ମୁଁ ଜଣେ ଅନ୍ଧ ବାଳକ। ଈଶ୍ୱରଙ୍କ ଇଚ୍ଛାରେ ମୁଁ ଜନ୍ମରୁ ଦୁଇଟି ଆଖି ହରାଇଛି। ମୋ ପାଇଁ ଏହି ଦୁନିଆ ଅନ୍ୟମାନଙ୍କ ପରି ନୁହେଁ। ମୁଁ ଆଲୋକ ଜାଣେନି, ରଙ୍ଗ ଜାଣେନି, ଆଖିରେ କାହାର ମୁହଁ ଦେଖିପାରେନି। ସୂର୍ଯ୍ୟ କେମିତି ଦେଖାଯାଏ, ଚନ୍ଦ୍ର କେତେ ସୁନ୍ଦର, ଫୁଲର ରଙ୍ଗ କ’ଣ—ଏସବୁ ମୋ ପାଇଁ କେବଳ ଅନ୍ୟମାନଙ୍କ କଥା।

ମୁଁ ଦିନ ଓ ରାତିର ତଫାତ ଆଖିରେ ଜାଣେନି। ସକାଳର ସୁନେଲି କିରଣ ମୋ ଆଖିରେ ପଡ଼େନି। ସନ୍ଧ୍ୟାର ଲାଲିମା ମୋତେ ଦେଖାଯାଏନି। ଆକାଶରେ ତାରା ଝଲମଲ କରୁଥିବା ଦୃଶ୍ୟ ମଧ୍ୟ ମୁଁ ଦେଖିନାହିଁ। ତଥାପି ମୋ ମନରେ ଗୋଟିଏ ଆଲୋକ ଅଛି। ସେ ଆଲୋକ ହେଉଛି ମୋର ଆଶା, ମୋର ସ୍ୱପ୍ନ ଓ ମୋର ଈଶ୍ୱରଙ୍କ ପ୍ରତି ଭରସା।

ମୁଁ ଆଖିରେ ଦେଖିପାରେନି, କିନ୍ତୁ ମନରେ ଅନେକ କିଛି ଦେଖେ। ମାଆଙ୍କ ମୁହଁ ମୁଁ ଆଖିରେ ଦେଖିନାହିଁ, କିନ୍ତୁ ତାଙ୍କ ସ୍ନେହକୁ ମୋ ହୃଦୟରେ ଅନୁଭବ କରେ। ତାଙ୍କ ହାତର ସ୍ପର୍ଶ ମୋ ପାଇଁ ଆଲୋକ ଠାରୁ ମଧ୍ୟ ଅଧିକ ମୂଲ୍ୟବାନ। ମୋ ପାଖରେ ଥିବା ଲୋକଙ୍କ ସ୍ୱର ମୋତେ ତାଙ୍କ ଉପସ୍ଥିତିର ଅନୁଭବ ଦିଏ।ସୂର୍ଯ୍ୟ ଉଇଁଲେ ମୁଁ ତାକୁ ଦେଖିପାରେନି, କିନ୍ତୁ ତାହାର ଉତ୍ତାପକୁ ଅନୁଭବ କରେ। ଗରମ ପବନ ମୋତେ କହିଦିଏ ଯେ ସୂର୍ଯ୍ୟ ଆକାଶରେ ଅଛି। ଶୀତଳ ପବନ ମୋତେ ପ୍ରକୃତିର ଅନ୍ୟ ଏକ ରୂପ ଅନୁଭବ କରାଏ। ପକ୍ଷୀର କିଚିରି ମିଚିରି ଶବ୍ଦ ମୋ ପାଇଁ ସକାଳର ସଙ୍ଗୀତ। ରାତିର ନିରବତା ମୋତେ ଶାନ୍ତିର ଭାଷା ଶିଖାଏ। ମୋର ଦିନ ଓ ରାତି ମୋ ନିଜର। ଅନ୍ୟମାନଙ୍କ ପାଇଁ ଦିନ ଯେତେବେଳେ ଆଲୋକରେ ଭରିଯାଏ, ମୋ ପାଇଁ ସେତେବେଳେ ମଧ୍ୟ ସେହି ଅନ୍ଧାର। କିନ୍ତୁ ମୁଁ ଅନ୍ଧାରକୁ ଭୟ କରେନି। କାରଣ ମୁଁ ଏହି ଅନ୍ଧାର ଭିତରେ ନିଜର ଏକ ଦୁନିଆ ତିଆରି କରିଛି। ସେହି ଦୁନିଆରେ ମୋର ସ୍ୱପ୍ନ ଅଛି, ଆଶା ଅଛି ଏବଂ ଭଲପାଇବା ଅଛି।ମୋ ମାଆ ମୋର ସବୁଠାରୁ ବଡ଼ ଆଶ୍ରୟ। ସେ ମୋତେ ସବୁବେଳେ ସାହାଯ୍ୟ କରନ୍ତି। ମୋ ପାଇଁ ତାଙ୍କ ହୃଦୟରେ କେବଳ ଦୟା ନୁହେଁ, ଅସୀମ ଭଲ ପାଇବା ଅଛି। ସେ ମୋ ହାତ ଧରି ଚଲାଇଲେ ମୋତେ ଲାଗେ, ମୁଁ ଏକା ନୁହେଁ। ମୋର ମାଆ ହିଁ ମୋର ପଥର ଆଲୋକ।

କେହି ମୋତେ ଦୟାର ଆଖିରେ ଦେଖିଲେ ମୋ ମନ ଦୁଃଖିତ ହୁଏ। ମୁଁ ଦୃଷ୍ଟିହୀନ ହୋଇପାରେ, କିନ୍ତୁ ମୋର ମନ ଦୃଢ଼। ମୋର ମଧ୍ୟ ସ୍ୱପ୍ନ ଅଛି। ମୁଁ ଶିଖିବାକୁ ଚାହେଁ, ଆଗକୁ ବଢ଼ିବାକୁ ଚାହେଁ ଓ ନିଜ ଜୀବନକୁ ସୁନ୍ଦର କରିବାକୁ ଚାହେଁ। ମୋତେ ଦୟା ନୁହେଁ, ସୁଯୋଗ ଦରକାର।

ମୋ ଆଖି ନାହିଁ, ତଥାପି ମୁଁ ମୋ ଅନ୍ଧାର ରାଜ୍ୟର ରାଜା। ମୋ ମନ ହେଉଛି ମୋର ସିଂହାସନ। ମୋ ସ୍ୱପ୍ନ ହେଉଛି ମୋର ରାଜ ମୁକୁଟ। ମୁଁ ନିଜ ମନର ଆଲୋକରେ ସାରା ଜଗତକୁ ଅନୁଭବ କରେ।

ଦୃଷ୍ଟି ଦିବସ ଅବସରରେ ମୋର ଏକମାତ୍ର ଅନୁରୋଧ ଦୃଷ୍ଟିହୀନ ଲୋକଙ୍କୁ ଦୁର୍ବଳ ଭାବନ୍ତୁ ନାହିଁ। ସେମାନଙ୍କୁ ସମାନ ସୁଯୋଗ ଦିଅନ୍ତୁ, ସେମାନଙ୍କ ହାତ ଧରନ୍ତୁ, କିନ୍ତୁ ସେମାନଙ୍କ ସ୍ୱପ୍ନକୁ ଛୋଟ କରନ୍ତୁ ନାହିଁ। ଆଖିର ଆଲୋକ ନଥିଲେ ମଧ୍ୟ ସେମାନଙ୍କୁ ମନର ଆଲୋକୁ ନିଶ୍ଚିତ ଆଗକୁ ନେବାରେ ସହାୟକ ହୁଅନ୍ତୁ ।

!! ସୁଶାନ୍ତ କୁମାର ସାସମଲ

ବ୍ରହ୍ମପୁର ଗଞ୍ଜାମ !!

ଦୃଷ୍ଟି ଦିବସରେ ପଦେ - ଆଲୋକ ଖୋଜୁଥିବା ଏକ ନିରୀହ ମନ

ଦୃଷ୍ଟି ଦିବସରେ ପଦେ - ଆଲୋକ ଖୋଜୁଥିବା ଏକ ନିରୀହ ମନ