ଶାରଦୀୟ ନବରାତ୍ରି ଆମ ଧର୍ମ ଓ ସଂସ୍କୃତିର ଏକ ପବିତ୍ର ପର୍ବ। ନଅ ଦିନ ଧରି ମାଁ ଦୁର୍ଗାଙ୍କ ନଅଟି ରୂପକୁ ଭକ୍ତିର ସହ ପୂଜା କରାଯାଏ। ନବ ରାତ୍ରିର ନବମ ତଥା ଶେଷ ଦିନରେ ମାଁ ଦୁର୍ଗାଙ୍କ ନବମ ସ୍ୱରୂପ ମାଁ ସିଦ୍ଧିଦାତ୍ରୀଙ୍କୁ ପୂଜା କରାଯାଏ। ମାଆଙ୍କ ପୂଜା ସହିତ ନବଦୁର୍ଗାଙ୍କ ଆରାଧନା ମଧ୍ୟ ସମ୍ପୂର୍ଣ୍ଣ ହୁଏ।

‘ସିଦ୍ଧିଦାତ୍ରୀ’ ନାମର ଅର୍ଥ ହେଉଛି ସିଦ୍ଧି ପ୍ରଦାନ କରୁଥିବା ମାଆ। ଧାର୍ମିକ ବିଶ୍ୱାସ ଅନୁସାରେ ମାଆ ତାଙ୍କ ଭକ୍ତମାନଙ୍କୁ ବିଭିନ୍ନ ପ୍ରକାର ସିଦ୍ଧି ଓ ଦିବ୍ୟ ଶକ୍ତି ପ୍ରଦାନ କରନ୍ତି। ଅଷ୍ଟସିଦ୍ଧିଠାରୁ ଆରମ୍ଭ କରି ଅଷ୍ଟାଦଶ ସିଦ୍ଧି ପର୍ଯ୍ୟନ୍ତ ଅନେକ ସିଦ୍ଧିର ଦାତ୍ରୀ ଭାବେ ମାଆଙ୍କୁ ମାନ୍ୟତା ଦିଆଯାଏ। ଭକ୍ତମାନେ ବିଶ୍ୱାସ କରନ୍ତି, ମାଆଙ୍କ କୃପା ମିଳିଲେ ଜୀବନର ଅନେକ ଅସୁବିଧା ଦୂର ହୁଏ ଏବଂ ମନୋକାମନା ପୂରଣ ହୁଏ।

ମାଁ ସିଦ୍ଧିଦାତ୍ରୀଙ୍କର ଚାରିଟି ହାତ ଥିବାର ବର୍ଣ୍ଣନା ମିଳେ। ଗୋଟିଏ ହାତରେ ଶଙ୍ଖ, ଅନ୍ୟ ହାତରେ ଚକ୍ର, ତୃତୀୟ ହାତରେ ଗଦା ଓ ଚତୁର୍ଥ ହାତରେ ପଦ୍ମ ଶୋଭା ପାଏ। ମାଆ ସିଂହବାହିନୀ। ସେ ପଦ୍ମାସନରେ ବସି ଭକ୍ତମାନଙ୍କୁ ଆଶୀର୍ବାଦ କରନ୍ତି। ତାଙ୍କର ଶାନ୍ତ ଓ ସୁନ୍ଦର ରୂପ ଭକ୍ତଙ୍କ ମନକୁ ଶାନ୍ତି ଦିଏ। ମାଆଙ୍କ ହାତରେ ଥିବା ଶଙ୍ଖ ଶୁଭତା, ଚକ୍ର ଶକ୍ତି, ଗଦା ସାହସ ଓ ପଦ୍ମ ପବିତ୍ରତାର ପ୍ରତୀକ ବୋଲି ମନେ କରାଯାଏ।

ନବମୀ ଦିନରେ କୁମାରୀ କନ୍ୟା ପୂଜାର ମଧ୍ୟ ବିଶେଷ ମହତ୍ତ୍ୱ ରହିଛି। ନବଦୁର୍ଗାଙ୍କ ଉପାସନା କରୁଥିବା ଭକ୍ତମାନେ ଏହି ଦିନ ନଅ ଜଣ କୁମାରୀ କନ୍ୟାଙ୍କୁ ଦେବୀଙ୍କ ସ୍ୱରୂପ ଭାବେ ସମ୍ମାନ କରନ୍ତି। ସେମାନଙ୍କୁ ଆଦରରେ ଭୋଜନ କରାଯାଏ ଓ ଉପହାର ଦିଆଯାଏ। ଏହି ପରମ୍ପରା ଆମକୁ ଝିଅ ଓ ନାରୀଙ୍କୁ ସମ୍ମାନ ଦେବାର ମହତ୍ତ୍ୱ ଶିଖାଏ।

ମୋ ମନରେ ମାଁ ସିଦ୍ଧିଦାତ୍ରୀ କେବଳ ଦିବ୍ୟ ଶକ୍ତି ପ୍ରଦାନ କରୁଥିବା ଦେବୀ ନୁହନ୍ତି, ସେ ଆମ ଜୀବନରେ ଭଲ ଚିନ୍ତା ଓ ଭଲ କାମର ପ୍ରେରଣା। ମାଆଙ୍କ ନିକଟରେ ପ୍ରାର୍ଥନା କଲେ ମନର ଭୟ କମିଯାଏ ଏବଂ ନୂଆଁ ଆଶା ଜାଗେ। ମାଆ ଆମ ସମସ୍ତଙ୍କୁ ସତ୍ୟ, ଧର୍ମ ଓ ମାନବିକତାର ପଥରେ ଚାଲିବାକୁ ଶକ୍ତି ଦିଅନ୍ତୁ।

ନବରାତ୍ରିର ଶେଷ ଦିନରେ ମାଆଙ୍କ ପୂଜା ଆମକୁ ଏକ ସୁନ୍ଦର ବାର୍ତ୍ତା ଦିଏ—ଜୀବନରେ ସଫଳତା ପାଇଁ କେବଳ ଶକ୍ତି ନୁହେଁ, ଭଲ ମନ, ନିଷ୍ଠା ଓ ମାନବିକତା ମଧ୍ୟ ଆବଶ୍ୟକ। ମାଁ ସିଦ୍ଧିଦାତ୍ରୀଙ୍କ କୃପାରେ ପ୍ରତ୍ୟେକ ଘରେ ସୁଖ, ଶାନ୍ତି ଓ ସମୃଦ୍ଧି ଭରିଯାଉ—ଏହା ହିଁ ମୋର ହୃଦୟର ପ୍ରାର୍ଥନା।

!! ସୁଶାନ୍ତ କୁମାର ସାସମଲ

ବ୍ରହ୍ମପୁର ଗଞ୍ଜାମ!!