वळण शब्द ऐकताच मनात येते आपल्या मुलांना चांगले वळण पाहिजे आणि ते आई वडिलांनी लावले पाहिजे.नाहीतर ह्यांच्या मुलांना काही वळण च नाही असं बोलले जाते. एखाद्या मुलीचे स्थळ सांगताना मुलगी साधी सरळ वळणाची आहे असे सांगतात.वळण हे सरळ कसे असते माहीत नाही.

नंतर काही वेळा पत्ता सांगताना ह्या वळणावरून इकडे वळायचे .नाहीतर हे वळण ओलांडून पुढे डावी किंवा उजवी कडे वळायचे असे सांगतात

नदी पर्वतावरून वळण घेत सपाटीवर येते .परत काही वळणे घेत समुद्राला मिळते.काही नद्या काही वेळेस वळण बदलून हाहा: कार माजवतात.दामोदर नदी पण खूप वेळा वळणे बदलून पुर परिस्थती निर्माण करते .त्यामुळे तिला अश्रूंची नदी नाव पडले.

कथे मध्ये कथानक अचानक वेगळचं वळण घेते. चित्रपटात पण कधी कुठल्या वळणावर गाणे घालावे दिग्दर्शकाला ठरवावं लागतं.

अक्षराला पण वळण पाहिजे.अक्षर वळणदार असले पाहिजे.वळणदार अक्षरात लिहिलेले वाचायला छान वाटते.

माणसाच्या जीवनात पण अनेक वळणे येतात काही सुखद तर काही

दुःखद. प्रत्येक वळणावर काही माणसे भेटतात.

माणसाचे जीवनातील अखरी वळण त्याने कसे घ्यायचे आणि कसे पेलायचे ही खरी परीक्षा .

सौ मेधा भिडे