ଶ୍ରୀ ମଦ୍ ଭଗବଦ୍ ଗୀତା ରୁ ପଦେ

ବିଶ୍ୱ ରୂପ ଦର୍ଶନ ଯୋଗ

🌹🌹🌹🌹

ଓଁ ନମଃ ଭଗବତେ ବାସୁଦେବାୟ।

ମଧ୍ୟମ ପାଣ୍ଡବ ବିନତି କରିଲା

ମହାବାହୁ ବାରେ ଶୁଣ,

ତୁମ୍ଭ ବିଶ୍ୱରୂପ ଦର୍ଶନ କରାଅ

ଆହେ ଅଭେଦ୍ୟ ନିର୍ଗୁଣ।

ତୁମ୍ଭ ଅବିନାଶୀ ସ୍ୱରୂପ ଦର୍ଶନ

କରିବାର ଯୋଗ୍ୟ କର,

ଅଜ୍ଞାନୀ ମାନବକୁ ହେ ମହାବାହୁ

ଜ୍ଞାନ ଚକ୍ଷୁ ଦାନ କର।

ସବ୍ୟସାଚୀ ର ଆକୁଳ ଦେଖି ପ୍ରଭୁ

ଆଶିର୍ବାଦ କରିଥିଲେ,

ସହସ୍ର ରୂପମାନ ଏକତ୍ରିତ ଥିବା

ଏକ ମୂର୍ତ୍ତି ଦେଖାଇଲେ।

କଳ୍ପନା ବହିର୍ଭୂତ ରୂପ ଦେଖି ସେ

ଆଚମ୍ବିତ ହୋଇ ଗଲା,

ଭୟେ ଆକୁଳିତ ଗାଣ୍ଡିବଧାରୀର

ନୟନ ବରଷି ଗଲା।

ସାକାର ରୂପ ଧାରଣ କାରି ପ୍ରଭୁ

ଆହେ ନିରାକାର ବ୍ରହ୍ମ,

ଅନନ୍ତ କୋଟି ଆକୃତି ଧାରଣ କାରି

ତୁମେତ ପରମ ବ୍ରହ୍ମ।

ବିଚଳିତ ହୋଇ କହେ ପୃଥାସୂତ

ଆଦି ଅନ୍ତ ପାଉନାହିଁ,

କେଉଁ ଠୁ ଦେଖିବୀକେମିତି ଦେଖିବି

କିଛି ଜାଣି ପାରୁନାହିଁ।

କୋଟି ନକ୍ଷତ୍ର ଙ୍କ ଜ୍ୟୋତି ସମ୍ମିଳିତ

ରଶ୍ମି ବାହାରି ଆସୁଛି,

ନୟନ ପଟଳ ଚମକି ଯାଉଛି

ଚକ୍ଷୁ ମୁଦ୍ରିତ ହେଉଛି।

ସ୍ୱରୂପ ତୋହର ଅନନ୍ତ ଅବ୍ୟକ୍ତ

ଆଶ୍ଚର୍ଯ୍ୟ ଲାଗାଇମତେ,

ବହୁ ବକ୍ତ୍ର ବହୁ ନେତ୍ର ବହୁପାଦ

ବୁଝି ପାରୁନାହିଁ ତତେ।

କରାଳ ରୂପକୁ ଦେଖି ମହାବାହୁ

ପ୍ରବ୍ୟସ୍ଥିତ ହେଉଅଛି,

ପ୍ରଶମିତ କର ଏବିଶ୍ୱ ରୂପକୁ

ତୁମ୍ଭ ପୟରେ ନମୁଛି।

ରୁଦ୍ର ରୂପ ଉଗ୍ର ରୂପ ମହାବାହୁ

ମୁହିଁ ଦେଖି ପାରିବିନି,

ସେହି ଶାନ୍ତ ଶ୍ୟାମଳାଙ୍ଗ ମହାପ୍ରଭୁ

ଆଉ କିବା ଦିଶିବନି।

ସତ୍ୟ ସୁନ୍ଦର କୋମଳ ରୂପଟିକୁ

ଦର୍ଶନ କରାଅ ବାରେ,

ବିଶ୍ୱ ରୂପ ଦର୍ଶନ କରି ଅର୍ଜୁନ

ଲୋଟିଯାଏ ଶ୍ରୀ ପୟରେ।

ବିକଟାଳ ଦିଶେ ଦନ୍ତପାତିଯାକ

ସବୁ ଚୋବାଇ ଯାଉଛ,

ଅଗ୍ନି ବରଷଇ ନୟନ ଦ୍ୱୟରୁ

ଭୟଂକର ଦିଶୁଅଛ।

ତ୍ରାହି ତ୍ରାହି ଡାକି ଆକୁଳେ ଚାହିଁଛି

ଭୟରେ ଥରଇ ତନୁ,

ଭୁଲିଛି ନିଜର ଅସ୍ତିତ୍ୱ ପ୍ରମାଣ

ଅଶ୍ରୁ ଝରଇ ନୟନୁ।

ପ୍ରବ୍ୟଥିତ ହୁଏ ଅନ୍ତରାତ୍ମା ମୋର

ହେଉଅଛି ମୁଁ ବ୍ୟଥିତ,

ହେ କ୍ଷୀରସାଗର ବାସୀ ଚକ୍ରଧର

ପ୍ରଭୁ ମୁଁ ତୁମ୍ଭ ଆଶ୍ରିତ।

ମାତା ଯଶୋମତି ଦେଖିଥିଲେ ଦିନେ

ତୁମ୍ଭ ଅନ୍ତରେ ବ୍ରହ୍ମାଣ୍ଡ,

ମୋର ଧୈର୍ଯ୍ୟ ନାହିଁ ଦେଖିବାକୁ ପ୍ରଭୁ

ବୁଲାଇ ଦିଅଇ ମୁଣ୍ଡ।

ହେ ମହାବିଷ୍ଣୁ ସର୍ବତୁମ୍ଭ ଭିଆଣ

ପ୍ରଭୁ ବାରେ ଦୟାକର,

ଆହେ ଅବତାରୀ କୃଷ୍ଣ ଦେହଧାରୀ

ତୁମ୍ଭେ ପ୍ରଭୁ ନିରାକାର।

ଜୟ ଶ୍ରୀ ରାଧା

ଲିଳା ମୟୀ ଦାଶ

କେନ୍ଦ୍ରାପଡ଼ା

ଗୀତା ବାଣୀ

gita bani