🦐🦐ଚିଲିକା ଚିଙ୍ଗୁଡ଼ି 🦐🦐

ସକାଳୁ ସକାଳୁ ସବୁଦିନ ଭଳି
ବଜାରକୁ ଆଜି ଗଲି
ବୁଧବାର ବୋଲି ଚିଲିକା ଚିଙ୍ଗୁଡ଼ି
କିଣିବି ବୋଲି ଭାବିଲି

ବଜାରେ ଦେଖିଲି ତିନି ଚାରି ଯାଗା
ଚିଙ୍ଗୁଡ଼ି କଙ୍କଡା ମାଛ
କେଉଁଠୁ କିଣିଲେ ଶସ୍ତାରେ ପାଇବି
ଭାବି ହେଲି ଆଗ ପଛ

ପ୍ରଥମ ଦୋକାନୀ ଚାହୁଁଥିଲା ମୋତେ
କେତେ କଥା ଭାବି ଭାବି
ବଡ଼ ଗରାଖ କି ଛୋଟ ଗରାଖ ମୁଁ
କେତେ ମାଛ ଅବା ନେବି

ଭାବନାରେ ତା'ର ହଜିଗଲା ସିଏ
ଡାକିବାକୁ ଭୁଲି ଗଲା
ଡାକିଲାନି ବୋଲି ହୃଦୟକୁ ମୋର
ଭାରି ଜୋ'ରେ ବାଧିଗଲା

ତା' ପାଖରେ ସବୁ ସଜ ମାଛ ଥିଲା
କିଣିବାକୁ ଚାହୁଁଥିଲି
ଡାକିଲାନି ବୋଲି ତା' ଉପରେ ରାଗି
ଦ୍ଵିତୀୟ ଦୋକାନେ ଗଲି

ବୁଢ଼ା ଦୋକାନୀର କାମ ସରୁନାହିଁ
ସଜାଇବାରେ ତା' ମନ
ଦୁଇ ତିନି ଥର ଦର ପଚାରିଲି
ମୋଟେ ଦେଲାନି ସେ ଧ୍ୟାନ

ନିଜକୁ ନିଜେ ମୁଁ ଅପମାନ ପାଇ
ବାଧ୍ୟହୋଇ ଲେଉଟିଲି
ଚିଙ୍ଗୁଡ଼ି ନେବି କି ଚିକେନ କିଣିବି
ଦ୍ବନ୍ଦରେ ମୁଁ ପଡ଼ିଗଲି

ସେତିକି ବେଳକୁ ଟୋକା ଦୋକାନୀଟା
ହସି ମୋତେ ଡାକିଦେଲା
ଜିଅନ୍ତା ଚିଙ୍ଗୁଡ଼ି ନିଅନ୍ତୁ ସା'ରେ
କେ.ଜି ଛଅ'ଶ ଲାଗିଲା

ତା' କଥାରେ ମୋତେ କିମିଆ କଲା ସେ
ଗାଡ଼ି ରୁ ମୁଁ ଓହ୍ଲାଇଲି
କେଜିଏ ଚିଙ୍ଗୁଡ଼ି କିଣି ନେବି ବୋଲି
ମନେ ମନେ ସ୍ଥିର କଲି

ଦେଖିଲି ଯାଇ ମୁଁ ଚିଲିକା କଣ୍ଟାଳ
ସଜ ସଜ ଲାଗୁଥିଲା
କହିଲି ବେଗେ ତୁ ଡ୍ରେସିଂ କରି ଦେ
ଖୁସିରେ ସେ ରାଜି ହେଲା

ଡ୍ରେସିଂ କାମରେ ଲାଗିଗଲା ସିଏ
ହେଲା ତରତର ଭାରି
କହିଲା ସା'ରେ ଟିକିଏ ରହନ୍ତୁ
ସାଙ୍ଗେ ସାଙ୍ଗେ ଯିବ ସରି

ସେତିକି ବେଳକୁ ଫୋନ୍ ଟା ବାଜିଲା
କଲ୍ ଆସିଛି ଘରୁ
ଚିଙ୍ଗୁଡ଼ି ନେଇକି ଶୀଘ୍ର ଆସିବାକୁ
ହେଲେ ସିଏ ଗାରୁ ଗାରୁ

ଦେଢ଼ ମିନିଟ୍ ରେ କଥା ମୋ ସରିଲା
ପଛକୁ ବୁଲି ଚାହିଁଲି
ଡ୍ରେସିଂ ସାରି ସେ ପ୍ୟାକିଙ୍ଗ୍ କରିଛି
ଦେଖି ମୁଁ ଆଶ୍ଚର୍ଯ୍ୟ ହେଲି

ବେଶି ନ ଭାବି ମୁଁ ଛଅଶ ଗଣିଲି
ବୀର ଦର୍ପରେ ଛୁଟିଲି
ଗୀତ ଗାଇ ଗାଇ ପଲିଥିନ ନେଇ
ରୋଷେଇ ଶାଳେ ରଖିଲି

ତରତର ହୋଇ ନିତ୍ୟ କର୍ମ ପାଇଁ
ପାଇଖାନାକୁ ମୁଁ ଗଲି
ଦଶ ମିନିଟ୍ ରେ ସବୁ କାମ ସାରି
ବାହାରକୁ ବାହାରିଲି

ଗୃହଲକ୍ଷ୍ମୀ ମୋର ପୁରା ପଞ୍ଚମରେ
ଆସିଲେ କୁହାଟ ଛାଡ଼ି
ଚିଲିକା ଚିଙ୍ଗୁଡ଼ି ପଲିଥିନ ଯାକ
ସିଧା ତ ଦେଲେ କଚାଡ଼ି

ଭଣଭଣ ଗନ୍ଧେ ନାକ ଫାଟୁଥିଲା
ସତେ ବାନ୍ତି ହୋଇଯିବ
ଚିଙ୍ଗୁଡ଼ି ଭିତରୁ ଏ ପ୍ରକାର ଗନ୍ଧ
ଆସିବା ତ ଅସମ୍ଭବ

ନାକରେ ପାଟିରେ ଗାମୁଛାଟା ଦେଇ
ପଲିଥିନ୍ ଟା ଖୋଲିଲି
ଦେଖିଲି ଯାହା ମୁଁ କାହାକୁ କହିବି
କ୍ରୋଧରେ ମୁଁ ଜଳି ଗଲି

କ୍ରୋଧ କରି ଅବା କି ଲାଭ ମିଳିବ
ନିଜେ ତ ଅର୍ଜିଛି କର୍ମ
ପଚା ଚିଙ୍ଗୁଡ଼ି ତ ମୁଁ ନିଜେ ଆଣିଛି
ଭାବିଲେ ବିନ୍ଧୁଛି ମର୍ମ

ଦୋକାନୀ ଟୋକାକୁ ବୁହେ ଶୋଧିବାକୁ
ମନେ ମନେ ସ୍ଥିର କଲି
ପ୍ୟାଣ୍ଟ୍ ସାର୍ଟ ପିନ୍ଧି ପଲିଥିନ ଧରି
ବଜାରକୁ ବାହାରିଲି

ପବନ ବେଗରେ ପହଞ୍ଚିଲି ଯାଇ
ଦୋକାନୀ ଟୋକା ପାଖରେ
ତା'ର ଫୁର୍ତ୍ତି ଦେଖି କାବା ହୋଇଗଲି
ବ୍ୟସ୍ତ ସେ ତା' ବେପାରରେ

ଏତେ ଲୋକ ଦେଖି ଭାବିଲି ଟୋକାକୁ
ଶକ୍ତ ଅପମାନ ଦେବି
ସକାଳୁ ମୋତେ ସେ ଚୁନା ଲଗାଇଛି
ବେପାର ତା' ଛଡ଼େଇବି

ସତେ ଅବା ମୋତେ ନୂଆକି ଦେଖିଲା
ନମସ୍କାର ଟାଏ କଲା
ଜିଅନ୍ତା ଚିଙ୍ଗୁଡ଼ି ନିଅନ୍ତୁ ସା'ରେ
ଏବେ ଖୋଲିଛି କହିଲା

କ୍ରୋଧ ମୋର ପୁରା ମଥାକୁ ଚଢ଼ିଲା
ଯାହା ଇଚ୍ଛା କହିଗଲି
ପଲିଥିନ୍ ଖୋଲି ଦେଖାଇଲି ତାକୁ
ଭାବିଲି ମୁଁ ଜିତିଗଲି

ନନ୍ସେନ୍ସ ବୋଲି ମୋତେ ସେ କହିଲା
ଏତେ ବଡ଼ ପାଟି କରି
ତା'ର ପାଟି ଶୁଣି ଲୋକେ ଜମା ହେଲେ
ଉଠିଲା ସେ ମୋତେ ମାରି

କହିଲା ଦେଖ ହୋ ଅଭଦ୍ର ଲୋକଟା
କଜିଆ କରୁଛି ଆସି
ପଚା ଚିଙ୍ଗୁଡ଼ି ସେ କୋଉଠୁ କିଣିଛି
ମୁଁ ହେବି କିଆଁ ଦୋଷୀ ?

ପାଖକୁ ଆସନ୍ତୁ ସମସ୍ତେ ଦେଖନ୍ତୁ
ଜିଅନ୍ତା ଚିଙ୍ଗୁଡ଼ି ମୋର
ଗନ୍ଧିଆ ଚିଙ୍ଗୁଡ଼ି ମୁଁ କାହିଁକି ଦେବି
ୟାଙ୍କୁ ମାଡ଼ ଦରକାର

ଲୋକମାନେ ମୋତେ ଶୋଧା ବକା କଲେ
ଟୋକା ପଟ ହୋଇଗଲେ
ମୁଁ କୁଆଡ଼େ ଭାରି ମିଛୁଆ ଲୋକଟା
ଅନେକେ ମୋତେ କହିଲେ

କାନ ମୁଣ୍ଡାକୁ ମୁଁ ଆଉଁସି ଆଉଁସି
ବାଧ୍ୟହେଲି ଫେରିବାକୁ
କାହାକୁ କହିବି କିଏ ବା ଶୁଣିବ
ଦୋଷ ଦେଲି ମୋ ଭାଗ୍ୟକୁ
ଦୋଷ ଦେଲି ମୋ ଭାଗ୍ୟକୁ

~ ସନ୍ତୋଷ କୁମାର ରାୟ
9583805249

ଚିଲିକା ଚିଙ୍ଗୁଡ଼ି

ବ୍ୟଙ୍ଗ କବିତା