ଶ୍ରୀମନ୍ଦିର ସ୍ଵତ୍ତ୍ଵଲିପି ଅନୁସାରେ ନିମ୍ନଲିଖିତ ସେବକମାନଙ୍କ ଦ୍ଵାରା ଏହି ନୀତି ସଂପନ୍ନ ହୋଇଥାଏ । ସେମାନେ ହେଲେ-

୧) ପୁଷ୍ପାଳକ

୨) ସୁଆରବଡୁ

୩) ପାଣିଆପଟ

୪) ଖଟୁଳିସେବକ

୫) ଦର୍ପଣିଆ

୬) ମୁଖପଖାଳ ପ୍ରତିହାରୀ

୭) ପୁଷ୍ପାଳକ

୮) ଅଁଳା ଘଟୁଆରୀ

୯) ଭଣ୍ଡାରମେକାପ

୧୦) ମହାଭୋଇ

୧୧) ଜ୍ୟୋତିଷ

ଏଥନିମିତ୍ତ ପିଢା, ପାଣିଗରା, ଖଟୁଳି, ଦାନ୍ତକାଠି, ଜିଭଛେଲା, ବଟା, ଫୁଲ, ତୁଳସୀ, ଚନ୍ଦନ, ଅଁଳା, କର୍ପୂର, ଦର୍ପଣ ଇତ୍ୟାଦି ଉପକରଣମାନ ଆବଶ୍ୟକ ହୁଏ । ଏସବୁର ପ୍ରସ୍ତୁତି ଓ ଅବକାଶ ନୀତି ସରିବାକୁ ପ୍ରାୟ ୪୫ ମିନିଟରୁ ଅଧିକ ସମୟ ଲାଗିଥାଏ ।

ଠାକୁରମାନଙ୍କ ମଙ୍ଗଳଆଳତି ବଢି ମଇଲମ ହୋଇ ତଡ଼ପ ଉତ୍ତରୀୟ ପରିଧାନ ପରେ ପାଣିଆପଟ ସେବକ ବିମଳାମନ୍ଦିର ସମ୍ମୁଖସ୍ଥ କୂଅରୁ ଆଣି ଦିଅନ୍ତି । ସୁଆରବଡୁ ଶୁଦ୍ଧଜଳରେ ଭିତର ପୋଖରିଆ (ଗର୍ଭଗୃହର ରସିଂହାସନସ୍ଥ ସମ୍ମୁଖ ଅଞ୍ଚଳ) ପାଣିପକାଇ ପରିଷ୍କାର କରି ପିଢା, ଖଟୁଳି, ବଟା, ଝରି, ପିଙ୍ଗଣ, ପରଖ, ଦର୍ପଣ ଇତ୍ୟାଦି ସଂସ୍ଥାପନ କରନ୍ତି । ଏହାକୁ “ ଅବକାଶ ପାଣି ପଡିଲା” ବୋଲି କୁହାଯାଏ । ପାଣିଆପଟ ତିନି ଗରା ଜଳ ଓ ତିନି ପିଙ୍ଗଣ ଏବଂ ଝରି ପାଇଁ ଅଲଗା ଜଳ ଯୋଗାନ୍ତି ।

ସୁଆରବଡୁ ତିନିଦିଅଁଙ୍କ ସାମନାରେ ରନ୍‌ସିଂହାସନ ତଳେ ପୋଖରିଆର ମଧ୍ୟଭାଗରେ ତିନିଗୋଟି କାଠ ପିଢା ଆସନ ପକାଇଥାନ୍ତି । ଖଟୁଳି ସେବକ ତିନିଗୋଟି ଖଟୁଳି ( ଏହା କାଷ୍ଠ ଓ ରୂପାରେ ତିଆରି ପ୍ରାୟ ଦେଢଫୁଟ ଉଚ୍ଚତା ବିଶିଷ୍ଟ) ପିଢା ପାଖରେ ରଖୁଥାନ୍ତି । ମୁଖପଖାଳ ପ୍ରତିହାରି ତିନୋଟି ବଟା ଓ ତିନିଗୋଟି ରୂପାଥାଳି ସଜାଡି ସେଥୁରେ ଫୁଲ, ତୁଳସୀ, ଚନ୍ଦନ, ଅଁଳା ରଖନ୍ତି । ପ୍ରାୟ ବାରଇଞ୍ଚ ଲମ୍ବର ତିନୋଟି ମୁତୁରି ଦାନ୍ତକାଠି ଗାରଦରୁ ଆଣି ତାର ଅଗ୍ରଭାଗକୁ ଛେଚି, ସେଥ‌ିରେ କର୍ପୂର ଓ ଗୁଆଗୁଣ୍ଡ ଲଗାଇ ରଖାଯାଏ । ମୁଖପଖାଳ ସେବକ ଭଣ୍ଡାର ମେକାପଠାରୁ ତିନୋଟି ଜିଭିଛେଲା ଯାହା ଛୋଟ ବଡ ଏମିତି ତିନି ଆକୃତିର ସୁବର୍ଣ୍ଣ ନିର୍ମିତ ହୋଇଥାଏ, ତାକୁ ମଧ୍ୟ ଆଣି ରଖାଯାଏ । ଗରାବଡୁ ସେବକ ତିନିଗୋଟି ରୂପାଝରି, ତିନିପିଢା ପାଖରେ ରଖନ୍ତି, ଦର୍ପଣିଆ ତିନୋଟି ଦର୍ପଣ ଆଣି ଗରାବଡୁଙ୍କୁ ଦିଅନ୍ତି | ଏହି ଦର୍ପଣ ଗୁଡିକ ଅଷ୍ଟଧାତୁ ନିର୍ମିତ ଅଟେ । ଗରାବଡୁ ସେ ଦର୍ପଣ ତିନୋଟିରେ ପୁଣିଥରେ ପାଣିଛିଞ୍ଚି ଖଟୁଳି ପିଢା ନିକଟରେ ରଖନ୍ତି । ପାଣିଆପଟ ତିନୋଟି ପିଢା ପାଖରେ ତିନିଗର ପାଣି ଓ ଆଉ ଗୋଟିଏ ଗରାପାଣି ଅଲଗା ରଖନ୍ତି । ଚତୁର୍ଥଗରା ପାଣିରେ କର୍ପୂର ମିଶାଯାଏ । ମୁଖପଖାଳ ସେବକ ସମସ୍ତ ପ୍ରସ୍ତୁତି ପରେ ସିଂହାସନ ନିକଟକୁ ଯାଇ “ ପୂଜା ବସାଇବାକୁ ଓହ୍ଲାଇବା ହେଉ” ଏମିତି ତିନିଥର ଡାକ ଦେଲାପରେ ତିନିଜଣ ପୁଷ୍ପାଳକ ସିଂହାସନରେ ଠାକୁରଙ୍କୁ ପ୍ରଣିପାତ ହୋଇ ପୂଜା ଠା ନିକଟରେ ଆସି ବସନ୍ତି । ତା ପରେ ପୂଜା ଆରମ୍ଭ ହୁଏ । ସିଂହାସନ ସମ୍ମୁଖରେ ପଡିଥିବା ଖଟୁଳି ଉପରେ ତିନୋଟି ପାହାଡା ପଡିଥାଏ । ଠାକୁରଙ୍କୁ ଆବାହନ ପୂଜା କରି ତିନିପୁଷ୍ପାଳକ ଠାକୁରଙ୍କୁ ଆମନ୍ତ୍ରଣ କରିଥାନ୍ତି ଖଟୁଳି ଉପରକୁ । ସୁବାସିତ ଜଳରେ ସାତବିଗ୍ରହଙ୍କର ମୁଖ ପ୍ରକ୍ଷାଳନ କରିଥାନ୍ତି । ଦ୍ଵାଦଶବାର ଗଣ୍ଡୁଷ ଜଳଦ୍ଵାରା ଶ୍ରୀମୁଖ ପ୍ରକ୍ଷାଳନ କରାଯାଇଥାଏ । ପ୍ରସ୍ତୁତ ଥିବା ଦ୍ଵାଦଶ ଆଙ୍ଗୁଳିବିଶିଷ୍ଟ ଦାନ୍ତକାଠିକୁ ସଂସ୍କାରାଦି ମନ୍ତ୍ରରେ ଦନ୍ତ ମାର୍ଜନ ପରେ ପୁଣିଥରେ ଦ୍ଵାଦଶବାର ଗଣୁଷ ଜଳରେ ମୁଖମାର୍ଜନ ପରେ ଜିଭିଦ୍ଵାରା ଜିହ୍ବାଲେହନ କାର୍ଯ୍ୟ କରାଯାଇଥାଏ ଓ ପୁଣି ଶ୍ରୀମୁଖ ଧୁଆଯାଏ ।

ଶୁଦ୍ଧଜଳରେ ସିଂହାରୀ ଦର୍ପଣକୁ ପରିଷ୍କାର କରିବେ ଓ ଖଟୁଳି ସମ୍ମୁଖରେ ଥିବା ପରଖକୁ ଧୋଇ ସେଥ‌ିରେ ସଂସ୍ଥାପନ କରିବେ । ଆବାହନାଦି ଦଶମୁଦ୍ରା ଦର୍ଶାଇ ଠାକୁରଙ୍କୁ ଆବାହନ କରାଯିବ । ହାତଧୋଇ ଚନ୍ଦନ ତୁଳସୀ ଦେଇ ପଞ୍ଚାମୃତ ସଂସ୍କାର କରିବେ । ପଞ୍ଚାମୃତ ମନ୍ତ୍ରରେ ସ୍ନାନ କରାଇବେ । ଅଁଳା ଚନ୍ଦନଦ୍ଵାରା ପୁନଃ ସ୍ନାନାଦି କାର୍ଯ୍ୟ ସମାପନ ହେବା ପରେ, ପୁଣିଥରେ ଶୁଦ୍ଧଜଳରେ ସ୍ନାନକାର୍ଯ୍ୟ ହୋଇ ଖଟୁଳିସ୍ଥିତ ପାହାଡା ଉଠାଯାଇ, ଦର୍ପଣ ଉପରେ ପଡ଼ୁଥ‌ିବା ପ୍ରତିବିମ୍ବ ଉପରେ ପକାଇ ଠାକୁରମାନଙ୍କର ସ୍ନାନକାର୍ଯ୍ୟ କରାଯାଇଥାଏ । ସ୍ଵତନ୍ତ୍ର ସ୍ନାନମନ୍ତ୍ରରେ ପୁଷ୍ପାଳକମାନେ ଶ୍ରୀବିଗ୍ରହମାନଙ୍କର ସ୍ନାନବିଧ୍ଵ ପଞ୍ଚଉପସ୍ପରରେ କରିଥାନ୍ତି । ଏ ସବୁ ନୀତି ଋଲୁଥ‌ିବା ବେଳେ ଶ୍ରୀମନ୍ଦିର ଜ୍ୟୋତିଷ ସେବକ ରସିଂହାସନ ଆଗରେ ଦଣ୍ଡାୟମାନ ହୋଇ ସେ ଦିନର ତିଥ୍‌, ବାର, ନକ୍ଷତ୍ର ଓ ଗ୍ରହଚଳନ ବିଷୟରେ ଶ୍ରୀମନ୍ଦିର ପଞ୍ଜିକାରେ ଉଲ୍ଲେଖୁ ତଥ୍ୟ ଅବଗତ କରାଇଥାନ୍ତି । ଯେଉଁଦିନ ଠାକୁରମାନଙ୍କର ଜନ୍ମ ନକ୍ଷତ୍ର ପଡେ, ସେଦିନ ମଧ୍ୟାହ୍ନ ଧୂପ ପରେ ନକ୍ଷତ୍ର ବନ୍ଦାପନା ନୀତି ହୋଇଥାଏ । ଏ ନୀତି ହେଉଥିଲା ବେଳେ ସର୍ବସାଧାରଣ ଭିତର ଅର୍ଗଳୀ ପାଖରେ ରହି ଦର୍ଶନ କରିପାରିବେ । ଏହି ସ୍ନାନଜଳ ପାଦୁକ ଭାବରେ ଉପସ୍ଥିତ ଭକ୍ତମାନଙ୍କ ମଧ୍ୟରେ ବିତରିତ ହୋଇଥାଏ ।

ଅବକାଶ ପରେ ଠାକୁରଙ୍କ ମଇଲମ ଓ ବେଶ ହୋଇ “ ସାହାଣମେଲା” ହେବାର ବିଧ୍ । ସାହାଣମେଲା ହେଉଛି ସର୍ବସାଧାରଣ ଦର୍ଶନ, ଯେଉଁଥିରେ ସର୍ବସାଧାରଣ ବିନା ପରିମାଣିକ ଟିକେଟ୍‌ରେ ରନ୍‌ସିଂହାସନକୁ ପରିକ୍ରମା କରିବାର ସୁଯୋଗ ପାଇଥାନ୍ତି । କିନ୍ତୁ ବର୍ତ୍ତମାନ ଏହି ସୁବିଧା ଉପଲବ୍ଧ ନାହିଁ । ଭକ୍ତମାନଙ୍କୁ ୨୦୧୬ ମସିହାଠାରୁ ଗର୍ଭଗୃହ ବା ରସିଂହାସନ ପାଖକୁ ଯାଇ ଶ୍ରୀଜୀଉଙ୍କର ଦର୍ଶନ କରିବାର ଅନୁମତି ନାହିଁ ।