନେଉ ଯେ ସାରା ଦୁନିଆରେ କେବଳ ଆମେ ହିଁ ଅଧିକ ଦୁଃଖୀ ଏବଂ ଈଶ୍ୱର ବୋଧହୁଏ ଆମ ଗୁହାରି ଶୁଣୁ ନାହାନ୍ତି କି ଆମକୁ ସାହାଯ୍ୟ କରୁନାହାନ୍ତି। ମାତ୍ର ଏହା ଭୁଲ ଅଟେ। ଈଶ୍ଵରଙ୍କ କୃପା ଦୃଷ୍ଟି ସମସ୍ତଙ୍କ ଉପରେ ସମାନ ଭାବରେ ରହିଛି। ତେବେ ଆପଣ କ'ଣ ଜାଣିଛନ୍ତି କି ଇଶ୍ୱରଙ୍କୁ କ'ଣ ମାଗିବା ଉଚିତ୍ ? ସମର୍ଥ ରାମଦାସ ସ୍ଵାମୀ ଏକଦା ମହାରାଷ୍ଟ୍ରର ଜଣେ ତେଜସ୍ଵୀ ସନ୍ଥ ଥିଲେ। ସେ ନିଜ ଶିଷ୍ୟମାନଙ୍କୁ ଜୀବନର ସମସ୍ତ ମୂଲ୍ୟ ବିଷୟରେ ଅବଗତ କରାଇ ଉଭୟ ଶକ୍ତି ଏବଂ ଭକ୍ତି ଉପାସନାର ଶିକ୍ଷା ଦେଉଥିଲେ।

ସେ ଦିନେ ଈଶ୍ୱରଙ୍କୁ କିଛି ମାଗିବା ଉଚିତ କି ନୁହେଁ ଏ ବିଷୟରେ ଶିଷ୍ୟମାନଙ୍କୁ ଶିକ୍ଷା ଦେଉଥିଲେ। କାରଣ ତାଙ୍କର ଜଣେ ଶିଷ୍ୟ ତାଙ୍କୁ ପଚାରିଥିଲେ କି, ଗୁରୁଜୀ ଆପଣ ଯେତେବେଳେ ଈଶ୍ଵରଙ୍କ ନାମ ସ୍ମରଣ କରନ୍ତି ସେତେବେଳେ ଆପଣଙ୍କ ମୁଖରେ ଏତେ ଶାନ୍ତି କିପରି ରହିଥାଏ ? ମାତ୍ର ଆମେ ଈଶ୍ଵରଙ୍କ ନାମ ସ୍ମରଣ କରିବା ମାତ୍ରେ ଆମ ମନ ଅଶାନ୍ତ ହୁଏ। ଆମେ ଈଶ୍ୱରଙ୍କୁ ନିଜ ଦୁଃଖ କଷ୍ଟ ବଖାଣି ଥାଉ।

ତେବେ ଗୁରୁ ରାମଦାସ ଶିଷ୍ୟଙ୍କୁ ଉତ୍ତର ଦେଲେ ସେ ଥରେ ଗୋଟିଏ ବଡ଼ ରାଜମହଲ ସାମନାରେ ଜଣେ ଭିକ୍ଷୁକକୁ ଠିଆ ହୋଇଥିବାର ଦେଖିଲେ। ତା'ର ଅବସ୍ଥା ଏତେ ଦୟନୀୟ ଥିଲା ଯେ ସମ୍ପୂର୍ଣ୍ଣ ଶରୀରକୁ ଘୋଡାଇବା ଭଳି ବସ୍ତ୍ର ମଧ୍ୟ ସେ ପିନ୍ଧି ନ ଥିଲା। ସେ ଅନେକ ଦିନରୁ ଭୋକିଲା ଥିଲା ପରି ଲାଗୁଥିଲା ଓ ଦୁର୍ବଳତା ଯୋଗୁଁ କେତେବେଳେ ମଧ୍ୟ ପଡ଼ିଯିବ ବୋଲି ଲାଗୁଥିଲା।

ସେତେବେଳେ ରାଜମହଲରୁ ରାଜା ବାହାରି ଆସିଲେ ଓ ଭିକ୍ଷୁକଙ୍କୁ ପଚାରିଲେ, “ତୁମର କଣ ଆବଶ୍ୟକ ରହିଛି ?” ତେବେ ଭିକ୍ଷୁକ ଉତ୍ତର ଦେଇଥିଲା, “ଯଦି ମୋର ଅବସ୍ଥାକୁ ଦେଖି ଆପଣ ଜାଣି ପାରୁନାହାନ୍ତି କି ମୋତେ କ'ଣ ଦରକାର ବୋଲି ତା'ହେଲେ ମୁଁ ଆପଣଙ୍କଠାରୁ କ'ଣ ଆଶା କରିବି ? ମୁଁ ଆପଣଙ୍କ ସାମନାରେ ଠିଆ ହୋଇଛି ଆପଣ ନିଜେ ଚିନ୍ତା କରନ୍ତୁ କି ମୋର କଣ ଆବଶ୍ୟକ ରହିଛି।

ଏହା ଦେଖିବା ପରେ ସେହି ଦିନଠାରୁ ରାମଦାସ ସ୍ଵାମୀ ଈଶ୍ୱରଙ୍କୁ କିଛି ବି ମାଗିବା ଛାଡ଼ି ଦେଲେ। ତତ୍ପରେ ସେ ଶିଷ୍ୟମାନଙ୍କୁ କହିଲେ, ସତ୍ୟ ଓ ଶୁଦ୍ଧ ମନରେ କେବଳ ଈଶ୍ଵରଙ୍କ ନାମ ସ୍ମରଣ କର। ତୁମ ଅନ୍ତରର ଅପ୍ରକାଶିତ ଭାବନା ମଧ୍ୟ ପରମାତ୍ମଙ୍କୁ ପୂର୍ଣ୍ଣରୂପେ ଜ୍ଞାତ ଥାଏ। ସେ ସମସ୍ତଙ୍କ ଅବସ୍ଥା ମଧ୍ୟ ଦେଖୁଛନ୍ତି। ତାଙ୍କ ପାଖରେ ଶବ୍ଦର କୌଣସି ଆବଶ୍ୟକ ନାହିଁ।

ଏହାର ତାତ୍ପର୍ଯ୍ୟ ହେଉଛି ଈଶ୍ୱର ସମସ୍ତଙ୍କ ଭାଗ୍ୟରେ ସୁଖ ଓ ଦୁଃଖ ଉଭୟ ଲେଖିଛନ୍ତି। ସବୁ ବିଷୟର ଏକ ନିର୍ଦ୍ଦିଷ୍ଟ ସମୟ ରହିଛି। ଆପଣ କେବଳ କର୍ମ କରି ଚାଲନ୍ତୁ। ଉଚିତ ସମୟ ଆସିଲେ ତାର ଫଳ ଆପଣଙ୍କୁ ନିଶ୍ଚୟ ପ୍ରାପ୍ତ ହେବ। ସେଥିପାଇଁ ଈଶ୍ଵରଙ୍କ ପାଖରେ ସର୍ବଦା କିଛି ନା କିଛି ମାଗିବା ଠିକ୍ ନୁହେଁ। ବରଂ ବର୍ତ୍ତମାନ ଯେ କୌଣସି ବିଷୟ ଆପଣଙ୍କୁ ଈଶ୍ୱର ଦେଇଛନ୍ତି ସେଥିପ୍ରତି ଧନ୍ୟବାଦ ଦେବାକୁ ଭୁଲନ୍ତୁ ନାହିଁ। ଈଶ୍ୱର ସବୁ ଦେଖୁଛନ୍ତି, ଉଚିତ ସମୟରେ ସମସ୍ତ ସମସ୍ୟାର ସମାଧାନ କରିବେ; କେବଳ ଏଇଥିରେ ଦୃଢ଼ତା ରଖିଥା'ନ୍ତୁ।

ଜୟ ଜୟ ଜଗନ୍ନାଥ ମହାପ୍ରଭୁ

🙏🙏🙏🙏🙏

ଭଗବାନ ଶ୍ରୀ ଜଗନ୍ନାଥ ଙ୍କୁ କ'ଣ ମାଗିବା ଉଚିତ୍

ଭଗବାନଙ୍କୁ କ'ଣ ମାଗିବା ଉଚିତ୍