।। ସର୍ଵ ରହସ୍ୟମୟ ଶ୍ରୀମନ୍ଦିରର ସିଂହଦ୍ଵାର ଗୁମୁଟ।।

*ସିଂହଦ୍ୱାର ଗୁମୁଟ*

👉 ଶ୍ରୀମନ୍ଦିରରେ ଥିବା ଅରୁଣ ସ୍ତମ୍ଭଙ୍କର ସମ୍ମୁଖ ଦ୍ୱାର ତଥା ପୂର୍ବ ଦ୍ୱାର ସିଂହଦ୍ୱାରର ଗୁମୁଟକୁ ହିଁ ସିଂହଦ୍ୱାର ଗୁମୁଟ କୁହାଯାଏ।

👉 ସିଂହଦ୍ଵାର ଅତିକ୍ରମ କଲା ପରେ ଏକ ମନ୍ଦିରାକୃତି ଦ୍ଵାରକକ୍ଷ ବା ଗୁମୁଟ ପଡ଼େ । ଏହାର ନାମ ସିଂହଦ୍ଵାର ଗୁମୁଟ ବା ବାହାର ଗୁମୁଟ ।

👉 ଏଠାରେ ଆମର ବାମପଟ କାନ୍ଥରେ (ଅର୍ଥାତ୍ ଗୁମୁଟର ଦକ୍ଷିଣପଟ କାନ୍ଥରେ) ଫତେ ହନୁମାନ (ଫତେ ଅର୍ଥ ଜୟ), ରାଧାକୃଷ୍ଣ ଓ ଗଣେଶ (ଚିତ୍ର) ବିଦ୍ୟମାନ ।

👉 ଆମର ଦକ୍ଷିଣପଟ କାନ୍ଥରେ ନରସିଂହ (ଦକ୍ଷିଣମୁଖୀ ବିଂଶଭୁଜବିଶିଷ୍ଟ । ଏହାଙ୍କୁ ମହାନରସିଂହ ବା ତାନ୍ତ୍ରିକ ନୃସିଂହ କୁହାଯାଏ), ହନୁମାନ (ମତାନ୍ତରେ ସୁଗ୍ରୀବ) ଓ ପତିତପାବନ ବିରାଜିତ ।

।। ସର୍ଵ ରହସ୍ୟମୟ ଶ୍ରୀମନ୍ଦିରର ଶ୍ରୀ ସିଂହଦ୍ଵାର ଗୁମୁଟ।। part 1

*ଶ୍ରୀ ସିଂହଦ୍ଵାର ଗୁମୁଟରେ ଫତେ ହନୁମାନ / ମହାବୀର*

👉 ସିଂହଦ୍ଵାର ଅତିକ୍ରମ କରି ଶ୍ରୀମନ୍ଦିର ଭିତରକୁ ପ୍ରବେଶ କରିବା ସମୟରେ ବାମପାର୍ଶ୍ବରେ ଏକ ହନୁମାନ ମୂର୍ତ୍ତି ଦୃଷ୍ଟିଗୋଚର ହୁଅନ୍ତି । ଏହି ହନୁମାନଙ୍କୁ ଫତେ ମହାବୀର କୁହାଯାଏ ।

👉 ଫତେ ଏକ ମରାଠୀ ଶବ୍ଦ, ଫତେ ଅର୍ଥ ନିର୍ବିଘ୍ନରେ କାର୍ଯ୍ୟର ସମାଧାନ ହେବା ।

👉 ଶ୍ରୀମନ୍ଦିରରେ ଅନେକ ହନୁମାନ ମୂର୍ତି ଅଛନ୍ତି, ତନ୍ମଧ୍ୟରୁ ଫତେ ହନୁମାନ ସର୍ବଶ୍ରେଷ୍ଠ । ତାଙ୍କୁ ମୁଣ୍ଡିଆ ମାରିଲେ, ସବୁ ଆଶା, କାମନା ଫତେ କରନ୍ତି, ଅର୍ଥାତ୍ ପୂରଣ କରନ୍ତି ।

👉 ‘ଫତେ ମହାବୀର’ ଅର୍ଥ ଯେଉଁ ମହାବୀର ଭକ୍ତର ସଂସାରିକ ମନୋବାଞ୍ଛାକୁ ପୂରଣ କରିଥା’ନ୍ତି ।

👉 ଶ୍ରୀଗୁଣ୍ଡିଚା ସମୟରେ ଶ୍ରୀଜଗନ୍ନାଥ ଫତେ ହନୁମାନଙ୍କୁ ଦର୍ଶନର ସୁଯୋଗ ଦିଅନ୍ତି ।

👉 ଫତେ ହନୁମାନଙ୍କ ଦର୍ଶନ ମିଳିଲେ ଜଗନ୍ନାଥଙ୍କ ଦର୍ଶନ ସହଜ ଓ ସୁଗମ ହୁଏ ବୋଲି ଶ୍ରଦ୍ଧାଳୁମାନଙ୍କର ବିଶ୍ବାସ ।

👉 ରାମାନନ୍ଦାଚାର୍ଯ୍ୟଙ୍କ ସମୟରେ ସ୍ଥାପିତ ପଞ୍ଚରାମାନନ୍ଦୀ ଖାଲସାଙ୍କ ଆରାଧ୍ୟ ଦେବତା ଏହି ଫତେ ମହାବୀର ପୂର୍ବଦ୍ୱାରର ରକ୍ଷକ ଅଟନ୍ତି ।

👉 ଉଲ୍ଲେଖଯୋଗ୍ୟ ଯେ କଳିଯୁଗରେ ହନୁମାନ ମହାପ୍ରଭୁ ଅମର ହୋଇ ବିରାଜିତ ।

।। ସର୍ଵ ରହସ୍ୟମୟ ଶ୍ରୀମନ୍ଦିରର ଶ୍ରୀ ସିଂହଦ୍ଵାର ଗୁମୁଟ।। part 2

*ଶ୍ରୀ ସିଂହଦ୍ଵାର ଗୁମୁଟରେ ରାଧାକୃଷ୍ଣ ମନ୍ଦିର*

👉 ରାଧା ଓ କୃଷ୍ଣଙ୍କର ଏକତ୍ର ସନ୍ନିବିଷ୍ଟ ଯୁଗଳ ରୂପ ।

👉 ସିଂହଦ୍ଵାର ଗୁମୁଟର ବାମ ପାର୍ଶ୍ଵରେ ଫତେ ହନୁମାନ /ମହାବୀରଙ୍କ ପାର୍ଶ୍ଵରେ ରାଧାକୃଷ୍ଣ ବିଗ୍ରହ ପୂଜିତ ହେଉଛନ୍ତି।

👉 ଏତଦ୍‌ବ୍ୟତୀତ ବେଢ଼ା ଭିତରେ ଅନେକ ରାଧାକୃଷ୍ଣ ବିଗ୍ରହ ଏବଂ ମନ୍ଦିର ବିରାଜିତ ଅଛନ୍ତି।

।। ସର୍ଵ ରହସ୍ୟମୟ ଶ୍ରୀମନ୍ଦିରର ଶ୍ରୀ ସିଂହଦ୍ଵାର ଗୁମୁଟ।। part 3

*ଶ୍ରୀ ସିଂହଦ୍ଵାର ଗୁମୁଟରେ ହରଚଣ୍ଡୀଙ୍କର ମୂର୍ତ୍ତି*

👉 ପତିତପାବନ ଗୁମୁଟ ଭିତରେ ହରଚଣ୍ଡୀଙ୍କ ଚିତ୍ରିତ ମୂର୍ତ୍ତି ବିଦ୍ୟମାନ ।

👉 ଜଣେ ପୂଜାପଣ୍ଡା ହରଚଣ୍ଡୀଙ୍କୁ ମାଳା ଓ କୈବଲ୍ୟ ଅର୍ପଣ କରିବାକୁ ଗଲାବେଳେ ଏତେ ଝଡ଼ପବନ ହେଲା ସେ ଗୁମୁଟ ଭିତରୁ ଆଗକୁ ଯାଇପାରିଲେନି । ଜଣେ ଯୁବତୀ ଏହି ସମୟରେ ସେଠାରେ ପହଞ୍ଚି ପୂଜାପଣ୍ଡାଙ୍କ ଠାରୁ ତାହା ନେଇ ହରଚଣ୍ଡୀଙ୍କୁ ଅର୍ପଣ କଲେ । ମା' ହରଚଣ୍ଡୀ ରାତିରେ ସ୍ଵପ୍ନରେ କହିଲେ, ତୁ ସିନା ମୋ ପାଖକୁ ଆସିପାରିଲୁନି । ମୁଁ ଯୁବତୀ ବେଶରେ ଆସି ତୋଠାରୁ ମାଳା କୈବଲ୍ୟ ନେଇଗଲି । ତାହାରି ସ୍ମୃତିରେ ହରଚଣ୍ଡୀଙ୍କର ମୂର୍ତ୍ତି ଏଠାରେ ଶୋଭିତ ।

।। ସର୍ଵ ରହସ୍ୟମୟ ଶ୍ରୀମନ୍ଦିରର ଶ୍ରୀ ସିଂହଦ୍ଵାର ଗୁମୁଟ।। part 4

*ଶ୍ରୀ ସିଂହଦ୍ଵାର ଗୁମୁଟରେ ଅଙ୍ଗଦ/ଚିତ୍ରଗଣପତି/ନୃସିଂହ ମୂର୍ତ୍ତି*

👉 ଅଙ୍ଗଦ :

ଅଙ୍ଗଦ ଶ୍ରୀରାମଚନ୍ଦ୍ରଙ୍କର ନିଷ୍ଠାବାନ ସେବକ । ସେହିଭଳି ନିଷ୍ଠାର ସହ ସେବା ପ୍ରଦାନ କରିବା ପାଇଁ ସେବାୟତମାନେ ଓ ଛତିଶା ନିଯୋଗ ଅଙ୍ଗଦଙ୍କୁ ଗୁମୁଟରେ ପ୍ରତିଷ୍ଠା କରିଛନ୍ତି | କେହି କେହି କୁହନ୍ତି ସେ ଅଙ୍ଗଦ ନୁହନ୍ତି, ସେ ସୁଗ୍ରୀବ ।

👉 ଚିତ୍ରଗଣପତି :

ପତିତପାବନ ଗୁମୁଟରେ ଚିତ୍ରିତ ଗଣେଶ ମୂର୍ତ୍ତି ବା ଚିତ୍ରଗଣପତି ବିରାଜମାନ କରିଛନ୍ତି ।

👉 ନୃସିଂହ ମୂର୍ତ୍ତି :

ଗୁମୁଟରେ ୨୨ ହାତ ଥିବା ନୃସିଂହ ମୂର୍ତ୍ତିର ଦର୍ଶନ ମିଳେ । ଭଗବାନ ନୃସିଂହ ରାଜା ଇନ୍ଦ୍ରଦ୍ୟୁମ୍ନଙ୍କୁ ଏଠାରେ ଦର୍ଶନ ଦେଇଥିଲେ । ୨୨ ହାତ ଥିବା ନୃସିଂହ ମୂର୍ତ୍ତି କେଉଁଠାରେ ଦେଖିବାକୁ ମିଳନ୍ତି ନାହିଁ । ଜଗନ୍ନାଥ ସଂସ୍କୃତିରେ ନୃସିଂହ ଏକ ପ୍ରଚଣ୍ଡ ତତ୍ତ୍ଵ । ଓଡ଼ିଆ ଭାଗବତରେ ପ୍ରଥମେ ପ୍ରଭୁ ନୃସିଂହଙ୍କର ଉପାସନା କରାଯାଇଛି ।