କୋଣାର୍କ ସୂର୍ଯ୍ୟ ମନ୍ଦିରରେ ଜିରାଫ ମୂର୍ତ୍ତି ବିଷୟରେ କିଛି ତଥ୍ୟ

------------------------------------------

୧. ଭାରତୀୟ ଉପମହାଦେଶର ବିଭିନ୍ନ ରାଜ୍ୟମାନଙ୍କ ସହିତ ଆଫ୍ରିକୀୟ ଦେଶମାନଙ୍କର ସ୍ଥଳ ପଥରେ ବାଣିଜ୍ୟ ସମ୍ପର୍କ ସିନ୍ଧୁ ସଭ୍ୟତା କାଳରୁ (ବର୍ତ୍ତମାନ ଠାରୁ ୩୦୦୦+ ବର୍ଷ ପୂର୍ବେ, ତାମ୍ରଯୁଗରେ) ଥିବାର ଐତିହାସିକ ପ୍ରମାଣ ରହିଛି |

୨. ଖ୍ରୀ.ପୂ. ୨ୟ ଶତାବ୍ଦୀରେ ଗ୍ରୀକ୍‍ମାନଙ୍କ ଦ୍ବାରା ଲିଖିତ ବୀବରଣୀରୁ ଜଣାଯାଏ ଯେ, ଭାରତୀୟ ରାଜ୍ୟମାନଙ୍କର ପୂର୍ବ ଆଫ୍ରିକୀୟ ଦେଶମାନଙ୍କ ସହିତ ନୌବାଣିଜ୍ୟ ସମ୍ପର୍କ ଥିଲା | ଏହି ସମୟରେ ଆଫ୍ରିକାର ପୂର୍ବ ଉପକୂଳ ସହିତ ଭାରତୀୟ ରାଜ୍ୟମାନଙ୍କର ନୌବାଣିଜ୍ୟ ମୌସୁମୀ ବାୟୁ ଚଳାଚଳ ଉପରେ ନିର୍ଭରଶୀଳ ଥିଲା, ଏବଂ ଏହି ସମୟରେ ଆଫ୍ରିକା ଓ ଭାରତ ମଧ୍ୟରେ କପା, କାଚ, ସୁନା, ହାତୀଦାନ୍ତ ଆଦି ସାମଗ୍ରୀର ବିନିମୟ ହେଉଥିଲା |

୩. ଖ୍ରୀ. ୮ମ ଶତାବ୍ଦୀ ସମୟରେ ଭାରତର କେତେକ ରାଜଦରବାରରେ ଆଫ୍ରିକୀୟ ବ୍ୟକ୍ତିବିଶେଷଙ୍କର ଉପସ୍ଥିତି ବିଷୟରେ ପ୍ରମାଣ ରହିଛି | ଏହି ଆଫ୍ରିକୀୟମାନଙ୍କୁ ହବ୍‍ସି କୁହାଯାଉଥିଲା |

୪. ଖ୍ରୀ. ୧୪ଶ - ୧୫ଶ ଶତାବ୍ଦୀରେ ଆଫ୍ରିକୀୟ ବ୍ୟବସାୟୀମାନେ ବଙ୍ଗର ଏକ ବନ୍ଦରରେ ଚୀନ୍‍ର ଜଣେ ନୌସେନା ମୂଖ୍ୟଙ୍କୁ ଭେଟି ଏକ ଜିରାଫ୍‍ ଉପହାର ଦେଇଥିବାର ପ୍ରମାଣ ରହିଛି | ଏହି ସମୟରେ, ସେହି ବ୍ୟବସାୟୀମାନେ ଅନ୍ୟ ଏକ ଜିରାଫ୍‍ ବଙ୍ଗର ତତ୍କାଳୀନ ମୁସଲମାନ ଶାସକଙ୍କୁ ଉପହାର ଦେଇଥିଲେ | ଖ୍ରୀ. ୧୫ଶ ଶତାବ୍ଦୀରେ ଚୀନ୍‍ ଦେଶରେ ଜିରାଫ୍‍ର ଚିତ୍ର ଅଙ୍କିତ ହୋଇଥିଲା |

୫. ଖ୍ରୀ. ୧୪୯୮ ରେ, ଭାସ୍କୋ-ଡା-ଗାମା ଉତ୍ତମାଶା ଅନ୍ତରିପ ଅତିକ୍ରମ କରି ଆଫ୍ରିକାର ପୂର୍ବ ଉପକୂଳରେ ପହଞ୍ଚିବା ପରେ ସେଠାରୁ ଭାରତୀୟ ବଣିକମାନଙ୍କ ସହାୟତାରେ ଭାରତକୁ ଜଳପଥ ପାଇଥିଲେ |

୬. ଏହି ସମସ୍ତ ତଥ୍ୟରୁ ସୂଚନା ମିଳେ ଯେ, ଖ୍ରୀ.ପୂ. ୨ୟ ଶତାବ୍ଦୀ ଠାରୁ ଖ୍ରୀ. ୧୫ଶ ଶତାବ୍ଦୀ ମଧ୍ୟରେ ଭାରତ ଓ ଆଫ୍ରିକା ମଧ୍ୟରେ ନୌବାଣିଜ୍ୟ ସମ୍ପର୍କ ଥିଲା, ଏବଂ ଜଳପଥରେ ଜିରାଫ୍‍ ଭଳି ପଶୁମାନଙ୍କୁ ଉପହାର ଦେବା ଉଦ୍ଦେଶ୍ୟରେ ଭାରତକୁ ଅଣାଯାଉଥିଲା |

୭. କୋଣାର୍କ ମନ୍ଦିର ପ୍ରଥମ ନରସିଂହ ଦେବଙ୍କ (ଲାଙ୍ଗୁଳା) ସମୟରେ ନିର୍ମିତ ହୋଇଥିଲା | ଏହି ରାଜା ଖ୍ରୀ. ୧୨୩୮ - ୧୨୬୪ ବର୍ଷ ମଧ୍ୟରେ ରଜତ୍ବ କରିଥିବାର ଜଣାଯାଏ | ଏହାଙ୍କ ସମୟରେ ବଙ୍ଗର ମାମଲୁକ ସୁଲତାନଙ୍କ ସହିତ ଯୁଦ୍ଧ ହୋଇଥିଲା | ନରସିଂହ ଦେବଙ୍କ ସମୟରେ ଓଡ଼ିଶାର ଉତ୍ତର ସୀମା ବଙ୍ଗର ହୁଗଲି ପର୍ଯ୍ୟନ୍ତ ଏବଂ ଦକ୍ଷିଣରେ ଗୋଦାବରୀ ନଦୀ ପର୍ଯ୍ୟନ୍ତ ବ୍ୟାପ୍ତ ଥିଲା | ତତ୍କାଳୀନ ଓଡ଼ିଶାର ଏହି ଦୀର୍ଘ ଉପକୂଳରେ ଆଫ୍ରିକୀୟମାନଙ୍କ ସହିତ ବାଣିଜ୍ୟ କାରବାର ହେଉଥିବାର ଯଥେଷ୍ଟ ସମ୍ଭାବନା ରହିଛି | ଏହି ଆଫ୍ରିକୀୟମାନେ ନରସିଂହ ଦେବଙ୍କୁ ଜିରାଫ୍‍ ଉପହାର ଦେଇଥାଇ ପାରନ୍ତି |

୮. କଳିଙ୍ଗ ଯୁଦ୍ଧ ପୂର୍ବ କାଳରୁ ଇଂରେଜମାନଙ୍କ ଓଡ଼ିଶା ଅଧିକାର ପର୍ଯ୍ୟନ୍ତ ଦୀର୍ଘ ୨୦୦୦ ବର୍ଷ ଧରି ଓଡ଼ିଶା ଏକ ନୌବାଣିଜ୍ୟ ସମୃଦ୍ଧ ରାଜ୍ୟ ଥିଲା | ଓଡ଼ିଆ ସାଧବମାନଙ୍କର ଦକ୍ଷିଣପୂର୍ବ ଏସୀୟ ଦେଶମାନଙ୍କ ସହିତ ବାଣିଜ୍ୟ କାରବାର ଥିଲା - ଏହି ଦକ୍ଷିଣପୂର୍ବ ଏସୀୟ ଦେଶମାନଙ୍କର ଭାଷା, ଲୋକ ସଂସ୍କୃତି ଏବଂ ଓଡ଼ିଆ ଭାଷା, ସଂସ୍କୃତିର ସାମଞ୍ଜସ୍ୟ ଏହି ବାଣିଜ୍ୟିକ ଓ ସାଂସ୍କୃତିକ ସମ୍ପର୍କର ପ୍ରମାଣ | ଏହି କାରଣରୁ, ଓଡ଼ିଶାର ଉପକୂଳ ଦକ୍ଷିଣପୂର୍ବ ଏସୀୟ ଦେଶମାନଙ୍କରୁ ଆମଦାନୀ ହେଉଥିବା ମସଲା, ଚନ୍ଦନ ଆଦି ସାମଗ୍ରୀର ବିକ୍ରୟ ପାଇଁ ଏକ ପେଣ୍ଠସ୍ଥଳୀ ହୋଇଥିବାର ସମ୍ଭାବନା ରହିଛି | ଅଫ୍ରିକୀୟ ଓ ଆରବିକ ବଣିକମାନେ ଓଡ଼ିଶା ଉପକୂଳରୁ ଏହି ସାମଗ୍ରୀମାନ କିଣି ନିଜ ଦେଶକୁ ନେଉଥିବାର ସମ୍ଭାବନା ଅଛି | ସେହିପରି ଓଡ଼ିଆ ବଣିକମାନେ ଆଫ୍ରିକା ଓ ଆରବର ଉପକୂଳକୁ ବିଭିନ୍ନ ସାମଗ୍ରୀ ଜଳପଥରେ ନେଇ ବିକ୍ରୟ କରୁଥିବାର ସମ୍ଭାବନା ଅଛି | ଏହି ବିଷୟରେ ଅଧିକ ଗବେଷଣା ଓ ପ୍ରମାଣର ଆବଶ୍ୟକତା ରହିଛି, ମାତ୍ର ତତ୍କାଳୀନ ଓଡ଼ିଶାର ସମୃଦ୍ଧ ନୌବାଣିଜ୍ୟକୁ ବିଚାରକୁ ନେଲେ ଏହି ସମ୍ଭାବନାଗୁଡ଼ିକୁ ଏଡ଼ାଇ ଦିଆଯାଇ ନପାରେ |