ମଣିଷ ଜୀବନରେ ଅର୍ଥର ଆବଶ୍ୟକତା ଅନେକ। ଜନ୍ମ ଠାରୁ ମୃତ୍ୟୁ ପର୍ଯ୍ୟନ୍ତ ପ୍ରତ୍ୟେକ କ୍ଷେତ୍ରରେ ଟଙ୍କାର ଆବଶ୍ୟକତା ପଡ଼ିଥାଏ। ଖାଦ୍ୟ, ବସ୍ତ୍ର, ବାସଗୃହ, ଶିକ୍ଷା, ସ୍ୱାସ୍ଥ୍ୟ ଓ ଅନ୍ୟାନ୍ୟ ଦୈନନ୍ଦିନ ଆବଶ୍ୟକତା ପୂରଣ ପାଇଁ ଅର୍ଥ ଦରକାର। କିନ୍ତୁ ଟଙ୍କା ରୋଜଗାର କରିବା ଯେତିକି ଗୁରୁତ୍ୱପୂର୍ଣ୍ଣ, ତାହାକୁ ଠିକ୍ ଭାବରେ ଖର୍ଚ୍ଚ କରିବା ଓ କିଛି ଅଂଶ ସଞ୍ଚୟ କରିବା ମଧ୍ୟ ସେତିକି ଜରୁରୀ। କାରଣ ଆଜିର ଛୋଟ ସଞ୍ଚୟ ଆସନ୍ତା କାଲିର ବଡ଼ ସ୍ୱପ୍ନକୁ ସାକାର କରିବାରେ ସାହାଯ୍ୟ କରେ।

ସଞ୍ଚୟ କେବଳ ଧନୀ ଲୋକଙ୍କ ପାଇଁ ନୁହେଁ। ଜଣେ ଗରିବ ଶ୍ରମିକ ଠାରୁ ଆରମ୍ଭ କରି ଜଣେ ବଡ଼ ବ୍ୟବସାୟୀ ପର୍ଯ୍ୟନ୍ତ ସମସ୍ତଙ୍କ ପାଇଁ ଏହାର ଆବଶ୍ୟକତା ରହିଛି। ଯେଉଁ ମଣିଷ ନିଜ ଆୟ ଅନୁସାରେ ଖର୍ଚ୍ଚ କରିବା ଜାଣିଥାଏ, ସେ ସବୁବେଳେ ଶାନ୍ତିରେ ଜୀବନ ବିତାଇଥାଏ। ଗୋଟିଏ କଥା ମନେ ରଖିବା ଉଚିତ୍, ଆୟ ଅନୁସାରେ ବ୍ୟୟ କଲେ ବିପଦ ଆସିଲେ ମଧ୍ୟ ମଣିଷ ସହଜରେ ତାହାର ସାମ୍ନା କରିପାରେ। ଅନ୍ୟପକ୍ଷରେ ଆୟ ଠାରୁ ଅଧିକ ଖର୍ଚ୍ଚ କଲେ ଧୀରେ ଧୀରେ ଋଣର ବୋଝ ବଢ଼ିଯାଏ। ଋଣ ଚିନ୍ତାରେ ମନ ଅଶାନ୍ତ ହୁଏ, ପାରିବାରିକ ସମ୍ପର୍କରେ ତିକ୍ତତା ଆସେ ଏବଂ ଶରୀର ଉପରେ ମଧ୍ୟ ତାହାର କୁପ୍ରଭାବ ପଡ଼େ। ଅନାବଶ୍ୟକ ଖର୍ଚ୍ଚ ମଣିଷକୁ ଅନେକ ସମୟରେ ମାନସିକ ଚାପ ଓ ଉଚ୍ଚ ରକ୍ତଚାପ ଭଳି ସମସ୍ୟା ଆଡ଼କୁ ଠେଲିଦିଏ।

ପ୍ରକୃତରେ ସଞ୍ଚୟ ଏକ ଭଲ ଅଭ୍ୟାସ ଓ ଜୀବନର ଏକ ଶୃଙ୍ଖଳା। ଏଥିପାଇଁ ବହୁତ ଅର୍ଥର ଆବଶ୍ୟକତା ନାହିଁ। ପ୍ରତିଦିନ ଦଶ, କୋଡ଼ିଏ କିମ୍ବା ପଚାଶ ଟଙ୍କା ଅଲଗା ରଖିଲେ ମଧ୍ୟ କିଛି ଦିନ ପରେ ତାହା ଏକ ଭଲ ରାଶିରେ ପରିଣତ ହୋଇପାରିବ। ଯେମିତି ଛୋଟ ଛୋଟ ବୁନ୍ଦା ମିଶି ଏକ ବଡ଼ ଜଳାଶୟ ସୃଷ୍ଟି କରେ, ସେହିପରି ଛୋଟ ଛୋଟ ସଞ୍ଚୟ ମିଶି ଜୀବନରେ ଏକ ବଡ଼ ଆର୍ଥିକ ସମ୍ବଳ ଗଢ଼ିଥାଏ। ଏଥିପାଇଁ ଆମକୁ ନିଜ ଆୟ ଓ ବ୍ୟୟର ହିସାବ ରଖିବା ସହିତ ଅନାବଶ୍ୟକ ଖର୍ଚ୍ଚକୁ ନିୟନ୍ତ୍ରଣ କରିବା ଦରକାର।

ସଞ୍ଚିତ ଅର୍ଥକୁ ଘରେ ରଖିବା ପରିବର୍ତ୍ତେ ଡାକଘର, ବ୍ୟାଙ୍କ କିମ୍ବା ନିରାପଦ ସଞ୍ଚୟ ଯୋଜନାରେ ଜମା କରିବା ଭଲ। ଆଜିକାଲି ସରକାରଙ୍କ ପକ୍ଷରୁ ମଧ୍ୟ ଛୋଟ ସଞ୍ଚୟକୁ ଉତ୍ସାହିତ କରିବା ପାଇଁ ବିଭିନ୍ନ ଯୋଜନା ରହିଛି। ଏହାଦ୍ୱାରା ଆମର ଅର୍ଥ ସୁରକ୍ଷିତ ରହିବା ସହିତ ନିୟମ ଅନୁସାରେ ସୁଧ ମଧ୍ୟ ମିଳିଥାଏ। ବିଶେଷକରି ଜରୁରୀକାଳୀନ ପରିସ୍ଥିତି, ହଠାତ୍ ଦେହ ଖରାପ, ପିଲାମାନଙ୍କ ଉଚ୍ଚଶିକ୍ଷା, ଝିଅର ବିବାହ କିମ୍ବା ଘର ତିଆରି ଭଳି ଆବଶ୍ୟକତା ସମୟରେ ଏହି ସଞ୍ଚୟ ଆମ ପାଇଁ ବଡ଼ ସାହାଯ୍ୟ ହୋଇଥାଏ। ଅନ୍ୟ ପାଖରେ ହାତ ପତାଇବାକୁ ପଡ଼େ ନାହିଁ।

ସଞ୍ଚୟର ମହତ୍ତ୍ୱକୁ ଲୋକମାନଙ୍କ ମଧ୍ୟରେ ପ୍ରସାର କରିବା ପାଇଁ ପ୍ରତିବର୍ଷ ଭାରତରେ ଏହି ଦିବସକୁ ଅକ୍ଟୋବର ୩୧ ପରିବର୍ତ୍ତେ ଅକ୍ଟୋବର ୩୦ ତାରିଖରେ ପାଳନ କରାଯାଏ ।

କାରଣ ୧୯୮୪ ମସିହା ଅକ୍ଟୋବର ୩୧ ତାରିଖରେ ଭାରତର ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କର ନିଧନ ହୋଇଥିଲା । ତେଣୁ ସେହି ଦିନକୁ ସ୍ମରଣ କରି ଭାରତରେ ଏହି ସଞ୍ଚୟ ଦିବସକୁ ଗୋଟିଏ ଦିନ ପୂର୍ବରୁ ଅର୍ଥାତ ଅକ୍ଟୋବର ୩୦ରେ ପାଳନ କରାଯାଉଛି । ଇଟାଲୀର ପ୍ରଫେସର ଫିଲିପ୍ପୋ ରାଭିଜା ଏହି ଦିବସକୁ ପ୍ରଚାର କରିବାରେ ଗୁରୁତ୍ୱପୂର୍ଣ୍ଣ ଭୂମିକା ନେଇଥିଲେ। ଏହାର ମୁଖ୍ୟ ଉଦ୍ଦେଶ୍ୟ ଥିଲା ଲୋକମାନଙ୍କୁ ସଞ୍ଚୟର ଅଭ୍ୟାସ ଶିଖାଇବା ଓ ଅର୍ଥର ସଠିକ୍ ବିନିଯୋଗ ପାଇଁ ସଚେତନ କରିବା।

ଆଜିର ଆଧୁନିକ ଯୁଗରେ ମଣିଷର ଆବଶ୍ୟକତା ସହିତ ଅନାବଶ୍ୟକ ଆକାଂକ୍ଷା ମଧ୍ୟ ବଢ଼ିଚାଲିଛି। ନୂଆ ମୋବାଇଲ, ଦାମୀ ପୋଷାକ, ଆଡ଼ମ୍ବରପୂର୍ଣ୍ଣ ଜୀବନ ଓ ଦେଖା ଦେଖିରେ ଅନେକ ଲୋକ ନିଜର ଆୟ ଠାରୁ ଅଧିକ ଖର୍ଚ୍ଚ କରୁଛନ୍ତି। କେବଳ ଅନ୍ୟକୁ ଦେଖାଇବା ପାଇଁ ଋଣ କରିବା ଆଦୌ ବୁଦ୍ଧିମାନର କାମ ନୁହେଁ। ଆମେ ମନେ ରଖିବା ଉଚିତ୍ ଯେ ଧନୀ ହେବାର ଅର୍ଥ ଅଧିକ ଖର୍ଚ୍ଚ କରିବା ନୁହେଁ, ବରଂ ନିଜ ଆୟକୁ ସୁବିଚାରିତ ଭାବରେ ବ୍ୟବହାର କରିବା। ମିତବ୍ୟୟୀ ହେବା ଓ କଞ୍ଜୁସ ହେବା ମଧ୍ୟରେ ପାର୍ଥକ୍ୟ ରହିଛି। ମିତବ୍ୟୟୀ ମଣିଷ ଆବଶ୍ୟକତା ଅନୁସାରେ ଖର୍ଚ୍ଚ କରେ, କିନ୍ତୁ ଅପଚୟ କରେ ନାହିଁ।

ପିଲାଦିନରୁ ହିଁ ଆମେ ନିଜ ପିଲାମାନଙ୍କୁ ସଞ୍ଚୟର ଶିକ୍ଷା ଦେବା ଉଚିତ୍। ସେମାନଙ୍କୁ ଖୁମ୍ପିରେ କିଛି ଟଙ୍କା ରଖିବାକୁ ଉତ୍ସାହିତ କଲେ ଭବିଷ୍ୟତରେ ସେମାନେ ଅର୍ଥର ମୂଲ୍ୟ ବୁଝିପାରିବେ। ଏହା ସହିତ ଗଛ ଲଗାଇବା, ପାଣି ଓ ବିଦ୍ୟୁତ୍‌ର ଅପଚୟ ରୋକିବା ମଧ୍ୟ ଏକ ପ୍ରକାର ସଞ୍ଚୟ। କାରଣ ସଞ୍ଚୟର ଭାବନା କେବଳ ଟଙ୍କା ମଧ୍ୟରେ ସୀମିତ ନୁହେଁ; ଏହା ଆମ ଜୀବନର ପ୍ରତ୍ୟେକ କ୍ଷେତ୍ର ସହିତ ଜଡ଼ିତ।

ପରିଶେଷରେ କହିବାକୁ ଗଲେ, ସଞ୍ଚୟ ହେଉଛି ଭବିଷ୍ୟତ ପାଇଁ ଆଜିର ଏକ ସୁନ୍ଦର ପ୍ରସ୍ତୁତି। ଜୀବନରେ କେତେବେଳେ କେଉଁ ପରିସ୍ଥିତି ଆସିବ, ତାହା କେହି ଜାଣିନାହିଁ। ତେଣୁ ଆୟରୁ କିଛି ଅଂଶ ନିୟମିତ ସଞ୍ଚୟ କରିବା ଆମର ଅଭ୍ୟାସ ହେବା ଦରକାର। ଆସନ୍ତୁ, ଏହି ଅନ୍ତର୍ଜାତୀୟ ସଞ୍ଚୟ ଦିବସରେ ଆମେ ସମସ୍ତେ ସଂକଳ୍ପ ନେବା—ଅପଚୟ କରିବା ନାହିଁ, ଆୟ ଅନୁସାରେ ଖର୍ଚ୍ଚ କରିବା ଏବଂ ନିୟମିତ ଅଳ୍ପ ଅଳ୍ପ ସଞ୍ଚୟ କରିବା। କାରଣ ଆଜିର ଛୋଟ ସଞ୍ଚୟ ହିଁ ଆସନ୍ତାକାଲିର ବଡ଼ ସ୍ୱପ୍ନ, ସୁଖ ଓ ସୁରକ୍ଷିତ ଜୀବନର ମୂଳଦୁଆ।

!! ସୁଶାନ୍ତ କୁମାର ସାସମଲ

ବ୍ରହ୍ମପୁର ଗଞ୍ଜାମ !!

ଛୋଟ ସଞ୍ଚୟ, ବଡ଼ ସ୍ୱପ୍ନ

ଛୋଟ ସଞ୍ଚୟ, ବଡ଼ ସ୍ୱପ୍ନ