जग आहे रंग - बिरंगी.जगातील प्रत्येक वस्तूला आणि प्रत्येक प्राणी मात्राला रंग आहे.कोणाचा गौर वर्ण तर कोणाचा शामल वर्ण तर कोणी गहुवर्णी.प्रत्येक रंगाची आपली महती असते.

शामल वर्णी लोकांना वाटते आपला गौर वर्ण का नाही.सामान्य माणसाचं सोडा कृष्णाला पण वाटायचे राधा का गोरी ,मी का काळा.त्याने यशोदा मातेला हे विचारले असता तिने त्याला समजावले की तू रात्री अंधारात जन्माला आलास त्यामुळे तू काळा.नंतर यशोदा सांगते की तू राधेचा रंग बदलून टाक.कृष्णाने राधेला गुलाल लावला.अशी रंग खेळण्याची प्रथा सुरू झाली.

दुसऱ्या गोष्टीत भक्त प्रल्हाद होळीच्या अग्नितून सुरक्षित बाहेर आला म्हणून गुलाल उधळला.ज्याला काही मिळाले नाही त्याने होळीची राख उधळली.अशी धुळवड व रंग खेळण्यास सुरुवात झाली.

प्रत्येक रंगाचा आपला ठसा असतो.पण दुसऱ्या रंगात मिसळता एकदम वेगळाच भासतो.

काळा रंग फारसा कोणाला आवडत नाही पण दृष्ट लागू नाही या साठी काळी टीट लावतात. केस काळे हवे असतात.

श्वेत रंग पवित्र व शांततेचा मानला जातो.

प्रत्येकाला वेगवेगळा रंग आवडतो.काही लोक तर वारा प्रमाणे

विशिष्ट रंगाचे कपडे वापरतात.जसे सोमवारी पांढरे, मंगळवारी लाल.गुरुवारी पिवळे,शनिवारी नीळे.माणसाचं सोडा देवांना पण विशिष्ट रंगाची फुले आवडतात.जसे शंकराला पांढरे,गणपतीला लाल, दत्ताला पिवळी.

प्रत्येकजण आपल्या आवडीच्या गोष्टीत रंगून जातो.वारकरी टाळ मृदुंगाच्या आवाजात रंगून नाचतात.

माणूस आनंदी होवून बोलायला लागला की रंगात आलाय असे बोलले जाते.

नाटक पण रंगते.

पार्टी पण रंगात येते.रंगाचा बेरंग करणारे पण असतात.

काही वेळेस माणसाचा रंगच वेगळा असतो.

काहीजण म्हणतात रंग माझा वेगळा.

असा रंगाचा महिमा.

चारोळी

हिंदूंचा रंग भगवा,

मुस्लिमांचा रंग हिरवा,

कोणचा रंग निवडावा,

मनुष्याचा माणूस व्हावा.

सौ मेधा भिडे.

रंग

रंग बिरंगी