ମଣିଷ ଜୀବନରେ ଶରୀର ଓ ମନର ସୁସ୍ଥତାର ବିଶେଷ ମହତ୍ତ୍ୱ ରହିଛି। ସୁସ୍ଥ ଶରୀରରେ ସୁସ୍ଥ ମନ ବାସ କରେ। ଏଥିପାଇଁ ଖେଳ ଓ ବ୍ୟାୟାମ ଆମ ଜୀବନର ଏକ ଆବଶ୍ୟକ ଅଂଶ। କୁସ୍ତି ଓ ଜୁଡୋ ଏହି ଦିଗରେ ଦୁଇଟି ଗୁରୁତ୍ୱପୂର୍ଣ୍ଣ ଖେଳ। ଦୁଇଟି ଖେଳର ଲକ୍ଷ୍ୟ ଓ ପଦ୍ଧତି ଅଲଗା ହେଲେ ମଧ୍ୟ ଉଭୟ ଆମକୁ ଶକ୍ତି, ଶୃଙ୍ଖଳା, ସାହସ, ଆତ୍ମବିଶ୍ୱାସ ଓ ଆତ୍ମସଂଯମର ଶିକ୍ଷା ଦିଏ।

କୁସ୍ତି ଆମ ଦେଶର ଏକ ପୁରାତନ ଓ ପାରମ୍ପରିକ ଖେଳ। ଗାଁ ଗହଳିର ଅଖାଡ଼ାରେ ପହିଲିମାନେ ନିୟମିତ ଅଭ୍ୟାସ କରୁଥିଲେ। ସକାଳୁ ଉଠି ବ୍ୟାୟାମ, ଦୌଡ଼, ଶରୀରଚର୍ଚ୍ଚା ଓ ମାଟିରେ କୁସ୍ତି ଅଭ୍ୟାସ ସେମାନଙ୍କ ଦୈନନ୍ଦିନ ଜୀବନର ଅଂଶ ଥିଲା। ଏହି ଅଭ୍ୟାସ ଶରୀରକୁ ସବଳ କରିବା ସହିତ ମନକୁ ମଧ୍ୟ ଦୃଢ଼ କରୁଥିଲା।କୁସ୍ତି କେବଳ ଜଣେ ପ୍ରତିଦ୍ୱନ୍ଦ୍ୱୀକୁ ହରାଇବାର ଖେଳ ନୁହେଁ। ଏଥିରେ ଧୈର୍ଯ୍ୟ, କୌଶଳ, ସନ୍ତୁଳନ ଓ ଶାରୀରିକ ଶକ୍ତିର ଆବଶ୍ୟକତା ରହେ। କୁସ୍ତି ଖେଳାଳି ନିଜ ଶରୀରକୁ ନିୟନ୍ତ୍ରଣ କରିବା ଶିଖେ। ପରିଶ୍ରମ ଓ ନିୟମିତ ଅଭ୍ୟାସ ତାକୁ ଲକ୍ଷ୍ୟ ପାଇଁ ଲଢ଼ିବାର ପ୍ରେରଣା ଦିଏ।

ଅଖାଡ଼ାରେ ଦୁଇଜଣ ଖେଳାଳି ପରସ୍ପରର ପ୍ରତିଦ୍ୱନ୍ଦ୍ୱୀ ହୋଇଥାନ୍ତି, କିନ୍ତୁ ଖେଳ ଶେଷରେ ସେମାନେ ପରସ୍ପରକୁ ସମ୍ମାନ କରନ୍ତି। ଏହା ଆମକୁ ଶିଖାଏ ପ୍ରତିଯୋଗିତା ରହୁ, କିନ୍ତୁ ମନରେ ଶତ୍ରୁତା ନ ରହୁ। ବିଜୟରେ ଅହଂକାର ନ କରିବା ଓ ପରାଜୟରୁ ଶିକ୍ଷା ନେବା ହେଉଛି କୁସ୍ତିର ଏକ ମହାନ ଶିକ୍ଷା।

ଜୁଡୋ ହେଉଛି ଜାପାନରୁ ଉତ୍ପତ୍ତି ହୋଇଥିବା ଏକ ମାର୍ଶାଲ ଆର୍ଟ ଓ ଅଲିମ୍ପିକ୍‌ ଖେଳ। ଏଥିରେ କେବଳ ଶକ୍ତି ପ୍ରୟୋଗ ନୁହେଁ, ବରଂ ପ୍ରତିଦ୍ୱନ୍ଦ୍ୱୀର ଗତି ଓ ଶକ୍ତିକୁ ବୁଝି କୌଶଳର ସହାୟତାରେ ତାକୁ ନିୟନ୍ତ୍ରଣ କରିବା ଉପରେ ଗୁରୁତ୍ୱ ଦିଆଯାଏ। ତେଣୁ ଜୁଡୋରେ ଶରୀର ସହିତ ବୁଦ୍ଧି ଓ ଏକାଗ୍ରତାର ମଧ୍ୟ ଆବଶ୍ୟକତା ରହେ।

ଜୁଡୋ ଅଭ୍ୟାସ ଶରୀରକୁ ସୁସ୍ଥ ରଖିବା ସହିତ ଆତ୍ମରକ୍ଷାର ଜ୍ଞାନ ଦିଏ। ବିପଦ ସମୟରେ ନିଜକୁ ସୁରକ୍ଷିତ ରଖିବାର ଆତ୍ମବିଶ୍ୱାସ ଏଥିରୁ ମିଳେ। ତେବେ ଜୁଡୋର ଶକ୍ତିକୁ ଅନ୍ୟକୁ କ୍ଷତି କରିବା ପାଇଁ ନୁହେଁ, ଆବଶ୍ୟକ ସମୟରେ ଆତ୍ମରକ୍ଷା ପାଇଁ ବ୍ୟବହାର କରିବା ଉଚିତ।

ଜୁଡୋର ମୂଳ ଶିକ୍ଷା ହେଉଛି ପରସ୍ପର ସମ୍ମାନ, ଆତ୍ମନିୟନ୍ତ୍ରଣ ଓ ସହଯୋଗ। ପ୍ରତିଦ୍ୱନ୍ଦ୍ୱୀଙ୍କୁ ସମ୍ମାନ କରିବା ଏହି ଖେଳର ଏକ ମୁଖ୍ୟ ନୀତି। ଏହି ମନୋଭାବ ଯଦି ଆମ ସାଧାରଣ ଜୀବନରେ ଆସିପାରେ, ତେବେ ସମାଜରେ ହିଂସା କମିବ ଓ ଶାନ୍ତି, ମିତ୍ରତା ଓ ଭଲପାଇବା ବଢ଼ିବ।୨୮ ଅକ୍ଟୋବର ବିଶ୍ୱ ଜୁଡୋ ଦିବସ ଅବସରରେ ଜୁଡୋର ଏହି ମୂଲ୍ୟବୋଧକୁ ଆହୁରି ବ୍ୟାପକ କରିବାର ଆବଶ୍ୟକତା ରହିଛି। ଆନ୍ତର୍ଜାତିକ ଜୁଡୋ ଫେଡେରେସନ୍ ଜୁଡୋର ବିକାଶ ଓ ବିଶ୍ୱସ୍ତରୀୟ ପ୍ରସାରରେ କାର୍ଯ୍ୟ କରୁଛି। ବିଭିନ୍ନ ଦେଶର ଖେଳାଳିମାନେ ଏହି ଖେଳ ମାଧ୍ୟମରେ ଏକାଠି ହେଉଛନ୍ତି। ଭିନ୍ନ ଭାଷା ଓ ସଂସ୍କୃତି ଥିଲେ ମଧ୍ୟ ଖେଳ ସମସ୍ତଙ୍କ ମଧ୍ୟରେ ଏକତାର ସେତୁ ତିଆରି କରୁଛି। କୁସ୍ତି ଆମକୁ ଶିଖାଏ ଦୃଢ଼ ହେବାକୁ, ଜୁଡୋ ଶିଖାଏ ଶକ୍ତିକୁ ସଂଯମରେ ବ୍ୟବହାର କରିବାକୁ। ଦୁଇଟି ଖେଳର ଏହି ଶିକ୍ଷା ଆମ ଜୀବନ ପାଇଁ ବହୁତ ଆବଶ୍ୟକ। ଆଜି ଆମ ସମାଜରେ ଯଦି ପ୍ରତିଯୋଗିତା ସହିତ ସହଯୋଗ, ଶକ୍ତି ସହିତ ନମ୍ରତା ଓ ଭିନ୍ନତା ମଧ୍ୟରେ ଏକତା ରହିବ, ତେବେ ସମାଜ ଆହୁରି ସୁନ୍ଦର ହେବ।

ଆସନ୍ତୁ, ବିଶ୍ୱ ଜୁଡୋ ଦିବସରେ ଆମେ ଆସ୍ଥା, ସଦ୍ଭାବ ଓ ସହଯୋଗର ସଂକଳ୍ପ ନେବା। ଶରୀରକୁ ସୁସ୍ଥ, ମନକୁ ଶାନ୍ତ ଓ ଚରିତ୍ରକୁ ଦୃଢ଼ କରିବା। କୁସ୍ତିର ଅଖାଡ଼ା ଆମକୁ ଶକ୍ତି ଦେଉ, ଜୁଡୋର ମଞ୍ଚ ଆମକୁ ସଂଯମ ଓ ମାନବିକତା ଶିଖାଉ। ଖେଳ ମାଧ୍ୟମରେ ମଣିଷ ମଣିଷ ମଧ୍ୟରେ ମିତ୍ରତା ଓ ପ୍ରେମ ବଢ଼ୁ। ସମାଜରେ ଶାନ୍ତି ଓ ସୌନ୍ଦର୍ଯ୍ୟ ବୃଦ୍ଧି ପାଉ। ସମସ୍ତଙ୍କ ଜୀବନ ସୁଖୀ ଓ ମଙ୍ଗଳମୟ ହେଉ—ଏହା ହିଁ ଆମର ଶୁଭକାମନା।

!! ସୁଶାନ୍ତ କୁମାର ସାସମଲ

ବ୍ରହ୍ମପୁର ଗଞ୍ଜାମ!!

କୁସ୍ତିର ଅଖାଡ଼ାରୁ ବିଶ୍ୱମଞ୍ଚ ଯାଏଁ

କୁସ୍ତିର ଅଖାଡ଼ାରୁ ବିଶ୍ୱମଞ୍ଚ ଯାଏଁ