(୧)
ମୋହନ ହେ ମୋହନ
ଆଜି ସେହି ସୁଦିନ
ଭାରତର ଭାଗ୍ଯାକାଶେ
ଉଇଁଥିଲା ତପନ,
ପରାଧିନ ଅମାରାତି
କରିବାକୁ ମୋଚନ।
(୨)
ଜାଗୃତି ଆଣିଲ ସତ୍ଯର ସନ୍ଧାନୀ,
ଉଷ୍ମତା ଭରିଲ ଶୀଥିଳ ଧମନୀ।
ସତ୍ୟାଗ୍ରହ ପଥେ ଆଶ୍ଲେଷ କଷଣ,
ଧରି ଧରାଇଲ ଅହିଂସା କମାଣ।
ଚେତନା ଭରିଲ ପ୍ରାଣେ,
ମୋହିନୀ ମନ୍ତ୍ରରେ ଦେଶପ୍ରେମ ବଂଶୀ
ଫୁଙ୍କି ଦେଲ ପ୍ରତି କାନେ।
(୩)
ସ୍ବାଧୀନତା ଯଜ୍ଞେ ଜାତୀୟ ଜୀବନ,
ଆହୁତି ଢାଳିଲେ ଦେଶପ୍ରେମୀ ଗଣ।
କମ୍ପିତ ହୋଇଲା ଗଗନ ପବନ,
ଶଙ୍କିତ ହୋଇଲା ଫିରିଙ୍ଗି ଶାସନ।
ହାତେ ଦେଖି ତୁମ ବଲମ,
ନବ ଜାଗରଣ ହୋଇଲା ଉଚ୍ଛନ୍ନ
ହୁଗୁଳି ଗଲା ବନ୍ଧନ।
(୪)
ତୁଚ୍ଛ କରି ନିଜ ଯଶଖ୍ୟାତି ମାନ,
ଇଚ୍ଛାମତେ ବରି ସଂଗ୍ରାମୀ ଜୀବନ।
ଲାଞ୍ଛନା ଯାତନା କାରାର କଷଣ,
ବାଞ୍ଛନା ଜାଗିଲା ସ୍ବିଧୀନତା ସ୍ବପ୍ନ।
ଗଗନେ ପବନେ ହେଲା ନିନାଦିତ
ଜନ୍ମଭୂମୀ ଜୟଗାନ।
(୫)
ଜନ ହାତେ ଦେଲ ଶାସନ କ୍ଷମତା,
ନିଜେ ହେବେ ନିଜ ଭାଗ୍ୟର ବିଧାତା।
ଶୋଷଣ ତୋଷଣ ଲୁପ୍ତ ହେବ ପ୍ରଥା,
ଓହ୍ଲାଇ ଆସିବ ରାମରାଜ୍ୟ ଗାଥା।
ତ୍ଯାଗ ଦାନେ ପ୍ରତିଦାନ,
ଗୁଳି ହେଲା ତୁମ୍ଭ ଶ୍ରେଷ୍ଠ ପୁରସ୍କାର
ହା-ରାମ,ହା-ରାମ,ଲୋଟିଲା ଜୀବନ।
(୬)
ସ୍ବର୍ଗପୁରେ ଥାଇ କର ନିରୀକ୍ଷଣ,
ଦୁର୍ନୀତି କୋଳରେ ଶୋଇଛି ଶାସନ।
ଗାଁ ଠୁଁ ସହର ମଦିରା ପ୍ଲାବନ,
କିଣା ବିକା ଚାଲେ ମତ ନିର୍ବାଚନ।
ଅପମୃତ୍ୟୁ ସମ୍ବିଧାନ,
ଅର୍ଥ ବାହୁବଳୀ ଆଜି କୋଳାକୋଳି
ଶାସନ ମଙ୍ଗ କୁ କରେ ନିୟନ୍ତ୍ରଣ।
(୭)
ବରଷକ ସାରା ସହି ବର୍ଷା ତାତି,
ବିବର୍ଣ୍ଣ ବେରୂପ ତୁମ୍ଭ ପ୍ରତିମୂର୍ତ୍ତି।
କୁଆ ଚିଲ ମଥେ କରୁଥାନ୍ତି ଫୂର୍ତ୍ତି,
ମନେ ପଡ଼ିଯାଏ ହେଲେ ଜନ୍ମତିଥି।
ଉଛୁଳଇ ଦେଶ ଭକ୍ତି,
ମାଲ୍ୟାର୍ପଣ ଦୃଶ୍ୟ ଫଟୋଉଠା କେତେ
କୁତୁକୁତୁ ନେତା ମନ୍ତ୍ରୀ।

(୮)
କେହି କେହି ଆଜି ନିନ୍ଦୁକ ଜନ,
ଅସହିଷ୍ଣୁ ଭାବ ତୁଣ୍ଡେ ଉଦ୍ବେଳନ।
ତୁମ୍ଭ ନିନ୍ଦା କଥା କରନ୍ତି ଭଣିତା
ଲାଜେ ନଇଁଯାଏ ଆଜି ଦେଶ ମଥା।
ମୁହଁରେ ଅଲଣା କଥା,
ଜାତିର ଜନକ ତୁମ୍ଭେ ଯୋଗ୍ୟ ନୁହଁ
ଭୋ ଭୋ ରଡି ଛାଡନ୍ତି କୁତ୍ତା।

ମନେପଡ ବାପୁ

ଗାନ୍ଧୀ ଜୟନ୍ତୀ ଉପଲକ୍ଷେ