.

*ଆସନ୍ତୁ ପଢିବା ଆଜିର ପୌରାଣିକ କାହାଣୀ*

*ଅଭିଶପ୍ତ ଦ୍ୱାରପାଳ, ଦ୍ଵିତୀୟ ଅଧ୍ୟାୟ*

*!! ଭାଗ - ୧୩ !!*

*ଡା.କୃପାସିନ୍ଧୁ ମିଶ୍ର*

✤●○●○●○✤‼️✤○●○●○●✤

*ସୌଜନ୍ୟ: ଆଧ୍ୟାତ୍ମ ଜଗତ ହ୍ବାଟ୍ସଆପ୍ ଗୃପ୍*

✤●○●○●○✤♾️✤○●○●○●✤

*══━━━━✥◈❤️◈✥━━━━══*

କୁମ୍ଭକର୍ଣ୍ଣଙ୍କର ବିବାହ ଦାନବରାଜ ବଳୀଙ୍କର କନ୍ୟା ବଜ୍ରଜ୍ଜ୍ୱାଳା ଓ ବିଭୀଷଣଙ୍କର ବିବାହ ଗନ୍ଧର୍ବରାଜ ଶୈଳେଶଙ୍କ ପୁତ୍ରୀ ସରମା ସହିତ ସମ୍ପନ୍ନ ହୋଇଥିଲା Ι ରାବଣଙ୍କ ସମୟରେ ମଧ୍ୟ ସମ୍ମାନ ପାଇଁ ହତ୍ୟା (ଅନର କିଲିଂ) ହେଉଥିଲା Ι ରାବଣଙ୍କ ଇଚ୍ଛା ବିରୁଦ୍ଧରେ ସୂର୍ପଣଖା ବିଦ୍ୟୁଜ୍ଜିହ୍ୱ ନାମକ ଏକ ଅସୁର ଯୁବକକୁ ପ୍ରେମ ବିବାହ କରିଥିଲେ Ι କିନ୍ତୁ ବ୍ରାହ୍ମଣ କନ୍ୟା ସୂର୍ପନଖାଙ୍କୁ ଏକ ସୁପଣ୍ଡିତ, ସୁନ୍ଦର, ଶକ୍ତିଶାଳୀ ତଥା ଉଚ୍ଚ ବର୍ଣ୍ଣର ଯୁବକ ସହିତ ବିବାହ ଦେବା ତାଙ୍କର ଇଚ୍ଛା ଥିଲା Ι ସୂର୍ପଣଖାଙ୍କ ଜିଦ୍ ଓ ମାତା ନିକଷାଙ୍କ ସ୍ଵୀକୃତି ଯୋଗୁଁ ବିବାହ ସମ୍ପନ୍ନ ହେଲା Ι କିନ୍ତୁ ରାବଣ ସୁଯୋଗ ଅପେକ୍ଷାରେ ଥିଲେ Ι ଥରେ ସୂର୍ପଣଖା ପିତୃଗୃହକୁ ଆସିଥିଲେ Ι ରାବଣ ବିଦ୍ୟୁଜ୍ଜିହ୍ୱଙ୍କ ଗୃହକୁ ଯାଇ ଅନ୍ୟମାନଙ୍କ ଅଜ୍ଞାତରେ ତାକୁ ହତ୍ୟା କରିଦେଲେ Ι କିନ୍ତୁ ସୂର୍ପଣଖା ତାହା ଜାଣିପାରିଲେ Ι ସେ ଶ୍ୱଶୁରାଳୟକୁ ଗଲେନାହିଁ Ι ସେ ନାନା ମାୟା ଜାଣିଥିଲେ Ι ଶୂନ୍ୟରେ ଗତି କରି ପାରୁଥିଲେ Ι ରୂପ ବଦଳାଇ ପାରୁଥିଲେ Ι ସେ ଭାରତର ଦଣ୍ଡକାରଣ୍ୟ ଅଞ୍ଚଳରେ ଖର ଓ ଦୂଷଣଙ୍କ ଭଳି ଅନ୍ୟ ଅସୁର ସମ୍ପର୍କୀୟମାନଙ୍କ ନିକଟରେ ରହି କାଳ ବିତାଇଲେ Ι ଅନ୍ତର ମଧ୍ୟରେ ଅଗ୍ରଜଙ୍କ ପ୍ରତି ପୁଞ୍ଜିଭୂତ ଆକ୍ରୋଶ ଧରି ଉପାୟହୀନା ସୂର୍ପଣଖା ପ୍ରତିଶୋଧ ନେବାପାଇଁ ସୁଯୋଗ ଅପେକ୍ଷାରେ ରହିଲେ Ι

ରାବଣଙ୍କର ମନ୍ଦୋଦରୀଙ୍କ ଭିନ୍ନ ଅନ୍ୟ ଦୁଇଟି ରାଣୀ ଥିଲେ ବୋଲି କେତେକ ପୁରାଣରେ ଉଲ୍ଲେଖ ଅଛି Ι ତାଙ୍କର ଖର ଦୂଷଣ, ମହୀରାବଣ ନାମରେ ଅନ୍ୟ ତିନୋଟି ସମ୍ପର୍କୀୟ ଭାଇ ଥିଲେ Ι ତିନିରାଣୀଙ୍କଠାରୁ ମେଘନାଦ, ଅକ୍ଷୟ କୁମାର ନରାନ୍ତକ, ଦେବାନ୍ତକ, ଅତିକାୟ, ତ୍ରିଶିରା ଓ ପ୍ରହସ୍ତ ନାମରେ ପୁତ୍ରମାନେ ଜନ୍ମ ହୋଇଥିଲେ Ι ସୁମାଳିଙ୍କ ପତ୍ନୀ ଥିଲେ ତାଡକା Ι ନିକଷାଙ୍କର ଦୁଇଟି ଭାଇ ଅର୍ଥାତ୍ ରାବଣଙ୍କର ମାମୁ ଥିଲେ, ସୁବାହୁ ଓ ମାରୀଚ Ι

ରାବଣ ରାଜ୍ୟବିସ୍ତାର ନାମରେ ଅନେକ ଦୁର୍ବଳ ରାଜାଙ୍କୁ ହତ୍ୟା କରିଥିଲେ Ι ଦେବତା, ଅସୁର ଓ ମନୁଷ୍ୟମାନଙ୍କର ଯୁବତୀ କନ୍ୟା ଓ ସ୍ତ୍ରୀମାନଙ୍କୁ ଯଥେଚ୍ଛା ବଳପୂର୍ବକ ହରଣ କରି ଉପଭୋଗ କରୁଥିଲେ Ι ଅସହାୟା ନାରୀମାନଙ୍କର କରୁଣ ପ୍ରାର୍ଥନା ତାଙ୍କ ମନରେ ତିଳେ ହେଲେ ଦୟାର ସଞ୍ଚାର କରୁ ନ ଥିଲା Ι ଧର୍ଷିତା ନାରୀମାନଙ୍କର ଅଭିଶାପ ଶୁଣି ସେ ତାକୁ ଏକ ଦୁର୍ଦ୍ଦାନ୍ତ ଖଳନାୟକ ଭଳି ପ୍ରଚଣ୍ଡ ହସରେ ଉଡାଇ ଦେଉଥିଲେ Ι ଅନେକ ତାଙ୍କ ବଳାତ୍କାରର ଶିକାର ହୋଇ ଆତ୍ମହତ୍ୟା କରୁଥିଲେ Ι ବିଷ୍ଣୁଙ୍କୁ ସ୍ୱାମୀ ଭାବରେ ପାଇବା ପାଇଁ ତପସ୍ୟା କରୁଥିବା ବେଦମତୀ ନାମକ କନ୍ୟାକୁ ଅପହରଣ କରିବାକୁ ଉଦ୍ୟମ କଲାରୁ ସେ ଅଗ୍ନିରେ ପ୍ରବେଶ କରି ଆତ୍ମହତ୍ୟା କରିଥିଲେ Ι ବୈଦେହୀଶ ବିଳାଶରେ କବିସମ୍ରାଟ ଲେଖିଛନ୍ତି , "ବେଦମତୀରେ ମତି ବଳାଇ , ଦେଲା ସେ କନ୍ୟା ତନୁ ଜଳାଇ , ମୋ ହେତୁ ମୃତ୍ୟୁ, ଏ ଶାପ ପାଇ ତହୁଁ ଚପଳେ ଯେ" Ι

ଥରେ ରାବଣ ତାଙ୍କ ମାଉସୀ ଝିଅ ଭଉଣୀ କୁମ୍ଭିନାସୀକୁ ଅନ୍ୟ ଏକ ଦୈତ୍ୟ ଉଗ୍ରମଧୁ ଠାରୁ ଉଦ୍ଧାର କରିବା ପାଇଁ କୁବେରଙ୍କ ଅଳକାପୁରୀ ନିକଟସ୍ଥ ଏକ ଅସୁର ରାଜ୍ୟକୁ ଯାଇଥିଲେ Ι ସେଠାରୁ ଫେରିବା ସମୟରେ ଅଳକାପୁରୀର ଅନୁପମ ସୌନ୍ଦର୍ଯ୍ୟ ଓ ସେଠାକାର ପ୍ରାକୃତିକ ପରିବେଶରେ ମୁଗ୍ଧ ହୋଇ ସେ କିଛି ସମୟ ପାଇଁ ସେଠାରେ ଅଟକି ଗଲେ Ι ସେଠାରେ ସେ ନିକଟସ୍ଥ ଏକ ଉଦ୍ୟାନରେ ଭ୍ରମଣ କରୁଥାନ୍ତି Ι ସୁଗନ୍ଧିତ ପୁଷ୍ପମାନଙ୍କର ସୁରଭି, ମଳୟାନିଳର ମାଦକତା ତାଙ୍କ ଶରୀର ଓ ମନକୁ ମୋହାଚ୍ଛନ୍ନ କରିଦେଉଥାଏ Ι ଏହି ସମୟରେ ସେହି ପଥ ଦେଇ କୁବେରଙ୍କ ପୁତ୍ର ନଳକୁବେରଙ୍କ ପତ୍ନୀ ସୁନ୍ଦରୀ ଅପ୍ସରୀ ରମ୍ଭା ଯିବାର ତାଙ୍କ ଦୃଷ୍ଟିରେ ପଡିଲା Ι

[କ୍ରମଶଃ]

✿❁❣️༒ *ଜୟ ଶ୍ରୀ ରାମ*༒ ❣️❁✿

*=≠≠=====ଆଜି ପାଇଁ ସମାପ୍ତ==≠====*

🏵️🏵️🙏 *ଶୁଭ ରାତ୍ରି* 🙏🏵️🏵️

ଆଜିର ପୌରାଣିକ କାହାଣୀ ଅଭିଶପ୍ତ ଦ୍ୱାରପାଳ, ଦ୍ଵିତୀୟ ଅଧ୍ୟାୟ ଭାଗ - ୧୩

ଆଜିର ପୌରାଣିକ କାହାଣୀ ଅଭିଶପ୍ତ ଦ୍ୱାରପାଳ, ଦ୍ଵିତୀୟ ଅଧ୍ୟାୟ ଭାଗ - ୧୩