ଓଁ

ରକ୍ଷ ରକ୍ଷ ମହାଦେବି ଦୁର୍ଗେ ଦୁର୍ଗତିନାଶିନି ।

ମାଂ ଭକ୍ତମନୁରକ୍ତଂ ଚ ଶତ୍ରୁଗ୍ରସ୍ତଂ କୃପାମୟି ॥ ୧॥

ବିଷ୍ଣୁମାୟେ ମହାଭାଗେ ନାରାୟଣି ସନାତନି ।

ବ୍ରହ୍ମସ୍ୱରୂପେ ପରମେ ନିତ୍ୟାନନ୍ଦସ୍ୱରୂପିଣୀ ॥ ୨॥

ତ୍ୱଂ ଚ ବ୍ରହ୍ମାଦିଦେବାନାମମ୍ବିକେ ଜଗଦମ୍ବିକେ ।

ତ୍ୱଂ ସାକାରେ ଚ ଗୁଣତୋ ନିରାକାରେ ଚ ନିର୍ଗୁଣାତ୍ ॥ ୩॥

ମାୟଯା ପୁରୁଷସ୍ତ୍ୱଂ ଚ ମାୟଯା ପ୍ରକୃତିଃ ସ୍ୱୟମ୍ ।

ତୟୋଃ ପରଂ ବ୍ରହ୍ମ ପରଂ ତ୍ୱଂ ବିଭର୍ଷି ସନାତନି ॥ ୪॥

ବେଦାନାଂ ଜନନୀ ତ୍ୱଂ ଚ ସାବିତ୍ରୀ ଚ ପରାତ୍ପରା ।

ବୈକୁଣ୍ଠେ ଚ ମହାଲକ୍ଷ୍ମୀଃ ସର୍ବସମ୍ପତ୍ସ୍ୱରୂପିଣୀ ॥ ୫॥

ମର୍ତ୍ତ୍ୟଲକ୍ଷ୍ମୀଶ୍ଚ କ୍ଷୀରୋଦେ କାମିନୀ ଶେଷଶାୟିନଃ ।

ସ୍ୱର୍ଗେଷୁ ସ୍ୱର୍ଗଲକ୍ଷ୍ମୀସ୍ତ୍ୱଂ ରାଜଲକ୍ଷ୍ମୀଶ୍ଚ ଭୂତଳେ ॥ ୬॥

ନାଗାଦିଲକ୍ଷ୍ମୀଃ ପାତାଳେ ଗୃହେଷୁ ଗୃହଦେବତା ।

ସର୍ବସସ୍ୟସ୍ୱରୂପା ତ୍ୱଂ ସର୍ବ୍ୟୈଶ୍ୱର୍ଯ୍ୟବିଧାୟିନୀ ॥ ୭॥

ରାଗାଧିଷ୍ଠାତୃଦେବୀ ତ୍ୱଂ ବ୍ରହ୍ମଣଶ୍ଚ ସରସ୍ୱତୀ ।

ପ୍ରାଣାନାମଧିଦେବୀ ତ୍ୱଂ କୃଷ୍ଣସ୍ୟ ପରମାତ୍ମନଃ ॥ ୮॥

ଗୋଲୋକେ ଚ ସ୍ୱୟଂ ରାଧା ଶ୍ରୀକୃଷ୍ଣସ୍ୟୈବ ବକ୍ଷସି ।

ଗୋଲୋକାଧିଷ୍ଠାତା ଦେବୀ ବୃନ୍ଦାବନବନେ ବନେ ॥ ୯॥

ଶ୍ରୀରାସମଣ୍ଡଳେ ରମ୍ୟା ବୃନ୍ଦାବନବିନୋଦିନୀ ।

ଶତଶୃଙ୍ଗାଧିଦେବୀ ତ୍ୱଂ ନାମ୍ନା ଚିତ୍ରାବଳୀତି ଚ ॥ ୧୦॥

ଦକ୍ଷକନ୍ୟା କୁତ୍ର କଳ୍ପେ କୁତ୍ରକଳ୍ପେ ଚ ଶୈଳଜା ।

ଦେବମାତା ଦିତିସ୍ତ୍ୱଂ ଚ ସର୍ବାଧାରା ବସୁନ୍ଧରା ॥ ୧୧॥

ତ୍ୱମେବ ଗଙ୍ଗା ତୁଳସୀ ତ୍ୱଂ ଚ ସ୍ୱାହା ସ୍ୱଧା ସତୀ ।

ତ୍ୱଦଂଶାଂଶାଂଶକଳୟା ସର୍ବଦେବାଦିଯୋଷିତଃ ॥ ୧୨॥

ସ୍ତ୍ରୀରୂପଂ ଚାପି ପୁରୁଷଂ ଦେବି ତ୍ୱଂ ଚ ନପୁଂସକମ୍ ।

ବୃକ୍ଷାଣାଂ ବୃକ୍ଷରୂପା ତ୍ୱଂ ସୃଷ୍ଟୌ ଚାଙ୍କୁରରୂପିଣୀ ॥ ୧୩॥

ବହ୍ନୌ ଚ ଦାହିକା ଶକ୍ତିର୍ଜଳେ ଶୈତ୍ୟସ୍ୱରୂପିଣୀ ।

ସୂର୍ଯ୍ୟେ ତେଜସ୍ୱରୂପା ଚ ପ୍ରଭାରୂପା ଚ ସନ୍ତତମ୍ ॥ ୧୪॥

ଗନ୍ଧରୂପା ଚ ଭୂମୌ ଚ ଆକାଶେ ଶବ୍ଦରୂପିଣୀ ।

ଶୋଭାସ୍ୱରୂପା ଚନ୍ଦ୍ରେ ଚ ପଦ୍ମସଙ୍ଘେ ଚ ନିଶ୍ଚିତମ୍ ॥ ୧୫॥

ସୃଷ୍ଟୌ ସୃଷ୍ଟିସ୍ୱରୂପା ଚ ପାଳନେ ପରିପାଳିକା ।

ମହାମାରୀ ଚ ସଂହାରେ ଜଳେ ଚ ଜଳରୂପିଣୀ ॥ ୧୬॥

କ୍ଷୁତ୍ ତ୍ୱଂ ଦୟା ତ୍ୱଂ ନିଦ୍ରା ତ୍ୱଂ ତୃଷ୍ଣା ତ୍ୱଂ ବୁଦ୍ଧିରୂପିଣୀ ।

ତୁଷ୍ଟିସ୍ତ୍ୱଂ ଚପି ପୁଷ୍ଟିସ୍ତ୍ୱଂ ଶ୍ରଦ୍ଧା ତ୍ୱଂ ଚ କ୍ଷମା ସ୍ୱୟମ୍ ॥ ୧୭॥

ଶାନ୍ତିସ୍ତ୍ୱଂ ଚ ସ୍ୱୟଂ ଭ୍ରାନ୍ତିଃ କାନ୍ତିସ୍ତ୍ୱଂ କୀର୍ତ୍ତିରେବ ଚ ।

ଲଜ୍ଜା ତ୍ୱଂ ଚ ତଥା ମାୟା ଭୁକ୍ତିମୁକ୍ତିସ୍ୱରୂପିଣୀ ॥ ୧୮॥

ସର୍ବଶକ୍ତିସ୍ୱରୂପା ତ୍ୱଂ ସର୍ବସମ୍ପତ୍ପ୍ରଦାୟିନୀ ।

ବେଦେଽନିର୍ବଚନୀୟା ତ୍ୱଂ ତ୍ୱାଂ ନ ଜାନାତି କଶ୍ଚନ ॥ ୧୯॥

ସହସ୍ରବକ୍ତ୍ରସ୍ତ୍ୱାଂ ସ୍ତୋତୁଂ ନ ଶକ୍ତଃ ସୁରେଶ୍ୱରି ।

ବେଦାଃ ନ ଶକ୍ତାଃ କୋ ବିଦ୍ୱାନ୍ ନ ଚ ଶକ୍ତା ସରସ୍ୱତୀ ॥ ୨୦॥

ସ୍ୱୟଂ ବିଧାତା ଶକ୍ତୋ ନ ନ ଚ ବିଷ୍ଣୁଃ ସନାତନଃ ।

କିଂ ସ୍ତୌମି ପଞ୍ଚବକ୍ତ୍ରେଣ ରଣତ୍ରସ୍ତୋ ମହେଶ୍ୱରି ।

କୃପାଂ କୁରୁ ମହାମାୟେ ମମ ଶତ୍ରୁକ୍ଷୟଂ କୁରୁ ॥ ୨୧॥

॥ ଇତି ଶ୍ରୀ ଦୁର୍ଗାସ୍ତୋତ୍ରଂ ସମ୍ପୂର୍ଣ୍ଣମ୍ ॥

ଶ୍ରୀ ଦୁର୍ଗା ସ୍ତୋତ୍ରମ୍