ଲୋ ରେବୀ

ଲୋ ନିଆଁ

ଲୋ ଚୁଲି

ଆ ଦେଖିବୁ

ତୋ ବାପ ର ବାକ୍ସଟି ଦାଦନ ରାଇଜରୁ ଫେରି ଆସିଲାଣି

ବାକ୍ସରେ ଟଙ୍କା -ତମ ଘରର ପଶ୍ଚିମ କାନ୍ଥକୁ ସାନି ତିଆରିବା ପାଇଁ

ବାକ୍ସରେ ଗହଣା - ତୋ ବେକକୁ, କାନକୁ ଆଉ ନାକକୁ,

ବାହା ବେଦୀରେ ତତେ ଆଉ କେହି ଖୁଣି ଦେବେ ନାହିଁ

ବାକ୍ସରେ ପ୍ରତିଶୃତି - ତୋ ବାପାର ଗୋଟେ ରକ୍ତ ଲଗା ଶାର୍ଟ ଯେ ଶେଷ ପର୍ଯ୍ୟନ୍ତ ଲଢ଼ି ଏତକ ଯୋଗାଡ଼ି ପାରିଛି

ଦାରିଦ୍ର୍ୟ ପାଖେ ହାରିଯାଇ ନାହିଁ

ନିଜ ପାଇଁ ସମ୍ମାନ ରଖିଛି,

ଦାରିଦ୍ର୍ୟ ସହ ଲଢେଇ କରି ଭୋକକୁ ଗିଳିଛି

ତଣ୍ଟିକୁ ନିଜ ଛେପରେ ଭେଦେଇ,

ତୋ ପାଇଁ ସୁନ୍ଦର ସ୍ୱପ୍ନଟେ ଗଢ଼ିଛି

ତୁ ବାକ୍ସରୁ ସବୁ ଗୋଟି ଗୋଟି କାଢି ନେ

ଟଙ୍କା, ସୁନା ଆଉ କେଇ ଖଣ୍ଡ ଶାଢ଼ୀ

ରହିବାକୁ ଦେ

ତୋ ବାପର ଭାଗ୍ୟ, ଜାତି ଆଉ କର୍ମ

ତା ମଇଳା ଲୁଗାରେ ସେସବୁ ସେଇମିତି ଥାଉ

ତୁ ହାତ ଲଗାନି ସେଥିରେ

ନହେଲେ ସଂକ୍ରମିତ ହେବୁ

ତୋ ବାପର ପିଞ୍ଜରା ଯେଉଁ ମହାମାରୀ ମୋଡ଼ି ଦେଲା ଭିତରୁ ବାହାରୁ,

ତୁ ପୁଣି ସେହି କବଳରେ ପଡ଼ି ହନ୍ତସନ୍ତ ହେବୁ

ଲୋ ରେବୀ,

ଲୋ ନିଆଁ,

ଲୋ ଚୁଲି,

ଖୁଣ୍ଟଟା ପରି ଚାହିଁଛୁ କଣ ବା

ଯା ଟିକେ ପ୍ରସାଧାନ ହେବୁ,

କଣ ଟିକେ ମାରିମୁରା ହେଇ ସୁନ୍ଦର ଦିଶିବୁ

ତାହେଲେ ସିନା ବରପକ୍ଷ ଅଳପରେ ମାନିନେବେ ସବୁ

ନହେଲେ ତୁ ବାହାବେଦୀରେ ବସିବା ପାଇଁକି

ତୋ ବାପକୁ ଆଉ ଥରେ ଜନ୍ମ ନେବା ପାଇଁ ହେବ

ଆଉ କିଛିଟା ଅଧିକା ଯୋଗାଡ଼ ଆଶାରେ ଦାଦନ ରାଇଜକୁ ଫେରିବାକୁ ହେବ ......

-ସମାପ୍ତ -

ନାମ - ଆଶୁତୋଷ ମିଶ୍ର

ସ୍ଥାନ -ଭୁବନେଶ୍ୱର