ପାଳିଆ ଖୁଣ୍ଟିଆ, ଗରାବଡୁ, ତିନିଜଣ ପାଳିଆ ପୁଷ୍ପାଳକ, ରଙ୍ଗଡାମେକାପ, ତିନିଜଣ ଦତ୍ତମହାପାତ୍ର, ମୁଦୁଲି ଓ ପୂଜାପଣ୍ଡା ସେବକଙ୍କ ଦ୍ଵାରା ଏ ନୀତି ସଂପାଦିତ ହୋଇଥାଏ । ବନକଲାଗି ନିମନ୍ତେ ଋରୋଟି ରଙ୍ଗ ଯଥା, ଧଳା, କଳା, ନାଲି, ହଳଦିଆର ଆବଶ୍ୟକତା ପଡିଥାଏ । ଶଙ୍ଖକୁ ଗୁଣ୍ଡକରି ଧଳାରଙ୍ଗ, ଖାଣ୍ଟି ରାଶିତେଲରେ ଦୀପ ଜାଳି ସଂଗୃହୀତ ହୋଇଥିବା କଳାରଙ୍ଗ, ହିଙ୍ଗୁଳ ଗୁଣ୍ଡକରି ନାଲିରଙ୍ଗ ଓ ହରିତାଳ ଗୁଣ୍ଡକରି ହଳଦିଆ ରଙ୍ଗ ଦତ୍ତମହାପାତ୍ରମାନେ ରଖୁଥାଆନ୍ତି । ଦରକାର ମୁତାବକ ରଙ୍ଗ ମିଶ୍ରିତ କରି ସେଥ‌ିରେ କର୍ପୂର, କେଶର, କସ୍ତୁରୀ, କଇଁଥ ଅଠା ଇତ୍ୟାଦି ସୁଗନ୍ଧ ଦ୍ରବ୍ୟ ମିଶାଯାଇଥାଏ । ପ୍ରତିଥର ବନକଲାଗି ନିମନ୍ତେ ଶ୍ରୀମନ୍ଦିର ପ୍ରଶାସନ ତରଫରୁ ଦରକାର ସାମଗ୍ରୀ ଯଥା, ହିଙ୍ଗୁଳ, ହରିତାଳ, ଶଙ୍ଖ, କେଶର, କର୍ପୂର, କଇଁଥ ଅଠା ଇତ୍ୟାଦି ଯୋଗାଇ ଦିଆଯାଇଥାଏ । ରଙ୍ଗଡାମେକାପ ୩ଖଣ୍ଡ ଶ୍ରୀକପଡା ଏବଂ ମୁଦୁଲି ସେବକ ୩ଟି ରୂପା ପିଙ୍ଗଣ ଓ ୩ଟି ରୂପା ଷଢେଇ ଯୋଗାଇଥାନ୍ତି ।

ମଧ୍ୟାହ୍ନଧୂପ ସରିବାପରେ ଭିତର ପୋଖରିଆ ସଂପୂର୍ଣ ଧୋପଖାଳ ହୁଏ । ଖୁଣ୍ଟିଆ ଦକ୍ଷିଣଦ୍ଵାର ଲଣ୍ଡାବର୍ଷ ଉପରକୁ ଆସି ତିନିଜଣ ପୁଷ୍ପାଳକଙ୍କୁ ମଇଲମ ନିମନ୍ତେ ଡାକନ୍ତି । ତିନିଜଣ ପୁଷ୍ପାଳକ ସିଂହାସନ ଉପରକୁ ଉଠି ଗରାବଡୁଙ୍କଠାରୁ ହାତୁଆଣି ନେଇ ହାତଧୋଇଲା ପରେ ଶ୍ରୀବିଗ୍ରହମାନଙ୍କର ମଇଲମ କରନ୍ତି । ଗଙ୍ଗଡା ମେକାପ ତିନିବାଡ଼ରେ ତଡପ ଯୋଗାନ୍ତି ଓ ମଇଲମ ପରେ ଖୁଣ୍ଟିଆ ଗଭାତୁଳସୀ ଯୋଗାନ୍ତି | ସବୁ ଲାଗି ହେଲାପରେ ତିନିବାଡରେ କର୍ପୂର ଆଳତି ଓ ସଂଜବତୀ ଆଳତି ହୁଏ । ଏହାକୁ ମଧ୍ୟାହ୍ନ ପହୁଡ ଆଳତି କୁହାଯାଏ । ଏହାପରେ ଶ୍ରୀବିଗ୍ରହଙ୍କର ବନକଲାଗି ବା ଶ୍ରୀମୁଖସିଂହାର ନୀତି ଆରମ୍ଭ ହୁଏ । ପ୍ରତିହାରୀ ଜୟବିଜୟ ଦ୍ଵାର ବନ୍ଦ କରନ୍ତି । ଜୟବିଜୟ ଦ୍ଵାର ବନ୍ଦ ହେଲା ପରେ ତିନିଜଣ ଦତ୍ତମହାପାତ୍ର ସେବକ ତିନୋଟି ବନକ ପେଡିରେ ବନକ ରଖ୍ ବେହେରଣ ଦ୍ଵାର ଦେଇ ଭିତରକୁ ଆସି ସିଂହାସନ ଉପରକୁ ଉଠନ୍ତି । ପୂର୍ବରୁ ଦତ୍ତ ମହାପାତ୍ରମାନେ ଶ୍ରୀମନ୍ଦିର ପ୍ରଶାସନ ଯୋଗାଇଥିବା ଥିବା ଦ୍ରବ୍ୟମାନଙ୍କରେ ଶୁଦ୍ଧପୂତ ଭାବରେ ବନକବାଟି ରୂପା ଷଢେଇରେ ରଖିଥାନ୍ତି । ଗରାବଡୁଠାରୁ ଜଳନେଇ ହାତଧୋଇ ଦତ୍ତ ସେବକମାନେ ବନକଲାଗି ଆରମ୍ଭ କରନ୍ତି । ମୁଦୁଲି ସେବକ ଦେଇଥ‌ିବା ରୂପା ପିଙ୍ଗଣରେ ତିନିପୁଷ୍ପାଳକ କର୍ପୂର ଜଳରେ ଶ୍ରୀମୁଖ ଧୋଇ ଶ୍ରୀକପଡାରେ ମୁଖ ପୋଛିଥାନ୍ତି । ଏ ସବୁକାମ ସରିବାକୁ ପ୍ରାୟ ଦୁଇରୁ ଅଢେଇ ଘଣ୍ଟା ସମୟ ଲାଗିଥାଏ । ଦକ୍ଷିଣଦ୍ଵାରରେ ପାଳିଆ ପ୍ରତିହାରୀ ଜଗିଥାନ୍ତି । ଜୟବିଜୟ ଦ୍ଵାର ବନ୍ଦ ରହେ, ଭିତର ଅନ୍ଧକାର କରାଯାଏ । ଏହି ବନକଲାଗି ପ୍ରତ୍ୟେକ ବୁଧବାର ନ ହୋଇ ସ୍ଥଳବିଶେଷରେ କେତେକ ଥର ଗୁରୁବାରେ ମଧ୍ୟ ହୋଇଥାଏ । ଏ ସମୟରେ ଦର୍ଶନ ବନ୍ଦ ରହୁଥ‌ିବାରୁ ଭକ୍ତମାନଙ୍କର ସୁବିଧାକୁ ଦେଖୁ ଶ୍ରୀମନ୍ଦିର ପ୍ରଶାସନ ତରଫରୁ ବନକଲାଗି ହେବାକୁ ଥିବା ଦିନମାନଙ୍କରେ ଆଗରୁ ଟିଭି ଓ ଖବରକାଗଜ ମାଧ୍ୟମରେ ଏ ବିଷୟରେ ଜଣାଇ ଦିଆଯାଇଥାଏ । ବନକଲାଗି ସରିବାପରେ ଦତ୍ତମହାପାତ୍ର ସେବକମାନେ ସିଂହାସନରୁ ଓହ୍ଲାଇଥାନ୍ତି ଓ ପାଳିଆ ମେକାପ ସିଂହାସନ ଉପରକୁ ଉଠି ସିଂହାସନ ଧୋଇଥାଏ । ତିନିପୂଜାପଣ୍ଡା ସିଂହାସନ ତଳେ ଠାକୁରଙ୍କୁ ପଞ୍ଚାମୃତରେ ମହାସ୍ନାନ କରନ୍ତି ଓ ପରେ ପରେ ସେ ଦିନର ଅନ୍ୟାନ୍ୟ ନୀତିମାନ ଅନୁଷ୍ଠିତ ହୁଏ ।