ବିଜୟା ଦଶମୀ ହେଉଛି ଶକ୍ତି, ସତ୍ୟ ଓ ଧର୍ମର ବିଜୟର ପବିତ୍ର ଦିନ। ଏହି ଦିନ ମା’ ଦୁର୍ଗାଙ୍କ ମହିଷାମର୍ଦ୍ଦିନୀ ରୂପକୁ ଭକ୍ତିର ସହିତ ପୂଜା କରାଯାଏ। ମା’ ମହିଷାମର୍ଦ୍ଦିନୀ କେବଳ ଅସୁର ବିନାଶିନୀ ନୁହନ୍ତି, ସେ ଭକ୍ତମାନଙ୍କ ପାଇଁ ମମତାମୟୀ ମା’ ମଧ୍ୟ। ତାଙ୍କ ନାମ ସ୍ମରଣ କଲେ ମନରେ ସାହସ, ଭରସା ଓ ଶାନ୍ତି ଜାଗ୍ରତ ହୁଏ।

ପୁରାଣ କଥା ଅନୁସାରେ ମହିଷାସୁର ନାମକ ଜଣେ ଅସୁର ନିଜ ଶକ୍ତିର ଅହଂକାରରେ ଅନ୍ଧ ହୋଇଯାଇଥିଲା। ତା’ର ଅତ୍ୟାଚାରରେ ଦେବତା ଓ ମଣିଷ ସମସ୍ତେ ଅତିଷ୍ଠ ହୋଇପଡ଼ିଥିଲେ। ଅସୁରର ଅନ୍ୟାୟରୁ ମୁକ୍ତି ପାଇବା ପାଇଁ ଦେବତାମାନେ ଆଦିଶକ୍ତିଙ୍କ ଶରଣ ନେଲେ। ସମସ୍ତ ଦେବତାଙ୍କ ତେଜରୁ ମା’ ଦୁର୍ଗାଙ୍କ ଆବିର୍ଭାବ ହେଲା।

ଦଶଭୁଜା ମା’ ସିଂହ ଉପରେ ବିରାଜମାନ ହୋଇ ଯୁଦ୍ଧକ୍ଷେତ୍ରକୁ ଗଲେ। ତାଙ୍କ ହାତରେ ଥିଲା ତ୍ରିଶୂଳ, ଖଡ୍ଗ, ଚକ୍ର ଓ ବିଭିନ୍ନ ଦିବ୍ୟ ଅସ୍ତ୍ର। ମା’ ଓ ମହିଷାସୁରଙ୍କ ମଧ୍ୟରେ ଦୀର୍ଘ ସମୟ ଧରି ଭୟଙ୍କର ଯୁଦ୍ଧ ହେଲା। ଶେଷରେ ମା’ ମହିଷାସୁରଙ୍କୁ ବଧ କରି ଧର୍ମର ପ୍ରତିଷ୍ଠା କଲେ। ସେହି ବିଜୟର ସ୍ମୃତିରେ ବିଜୟା ଦଶମୀ ପାଳନ କରାଯାଏ।

ମୋ ମନରେ ମା’ ମହିଷାମର୍ଦ୍ଦିନୀଙ୍କ ରୂପ କେବଳ ଯୁଦ୍ଧର ପ୍ରତୀକ ନୁହେଁ। ମା’ ଆମ ମନ ଭିତରେ ଥିବା ଭୟ, ଲୋଭ, କ୍ରୋଧ, ଅହଂକାର ଓ ଅଜ୍ଞାନକୁ ଦୂର କରିବାର ଶକ୍ତି। ଆଜି ମଧ୍ୟ ମଣିଷ ଯେତେବେଳେ ଅନ୍ୟାୟ ଓ ଅସତ୍ୟ ସହିତ ଲଢ଼େ, ସେତେବେଳେ ମା’ଙ୍କ ଶକ୍ତିକୁ ଅନୁଭବ କରେ।ବିଜୟା ଦଶମୀ ଦିନ ଭକ୍ତମାନେ ମା’ଙ୍କ ପାଦପଦ୍ମରେ ଫୁଲ, ଧୂପ, ଦୀପ ଓ ନୈବେଦ୍ୟ ଅର୍ପଣ କରନ୍ତି। ଭକ୍ତି ଭରା ମନରେ ମା’ଙ୍କୁ ପ୍ରାର୍ଥନା କରି ପରିବାରର ସୁଖ, ଶାନ୍ତି ଓ ମଙ୍ଗଳ କାମନା କରନ୍ତି।

ମା’ଙ୍କ ନିକଟରେ ଆମର ପ୍ରାର୍ଥନା ହେଉ—ଆମ ମନରୁ ଲୋଭ, କ୍ରୋଧ, ହିଂସା ଓ ଅହଂକାର ଦୂର ହେଉ। ଆମେ ସତ୍ୟର ପଥରେ ଚାଲି ଅନ୍ୟାୟ ବିରୋଧରେ ସାହସର ସହିତ ଠିଆ ହେବା। ବିଜୟା ଦଶମୀ ଆମକୁ ଏହି ଶିକ୍ଷା ଦିଏ ଯେ, ଅସତ୍ୟ ଯେତେ ଶକ୍ତିଶାଳୀ ଦେଖାଯାଉ, ଶେଷରେ ସତ୍ୟର ହିଁ ବିଜୟ ହୁଏ।

ଜୟ ମା’ ଦୁର୍ଗା।

ଜୟ ମା’ ମହିଷାମର୍ଦ୍ଦିନୀ।

ମା’ଙ୍କ ଆଶୀର୍ବାଦରେ ସମସ୍ତଙ୍କ ଜୀବନ ସୁଖ, ଶାନ୍ତି, ସମୃଦ୍ଧି ଓ ମଙ୍ଗଳରେ ଭରିଯାଉ।

!! ସୁଶାନ୍ତ କୁମାର ସାସମଲ

ବ୍ରହ୍ମପୁର ଗଞ୍ଜାମ!!