ଭାରତୀୟ ସଂସ୍କୃତି ଓ ପରମ୍ପରାରେ 'ରାଖୀ ପୂର୍ଣ୍ଣିମା' ବା 'ରକ୍ଷାବନ୍ଧନ' ହେଉଛି ଭାଇ-ଭଉଣୀର ଅବିଳିଳ ସ୍ନେହ, ବିଶ୍ୱାସ ଓ ଆତ୍ମୀୟତାର ଏକ ସ୍ୱତନ୍ତ୍ର ଉତ୍ସବ। ଶ୍ରାବଣ ମାସର ପୂର୍ଣ୍ଣିମା ତିଥିରେ ପାଳିତ ଏହି ପବିତ୍ର ପର୍ବରେ ଭଉଣୀ ନିଜ ଭାଇର ମଙ୍ଗଳ କାମନା କରି ତା' ହାତରେ ସ୍ନେହର ସୂତା ବାନ୍ଧିଥାଏ ଏବଂ ଭାଇ ମଧ୍ୟ ତାକୁ ଆଜୀବନ ସୁରକ୍ଷା ଦେବାର ବଚନ ଦେଇଥାଏ।

ଓଡ଼ିଶାର ସଂସ୍କୃତିରେ ରାଖୀ ପୂର୍ଣ୍ଣିମାକୁ 'ଗହ୍ମା ପୂର୍ଣ୍ଣିମା' ଭାବରେ ମଧ୍ୟ ପାଳନ କରାଯାଏ। ଏହି ଦିନ ଭଗବାନ ବଳରାମଙ୍କ ଜନ୍ମୋତ୍ସବ ହୋଇଥିବାରୁ ଏହା କୃଷି ଓ କୃଷକମାନଙ୍କ ପାଇଁ ଏକ ଅତ୍ୟନ୍ତ ମହତ୍ତ୍ୱପୂର୍ଣ୍ଣ ଦିନ। ଏହି ସ୍ୱେଚ୍ଛାକୃତ ଉତ୍ସବରେ ଗୋମାତା ଓ ବଳଦମାନଙ୍କୁ ସଜାଯାଇ ପୂଜାର୍ଚ୍ଚନା କରାଯାଏ ଏବଂ ସେମାନଙ୍କୁ ପୀଠା-ମିଠା ଖାଇବାକୁ ଦିଆଯାଏ। ଏହା ଆମ ସଂସ୍କୃତିରେ ପ୍ରକୃତି, ପଶୁସମ୍ପଦ ଓ ମାନବ ମଧ୍ୟରେ ଥିବା ଆତ୍ମୀୟତାକୁ ଦର୍ଶାଏ।

ରାଖୀ ପୂର୍ଣ୍ଣିମା ସହ ଅନେକ ପୌରାଣିକ ଓ ଐତିହାସିକ କଥା ମଧ୍ୟ ଯୋଡ଼ିହୋଇ ରହିଛି:

ଶ୍ରୀକୃଷ୍ଣ ଓ ଦ୍ରୌପଦୀ: ପୁରାଣ ଅନୁସାରେ, ଶିଶୁପାଳ ବଧ ସମୟରେ ଶ୍ରୀକୃଷ୍ଣଙ୍କ ଅଙ୍ଗୁଳି କଟିଯିବାରୁ ଦ୍ରୌପଦୀ ନିଜ ଶାଢ଼ୀର କାନି ଚିରି ତାଙ୍କ ହାତରେ ବାନ୍ଧିଦେଇଥିଲେ। ସେହିଦିନଠାରୁ ଶ୍ରୀକୃଷ୍ଣ ଦ୍ରୌପଦୀଙ୍କୁ ସବୁ ସଙ୍କଟରୁ ରକ୍ଷା କରିବାର ବଚନ ଦେଇଥିଲେ ଏବଂ ଚୀରହରଣ ସମୟରେ ତାଙ୍କର ଲାଜ ରକ୍ଷା କରିଥିଲେ ।

ରାଣୀ କର୍ଣ୍ଣାବତୀ ଓ ହୁମାୟୁନ୍: ଇତିହାସରେ ମେବାରର ରାଣୀ କର୍ଣ୍ଣାବତୀ ନିଜ ରାଜ୍ୟକୁ ସୁଲତାନ ବାହାଦୁର ଶାହଙ୍କ ଆକ୍ରମଣରୁ ରକ୍ଷା କରିବା ପାଇଁ ମୋଗଲ ସମ୍ରାଟ ହୁମାୟୁନ୍‌ଙ୍କ ପାଖକୁ ରାଖୀ ପଠାଇଥିଲେ। ହୁମାୟୁନ୍‌ ମଧ୍ୟ ଏହି ସୂତାର ମହତ୍ତ୍ୱ ବୁଝି ଜଣେ ସଚ୍ଚା ଭାଇ ପରି ସାହାଯ୍ୟ କରିବାକୁ ଆଗେଇ ଆସିଥିଲେ।

ଆଜିର ଆଧୁନିକ ଓ ଡିଜିଟାଲ ଯୁଗରେ ରାଖୀ ପୂର୍ଣ୍ଣିମାର ସ୍ୱରୂପ କିଛି ମାତ୍ରାରେ ବଦଳିଛି, କିନ୍ତୁ ଏହାର ଭାବନା ପୂର୍ବପରି ଅକ୍ଷୁଣ୍ଣ ରହିଛି। ଆଜି ଦୂର-ଦୂରାନ୍ତରେ ରହୁଥିବା ଭାଇ-ଭଉଣୀମାନେ ଅନଲାଇନ୍ ମାଧ୍ୟମରେ ରାଖୀ ଓ ଉପହାର ପଠାଉଛନ୍ତି। ତଥାପି, ଏହି ପର୍ବର ମୂଳ ଉଦ୍ଦେଶ୍ୟ କେବଳ ଭାଇ-ଭଉଣୀଙ୍କ ମଧ୍ୟରେ ଉପହାର ଆଦାନପ୍ରଦାନରେ ସୀମିତ ନୁହେଁ। ଏହା ଆମକୁ ପରିବାର, ମୂଲ୍ୟବୋଧ ଓ ପ୍ରେମର ଡୋରୀରେ ବାନ୍ଧି ରଖିବାର ଏକ ମହାନ ସୁଯୋଗ ଦେଇଥାଏ।

ମାତ୍ର ଆଜି ଆମକୁ ନିଜ ହୃଦୟକୁ ଗୋଟିଏ ପ୍ରଶ୍ନ ପଚାରିବାକୁ ପଡ଼ିବ—ଆଜିର ଯୁଗରେ ଆମେ ଆମ ଭଉଣୀ ମାନଙ୍କୁ ସତରେ ସେହି ସୁରକ୍ଷା ଓ ସମ୍ମାନ ଦେଇପାରୁଛେ ତ?

ଆଜିର ସମାଜରେ ପ୍ରତିଦିନ ଭଉଣୀ ମାନଙ୍କ ପ୍ରତି ହେଉଥିବା ଅନ୍ୟାୟ, ଅତ୍ୟାଚାର ଏବଂ ଅସମ୍ମାନ ଆମ ଶିକ୍ଷା ଓ ସଭ୍ୟତା ଉପରେ ଏକ ବିରାଟ ପ୍ରଶ୍ନବାଚୀ ସୃଷ୍ଟି କରୁଛି। ଖବରକାଗଜର ପୃଷ୍ଠା ହେଉ କିମ୍ବା ଡିଜିଟାଲ୍ ମିଡିଆ, ପ୍ରତିଦିନ ଭଉଣୀ ମାନଙ୍କ ସୁରକ୍ଷାକୁ ନେଇ ଆସୁଥିବା ଖବର ଆମକୁ ଭିତରୁ ଆନ୍ଦୋଳିତ କରୁଛି। ଯେଉଁ ସମାଜରେ ନାରୀକୁ ଦେବୀ ରୂପରେ ପୂଜା କରାଯାଏ, ସେହି ସମାଜରେ ଆଜି ଝିଅଟିଏ ରାସ୍ତାରେ ଏକାକୀ ଚାଲିବାକୁ ଭୟ କରୁଛି।

କେବଳ ନିଜ ସକ୍ତା-ଭଉଣୀର ହାତରୁ ରାକ୍ଷୀ ବାନ୍ଧିଦେଲେ କିମ୍ବା ତାକୁ ସୁରକ୍ଷା ଦେବାର ପ୍ରତିଶ୍ରୁତି ଦେଲେ ରାକ୍ଷୀ ପୂର୍ଣ୍ଣିମାର ପର୍ବ ସମ୍ପୂର୍ଣ୍ଣ ହୁଏନାହିଁ। ପ୍ରକୃତ ଭାଇ ସିଏ, ଯିଏ ନିଜ ଭଉଣୀ ସହ ସମାଜର ପ୍ରତ୍ୟେକ ନାରୀକୁ ସମ୍ମାନର ସହ ଦେଖିପାରେ।

ରାଖୀ ପୂର୍ଣ୍ଣିମା ହେଉଛି ଏକତା, ଶ୍ରଦ୍ଧା ଓ ନାରୀ ସମ୍ମାନର ଉତ୍ସବ। ଆସନ୍ତୁ, ଏହି ପବିତ୍ର ରାଖୀ ପୂର୍ଣ୍ଣିମାରେ ଆମେ ସମସ୍ତେ ସଂକଳ୍ପ ନେବା ଯେ ଆମେ ସମାଜରେ ନାରୀ ସୁରକ୍ଷା ସୁନିଶ୍ଚିତ କରିବା ଏବଂ ପ୍ରତ୍ୟେକ କନ୍ୟା, ଭଉଣୀ ଓ ମା'ଙ୍କୁ ସୋଦର ସମ୍ମାନ ପ୍ରଦାନ କରିବା। ଏହା ହିଁ ହେବ ଆଜିର ରାଖୀ ପୂର୍ଣ୍ଣିମାର ଶ୍ରେଷ୍ଠ ଉପହାର।

ଭାରତୀୟ ସଂସ୍କୃତି ଓ ପରମ୍ପରା 'ରାଖୀ ପୂର୍ଣ୍ଣିମା'

✨ରାଖୀ ପୂର୍ଣ୍ଣିମା:ସ୍ନେହ,ସୁରକ୍ଷା ଓ ସମ୍ମାନର ପବିତ୍ର ଡୋରୀ✨