ସକାଳର ଦ୍ଵାରଫିଟା ନୀତିପରି ଭିତରଚ୍ଛ ମହାପାତ୍ର, ପାଳିଆ ମେକାପ, ଅଖଣ୍ଡ ମେକାପ, ପାଳିଆ ପ୍ରତିହାରୀ ଓ ମୁଦୁଲି ଜୟବିଜୟ ଦ୍ଵାର ଅଳ୍ପ ଖୋଲି ଭିତରକୁ ଯାଆନ୍ତି । ଭିତରଛ କହିବାପରେ ମୁଦୁଲି କଳାହାଟ ଦ୍ଵାର ଖୋଲନ୍ତି । “ମଣିମା ମଣିମା, ରସିଂହାସନକୁ ବିଜେ ହୁଅନ୍ତୁ” ବୋଲି ପ୍ରତିହାରୀ ଡାକ ଦେଇଥାନ୍ତି । ଅଖଣ୍ଡମେକାପ ବଇଠା ସବୁ ପୁଣି ବସାନ୍ତି । ଖଟଶେଯ ମେକାପ ଭିତରକୁ ଯାଇ ପଲଙ୍କ ସବୁ ଆଣିବା ପରେ ଦ୍ଵାର ସଂପୂର୍ଣ୍ଣ ଖୋଲାଯାଏ । ସୁଆରବଡୁ ଏକୋଇଶି ବତୀ ସଂଜ କାଳି ବଳିତା ସଜାଇ ସିଂହାସନରେ ରଖନ୍ତି । ପୁଷ୍ପାଳକ, ତଳିଚ୍ଛ ମହାପାତ୍ର ଓ ଗରାବଡୁ ସିଂହାସନ ତଳେ ଠିଆ ହୁଅନ୍ତି । ତଳିଛ ମହାପାତ୍ର, ଜଗନ୍ନାଥଙ୍କ ବାଡ଼ରେ ଓ ଅନ୍ୟଦୁଇଜଣ ପୁଷ୍ପାଳକ ବଡଠାକୁର ଓ ମା’ ସୁଭଦ୍ରାଙ୍କ ବାଡର ମଙ୍ଗଳ ଆଳତି ନୀତି ମୁତାବକ କର୍ପୂର ଆଳତି, ଏକୋଇଶି ବତୀ ସଂଜଆଳତି କରନ୍ତି । ଯଦି ଠାକୁରମାନଙ୍କର ଦିବା ପହୁଡ ହୋଇ ନଥାଏ ତାହେଲେ ଦ୍ବିପହର (ମଧ୍ୟାହ୍ନଧୂପ) ଧୂପ ପରେ ଠାକୁରମାନଙ୍କର ମଇଲମ କରାଯାଇ, ବେଶ ହୋଇ ତାପରେ ସଂଧ୍ୟା ଆଳତି ହୁଏ | କିନ୍ତୁ ପହୁଡ ହୋଇଥିଲେ ସଂଧ୍ୟା ଆଳତି ପରେ ମଇଲମ ହୋଇ, ପୁଣି ବେଶ ଅନୁଷ୍ଠିତ ହୋଇଥାଏ । ଏକାଦଶୀ ଦିନ ପ୍ରଥମେ ଆଳତି ହୋଇ ପରେ ମଇଲମ ଓ ବେଶ ହୋଇଥାଏ ।

ଆଳତି ପରେ ପୁଷ୍ପାଳକମାନେ ଗରାବଡୁଠାରୁ ଜଳନେଇ ହାତ ଧୋଇବାପରେ ସିଂହାସନ ଉପରକୁ ଉଠି ମଇଲମ କରନ୍ତି । ଠାକୁରମାନଙ୍କୁ ପାଟବସ୍ତ୍ରରେ ବେଶ କରାଯାଏ । ଖୁଣ୍ଟିଆ ଫୁଲମାଳ ଦିଅନ୍ତି । ଠାକୁରମାନଙ୍କର ବେଶ କରିସାରି ପୁଷ୍ପାଳକମାନେ ପାଳିଆ ମେକାପକୁ ଶ୍ରୀଅଙ୍ଗ ମଣାଇ ଦେଇ ଖଲିଆସନ୍ତି ।

ଶ୍ରୀମନ୍ଦିର ସ୍ଵତ୍ତ୍ଵଲିପି ଅନୁସାରେ ସଂଧ୍ୟାଧୂପ ରାତି ୭ଟା ରୁ ରାତି ୮ଟା ମଧ୍ୟରେ ହୋଇଥାଏ । ମଧ୍ୟାହ୍ନଧୂପ ଯେଉଁ ନୀତିରେ ହୁଏ, ସେହି ନୀତିରେ ସଂଧ୍ୟାଧୂପ ହୋଇଥାଏ । କିନ୍ତୁ ଏହି ଧୂପର ଭୋଗସାମଗ୍ରୀ ମଧ୍ୟାହ୍ନ ଧୂପଠାରୁ ସମ୍ପୂର୍ଣ ଅଲଗା ଥାଏ । ସଂଧ୍ୟାଧୂପ ପରେ କର୍ପୂର ଆଳତି, ଏକୋଇଶିବତୀ ଆଳତି ଓ ପିଠଉ ଆଳତି ବ୍ୟତୀତ ଆଉ ଦୁଇଟି ଅଧିକା ଆଳତି ହୋଇଥାଏ ଯାହାକୁ “ ଜୟମଂଗଳ ଆଳତି” କୁହାଯାଏ । ଏହି ଅଧୂକା ଆଳତି ରୂପା ବଟାରେ ହୋଇଥାଏ । ସକାଳଧୂପ ଓ ମଧ୍ୟାହ୍ନଧୂପରେ ନିୟୋଜିତ ସେବକମାନେ ସଂଧ୍ୟାଧୂପରେ ନିଯୁକ୍ତ ଥାଆନ୍ତି ।

ସଂଧ୍ୟା ଆଳତି

ଅପରାହ୍ନ ୬ଟା ସମୟରେ ପହୁଡ ଫିଟିବାର ନିୟମ ।