ଏହି ନୀତି ସକାଶେ ଶ୍ରୀମନ୍ଦିର ତରଫରୁ ୧୪ ଗୋଟି ପଇଡ, ଫୁଲ, କର୍ପୂର, ବିଡିଆ, ସିଲ୍‌ମାଟି ଓ ତାଲା ଯୋଗାଇ ଦିଆଯାଇଥାଏ । ପ୍ରାୟ ତେର ପ୍ରକାରର ସେବକ, ଯଥା ୧) ମୁଦୁଲି ୨) ପ୍ରତିହାରୀ ୩) ଖଟଶେଯ ମେକାପ ୪) ସୁଆରବଡୁ ୫) ଭଣ୍ଡାର ମେକାପ ୬) ପାଳିଆ ପୁଷ୍ପାଳକ ୭) ଅଖଣ୍ଡ ମେକାପ ୮) ହଡପ ନାଏକ ୯) ପାଳିଆ ଖୁଣ୍ଟିଆ ୧୦) ପାଳିଆ ପ୍ରତିହାରୀ ୧୧) ତଳିଚ୍ଛ ମହାପାତ୍ର ୧୨) ଗରାବଡୁ ୧୩) ବାସିପାଳିଆ ଗରାବଡୁ ଇତ୍ୟାଦି ସେବକ ଏହି ନୀତି ନିମନ୍ତେ ଆବଶ୍ୟକ । ଶ୍ରୀବିଗ୍ରହମାନଙ୍କର ରାତ୍ର ପହୁଡ ନୀତି ଏ ପ୍ରକାରର ।

ବଡସିଂହାର ଧୂପ ବଢିବା ପରେ ସୁଆରବଡୁ ସେବକ ପୋଖରିଆ ଭିତରେ ପାଣି ପକାଇ ଧୋପଖାଳ ( ପାଣିରେ ଧୁଆଧୋଇ କରି ସଫା କରିବା । ସୁଆରବଡୁ ସେବକ ଗୋଟିଏ ଦିନରେ ଯେତେଥର ମନ୍ଦିର ଭିତର ଧୋଇବା ଆବଶ୍ୟକ ପଡିଥାଏ ସମସ୍ତ ଧୋପଖାଳ କାର୍ଯ୍ୟ କରିଥାନ୍ତି) କରନ୍ତି । ପାଣି ପଡିଲା ପରେ, ପାଳିଆ ଖୁଣ୍ଟିଆ ଡାକିଲେ ଖଟଶେଯ ମେକାପ ବଡ଼ଠାକୁରଙ୍କର ରନ୍‌ଲଙ୍କ ଖଟଶେଯ ଘରୁ ଆଣି ବଡଠାକୁରଙ୍କର ସମ୍ମୁଖରେ ସିଂହାସନ ତଳେ ରଖୁଥାନ୍ତି । ଭଣ୍ଡାର ମେକାପ ଭଣ୍ଡାରଘରୁ ଶୟନ ଠାକୁରଙ୍କୁ ଆଣନ୍ତି ଓ ପାଳିଆ ପୁଷ୍ପାଳକ ହାତଧୋଇ ଶୟନ ଠାକୁରଙ୍କୁ ନେଇ ରସିଂହାସନ ପାଖକୁ ଆସନ୍ତି । ହରିଶୟନ ଏକାଦଶୀ ଦିନ ଶ୍ରୀମନ୍ଦିରରେ କରାଯାଉଥିବା ଶୟନ ନୀତିର ଠାକୁର, ଏ ଠାକୁର ନୁହଁନ୍ତି । ଏହି ଶୟନଠାକୁର ସ୍ଵନିର୍ମିତ ଅଷ୍ଟଭୁଜ ବିଶିଷ୍ଟ ଅର୍ଦ୍ଧନାରୀଶ୍ଵର ବିଗ୍ରହ ଅଟନ୍ତି । ଏହାଙ୍କ ବାମଭାଗ ସ୍ତ୍ରୀ (ଲକ୍ଷ୍ମୀ) ଓ ଡାହାଣ ଭାଗ ହସ୍ତରେ ଶଂଖ, ଚକ୍ର, ଗଦା ଓ ପଦ୍ମ ଶୋଭିତ ପୁରୁଷ (ବିଷ୍ଣୁ) ଅଟନ୍ତି । ବଡଠାକୁରଙ୍କ ବାଡର ପୁଷ୍ପାଳକ ଶୟନଠାକୁରଙ୍କୁ ଚନ୍ଦନଲାଗି କରାଇ ସିଂହାସନରେ ଜଗନ୍ନାଥଙ୍କ ପାଖରେ ବିଜେ କରାନ୍ତି । ପୁଷ୍ପାଳକ ଗରାବଡୁ ଠାରୁ ଜଳ ନେଇ ହାତଧୋଇ ମାଳ ସଂସ୍କାରକରି ଶ୍ରୀଅଙ୍ଗରେ ଛୁଆଁଇ ଶୟନ ଠାକୁରଙ୍କୁ ଲାଗି କରାନ୍ତି । ପରେ ପରେ ମହାପ୍ରଭୁ ଶ୍ରୀଜଗନ୍ନାଥଙ୍କର ଏବଂ ମା’ ସୁଭଦ୍ରାଙ୍କର ପଲଙ୍କ ଅଣାଯାଇ ଠାକୁରମାନଙ୍କ ସାମନାରେ ରଖାଯାଏ । ଖଟଶେଯ ମେକାପମାନେ ପଳଙ୍କସବୁ ଭିତରକୁ ବୋହି ନେଉଥ‌ିବା ସମୟରେ ବାହରକାଠ ପାଖରେ ଉପସ୍ଥିତ ଥିବା ବଡଛତା ମଠର ସାଧୁସନ୍ଥ ଓ ଭକ୍ତମାନେ ତୁଳସୀ ଦାସଙ୍କ ପ୍ରଣୀତ ବିଭିନ୍ନ ପହୁଡ ଗୀତି ଗାନ କରୁଥିବାର ଲକ୍ଷ୍ୟ କରାଯାଏ ।

ରାତ୍ର ପହୁଡ ନୀତି ନିମନ୍ତେ ଆସିଥିବା ୧୪ଟି ପଇଡ ମଧ୍ୟରୁ ପୁଷ୍ପାଳକମାନେ ତିନିଠାକୁରଙ୍କ ପାଖରେ ଗୋଟିଏ ଲେଖାଏଁ ତିନୋଟି ଓ ସୁଦର୍ଶନଙ୍କ ବାଡ଼ରେ ଗୋଟିଏ ପଇଡ ସମର୍ପଣ କରନ୍ତି । ପାଞ୍ଚୋଟି ପଇଡ ଲକ୍ଷ୍ମୀ, ନୃସିଂହ, ବିମଳା, ସରସ୍ଵତୀ ଓ ଦକ୍ଷିଣିଘରକୁ ପଠାଯାଏ । ଆଉ ପାଞ୍ଚୋଟି ପଇଡ ବଡଦୁଆର ପ୍ରତିହାରୀ ଶ୍ରୀଜୀଉଙ୍କ ମଣୋହି ନିମନ୍ତେ ଅମୁଣିଆ କରି ରଖନ୍ତି । ଅମୁଣିଆ ପଇଡ ଗୋଟିଏ ଶୟନ ଠାକୁରଙ୍କର ଡମ୍ବରୁବିଜେ ସମୟରେ ଜୟବିଜୟ ଦ୍ଵାର ପାଖରେ ମଣୋହି ପାଇଁ ରହେ । ପୁଷ୍ପାଳକମାନେ ସିଂହାସନ ତଳେ ଠିଆହୋଇ କର୍ପୂର ଆଳତି କରନ୍ତି । ବାକି ଅମୁଣିଆ ପଇଡ ଖରୋଟି ଆଣି ଜଗନ୍ନାଥଙ୍କ ପଲଙ୍କ ତଳେ ଦୁଇଟି, ବଡଠାକୁରଙ୍କ ପଲଙ୍କ ତଳେ ଗୋଟିଏ ଓ ମା' ସୁଭଦ୍ରାଙ୍କ ପଲଙ୍କ ତଳେ ଗୋଟିଏ ପଇଡ ରଖାଯାଏ । ପାଳିଆ ଖୁଣ୍ଟିଆ ରୂପା ପିଙ୍ଗଣରେ ଶୁକ୍ଳଫୁଲ ନେଇ ଭିତରକୁ ଯାଏ । ଶୟନଠାକୁରଙ୍କୁ ପାଳିଆ ଗରାବଡୁ ଓ ପୁଷ୍ପାଳକମାନେ ହାତରେ ବିଜେ କରାଇ ଜୟବିଜୟ ଦ୍ଵାରକୁ ଆଣନ୍ତି । ଖଟଶେଯ ମେକାପ ଜୟବିଜୟ ଦ୍ଵାରରେ ଡମ୍ବରୁ (ଡମ୍ବରୁ ଆକୃତିର ବେତ ତିଆରି ଏକ ଆସନ । ଶୟନ ଠାକୁର ଏହା ଉପରେ ବିଜେ ହୁଅନ୍ତି) ପକାନ୍ତି । ଡମ୍ବରୁ ଉପରେ ଶୟନଠାକୁର ବିଜେ ହୁଅନ୍ତି | ଡମ୍ବରୁ ଉପରେ ଶୟନଠାକୁରଙ୍କୁ ପଇଡ ମଣୋହି ହୁଏ । ବିଡିଆ ଲାଗି ହୁଏ । କର୍ପୂର ଆଳତି ଓ ସଂଳକାଳୀ ଆଳତି ହୁଏ । ପାଳିଆ ଖୁଣ୍ଟିଆ ଠାକୁରଙ୍କ ଉପରକୁ ପୁଷ୍ପାଞ୍ଜଳି ପକାନ୍ତି ।

ପୁରୀ ସହରର କେତେକ ଭକ୍ତ ପ୍ରତ୍ୟେକଦିନ ମହାପ୍ରଭୁଙ୍କର ରାତ୍ର ପହୁଡ ଦର୍ଶନ ନିମିତ୍ତ ନାଟମଣ୍ଡପସ୍ଥ ବାହାରକାଠ ପାଖରେ ଅପେକ୍ଷା କରିଥାନ୍ତି । ଏତଦ୍‌ବ୍ୟତୀତ ଶ୍ରୀମନ୍ଦିରର ଧ୍ଵଜାବନ୍ଧା ନୀତି ପରି, ରାତ୍ରପହୁଡ ଦେଖିବାକୁ ଦୂରଦୂରାନ୍ତରୁ ଆସିଥିବା ଭକ୍ତମାନେ ମଧ୍ୟରାତ୍ର ପର୍ଯ୍ୟନ୍ତ ଅପେକ୍ଷା କରିଥୁବାର ଲକ୍ଷ୍ୟ କରାଯାଏ । ଉପସ୍ଥିତ ଭକ୍ତମଣ୍ଡଳୀଙ୍କର ହରିବୋଲ, ହୁଳହୁଳି ଓ ଜୟଜଗନ୍ନାଥ ଧ୍ୱନିରେ ନାଟମଣ୍ଡପ ପ୍ରକମ୍ପିତ ହେଉଥାଏ । ଏହି ସମୟରେ ଭକ୍ତମାନେ ଜୟବିଜୟ ଦ୍ଵାର ପାଖକୁ ଆସି ଶୟନଠାକୁରଙ୍କୁ ନିକଟରେ ଦର୍ଶନ କରିବାର ସୁଯୋଗ ପାଇଥାନ୍ତି ।

ପୁଷ୍ପାଞ୍ଜଳି ପରେ ପୁଷ୍ପାଳକମାନେ ଶୟନିଠାକୁରଙ୍କୁ ନେଇ ଶ୍ରୀଜଗନ୍ନାଥଙ୍କ ପଲଙ୍କରେ ଶୟନ କରାଇ ପୁଣି ଭଣ୍ଡାରଘରକୁ ବିଜେ କରାଇଥାଆନ୍ତି । ଏହା ପ୍ରତୀକାମୂକ ଭାବେ ମହାପ୍ରଭୁ ଜଗନ୍ନାଥଙ୍କୁ ଶୟନ କଲାଭଳି କରାଯାଏ । ପାଳିଆ ପ୍ରତିହାରୀ ଜୟବିଜୟଦ୍ବାର ଆଉଯାଇ ଦିଅନ୍ତି । ଦକ୍ଷିଣପାଖଦ୍ଵାର ଭିତରପଟୁ ବନ୍ଦ ହୁଏ । ଛାମୁ ବଇଠା ସମେତ ଅନ୍ୟ ଅଖଣ୍ଡ ବଇଠା ଓହ୍ଲାଯାଏ । ପ୍ରତିହାରୀ ମଣିମା, ମଣିମା ଡାକଦେଇ ବଇଠା ଧରି ସିଂହାସନ ଗରିଆଡେ ବୁଲି ଦେଖୁ ବାହାରକୁ ଆସନ୍ତି । ମୁଦୁଲି କଳାହାଟ ଦ୍ଵାର ବନ୍ଦକରି ତାଲା ପକାଏ ଓ ମାଟିର ମୁଦ ଦିଏ । ତଳିଛ ମହାପାତ୍ର ସିଲ୍ ପକାନ୍ତି । କଳାହାଟ ଦ୍ଵାରଠାରୁ ଜୟବିଜୟ ଦ୍ଵାର ପର୍ଯ୍ୟନ୍ତ ସଂପୂର୍ଣ ଅଞ୍ଚଳ ଶୋଧକରି ସମସ୍ତେ ବାହାରକୁ ଆସନ୍ତି ଓ ଜୟବିଜୟ ଦ୍ଵାର ବନ୍ଦକରି ମୁଦୁଲି ତାଲା ପକାନ୍ତି । ମାଟିର ମୁଦ ଦିଆଯାଏ ଓ ତଳିଛ ମହାପାତ୍ର ସିଲ ପକାନ୍ତି । ଏହି ସିଲ ମଦନମୋହନଙ୍କ ମୂର୍ତ୍ତିର ସିଲ୍ ଅଟେ, ଯାହା ତଳିଛଙ୍କ ପାଖରେ ଥାଏ । ମୁଦ ସକାଶେ ଆବଶ୍ୟକ ମାଟି, ହାଣ୍ଡି ଯୋଗାଣିଆ ସେବକ କୁମ୍ଭାରଠାରୁ ଆଣି ରଖୁଥାଏ ଓ ମୁଦ ସମୟରେ ତଳିଛଙ୍କୁ ଦେଇଥାଏ । ଜୟବିଜୟ ଦ୍ଵାର ବନ୍ଦହେଲା ପରେ ସମସ୍ତେ ବାହାରକୁ ଆସି ମୁଦୁଲି ଦ୍ଵାର ଦେଇ ଦକ୍ଷିଣଦ୍ଵାର ବାହାରପଟ ଜୟବିଜୟ ଦ୍ଵାର ବିଧିରେ ସିଲ୍ କରାଯାଏ ।

ଏ ସମୟରେ ମନ୍ଦିର ଭିତରର ସବୁ ଆଲୋକ ଲିଭାଇ ଅନ୍ଧକାର କରାଯାଇଥାଏ । ଶ୍ରୀମନ୍ଦିର ପୋଲିସ କର୍ମରରୀମାନେ ମନ୍ଦିର ଭିତର ବୁଲି ମନ୍ଦିର ଶୋଧ (ଶ୍ରୀମନ୍ଦିର ପରମ୍ପରାରେ ଭିତର ଓ ବାହାର ବେଢା, ନାଟମଣ୍ଡପ, ଜଗମୋହନରୁ ଦର୍ଶନାର୍ଥୀ ଓ ଯାତ୍ରୀମାନଙ୍କୁ ବାହାରକୁ ନେଇ ପରିସର ନିର୍ମଳ ପୂର୍ବକ, ଜନଶୂନ୍ୟ ଓ ପରିଷ୍କାର ରଖୁବା) କରନ୍ତି ଓ ବାହାରବେଢା ଋରିଦୁଆର ସଂପୂର୍ଣ୍ଣ ବନ୍ଦ ହୁଏ । ଶ୍ରୀମନ୍ଦିର ପୋଲିସ ଓ ସରକାରୀ ପୋଲିସ ରାତିସାରା ପହରା ଦେଇ ଶ୍ରୀମନ୍ଦିର ଜଗିଥାନ୍ତି ।