ସୋସିଆଲ ମିଡିଆ ଯୁଗରେ ଦେଶପ୍ରେମର ନୂଆ ସଂଜ୍ଞା :-

ଆଜିକାଲି ସକାଳୁ ଉଠିଲେ ଆମ ହାତ ପ୍ରଥମେ ମୋବାଇଲ୍‌ ଫୋନ୍‌ କୁ ଖୋଜେ। ଫେସବୁକ୍‌, ଇନଷ୍ଟାଗ୍ରାମ କିମ୍ବା ହ୍ୱାଟ୍ସଆପ୍‌ ଷ୍ଟାଟସ୍‌ ସ୍କ୍ରୋଲ୍‌ ନକଲେ ଆମ ଦିନ ଆରମ୍ଭ ହୁଏନି। ଆଉ ଏଇ ଭିତରେ ଯେତେବେଳେ ସ୍ୱାଧୀନତା ଦିବସ ଆସେ, ସେତେବେଳେ ଆମର ଡିଜିଟାଲ୍‌ ଦୁନିଆ ପୂରା ତ୍ରିରଙ୍ଗା ରଙ୍ଗରେ ରଙ୍ଗେଇ ହୋଇଯାଏ। ପ୍ରତି ପ୍ରୋଫାଇଲ୍‌ ପିକ୍ଚର୍‌ ବଦଳିଯାଏ, ସମସ୍ତେ ଦେଶାତ୍ମବୋଧକ ଗୀତର ରିଲ୍ସ ସେୟାର କରନ୍ତି। ଏହାକୁ ଦେଖି ଅନେକ ବଡ଼ଲୋକ କହନ୍ତି, "ଆଜିକାଲିର ପିଲାଙ୍କ ଦେଶପ୍ରେମ ଖାଲି ସୋସିଆଲ ମିଡିଆରେ, ଦେଖେଇହେବା ପାଇଁ।" କିନ୍ତୁ ପ୍ରକୃତରେ କଣ ସେମିତି? ମୋ ମତରେ ଆଦୌ ନୁହେଁ। ସମୟ ବଦଳିବା ସହ ଆମର ଭାବନା ପ୍ରକାଶ କରିବାର ତରିକା ବଦଳିଛି ଏବଂ ସୋସିଆଲ ମିଡିଆ ଯୁଗରେ ଦେଶପ୍ରେମ ଏକ ସୁନ୍ଦର, ନୂଆ ରୂପ ନେଇଛି।

୧୯୪୭ ମସିହା ଅଗଷ୍ଟ ୧୫ ତାରିଖରେ ଯେତେବେଳେ ଭାରତ ସ୍ୱାଧୀନ ହେଲା, ସେତେବେଳେ ଦେଶପ୍ରେମର ସଂଜ୍ଞା ଥିଲା ସ୍ୱାଧୀନତା ସଂଗ୍ରାମ, ବଳିଦାନ ଏବଂ ଦେଶକୁ ବ୍ରିଟିଶ ଶାସନରୁ ମୁକ୍ତ କରିବା। ସେହି ସମୟରୁ ଆଜି ଆମେ ୮୦ତମ ସ୍ୱାଧୀନତାର ଦିବସରେ ସମୟ ବଦଳିଛି, ସମାଜ ବଦଳିଛି ଏବଂ ତା’ ସହିତ ବଦଳିଛି ଦେଶପ୍ରେମ ପ୍ରକାଶ କରିବାର ଶୈଳୀ। ଆଜିର ଯୁଗ ହେଉଛି ସୋସିଆଲ ମିଡିଆ ଏବଂ କୃତ୍ରିମ ବୁଦ୍ଧିମତ୍ତା (AI) ର ଯୁଗ।ଏହି ଡିଜିଟାଲ୍ ବିପ୍ଳବ ଭିତରେ ଦେଶପ୍ରେମ କେବଳ ସୀମାନ୍ତରେ ଠିଆ ହେବା କିମ୍ବା ବର୍ଷକୁ ଦୁଇଥର ଜାତୀୟ ପତାକା ଉତ୍ତୋଳନ କରିବା ମଧ୍ୟରେ ସୀମିତ ହୋଇ ରହିନାହିଁ। ଏହା ଏବେ ଏକ ନୂଆ ରୂପ ନେଇଛି, ଯାହାକୁ ଆମେ "ଡିଜିଟାଲ୍ ଦେଶପ୍ରେମ" ବୋଲି କହିପାରିବା।

ହ୍ୟାସଟ୍ୟାଗ୍‌ରୁ ହୃଦୟ ପର୍ଯ୍ୟନ୍ତ: ଦେଶପ୍ରେମର ନୂଆ ଭାଷା

ଆମ ବାପା-ଜେଜେବାପାଙ୍କ ସମୟରେ ଦେଶପ୍ରେମର ମାନେ ଥିଲା ସ୍ୱାଧୀନତା ସଂଗ୍ରାମରେ ଭାଗ ନେବା କିମ୍ବା ସୀମାରେ ଠିଆ ହେବା। କିନ୍ତୁ ଆଜିର ପିଢ଼ି ପାଇଁ ଦେଶପ୍ରେମର ଭାଷା ଟିକେ ଅଲଗା। ଯେତେବେଳେ ଭାରତୀୟ ସେନା ଶତ୍ରୁକୁ ମୁହଁତୋଡ଼ ଜବାବ ଦିଏ କିମ୍ବା ନୀରଜ ଚୋପ୍ରା ଅଲିମ୍ପିକ୍ସରେ ସୁନା ଜିତନ୍ତି, ସେତେବେଳେ ଆମ ହୃଦୟ ଗର୍ବରେ କୁଣ୍ଢେମୋଟ ହୋଇଯାଏ। ଆଉ ସେହି ଗର୍ବକୁ ଆମେ ଦେଶର କୋଣ ଅନୁକୋଣରେ ପହଞ୍ଚାଇବା ପାଇଁ #ProudIndian କିମ୍ବା #IndiaFirst ଭଳି ହ୍ୟାସଟ୍ୟାଗ୍ ବ୍ୟବହାର କରୁ। AI (Artificial Intelligence) ଜୀବନର ପ୍ରତିଟି କ୍ଷେତ୍ରକୁ ନିୟନ୍ତ୍ରଣ କରୁଛି। AI ଏବଂ ଆଧୁନିକ ପ୍ରଯୁକ୍ତିବିଦ୍ୟା ମାଧ୍ୟମରେ ଆଜି ଭାରତର କଳା, ସଂସ୍କୃତି ଏବଂ ଐତିହ୍ୟକୁ ବିଶ୍ୱ ଦରବାରରେ ଅତି ସୁନ୍ଦର ଭାବରେ ଉପସ୍ଥାପନ କରାଯାଇପାରୁଛି।ଜଣେ ଭାରତୀୟ ଯୁବକ ଘରେ ବସି AI ସାହାଯ୍ୟରେ ଦେଶର ପ୍ରାଚୀନ ଇତିହାସ ଏବଂ ମନ୍ଦିର ଶିଳ୍ପର ଭିଜୁଆଲ୍ ପ୍ରସ୍ତୁତ କରି ସାରା ବିଶ୍ୱରେ ସେୟାର କରୁଛି। ମାତୃଭୂମିର ମାଟିର ବାସ୍ନା ଏବେ ଡିଜିଟାଲ୍ ମାଧ୍ୟମରେ ସୀମା ପାର ହୋଇ ବିଦେଶରେ ରହୁଥିବା ପ୍ରବାସୀ ଭାରତୀୟଙ୍କ ହୃଦୟକୁ ମଧ୍ୟ ଛୁଇଁପାରୁଛି।

AI ଯୁଗରେ ମଣିଷ ଓ ମାତୃଭୂମି:

ଆମେ ଏବେ AI ବା ଆର୍ଟିଫିସିଆଲ୍ ଇଣ୍ଟେଲିଜେନ୍ସର ଦୁନିଆରେ ପହଞ୍ଚିଛୁ। ସବୁ କାମ ମେସିନ୍ କରୁଛି। କିନ୍ତୁ ମେସିନ୍ କେବେ ମାତୃଭୂମିର ମାଟିକୁ ଭଲପାଇବା ଶିଖାଇ ପାରିବନି। ଟେକ୍ନୋଲୋଜି ଯେତେ ଆଗକୁ ଗଲେ ବି ଆମ ମନର ଓଡ଼ିଆ ଭାବ ଏବଂ ଭାରତୀୟ ସଂସ୍କୃତି ସେମିତି ରହିଛି। ବରଂ ଆଜିର ଯୁବପିଢ଼ି AI ଏବଂ ଡିଜିଟାଲ୍ ଆର୍ଟ ସାହାଯ୍ୟରେ ଜଗନ୍ନାଥ ସଂସ୍କୃତି, ଭାରତର ପୁରୁଣା ଇତିହାସ ଏବଂ ସ୍ୱାଧୀନତା ସଂଗ୍ରାମୀଙ୍କ ବୀରତ୍ୱର କାହାଣୀକୁ ଏତେ ସୁନ୍ଦର ଭାବେ ସଜେଇ ପୋଷ୍ଟ କରୁଛନ୍ତି, ଯାହା ପୂର୍ବରୁ କେବେ ହୋଇନଥିଲା। ବିଦେଶରେ ରହୁଥିବା ଓଡ଼ିଆ ପିଲାଟିଏ ମଧ୍ୟ ଇଣ୍ଟରନେଟ୍ ମାଧ୍ୟମରେ ନିଜ ଦେଶର ମାଟି ସହ ସବୁବେଳେ ଯୋଡ଼ି ହୋଇ ରହୁଛି।

Gen Z: ଭାରତର ଭବିଷ୍ୟତ ନା ବର୍ତ୍ତମାନର ପରିବର୍ତ୍ତନ?

Gen Z ହେଉଛି ଏମିତି ଏକ ପିଢ଼ି, ଯିଏ ଟେକ୍ନୋଲୋଜି, ଇଣ୍ଟରନେଟ୍ ଓ ସୋସିଆଲ୍ ମିଡିଆ ସହିତ ବଢ଼ିଛି। ମୋ ମତରେ, Gen Z କେବଳ ଭବିଷ୍ୟତ ନୁହେଁ; ସେମାନେ ବର୍ତ୍ତମାନର ପରିବର୍ତ୍ତନର ମଧ୍ୟ ଏକ ମୁଖ୍ୟ ଅଂଶ। ନୂଆ ଚିନ୍ତାଧାରା, ଡିଜିଟାଲ୍ ଦକ୍ଷତା, ନୂଆ ଉଦ୍ୟମ ଓ ସାମାଜିକ ପ୍ରଶ୍ନ ପ୍ରତି ସଚେତନତା ମାଧ୍ୟମରେ ଏହି ପିଢ଼ି ନିଜର ଭୂମିକା ଦେଖାଉଛି।ଆଜି ଯଦି ଦେଶର କୌଣସି କୋଣରେ ବନ୍ୟା ବା ପ୍ରାକୃତିକ ବିପର୍ଯ୍ୟୟ ଆସେ, ତେବେ ଏହି ସୋସିଆଲ ମିଡିଆ ମାଧ୍ୟମରେ ହିଁ ମିନିଟ୍‌କ ଭିତରେ କୋଟି କୋଟି ଟଙ୍କାର ସାହାଯ୍ୟ ଏବଂ ରିଲିଫ୍ ସାମଗ୍ରୀ ପହଞ୍ଚିଯାଏ। "Vocal for Local" ଆମ ପାଇଁ କେବଳ ଏକ ସରକାରୀ ସ୍ଲୋଗାନ ନୁହେଁ। ରାସ୍ତା କଡ଼ରେ ମାଟି ଦୀପ ତିଆରି କରୁଥିବା ଗରିବ କାରିଗର କିମ୍ବା ଜଣେ ଛୋଟ ଦୋକାନୀର ଭିଡିଓ ପ୍ରସ୍ତୁତ କରି ତାକୁ ଭାଇରାଲ୍ କରିବା ଏବଂ ତା’ର ରୋଜଗାର ବଢ଼ାଇବା ହିଁ ଆଜିର ଯୁବପିଢ଼ିର ଦେଶପ୍ରେମ।

ଶେଷ କଥା : -

ଅଗଷ୍ଟ ୧୫ ଆସିଲେ ହ୍ୱାଟ୍ସଆପ୍‌ରେ ତ୍ରିରଙ୍ଗା ଷ୍ଟାଟସ୍ ଲଗାନ୍ତୁ, ସେଥିରେ କିଛି ଭୁଲ୍ ନାହିଁ। କିନ୍ତୁ ଆମର ଦେଶପ୍ରେମ ଯେମିତି କେବଳ ୨୪ ଘଣ୍ଟାର ସେହି ଷ୍ଟାଟସ୍ ଭିତରେ ମରି ନଯାଏ। ସୋସିଆଲ ମିଡିଆର ସେହି ସକାରାତ୍ମକ ଚିନ୍ତାଧାରାକୁ ଆମେ ବାସ୍ତବ ଜୀବନରେ ଆପଣାଇବା ଉଚିତ୍। ଜଣେ ଭଲ ନାଗରିକ ହେବା, ଟ୍ରାଫିକ୍ ନିୟମ ମାନିବା, ପରିବେଶକୁ ସଫା ରଖିବା ଏବଂ ନିଜ ସ୍ୱାର୍ଥ ଉପରେ ଦେଶର ହିତକୁ ସ୍ଥାନ ଦେବା ହିଁ ପ୍ରକୃତ ଦେଶପ୍ରେମ। ଏହି ୮୦ତମ ସ୍ୱାଧୀନତା ଦିବସରେ ଆସନ୍ତୁ କେବଳ ପାଟିରେ "ଜୟ ହିନ୍ଦ୍" ନକହି, ଆମର କାମ ଏବଂ ଚିନ୍ତାଧାରାରେ ଭାରତକୁ ଏକ ଶ୍ରେଷ୍ଠ ରାଷ୍ଟ୍ର ବନାଇବାକୁ ଚେଷ୍ଟା କରିବା।

କାରଣ ଦେଶପ୍ରେମ କେବଳ ହ୍ୟାସଟ୍ୟାଗ୍‌ରେ ନୁହେଁ, ହୃଦୟରେ ରହିବା ଦରକାର; ଆଉ ହୃଦୟରେ ଥିବା ଦେଶପ୍ରେମ ଆମ କାର୍ଯ୍ୟରେ ଦେଖାଯିବା ଦରକାର।

ଜୟ ହିନ୍ଦ୍‌! 🇮🇳

ଆଜିର ପିଢ଼ି ଓ ଦେଶପ୍ରେମ