ରାତି ଦୁଇ ଟା ପାଖାପାଖି ହୋଇଥିବ ସଂଜୟ ର ନିଦ ଭାଙ୍ଗିଗଲା। ତା ମନ ରେ ଏବେବି ବହୁତ ପ୍ରଶ୍ନ। କେବେ ରବିବାର ହେବ ଆଉ କେବେ ସେ ଦେଖା କରି ମନ ରେ ଉଙ୍କି ମାରୁଥିବା ପ୍ରଶ୍ନ ର ସମାଧାନ କରିବ। ପ୍ରଶ୍ନ ପଚାରିବ ସତ କିନ୍ତୁ ପ୍ରଥମେ ଥରେ ମନ ଖୋଲି ଦେଖିବ ତାକୁ । କଲେଜ ପରେ ଆଉ କେବେ ଦେଖିନି ତାକୁ ପୁଣି ଥରେ ତାକୁ ଦେଖିବାକୁ ବହୁତ ଇଚ୍ଛା ହେଉଛି। ଭିଡ଼ ଭିତରେ ଦୁହେଁ ଦୁହିଁ କୁ କେମିତି ବାରମ୍ବାର ଅନାଇ ନିଜଠୁ ଆଖି ଫେରାଇ ନେଉଥିଲେ ଥରେ କିନ୍ତୁ ସେ ଆଖି ମିଶାଇ ଦେଖିବ ।

ମନ କଣ ହେଲା କେଜାଣି ହ୍ଵାଟ୍ସଆପ ଖୋଲିଲା ମୋହିନୀ ର ନମ୍ବର ରେ ଡିପି ଦେଖିବା ପାଇଁ । ଦେଖିଲାରୁ ସେ ଆକାଉଣ୍ଟ ରେ କିଛି ବି ଦେଖା ଯାଉ ନଥିଲା ଫୋଟୋ। ସଂଜୟ ଭାବିଲା ଏତେଦିନ ହୋଇଗଲାଣି ହୁଏତ ତା ନମ୍ବର ବି ବଦଳି ଯାଇଥିବ। ଏମିତି ଖାଲି ରେ Hii ଟିଏ ପଠେଇଦେଲା । ମେସେଜ ର ସିଙ୍ଗଲ ଟିକ ଦେଖି ସଂଜୟ ର ବିଶ୍ୱାସ ଆସିଗଲା ଏ ନମ୍ବର ହୁଏ ତ ଆଉ ବ୍ୟବହାର ହେଉନାହିଁ। ସାଙ୍ଗେ ସାଙ୍ଗେ ସିଙ୍ଗଲ ଟିକ ଟି ଡବଲ ଟିକ ହୋଇଗଲା ଓ ଉପରେ ଅନଲାଇନ ଦେଖା ହେଲା। ସଂଜୟ ତରତର ହୋଇ ମେସେଜ ଟି କୁ ଡିଲିଟ ମାରିଦେଲା। କାହିଁକି ଏମିତି ପାଗଳାମି କରୁଛି ତାକୁ ନିଜ ଉପରେ ହସ ଲାଗୁଥାଏ।

ଇଅରଫୋନ ରେ ଜଗଜିତ ସିଂ ଙ୍କର ଗୀତ ଲଗେଇ ଶୋଇ ପଡ଼ିଲା।

ସକାଳୁ 8 ଉଠିଲା ବେଳକୁ ଆଠ ଟା ବାଜିଲାଣି । ଉଠିବା କ୍ଷଣି ବୋଉ ସହ କଥା ହେଲା ସଂଜୟ । କାଲି ଆଉ ଫୋନ କରିନଥିଲାରୁ ବୋଉ ର ଭାରି ଅଭିମାନ ଥିଲା। ଅଭିମାନ ସରିଲା ପରେ ବୋଉ କହିଲା ବାପା ପଚାରୁଥିଲେ ମିନାକ୍ଷୀ ର ଘର ଟା କୋଉଠି , କଣ କରୁଛି ସେ ଝିଅ। ସଂଜୟ ଆଶ୍ଚର୍ଯ୍ୟ ହୋଇ ପଚାରିଲା କୋଉ ମିନାକ୍ଷୀ ? ଇଏ ପୁଣି କୋଉଠୁ ଆସିଲା। ବୋଉ କହିଲା ଦିଦି କହୁଥିଲା ସେ ପରା ତୋ ସହିତ ଭୁବନେଶ୍ୱର ରେ ପଢ଼ୁଥିଲା ତୁ ରବିବାର ଦେଖା କରିବାକୁ ଯିବୁ । ଓଃ ତା ନାଁ ମୋହିନୀ ବୋଲି ସଂଜୟ କହିଲା। ବୋଉ କହିଲେ ଓଃ ମୋହିନୀ ତା ନାଁ ? ମୁଁ ତ ମିନାକ୍ଷୀ ନା କଣ ଶୁଣିଥିଲି। ଆମ ଗାଁ କୁ ବି ମିଠା ବିକିବାକୁ ଆସୁଥିଲା ଜଣେ ମୋହିନୀ। ଅଛି କି ମଲାଣି କି କଣ କେଜାଣି ଆଉ ଖବର ନାହିଁ ତାର। ସଞ୍ଜୟ ଓହୋ ସେ ଯାହା ହଉ ୟାର ଘର କେନ୍ଦ୍ରାପଡ଼ା ବୋଧେ ଆଉ ମୁଁ ଜାଣିନି ସେ ଏବେ କଣ କରୁଛି , ଏବେ ମୁଁ ଯାଉଛି ରେଡି ହେବି ଅଫିସ ପାଇଁ କହି ସଂଜୟ ରଖିଦେଲା। ସେତେବେଳେ ଦେଖିଲା ତା ଫୋନ ରେ ମେସେଜ ଆସିଥିଲା who's this ? ମୋହିନୀ ହ୍ଵାଟ୍ସଆପ ରୁ । ସଂଜୟ ଜାଣିଗଲା ଯେ ମୋହିନୀ ପାଖରେ ତା ନମ୍ବର ନାହିଁ । ସେ କିଛି ଉତ୍ତର ଦେବାକୁ ବି ଠିକ ମନେ କଲାନି। ସେ ଭାବୁଥିଲା ମୋହିନୀ ଡିଲିଟେଡ଼ ମେସେଜ ଦେଖି କଣ ଭାବିଥିବ କେଜାଣି। ମନେ ଅଛି ତାର କଲେଜ ରେ ପଢ଼ୁଥିବା ସମୟରେ କେତେଥର ସେ ତାକୁ ହ୍ଵାଟ୍ସଆପ ମେସେଜ କରି ଡିଲିଟ ମାରିଦିଏ । ତାପରେ ମୋହିନୀ ର ରାଗ ଦେଖେ କିଏ ? ପଚାରେ ଯଦି ଡିଲିଟ କରିବାର ଅଛି କିଛି ମେସେଜ କରିବା କଣ ନିହାତି ଦରକାର ଥିଲା। ସେ ରାଗିଲେ ଗୋଟେ ଆରୋମା ମହମବତୀ ଭଳି ଲାଗେ , ଯେତେ ରାଗିଯାଏ ତା ନାଁ ର ସାର୍ଥକତା ରଖି ମୋହିତ କରିଦିଏ ତରଳୁଥିବା ବାସ୍ନାଯୁକ୍ତ ମହମବତୀ ପରି। ସଞ୍ଜୟ ତ ଏହି ଗୁଣ ପାଇଁ ତା ଉପରେ ମରି ଯାଉଥିଲା।

ସଂଜୟ ଅଫିସ ବାହାରିଲା ଟିକେ କଫି ପିଇ ଦେଇ। ବ୍ରେକଫାଷ୍ଟ ମିସ କରିବା ତାର ଏକ ଅଭ୍ୟାସ ହୋଇଗଲାଣି । ଭୁବନେଶ୍ୱର ରେ ଯୋଉ ଟ୍ରାଫିକ ଶୀଘ୍ର ନ ବାହାରିଲେ ଠିକ ଟାଇମ ରେ ପହଁଚିବା ଅସମ୍ଭବ। ଆଉ ଠିକ ଟାଇମ ରେ ନ ପହଁଚିଲେ କଥା ସରିଲା । 5 ମିନିଟ ଲେଟ ହେଲେ ଖାଲି ଚେୟାର ର ଫୋଟୋ ମିଡିଆ ରେ ଭାଇରଲ ହେଇଯିବ। ଅଫିସ ରେ ପହଂଚି କାମ ବ୍ୟସ୍ତ ରେ ରହିଯାଇଥିଲା ସେ। ଖାଇବା ସମୟରେ ଦେଖିଲା ମେସେଜ ପୁଣି ମୋହିନୀ ର "ସଂଜୟ ?" । ମେସେଜ ଦେଖି ସଂଜୟ ର ଆଖି ଛଳଛଳ ହୋଇଗଲା । ଭାବୁଥାଏ ଏବେ କେମିତି ଜାଣି ପାରିଲା ସେ ତାପରେ Truecaller ଦୁନିଆ ରେ କଣ ବା ଅଛପା ଏଠି । ସେ କଣ ଲେଖିବ ଜାଣି ପାରୁନଥିଲା । hmm ଲେଖି ମେସେଜ ଦେଇଦେଲା । ସାଙ୍ଗେ ସାଙ୍ଗେ ତାର ରିପ୍ଲାଏ ଆସିଲା କଣ କିଛି କହୁଥିଲୁ କି ? ସଂଜୟ ଲେଖିଲା ନାହିଁ କିଛି ନାହିଁ ଏମିତି। "ଦେଖା ହେଉଛନ୍ତି ତ ରବିବାର" ବୋଲି ମୋହିନୀ ପ୍ରଶ୍ନ କଲା ତାର ଉତ୍ତର ରେ ସଂଜୟ କହିଲା ହଁ ଫ୍ରି ତ ଅଛି ମୁଁ ସେଦିନ ତୁମର କେତେବେଳେ ସମୟ ହେବ କହିବ। ମୋହିନୀ ଗୋଟେ ଇମୋଜି ରେ କଥା କୁ ସମାପ୍ତ ଦେଲା। ସଂଜୟ ଭାବୁଥାଏ ମୋହିନୀ କେତେ ବଦଳି ଯାଇଛି ଯୋଉ ଝିଅ କେବେ କଥା ଶିଖି ନଥିଲା ସେ ଏତେ ସ୍ମାର୍ଟଲି ପଚାରୁଛି। ହୁଏତ ସମୟ ସହ ଓ ପ୍ରଫେସନ ଯୋଗୁଁ ସ୍ମାର୍ଟ ହୋଇଯାଇଥିବ ଯାହା ତା ପାଇଁ ବହୁତ ଆଗରୁ ହୋଇଯିବାର ଥିଲା। କେମିତି ସେ ଦିନ ଥିଲା ଯେବେ କେଉଁ ଭୁଲରେ ପଳେଇଯାଇଥିବା ମେସେଜ ରେ ସତରେ ଲମ୍ବା କଥା ହୋଇଯାଉଥିଲା। ସେଥିରେ ବି ଲମ୍ବା ଭାଗ ଟି ସଂଜୟର ନିଜର ଓ ମୋହିନୀ ଗୋଟିଏ ଧାଡ଼ି ଉତ୍ତର ରେ ତାକୁ ଯୋଗ ଦେଉଥାଏ । ଆପଣ ଭାବୁଥିବେ କଣ ଖାଲି ମେସେଜ ରେ ? ଆଜ୍ଞା ଠିକ ଭାବିଛନ୍ତି ଫୋନ କଲ୍ ରେ ସଂଜୟ ବାବୁ ଙ୍କ ସାହସ ପାଏ ନାହିଁ । ଚାରି ବର୍ଷ ର ଦୀର୍ଘ ଏକ ନାଁ ନଥିବା ସମ୍ପର୍କ ର ମେରୁଦଣ୍ଡ ଥିଲା ଏହି "ମେସେଜ"। ଆଉ ଯେଉଁ ଧକ୍କା ରେ ସମ୍ପର୍କ ର ପୂର୍ଣଛେଦ ପଡ଼ିଥିଲା ତାର ଶ୍ରେୟ ବି ଯଦି ମେସେଜ କୁ ଦିଆଯାଏ ବିଶେଷ କିଛି ଭୁଲ ହେବ ନାହିଁ।

"ସଞ୍ଜୟ ବାବୁ........ସଂଜୟ ବାବୁ ଫାଇଲ ନେଇକି ସାର୍ ଙ୍କ ପାଖକୁ ଯାଆନ୍ତୁ"। ହଁ ହଁ ଯାଉଛି କହି ସଞ୍ଜୟ ଧଡ଼ କିଣା ସ୍ବପ୍ନ ରୁ ଉଠି ପଡ଼ିଲା । ନୀଳ ବାବୁ କହିଲେ ଯାହା କୁହ ପଛେ କିଛି ଦିନ ହେବ ଭାରି ଅନ୍ୟମନସ୍କ ରହୁଛ ନୂଆ ନୂଆ ପ୍ରେମରେ ପଡ଼ିଛନ୍ତି ନା କଣ । ସାର୍ ଆଉ ମୋର କଣ ସେ ବୟସ ଅଛି ତିରିଶ ପରେ କି ପ୍ରେମ କହି ସଞ୍ଜୟ ହସି ଉଡ଼େଇଦେଲା। କେତେ ବୟସ କି ଆଉ ତମର ପଚିଶ ରୁ ଗୋଟେ ବର୍ଷ ଅଧିକ ଲାଗୁନ କହିଲେ ନୀଳ ବାବୁ....... ସଂଜୟ ମୁରୁକି ମୁରୁକି ହସି ଫାଇଲ ନେଇ ଅଫିସର ଙ୍କ ପାଖକୁ ଚାଲିଗଲା ।

କ୍ରମଶଃ.......

କୈବଲ୍ୟ ନାୟକ

Kaibalya Nayak

ସଂଯୋଗ(ଭାଗ-3) ଓଡ଼ିଆ ପ୍ରେମ କାହାଣୀ Sanjog Odia love story

ସଞ୍ଜୟର ଜୀବନରେ ପ୍ରେମର ସଂଯୋଗ। A Story by Kaibalya Nayak