ଆଜି ଆମେ ୮୦ତମ ସ୍ୱାଧୀନ ଭାରତ ଭୂମିରେ ଛିଡ଼ା ହୋଇଛୁ, ଯେଉଁଠି 'ଆର୍ଟିଫିସିଆଲ୍ ଇଣ୍ଟେଲିଜେନ୍ସ' (AI) ବା କୃତ୍ରିମ ବୁଦ୍ଧିମତ୍ତା ମାନବ ଜୀବନର ପ୍ରତ୍ୟେକ କ୍ଷେତ୍ରକୁ ପରିବର୍ତ୍ତିତ କରିସାରିଛି। ଶିକ୍ଷା, ସ୍ୱାସ୍ଥ୍ୟ, ବ୍ୟବସାୟ, ପ୍ରଯୁକ୍ତିବିଦ୍ୟା ଠାରୁ ଆରମ୍ଭ କରି ମଣିଷର ଚିନ୍ତାଧାରା ପର୍ଯ୍ୟନ୍ତ ସବୁକିଛି ଆଜି AI ଦ୍ୱାରା ପ୍ରଭାବିତ। ଡିଜିଟାଲ୍ ସଂଯୋଗୀକରଣ ଯୋଗୁଁ ଭୌଗୋଳିକ ସୀମାରେଖା ଆଜି ଫିକା ପଡ଼ିଯାଇଛି। ମଣିଷ ଗୋଟିଏ ସ୍ଥାନରେ ବସି ସମଗ୍ର ବିଶ୍ୱ ସହ ଯୋଡ଼ି ହୋଇପାରୁଛି।

କିନ୍ତୁ ଏହି ଆଲଗୋରିଦମ୍ ଓ ଡିଜିଟାଲ୍ ଜଗତ ମଧ୍ୟରେ ସବୁଠାରୁ ବଡ଼ ପ୍ରଶ୍ନ ଉଠୁଛି— ଏହି AI ଯୁଗରେ ମଣିଷର ନିଜ ମାଟି, ନିଜ ଭାଷା ଓ ମାତୃଭୂମି ସହ ସମ୍ପର୍କ କେଉଁଆଡ଼େ ଯାଉଛି?ଆମ କବିବର ରାଧାନାଥ ରାୟ ଲେଖିଥିଲେ,

"ଜନ୍ମଦାତ୍ରୀ ମାତା ପୁଣି ଜନ୍ମଦାତ୍ରୀ ଧରା,
ଦୁଇ ମାତା ସ୍ୱର୍ଗଠାରୁ ଗରୀୟସୀ ପରା।
ମାତୃସ୍ନେହ-ସିକ୍ତ ମାଟି, ମାତୃସ୍ନେହ-ଜଳ,
ଏହି ମାଟି-ଜଳେ ପୋଷିତ ଏ ଦେହ-ବଳ"

କିନ୍ତୁ ଆଜିର ଆଭାସୀ (Virtual) ଦୁନିଆରେ ମଣିଷ ବାସ୍ତବତାଠାରୁ ଦୂରେଇ ଗୋଟିଏ ସ୍କ୍ରିନ୍ ଭିତରେ ସୀମିତ ହୋଇପଡ଼ୁଛି।

ସୀମାହୀନ ଇଣ୍ଟରନେଟ୍ ଆମକୁ 'ବିଶ୍ୱ ନାଗରିକ' ବନାଇ ଦେଇଛି ସତ, କିନ୍ତୁ ଅନେକ ସମୟରେ ଏହା ଆମକୁ ନିଜର ଜେର/ଚେର, ଆମର ସଂସ୍କୃତି ଓ ମାତୃଭୂମିର ସମ୍ବେଦନଶୀଳତାଠାରୁ ଦୂରେଇ ଦେଉଛି। ମାନବୀୟ ସମ୍ପର୍କ ଓ ମାତୃଭୂମି ପ୍ରତି ଥିବା ଆବେଗ ଆଜି ଡାଟା (Data) ଏବଂ ଆଲଗୋରିଦମ୍‌ରେ ହଜିଯିବାର ଭୟ ସୃଷ୍ଟି ହୋଇଛି।

ତେବେ ପ୍ରଶ୍ନ ଉଠେ— AI କ’ଣ ମଣିଷକୁ ନିଜ ମାତୃଭୂମିରୁ କେବଳ ଦୂରେଇ ଦିଏ?

ଆଦୌ ନୁହେଁ! ଯଦି ଆମେ ଏହି କୃତ୍ରିମ ବୁଦ୍ଧିମତ୍ତାକୁ ସଠିକ୍ ଏବଂ ଗଠନମୂଳକ ଭାବେ ବ୍ୟବହାର କରିବା, ତେବେ ଏହା ଆମ ମାତୃଭୂମିର ସେବା ଓ ବିକାଶ ପାଇଁ ସବୁଠାରୁ ବଡ଼ ସାଧନ ହୋଇପାରିବ।ଆଜି AI ମାଧ୍ୟମରେ ଆମେ ଆମର ମାତୃଭାଷା ଓଡ଼ିଆ, ଆମର ପ୍ରାଚୀନ ଐତିହ୍ୟ, କଳା ଓ ସଂସ୍କୃତିକୁ ସଂରକ୍ଷିତ କରି ସମଗ୍ର ବିଶ୍ୱ ଦରବାରରେ ପହଞ୍ଚାଇ ପାରୁଛୁ। ଆମ ଭାରତର କୃଷକମାନେ AI ସାହାଯ୍ୟରେ ପାଣିପାଗ ଓ ମୃତ୍ତିକାର ସଠିକ୍ ସୂଚନା ପାଇ ନିଜ ମାତୃଭୂମିର କୃଷିକୁ ସମୃଦ୍ଧ କରୁଛନ୍ତି।

ଜଣେ ବ୍ୟକ୍ତି ସେ ପୃଥିବୀର ଯେଉଁ କୋଣରେ ଥାଉ ନା କାହିଁକି, AI ଓ ନୂତନ ପ୍ରଯୁକ୍ତିବିଦ୍ୟା ବଳରେ ନିଜ ଗାଁ ଓ ନିଜ ଦେଶର ଶିକ୍ଷା, ସ୍ୱାସ୍ଥ୍ୟ ଏବଂ ସାମାଜିକ ବିକାଶରେ ସିଧାସଳଖ ଯୋଗଦାନ ଦେଇପାରୁଛି।ମନେରଖିବାକୁ ହେବ, AI ହେଉଛି ମଣିଷର ବୁଦ୍ଧିର ସୃଷ୍ଟି, କିନ୍ତୁ ମାତୃଭୂମି ହେଉଛି ମଣିଷର ଆତ୍ମା। ଯନ୍ତ୍ର ପାଖରେ 'ମେସିନ୍ ଲର୍ନିଂ' (Machine Learning) ଅଛି,

କିନ୍ତୁ ମଣିଷ ପାଖରେ ମାତୃଭୂମି ପ୍ରତି ଭାବନା, ସଂସ୍କାର ଓ ସଂବେଦନଶୀଳତା ଅଛି। AI କଦାପି ମାତୃଭୂମିର ମାଟିର ବାସ୍ନା, ପରମ୍ପରା ଏବଂ ଦେଶପ୍ରେମର ସ୍ଥାନ ନେଇପାରିବ ନାହିଁ।ପରିଶେଷରେ, ଏହି ସ୍ୱାଧୀନତା ଦିବସରେ ଆମକୁ ଏହି ସଙ୍କଳ୍ପ ନେବାକୁ ହେବ ଯେ, ଆମେ AI ରୁ କୌଶଳ ଓ ପ୍ରଗତି ନେବା, କିନ୍ତୁ ଆମର ହୃଦୟ ସଦାବେଳେ ନିଜ ମାତୃଭୂମି ପାଇଁ ସ୍ପନ୍ଦିତ ହେଉଥିବ। AI କୁ କେବଳ ମନୋରଞ୍ଜନରେ ସୀମିତ ନରଖି, ତାକୁ ଏକ ମାଧ୍ୟମ କରି ଆମେ ଆମ ଭାରତମାତାକୁ ସମୃଦ୍ଧ, ସଶକ୍ତ ଓ ବିଶ୍ୱଗୁରୁ ଆସନରେ ବସାଇବା।

"ଜନନୀ ଜନ୍ମଭୂମିଶ୍ଚ ସ୍ୱର୍ଗାଦପି ଗରୀୟସୀ"

"ଜୟ ହିନ୍ଦ୍! ଜୟ ଭାରତ! ବନ୍ଦେ ଉତ୍କଳ ଜନନୀ!ଧନ୍ୟବାଦ

ଶୀର୍ଷକ: AI ଯୁଗରେ ମଣିଷ ଓ ମାତୃଭୂମି ସହ ସମ୍ପର୍କ'

ସୃଜନୀ ପାରିବାର ର ସମସ୍ତ ସଦସ୍ୟ ଙ୍କୁ ସ୍ୱାଧୀନତା ଦିବସର ହାର୍ଦ୍ଦିକ ଅଭିନନ୍ଦନ🙏