घटस्फोटावर खूप चर्चा होते... पण "सायलेंट डिवोर्स "वर मात्र जवळजवळ कोणीच बोलत नाही. सायलेंट डिव्होर्स म्हणजे: कायदेशीर रित्या वेगळे न होता भावनिक आणि मानसिकरित्या पूर्णपणे वेगळे होणे.

कारण त्याला कोणतीही कोर्टाची तारीख, कागदपत्रं नसतात.

कोणतीही अधिकृत आकडेवारी नसते.

पण तरीही ते अनेकांच्या आयुष्याचे वास्तव आहे .

एकाच घरात राहत असतात,.

पण संवाद फक्त कामापुरता असतो.

एकत्र जेवण नाही...

मनमोकळ्या गप्पा नाहीत...

एकमेकांसाठी वेळ नाही...

नात्यातील ऊब नाही...

दोघांचे वेगवेगळे वेळापत्रक, वाढलेला ताण, मोबाईल आणि सोशल मीडियामध्ये अडकलेलं आयुष्य—या सगळ्याचा परिणाम काही नात्यांवर होतो. काही जोडपी या अडचणींवर मात करतात, तर काहींच्या नात्यात शांतपणे दुरावा वाढत जातो.

बाहेरून मात्र सगळं छान दिसत असतं.

व्हाट्सअप स्टेटसवर जोडीनं फोटो...

वाढदिवसाच्या शुभेच्छा...

सण-समारंभ हसत साजरे केले जातात.

पण घराच्या बंद दारा आड वास्तव मात्र वेगळं असू शकतं. ते वास्तव फक्त त्या दोघांनाच माहीत असतं.

माझ्या आजूबाजूला, मैत्रिणींमध्ये, ओळखीच्या कुटुंबांमध्ये. मी असे बघितलेले आहे पण म्हणून हा प्रत्येकाचाच अनुभव आहे असं मी म्हणणार नाही; पण हा विषय अस्तित्वातच नाही, असंही मला वाटत नाही.

मग प्रश्न पडतो—वेगळं का होत नाहीत?

कारणं अनेक असतात.

• समाज काय म्हणेल?

• घटस्फोटित व्यक्तीकडे अजूनही वेगळ्या नजरेने पाहिलं जातं.

• मुलांचं भविष्य.

• घर आणि गाडीचे कर्ज.

• आर्थिक अवलंबित्व.

• जोडीदाराचा गंभीर आजार.

• अनेक वर्षांची झालेली सवय.

• पुन्हा नव्याने आयुष्य सुरू करण्याची भीती.

म्हणून अनेकदा लोक प्रेमामुळे नाही, तर परिस्थितीमुळे एकत्र राहतात.

आपल्या समाजात काही जण अभिमानाने म्हणतात, "आमच्या समाजात घटस्फोट होत नाहीत."

पण एक प्रश्न विचारावासा वाटतो...

खरंच घटस्फोट होत नाहीत, की कायदेशीर घटस्फोट होत नाहीत?

आजूबाजूला नीट पाहिलं तर अशी कितीतरी नाती दिसतील, जी वरवर सुखी कुटुंब म्हणून वावरत असतात, पण मनाने खूप दूर गेलेली असतात.लग्न टिकणं आणि नातं टिकणं या दोन वेगळ्या गोष्टी आहेत.

सायलेंट डिवोर्स हा कोणत्याही एका समाजाचा किंवा एका वर्गाचा प्रश्न नाही. तो अनेक कुटुंबांमध्ये वेगवेगळ्या स्वरूपात दिसू शकतो. त्यामुळे या विषयावर दोषारोप करण्यापेक्षा प्रामाणिकपणे चर्चा होणं अधिक गरजेचं आहे.

कारण काही नात्याचा न्यायालयात निकाल लागतो.

आणि काही नाती एकाच घरात, दुरावा निर्माण होऊन मनाने वेगळी होतात .

सायलेंट डिव्होर्सबद्दल बोलणं म्हणजे लग्नसंस्थेच्या विरोधात बोलणं नाही; तर नात्यांमधील वास्तव समजून घेण्याचा प्रयत्न आहे.

एक प्रश्न...

आपल्या समाजात खरंच घटस्फोट कमी आहेत, की सायलेंट डिवोर्स जास्त आहेत?

तुमच्या मते आजच्या काळात अधिक धोकादायक काय आहे— कायदेशीर घटस्फोट, की वर्षानुवर्षे भावनिकदृष्ट्या दुरावल्या नात्यात जगणं?

तुमचं मत काय?

सायलेंट घटस्फोट

रिलेशनशिप