।। ପଦ୍ମପୁରାଣାନ୍ତର୍ଗତମ୍ ॥

🌹ଶ୍ରୀଗଣେଶାୟ ନମଃ 🌹

ଅଦିତିରୁଵାଚ ।

ନମସ୍ତେ ଦେଵଦେଵେଶ ସର୍ଵଵ୍ୟାପିନ୍ ଜନାର୍ଦନ ।

ସତ୍ତ୍ଵାଦିଗୁଣଭେଦେନ ଲୋକଵ୍ୟାପାରକାରିଣେ ॥ ୧॥

ନମସ୍ତେ ବହୁରୂପାୟ ଅରୂପାୟ ନମୋ ନମଃ ।

ସର୍ଵୈକାଦ୍ଭୁତରୂପାୟ ନିର୍ଗୁଣାୟ ଗୁଣାତ୍ମନେ ॥ ୨॥

ନମସ୍ତେ ଲୋକନାଥାୟ ପରମଜ୍ଞାନରୂପିଣେ ।

ସଦ୍ଭକ୍ତଜନଵାତ୍ସଲ୍ୟଶୀଲିନେ ମଙ୍ଗଲାତ୍ମନେ ॥ ୩॥

ୟସ୍ୟାଵତାରରୂପାଣି ହ୍ୟର୍ଜୟନ୍ତି ମୁନୀଶ୍ଵରାଃ ।

ତମାଦିପୁରୁଷଂ ଦେଵଂ ନମାମୀଷ୍ଟାର୍ଥସିଦ୍ଧୟେ ॥ ୪॥

ୟଂ ନ ଜାନନ୍ତି ଶ୍ରୁତୟୋ ୟଂ ନ ଜାନନ୍ତି ସୂରୟଃ ।

ତଂ ନମାମି ଜଗଦ୍ଧେତୁଂ ମାୟିନଂ ତମମାୟିନମ୍ ॥ ୫॥

ୟସ୍ୟାଵଲୋକନଂ ଚିତ୍ରଂ ମାୟୋପଦ୍ରଵଵାରଣମ୍ ।

ଜଗଦ୍ରୂପଂ ଜଗତ୍ପାଲଂ ତଂ ଵନ୍ଦେ ପଦ୍ମଜାଧଵମ୍ ॥ ୬॥

ୟୋ ଦେଵସ୍ତ୍ୟକ୍ତସଙ୍ଗାନାଂ ଶାନ୍ତାନାଂ କରୁଣାର୍ଣଵଃ ।

କରୋତି ହ୍ୟାତ୍ମନା ସଙ୍ଗଂ ତଂ ଵନ୍ଦେ ସଙ୍ଗଵର୍ଜିତମ୍ ॥ ୭॥

ୟତ୍ପାଦାବ୍ଜଜଲକ୍ଲିନ୍ନସେଵାରଞ୍ଜିତମସ୍ତକାଃ ।

ଅଵାପୁଃ ପରମାଂ ସିଦ୍ଧିଂ ତଂ ଵନ୍ଦେ ସର୍ଵଵନ୍ଦିତମ୍ ॥ ୮॥

ୟଜ୍ଞେଶ୍ଵରଂ ୟଜ୍ଞଭୁଜଂ ୟଜ୍ଞକର୍ମସୁ ନିଷ୍ଠିତମ୍ ।

ନମାମି ୟଜ୍ଞଫଲଦଂ ୟଜ୍ଞକର୍ମପ୍ରବୋଧକମ୍ ॥ ୯॥

ଅଜାମିଲୋଽପି ପାପାତ୍ମା ୟନ୍ନାମୋଚ୍ଚାରଣାଦନୁ ।

ପ୍ରାପ୍ତଵାନ୍ପରମଂ ଧାମ ତଂ ଵନ୍ଦେ ଲୋକସାକ୍ଷିଣମ୍ ॥ ୧୦॥

ବ୍ରହ୍ମାଦ୍ୟା ଅପି ୟେ ଦେଵା ୟନ୍ମାୟାପାଶୟନ୍ତ୍ରିତାଃ ।

ନ ଜାନନ୍ତି ପରଂ ଭାଵଂ ତଂ ଵନ୍ଦେ ସର୍ଵନାୟକମ୍ ॥ ୧୧॥

ହୃତ୍ପଦ୍ମନିଲୟୋଽଜ୍ଞାନାଂ ଦୂରସ୍ଥ ଇଵ ଭାତି ୟଃ ।

ପ୍ରମାଣାତୀତସଦ୍ଭାଵଂ ତଂ ଵନ୍ଦେ ଜ୍ଞାନସାକ୍ଷିଣମ୍ ॥ ୧୨॥

ୟନ୍ମୁଖାଦ୍ବ୍ରାହ୍ମଣୋ ଜାତୋ ବାହୁଭ୍ୟଃ କ୍ଷତ୍ରିୟୋଽଜନି ।

ତଥୈଵ ଊରୁତୋ ଵୈଶ୍ୟଃ ପଦ୍ଭ୍ୟାଂ ଶୂଦ୍ରୋ ଅଜାୟତ ॥ ୧୩॥

ମନସଶ୍ଚନ୍ଦ୍ରମା ଜାତୋ ଜାତଃ ସୂର୍ୟଶ୍ଚ ଚକ୍ଷୁଷଃ ।

ମୁଖାଦିନ୍ଦ୍ରସ୍ତଥାଗ୍ନିଶ୍ଚ ପ୍ରାଣାଦ୍ଵାୟୁରଜାୟତ ॥ ୧୪॥

ତ୍ଵମିନ୍ଦ୍ରଃ ପଵନଃ ସୋମସ୍ତ୍ଵମୀଶାନସ୍ତ୍ଵମନ୍ତକଃ ।

ତ୍ଵମଗ୍ନିର୍ନିରୃତିଶ୍ଚୈଵ ଵରୁଣସ୍ତ୍ଵଂ ଦିଵାକରଃ ॥ ୧୫॥

ଦେଵାଶ୍ଚ ସ୍ଥାଵରାଶ୍ଚୈଵ ପିଶାଚାଶ୍ଚୈଵ ରାକ୍ଷସାଃ ।

ଗିରୟଃ ସିଦ୍ଧଗନ୍ଧର୍ଵା ନଦ୍ୟୋ ଭୂମିଶ୍ଚ ସାଗରାଃ ॥ ୧୬॥

ତ୍ଵମେଵ ଜଗତାମୀଶୋ ପୁନ୍ନାମାସ୍ତି ପରାତ୍ପରଃ । var ୟନ୍ନାମାସ୍ତି

ତ୍ଵଦ୍ରୂପମଖିଲଂ ତସ୍ମାତ୍ପୁତ୍ରାନ୍ମେ ପାହି ଶ୍ରୀହରେ ॥ ୧୭॥

ଇତି ସ୍ତୁତ୍ଵା ଦେଵଧାତ୍ରୀ ଦେଵଂ ମତ୍ଵା ପୁନଃ ପୁନଃ । var ନତ୍ଵା

ଉଵାଚ ପ୍ରାଞ୍ଜଲିର୍ଭୂତ୍ଵା ହର୍ଷାଶ୍ରୁକ୍ଷାଲିତସ୍ତନୀ ॥ ୧୮॥

ଅନୁଗ୍ରାହ୍ୟାଽସ୍ମି ଦେଵେଶ ହରେ ସର୍ଵାଦିକାରଣ ।

ଅକଣ୍ଟକଶ୍ରିୟଂ ଦେହି ମତ୍ସୁତାନାଂ ଦିଵୌକସାମ୍ ॥ ୧୯॥

ଅନ୍ତର୍ୟାମିନ୍ ଜଗଦ୍ରୂପ ସର୍ଵଭୂତପରେଶ୍ଵର ।

ତଵାଜ୍ଞାତଂ କିମସ୍ତୀହ କିଂ ମାଂ ମୋହୟସି ପ୍ରଭୋ ॥ ୨୦॥

ତଥାପି ତଵ ଵକ୍ଷ୍ୟାମି ୟନ୍ମେ ମନସି ଵର୍ତତେ ।

ଵୃଥାପୁତ୍ରାସ୍ମିଦେଵେଶ ରକ୍ଷୋଭିଃ ପରିପୀଡିତା ॥ ୨୧॥

ଏତାନ୍ନ ହନ୍ତୁମିଚ୍ଛାମି ମତ୍ସୁତା ଦିତିଜାତୟଃ । var ଦିତିଜା ୟତଃ

ତାନହତ୍ଵା ଶ୍ରିୟଂ ଦେହି ମତ୍ସୁତାନାମୁଵାଚ ସା ॥ ୨୨॥

ଇତ୍ୟୁକ୍ତୋ ଦେଵଦେଵସ୍ତୁ ପୁନଃ ପ୍ରୀତିମୁପାଗତଃ ।

ଉଵାଚ ହର୍ଷୟନ୍ସାଧ୍ଵୀଂ କୃପୟାଽଭିପରିପ୍ଲୁତଃ ॥ ୨୩॥

ଶ୍ରୀଭଗଵାନୁଵାଚ ।

ପ୍ରୀତୋଽସ୍ମି ଦେଵି ଭଦ୍ରଂ ତେ ଭଵିଷ୍ୟାମି ସୁତସ୍ତଵ ।

ୟତଃ ସପତ୍ନୀତନୟେଷ୍ଵପି ଵାତ୍ସଲ୍ୟଶାଲିନୀ ॥ ୨୪॥

ତ୍ଵୟା ଚ ମେ କୃତଂ ସ୍ତୋତ୍ରଂ ପଠନ୍ତି ଭୁଵି ମାନଵାଃ ।

ତେଷାଂ ପୁତ୍ରା ଧନଂ ସମ୍ପନ୍ନ ହୀୟନ୍ତେ କଦାଚନ ॥ ୨୫॥

ଅନ୍ତେ ମତ୍ପଦମାପ୍ନୋତି ୟଦ୍ଵିଷ୍ଣୋଃ ପରମଂ ଶୁଭମ୍ ॥ ୨୬॥

ଇତି ଶ୍ରୀପଦ୍ମପୁରାଣାନ୍ତର୍ଗତଂ ଵାମନସ୍ତୋତ୍ରଂ ସମାପ୍ତମ୍ ।

ଅଦିତିକୃତ ଵାମନସ୍ତୋତ୍ରମ୍