.

*ଆସନ୍ତୁ ପଢିବା ଆଜିର ପୌରାଣିକ କାହାଣୀ*

*ଅଭିଶପ୍ତ ଦ୍ୱାରପାଳ, ଦ୍ଵିତୀୟ ଅଧ୍ୟାୟ*

*!! ଭାଗ - ୧୪ !!*

*ଡା.କୃପାସିନ୍ଧୁ ମିଶ୍ର*

✤●○●○●○✤‼️✤○●○●○●✤

*ସୌଜନ୍ୟ: ଆଧ୍ୟାତ୍ମ ଜଗତ ହ୍ବାଟ୍ସଆପ୍ ଗୃପ୍*

✤●○●○●○✤♾️✤○●○●○●✤

*══━━━━✥◈❤️◈✥━━━━══*

ଅଳକାପୁରୀର ନିଷିଦ୍ଧ ପ୍ରମୋଦ ଉଦ୍ୟାନରେ ଅନଧିକାର ପ୍ରବେଶ କରିଥିଲେ ରାବଣ Ι ଉଦ୍ୟାନସ୍ଥ ପୁଷ୍କରିଣୀରେ କୁବେରଙ୍କ ଅନ୍ତଃପୁରର ମହିଳାମାନେ ସ୍ନାନ କରିବାର ବ୍ୟବସ୍ଥା ଥିଲା Ι ସଦ୍ୟସ୍ନାତା ରମ୍ଭାଙ୍କ ଆର୍ଦ୍ର ଝୀନବସ୍ତ୍ର ଅନ୍ତରାଳରୁ ତାଙ୍କର ଶରୀରର ଆକର୍ଷଣୀୟ ଅଂଶମାନ ଫୁଟି ଦିଶୁଥିଲା Ι ବିଧାତାଙ୍କର ଅନୁପମ କୃତି ଥିଲେ ଲୋଭନୀୟ ସୌନ୍ଦର୍ଯ୍ୟର ଅଧିକାରିଣୀ ରମ୍ଭା Ι ନିଜକୁ ସମ୍ଭାଳି ପାରିଲେ ନାହିଁ ରାବଣ Ι ସହଜରେ ସେ କାମୁକ ପ୍ରକୃତିର ଥିଲେ Ι ସେ ନିଜର ଅଦମ୍ୟ ବାସନାକୁ ଚରିତାର୍ଥ କରିବାପାଇଁ ରମ୍ଭାଙ୍କୁ ପାଖକୁ ଡାକିଲେ Ι" ପ୍ରିୟେ, ଚାରୁଶୀଳେ, ମୋ ପାଖକୁ ଆସ Ι ମୁଁ ତ୍ରିଭୁବନରେ ଭ୍ରମଣ କରିଛି Ι ଅନେକ ଅପରୂପା ରୂପବତୀଙ୍କ ସାନ୍ନିଧ୍ୟ ଲାଭ କରିଛି Ι କିନ୍ତୁ ତୁମ ପରି ସୁନ୍ଦରୀ ମୁଁ କେଉଁଠି ଦେଖି ନାହିଁ Ι ତୁମର ଏ କାମୋଦ୍ଦୀପକ ଉଦ୍ଦାମ ଯୌବନ ଦର୍ଶନରେ ମୋର ମନ ପ୍ରାଣ ବିଚଳିତ ହୋଇ ଉଠୁଛି Ι ଆସ, ମୋତେ ରତିସୁଖ ଦେଇ ମୋର ମନସ୍କାମନା ପୂର୍ଣ୍ଣ କର Ι ମୁଁ ତ୍ରୈଲୋକ୍ୟପତି ରାବଣ Ι ପ୍ରତି ବଦଳରେ ଯାହା ଚାହିଁବ, ମୁଁ ତୁମକୁ ଦେବି Ι" ରମ୍ଭା କହିଲେ, "ଛି ଛି, ଆପଣ କାହାକୁ କଣ କହୁଛନ୍ତି ? ମୁଁ ରମ୍ଭା, ଆପଣଙ୍କ ଭ୍ରାତୃଷ୍ପୁତ୍ର ନଲକୁବେର ମୋ ସ୍ୱାମୀ Ι ଆପଣ ମୋ ଶ୍ୱଶୁର କୁବେରଙ୍କ ଭାଇ Ι ମୋର ଶ୍ୱଶୁର ଅର୍ଥାତ୍ ପିତୃତୁଲ୍ୟ Ι ଆପଣଙ୍କ ମୁଖରେ ମୋ ଉଦ୍ଦେଶ୍ୟରେ ଏପରି ଭାଷା ଆଦୌ ଶୋଭା ପାଉନାହିଁ Ι ମୁଁ ଆପଣଙ୍କୁ ପ୍ରଣାମ କରୁଛି Ι ମୋତେ ଯିବାକୁ ଦିଅନ୍ତୁ Ι' ରାବଣ କହିଲେ," ତୁମ୍ଭେମାନେ କେବେଠାରୁ କାହାର ବଧୂ ହେଲଣି ? ମୁଁ କଣ ଜାଣିନାହିଁ ତୁମ୍ଭେମାନେ ସ୍ୱର୍ଗର ରୂପଜୀବି ବୋଲି ? କାହାର ପତ୍ନୀ ହେବାର ଦ୍ୱାହି ଦେଇ ତୁମେ ତ୍ରାହି ପାଇ ପାରିବ ନାହିଁ Ι ତୁମ୍ଭେ ସ୍ୱେଚ୍ଛାରେ ଦେହଦାନ ନ କଲେ ମୁଁ ବଳ ପ୍ରୟୋଗ କରିବି ଏବଂ ମୋତେ ବାଧା ଦେବାକୁ ତ୍ରିଭୁବନରେ କେହି ନାହିଁ Ι' ରାବଣ ରମ୍ଭାଙ୍କର ପ୍ରବଳ ବିରୋଧ ସତ୍ତ୍ୱେ ଏକ ଘୃଣ୍ୟ ଅନୈତିକ କାର୍ଯ୍ୟ କରି ବସିଲେ Ι କୌଣସି ସ୍ତ୍ରୀ, ସେ ବାରାଙ୍ଗନା ହେଉନା କାହିଁକି, ଇଚ୍ଛା ବିରୁଦ୍ଧରେ ସମ୍ଭୋଗ କରିବା ବଳାତ୍କାର ଏବଂ ବଳାତ୍କାର ଏକ ଜଘନ୍ୟ ଅପରାଧ Ι ରାବଣ ନିଜର ଅହଙ୍କାରରେ ଅନ୍ଧ ହୋଇ ସେ ଅପରାଧ କରିବାକୁ ତିଳେ ହେଲେ ଦ୍ଵିଧା ବୋଧ କଲେ ନାହିଁ Ι ରମ୍ଭାଙ୍କର ପ୍ରତିରୋଧର ସମସ୍ତ ଚେଷ୍ଟା ବିଫଳ ହେଲା Ι ନିକଟରେ କେହି ନ ଥିଲେ ତାଙ୍କର ଚିତ୍କାର ଶୁଣିବା ପାଇଁ Ι ଥିଲେ ମଧ୍ୟ ରାବଣ ବିରୁଦ୍ଧରେ ଯାଇ ତାଙ୍କୁ ରକ୍ଷା କରିଥାନ୍ତା କିଏ ? ମୁକ୍ତ ଆକାଶ ତଳେ ସେହି ନିର୍ଲଜ୍ଜ ବିଭତ୍ସ ପାଶବିକ କ୍ରିୟା ସଂଘଟିତ ହେଲା Ι ଅସଂଯତ ବେଶ ଭୂଷାରେ କ୍ରନ୍ଦନରତା ରମ୍ଭାଙ୍କୁ ଛାଡି ରାବଣ ଚାଲି ଯାଉଥିଲେ Ι ଅନ୍ୟ ପଟରୁ ଆସୁଥିଲେ ରମ୍ଭାଙ୍କ ପତି ନଳକୁବେର Ι କ୍ଷଣକ ମଧ୍ୟରେ ସେ ପରିସ୍ଥିତି ବୁଝିଗଲେ Ι ଗମନୋଦ୍ୟତ ରାବଣଙ୍କୁ ଡାକି ସେ କହିଲେ," ରହିଯାଅ ଲଙ୍କେଶ୍ଵର Ι କ୍ଷମତାରେ ଉନ୍ମତ୍ତ ହୋଇ କୁତ୍ସିତ, କଳଙ୍କିତ କାର୍ଯ୍ୟଟିଏ କରିଗଲ Ι ତାର ପରିଣାମ ଶ୍ରବଣ କରିବାକୁ ଅପେକ୍ଷା କରିବ ନାହିଁ ? ମୋର ଶକ୍ତି ନାହିଁ ତୁମକୁ ଆକ୍ରମଣ କରି ହତ୍ୟା କରିବାକୁ କିମ୍ବା କୌଣସି ଶାରୀରିକ କ୍ଷତି ପହଞ୍ଚାଇବାକୁ Ι କିନ୍ତୁ ଏହି ଅସହାୟା ନାରୀକୁ ନ୍ୟାୟ ଦେବାକୁ, ତାର ସ୍ୱାମୀ, ନିଜର ସାରା ଜନ୍ମର ସଞ୍ଚିତ ସମସ୍ତ ପୂଣ୍ୟ ବଦଳରେ ତୁମକୁ ଅଭିଶାପ ଦେଉଛି Ι" ପୁନର୍ବାର କୌଣସି ନାରୀକୁ ତାର ଇଚ୍ଛା ବିରୁଦ୍ଧରେ ରମଣ କଲେ, ତୁମ୍ଭର ମସ୍ତକ ସପ୍ତଧା ବିଦୀର୍ଣ୍ଣ ହେବ Ι“ ଆଲୁଳାୟିତକେଶା, ଅର୍ଦ୍ଧ ଉଲଗ୍ନା ପତ୍ନୀର କେଶବାସ ସୁସଂଯତ ଅବସ୍ଥାରେ ବ୍ୟବସ୍ଥିତ କରି ନଳକୁବେର ଆଦରର ସହିତ ତାକୁ ଅନ୍ତଃପୁରକୁ ଘେନିଗଲେ Ι ରାବଣଙ୍କ ଜୀବନରେ ତାହାହିଁ ଥିଲା ନାରୀର ଇଚ୍ଛା ବିରୁଦ୍ଧରେ ସର୍ବଶେଷ ବଳାତ୍କାର Ι

[କ୍ରମଶଃ]

✿❁❣️༒ *ଜୟ ଶ୍ରୀ ରାମ*༒ ❣️❁✿

*=≠≠=====ଆଜି ପାଇଁ ସମାପ୍ତ==≠====*

🏵️🏵️🙏 *ଶୁଭ ରାତ୍ରି* 🙏🏵️🏵️

ଆଜିର ପୌରାଣିକ କାହାଣୀ ଅଭିଶପ୍ତ ଦ୍ୱାରପାଳ, ଦ୍ଵିତୀୟ ଅଧ୍ୟାୟ ଭାଗ - ୧୪

ଆଜିର ପୌରାଣିକ କାହାଣୀ ଅଭିଶପ୍ତ ଦ୍ୱାରପାଳ, ଦ୍ଵିତୀୟ ଅଧ୍ୟାୟ ଭାଗ - ୧୪