ଶ୍ରୁତୟଃ ଊଚୁଃ ।

ଜୟ ଜୟ ଜହ୍ୟଜାମଜିତ ଦୋଷଗୃଭୀତଗୁଣାଂ ତ୍ଵମସି ୟଦାତ୍ମନା ସମଵରୁଦ୍ଧସମସ୍ତଭଗଃ ।

ଅଗଜଗଦୋକସାମଖିଲଶକ୍ତ୍ୟଵବୋଧକ ତେ କ୍ଵଚିଦଜୟାତ୍ମନା ଚ ଚରତୋଽନୁଚରେନ୍ନିଗମଃ ॥ ୧୪॥

ବୃହଦୁପଲବ୍ଧମେତଦଵୟନ୍ତ୍ୟଵଶେଷତୟା ୟତ ଉଦୟାସ୍ତମୟୌ ଵିକୃତେର୍ମୃଦି ଵାଽଵିକୃତାତ୍ ।

ଅତ ଋଷୟୋ ଦଧୁସ୍ତ୍ଵୟି ମନୋଵଚନାଚରିତଂ କଥମୟଥା ଭଵନ୍ତି ଭୁଵି ଦତ୍ତପଦାନି ନୃଣାମ୍ ॥ ୧୫॥

ଇତି ତଵ ସୂରୟସ୍ତ୍ର୍ୟଧିପତେଽଖିଲଲୋକମଲକ୍ଷଣପଣକଥାମୃତାବ୍ଧିମଵଗାହ୍ୟ ତପାଂସି ଜହୁଃ ।

କିମୁତ ପୁନଃ ସ୍ଵଧାମଵିଧୁତାଶୟକାଲଗୁଣାଃ ପରମ ଭଜନ୍ତି ୟେ ପଦମଜସ୍ରସୁଖାନୁଭଵମ୍ ॥ ୧୬॥

ଦୃତୟ ଇଵ ଶ୍ଵସନ୍ତ୍ୟସୁଭୃତୋ ୟଦି ତେଽନୁଵିଧା ମହଦମାୟୋଽଣ୍ଡମସୃଜନ୍ୟଦନୁଗ୍ରହତଃ ।

ପୁରୁଷଵିଧୋଽନ୍ଵୟୋଽତ୍ର ଚରମୋଽନ୍ନମୟାଦିଷୁ ୟଃ ସଦସତଃ ପରଂ ତ୍ଵମଥ ୟଦେଷ୍ଵଵଶେଷମୃତମ୍ ॥ ୧୭॥

ଉଦରମୁପାସତେ ୟ ଋଷିଵର୍ତ୍ମସୁ କୂର୍ପଦୃଶଃ ପରିସରପଦ୍ଧତିଂ ହୃଦୟମାରୁଣୟୋ ଦହରମ୍ ।

ତତ ଉଦଗାଦନନ୍ତ ତଵ ଧାମ ଶିରଃ ପରମଂ ପୁନରିହ ୟତ୍ସମେତ୍ୟ ନ ପତନ୍ତି କୃତାନ୍ତମୁଖେ ॥ ୧୮॥

ସ୍ଵକୃତଵିଚିତ୍ରୟୋନିଷୁ ଵିଶନ୍ନିଵ ହେତୁତୟା ତରତମତଶ୍ଚକାସ୍ସ୍ୟନଲଵତ୍ସ୍ଵକୃତାନୁକୃତିଃ ।

ଅଥ ଵିତଥାସ୍ଵମୂଷ୍ଵଵିତଥଂ ତଵ ଧାମ ସମଂ ଵିରଜଧିୟୋଽନ୍ଵୟନ୍ତ୍ୟଭିଵିପଣ୍ୟଵ ଏକରସମ୍ ॥ ୧୯॥

ସ୍ଵକୃତପୁରେଷ୍ଵମିଷ୍ଵବହିରନ୍ତରସଂଵରଣଂ ତଵ ପୁରୁଷଂ ଵଦନ୍ତ୍ୟଖିଲଶକ୍ତିଧୃତୋଂଽଶକୃତମ୍ ।

ଇତି ନୃଗତିଂ ଵିଵିଚ୍ୟ କଵୟୋ ନିଗମାପଵନଂ ଭଵତ ଉପାସତେଽଙ୍ଘ୍ରିମଭଵଂ ଭୁଵି ଵିଶ୍ଵସିତାଃ ॥ ୨୦॥

ଦୁରଵଗମାତ୍ମତତ୍ତ୍ଵନିଗମାୟ ତଵାତ୍ତତନୋଶ୍ଚରିତମହାମୃତାବ୍ଧିପରିଵର୍ତପରିଶ୍ରମଣାଃ ।

ନ ପରିଲଷନ୍ତି କେଚିଦପଵର୍ଗମପୀଶ୍ଵର ତେ ଚରଣସରୋଜହଂସକୁଲସଙ୍ଗଵିସୃଷ୍ଟଗୃହାଃ ॥ ୨୧॥

ତ୍ଵଦନୁପଥଂ କୁଲାୟମିଦମାତ୍ମସୁହୃତ୍ପ୍ରିୟଵଚ୍ଚରତି ତଥୋନ୍ମୁଖେ ତ୍ଵୟି ହିତେ ପ୍ରିୟ ଆତ୍ମନି ଚ ।

ନ ବତ ରମନ୍ତ୍ୟହୋ ଅସଦୁପାସନୟାତ୍ମହନୋ ୟଦନୁଶୟା ଭ୍ରମନ୍ତ୍ୟୁରୁଭୟେ କୁଶରୀରଭୃତଃ ॥ ୨୨॥

ନିଭୃତମରୁନ୍ମନୋକ୍ଷଦୃଢୟୋଗୟୁଜୋ ହୃଦି ୟନ୍ମୁନୟ ଉପାସତେ ତଦରୟୋଽପି ୟୟୁଃ ସ୍ମରଣାତ୍ ।

ସ୍ତ୍ରିୟ ଉରଗେନ୍ଦ୍ରଭୋଗଭୁଜଦଣ୍ଡଵିଷକ୍ତଧିୟୋ ଵୟମପି ତେ ସମାଂ ସମଦୃଧୋଽଙ୍ଘ୍ରିସରୋଜସୁଧାଃ ॥ ୨୩॥

କ ଇହ ନୁ ଵେଦ ବତଵରଜନ୍ମଲୟୋଽଗ୍ରସରଂ ୟତ ଉଦଗାଦୃଷିର୍ୟମନୁ ଦେଵଗଣା ଉଭୟେ ।

ତର୍ହି ନ ସନ୍ନ ଚାସଦୁଭୟଂ ନ ଚ କାଲଜଵଃ କିମପି ନ ତତ୍ର ଶାସ୍ତ୍ରମଵକୃଷ୍ୟ ଶୟୀତ ୟଦା ॥ ୨୪॥

ଜନିମସତଃ ସତୋ ମୃତିମୁତାତ୍ମନି ୟେ ଵେଦ ଚ ଭିଦାଂ ଵିପଣମୃତଂ ସ୍ମରନ୍ତ୍ୟୁପଦିଶନ୍ତି ତ ଆରୁପତୈଃ ।

ତ୍ରିଗୁଣମୟଃ ପୁମାନିତି ଭିଦା ୟଦବୋଧକୃତା ତ୍ଵୟି ନ ତତଃ ପରତ୍ର ସ ଭଵେଦଵବୋଧରସେ ॥ ୨୫॥

ସଦିଵ ମନସ୍ତ୍ରିଵୃତ୍ତ୍ଵୟି ଵିଭାତ୍ୟସଦାମନୁଜାତ୍ସଦଭିମୃଶନ୍ତ୍ୟଶେଷମିଦମାତ୍ମତ୍ୟାତ୍ମଵିଦଃ ।

ନ ହି ଵିକୃତିଂ ତ୍ୟଜନ୍ତି କନକସ୍ୟ ତଦାତ୍ମତୟା ସ୍ଵକୃତମନୁପ୍ରଵିଷ୍ଟମିଦମାତ୍ମତୟାଽଵସିତମ୍ ॥ ୨୬॥

ତଵ ପରି ୟେ ଚରନ୍ତ୍ୟଖିଲସତ୍ତ୍ଵନିକେତତୟା ତ ଉତ ପଦାକ୍ରମନ୍ତ୍ୟଵିଗଣୟ୍ୟ ଶିରୋ ନିରୃତେଃ ।

ପରିଵୟସେ ପଶୂନିଵ ଗିରା ଵିବୁଧାନପି ତାଂସ୍ତ୍ଵୟି କୃତସୌହୃଦାଃ ଖଲୁ ପୁନନ୍ତି ନ ୟେ ଵିମୁଖାଃ ॥ ୨୭॥

ତ୍ଵମକରଣଃ ସ୍ଵରାଡଖିଲକାରକଶକ୍ତିଧରସ୍ତଵ ବଲିମୁଦ୍ଵହନ୍ତି ସମଦନ୍ତ୍ୟଜୟାଽନିମିଷାଃ ।

ଵର୍ଷଭୁଜୋଽଖିଲକ୍ଷିତିପତେରିଵ ଵିଶ୍ଵସୃଜୋ ଵିଦଧତି ୟତ୍ର ୟେ ତ୍ଵଦଧିକୃତା ଭଵତଶ୍ଚକିତାଃ ॥ ୨୮॥

ସ୍ଥିରଚରଜାତୟଃ ସ୍ୟୁରଜୟୋଥନିମିତ୍ତୟୁଜୋ ଵିହର ଉଦୀକ୍ଷୟା ୟଦି ପରସ୍ୟ ଵିମୁକ୍ତ ତତଃ ।

ନ ହି ପରମସ୍ୟ କଶ୍ଚିଦପରୋ ନ ପରଶ୍ଚ ଭଵେଦ୍ଵିୟତ ଇଵାପଦସ୍ୟ ତଵ ଶୂନ୍ୟତୁଲାଂ ଦଧତଃ ॥ ୨୯॥

ଅପରମିତା ଧ୍ରୁଵାସ୍ତନୁଭୃତୋ ୟଦି ସର୍ଵଗତାସ୍ତର୍ହି ନ ଶାସ୍ୟତେତି ନିୟମୋ ଧ୍ରୁଵ ନେତରଥା ।

ଅଜନି ଚ ୟନ୍ମୟଂ ତଦ୍ଵିମୁଚ୍ୟ ନିୟନ୍ତୃ ଭଵେତ୍ସମମନୁଜାନତାଂ ୟଦମତଂ ମତଦୃଷ୍ଟତୟା ॥ ୩୦॥

ନ ଘଟତ ଉଦ୍ଭଵଃ ପ୍ରକୃତିପୂରୁଷୟୋର୍ଜୟୋରୁଭୟୟୁଜା ଭଵନ୍ତ୍ୟସୁଭୃତୋ ଜଲବୁଦ୍ବୁଦଵତ୍ ।

ତ୍ଵୟି ତ ଇମେ ତତୋ ଵିଵିଧନାମଗୁଣୈଃ ପରମେ ସରିତ ଇଵାର୍ଣଵେ ମଧୁନି ଲିଲ୍ୟୁରୁଶେଷରସାଃ ॥ ୩୧॥

ନୃଷୁ ତଵ ମାୟୟା ଭ୍ରମମମୀଷ୍ଵଵଗତ୍ୟ ଭୃଶଂ ତ୍ଵୟି ସୁଧିୟୋଽଭଵେ ଦଧତି ଭାଵମନୁପ୍ରଭଵମ୍ ।

କଥମନୁଵର୍ତତାଂ ଭଵଭୟଂ ତଵ ୟଦ୍ଭ୍ରୁକୁଟିଃ ସୃଜତି ମୁହୁସ୍ତ୍ରିଣେମିରଭଵଚ୍ଛରଣେଷୁ ଭୟମ୍ ॥ ୩୨॥

ଵିଜିତହୃଷୀକଵାୟୁଭିରଦାନ୍ତମନସ୍ତୁରଗଂ ୟ ଇହ ୟତନ୍ତି ୟନ୍ତୁମତିଲୋଲମୁପାୟଖିଦଃ ।

ଵ୍ୟସନଶତାନ୍ଵିତାଃ ସମଵହାୟ ଗୁରୋଶ୍ଚରଣଂ ଵଣିଜ ଇଵାଜ ସନ୍ତ୍ୟକୃତକର୍ଣଧରା ଜଲଧୌ ॥ ୩୩॥

ସ୍ଵଜନସୁତାତ୍ମଦାରଧନଧାମଧରାସୁରଥୈସ୍ତ୍ଵୟି ସତି କିଂ ନୃଣାଂ ଶ୍ରୟତ ଆତ୍ମନି ସର୍ଵରସେ ।

ଇତି ସଦଜାନତାଂ ମିଥୁନତୋ ରତୟେ ଚରତାଂ ସୁଖୟତି କୋ ନ୍ଵିହ ସ୍ଵଵିହତେ ସ୍ଵନିରସ୍ତଭଗେ ॥ ୩୪॥

ଭୁଵି ପୁରୁପୁଣ୍ୟତୀର୍ଥସଦନାନ୍ୟୃଷୟୋ ଵିମଦାସ୍ତ ଉତ ଭଵତ୍ପଦାମ୍ବୁଜହୃଦୋଽଘଭିଦଙ୍ଘ୍ରିଜଲାଃ ।

ଦଧତି ସୁକୃନ୍ମନସ୍ତ୍ଵୟି ୟ ଆତ୍ମନି ନିତ୍ୟସୁଖେ ନ ପୁନରୁପାସତେ ପୁରୁଷସାରହରାଵସଥାନ୍ ॥ ୩୫॥

ସତ ଇଦମୁତ୍ଥିତଂ ସଦିତି ଚେନ୍ନନୁ ତର୍କହତଂ ଵ୍ୟଭିଚରତି କ୍ଵ ଚ କ୍ଵ ଚ ମୃଷା ନ ତଥୋଭୟୟୁକ୍ ।

ଵ୍ୟଵହୃତୟେ ଵିକଲ୍ପ ଇଷିତୋଽନ୍ଧପରମ୍ପରୟା ଭ୍ରମୟତି ଭାରତି ତ ଉରୁଵୃତ୍ତିଭିରୁକ୍ଥଜଡାନ୍ ॥ ୩୬॥

ନ ୟଦିଦମଗ୍ର ଆସ ନ ଭଵିଷ୍ୟଦତୋ ନିଧନାଦନୁମିତମନ୍ତରା ତ୍ଵୟି ଵିଭାତି ମୃଷୈକରସେ ।

ଅତ ଉପମୀୟତେ ଦ୍ରଵିଣଜାତିଵିକଲ୍ପପଥୈର୍ଵିତଥମନୋଵିଲାସମୃତମିତ୍ୟଵୟନ୍ତ୍ୟବୁଧାଃ ॥ ୩୭॥

ସ ୟଦଜୟା ତ୍ଵଜାମନୁଶୟିତ ଗୁଣାଂଶ୍ଚ ଜୁଷନ୍ଭଜତି ସ୍ଵରୂପତାଂ ତଦନୁ ମୃତ୍ୟୁମପେତଭଗଃ ।

ତ୍ଵମୁତ ଜହାସି ତାମହିରିଵ ତ୍ଵଚମାତ୍ତଭଗୋ ମହସି ମହୀୟସେଽଷ୍ଟଗୁଣିତେଽପରିମେୟଭଗ।ଃ ॥ ୩୮॥

ୟଦି ନ ସମୁଦ୍ଧରନ୍ତି ୟତୟୋ ହୃଦି କାମଜଟା ଦୁରଧିଗମୋଽସତାଂ ହୃଦି ଗତୋଽସ୍ମୃତକଣ୍ଠମଣିଃ ।

ଅସୁତୃପୟୋଗିନାମୁଭୟତୋଽପ୍ୟସୁଖଂ ଭଗଵନ୍ନନପଗତାନ୍ତକାଦନଧିରୂଢପଦାଦ୍ଭଵତଃ ॥ ୩୯॥

ତ୍ଵଦଵଗମୀ ନ ଵେତ୍ତି ଭଵଦୁତ୍ଥଶୁଭୟୋର୍ଗୁଣଵିଗୁଣାନ୍ଵୟାଂସ୍ତର୍ହି ଦେହଭୃତାଂ ଚ ଗିରଃ ।

ଅନୁୟୁଗମନ୍ଵହଂ ସଗୁଣ ଗୀତପରମ୍ପରୟା ଶ୍ରଵଣଭୃତୋ ୟତସ୍ତ୍ଵମପଵର୍ଗଗତିର୍ମନୁଜୈଃ ॥ ୪୦॥

ଦ୍ୟୁପତୟ ଏଵ ତେ ନ ୟୟୁରନ୍ତମନନ୍ତତୟା ତ୍ଵମପି ୟଦନ୍ତାଽଣ୍ଡନିଚୟା ନନୁ ସାଵରଣାଃ ।

ଖ ଇଵ ରଜାଂସି ଵାନ୍ତି ଵୟସା ସହ ୟଚ୍ଛ୍ରୁତୟସ୍ତ୍ଵୟି ହି ଫଲନ୍ତ୍ୟତାନ୍ନିରସନେନ ଭଵନିଧନାଃ ॥ ୪୧॥

ଶ୍ରୁତିଗୀତା

ଶ୍ରୁତିଗୀତା