ଜନ୍ମାଷ୍ଟମୀ ପାଇଁ ଗର୍ଭଉଦକ ବନ୍ଦାପନା ରୁ କିଛି ଦିନ ପାଇଁ ଶ୍ରୀମନ୍ଦିର ଚଳଚଞ୍ଚଳ ରହିବ।

ଚୈତ୍ରରେ ହେଉଥିବା ରାମଲୀଳା ପରି ଭାଦ୍ରବ ରେ କୃଷ୍ଣଲୀଳା ପାଇଁ ପୁରୀ ର ପାରମ୍ପରିକ ସାତ(ଆଠ) ସାହି ଓ ଶ୍ରୀମନ୍ଦିର ରେ ପ୍ରାୟ ୧୫ ଦିନ ଧରି ବିଭିନ୍ନ ଲୀଳା ପ୍ରସ୍ତାବ ହେବ। ଏହି ଲୀଳା ମୁଖ୍ୟତଃ କୃଷ୍ଣ ଜନ୍ମ ଠାରୁ କଂସ ବଧ ପର୍ଯ୍ୟନ୍ତ ହୋଇଥାଏ, ଯେଉଁଥିରେ କୃଷ୍ଣଙ୍କ ବାଲ୍ୟଲୀଳା କୁ ଅଭିନୟ ରେ ଦର୍ଶାଯାଇଥାଏ। ଏହା ମଧ୍ୟ ଆମର ବ୍ୟାପକ ଓ ପୁରାତନ ମୁକ୍ତାକାଶ ରଙ୍ଗମଞ୍ଚ । ଗଜପତି ପ୍ରତାପରୁଦ୍ର ଦେବଙ୍କ ସମୟରୁ ଶ୍ରୀମନ୍ଦିର ରେ କୃଷ୍ଣ ଲୀଳା ଓ ଏଥିସହିତ ଠାକୁର ଙ୍କ ର ବେଶ ଆରମ୍ଭ ହୋଇଥିବାର ଜଣାଯାଏ।

ପ୍ରାୟ ସମସ୍ତେ ରାମଲୀଳା ବା ସାହିଯାତ ବିଷୟରେ ଜାଣିଛନ୍ତି ଆଉ କୃଷ୍ଣଲୀଳା କେବଳ ନୀତି ରେ ସୀମିତ ହୋଇ ରହିଛି। କିନ୍ତୁ ଏଥିରେ ମଧ୍ୟ ଆଠ ସାହି ଆଖଡ଼ା ମୁଖ୍ୟ ଭୂମିକା ତୁଲାଇଥାଏ।

ସାହିଯାତରେ ସମସ୍ତ ନୀତି ଜଗନ୍ନାଥ ବଲ୍ଲଭ ମଠରେ ହେଉଥିବାବେଳେ କୃଷ୍ଣଲୀଳା ର ନୀତି ଗୁଡ଼ିକ ମୁଖ୍ୟତଃ ଶ୍ରୀମନ୍ଦିର ଭିତରେ ହୋଇଥାଏ। ଲବଣୀଖିଆ,କାଳୀୟଦଳନ,କୋଳିବିକା, କଂସ ବଧ ପରି ଅଳ୍ପ କିଛି ନୀତି ଶ୍ରୀମନ୍ଦିର ଚାରିପାଖରେ ବିଭିନ୍ନ ସ୍ଥାନରେ ହୁଏ। ସେଥିପାଇଁ ସବୁ ଲୀଳା ର ଫଟୋ ଓ ଭିଡିଓ ଉପଲବ୍ଧ ନାହିଁ। ତଥାପି ବିଭିନ୍ନ ସାହି ଆଖଡ଼ା ତରଫରୁ ନୀତି ପାଇଁ ବେଶ ହୋଇ ଆସୁଥିବା ରାକ୍ଷସ ମାନଙ୍କର ଫଟୋ ଆମେ ବିଗତ ୩ ବର୍ଷ ଭିତରେ ପୋଷ୍ଟ କରିବାକୁ ଚେଷ୍ଟା କରିଛୁ।

କୃଷ୍ଣଲୀଳା ଏକ ବ୍ୟାପକ ଆୟୋଜନ ହୋଇଥିଲେ ହେଁ କୋୖଣସି କାରଣ ବଶତଃ ଏହା ସାହିଯାତ ପରି ଲୋକପ୍ରିୟ ଓ ସର୍ବ ସାଧାରଣ ରେ ଆଦୃତ ହୋଇପାରିନାହିଁ। ପୁରୁଣା କାଳରେ ଏହା ମଧ୍ୟ ଆଡ଼ମ୍ବର ସହକାରେ ହେଉଥିବାର ଜଣାଯାଏ ,ହେଲେ ସମୟ ଚକ୍ର ରେ ଏହା ସାହିଯାତ ପରି ଭବ୍ୟ ହୋଇପାରିନାହିଁ।

ସାହିଯାତ ବିଶାଳ ଓ ଭବ୍ୟ ହେବାର ମଧ୍ୟ କିଛି କାରଣ ରହିଛି। ସାହିଯାତ ରେ ମୁଖ୍ୟ ଚରିତ୍ର ଗୁଡ଼ିକ ରେ ବାହାରୁଥିବା କଳାକାର ମାନେ କିଛି ମାସ ଧରି ଚାଲି,ଠାଣି,ଚାହାଣି,ନାଚ ଓ ସଂଳାପ ର ଅଭ୍ୟାସ କରନ୍ତି। ଠାକୁର ଙ୍କ ସହିତ ନୀତି କରିବା ଆଗରୁ ତାଙ୍କୁ ବାଦୀ ସାହି ଯାଇ ସେଠାରେ ନିଜର ପ୍ରତିଭା ର ପରାକାଷ୍ଠା ଦେଖାଇବାକୁ ହୋଇଥାଏ । ଏ ଅଧ୍ୟବସାୟ କିନ୍ତୁ କୃଷ୍ଣଲୀଳା ରେ ଆବଶ୍ୟକ ପଡେନାହିଁ। ରାକ୍ଷସ ଭାବରେ ଅବତୀର୍ଣ୍ଣ ହେଉଥିବା କଳାକାରମାନଙ୍କର ନା କୌଣସି ସଂଳାପ ଥାଏ ନା କିଛି ନୃତ୍ୟ ଶୈଳୀ। ଆଉ କିଛି ରାକ୍ଷସ ତ କାଗଜ,କାର୍ଡ ବୋର୍ଡ,ସୋଲ,ଜରି ଜମ୍ଵୁରା ରେ ତିଆରି ହୁଅନ୍ତି। ତେଣୁ କୃଷ୍ଣ ଲୀଳା ରେ ଯାଗା ଆଖଡ଼ା ର ସଦସ୍ୟ ଙ୍କ ର ଏତେ ଟା ପ୍ରତ୍ୟକ୍ଷ ଯୋଗଦାନ ନ ଥାଏ।

ଦ୍ଵିତୀୟ ରେ ନୀତି ପାଇଁ ବାହାରୁଥିବା କଳାକାର ନିଜ ସାହି ମଧ୍ୟ ପରିକ୍ରମା କରନ୍ତି ନାହିଁ, ତେଣୁ ବାଦୀ ସାହି ଯାଇ ପରିକ୍ରମା କରିବା ତ ଦୂରର କଥା। ଯଦି ବେଶ ହୋଇ ଆଲୋକ ସଜ୍ଜା ଓ ବାଜା ସହିତ ପଟୁଆର ରେ ସାହି ବୁଲନ୍ତେ ତେବେ ଏହାକୁ ବହୁତ ଲୋକ ଜାଣି ପାରନ୍ତେ।

ଏ ସବୁ ସତ୍ତ୍ୱେ ମଧ୍ୟ ଆମ ପୁରୀ ର କୃଷ୍ଣ ଲୀଳା ମଧ୍ୟ ରାମଲୀଳା (ସାହିଯାତ) ପରି ଅନନ୍ୟ। ଜାଣିଥିବା ଲୋକମାନେ ଏ ସବୁ ଚରିତ୍ର କୁ ସିଂହଦ୍ଵାର ପାଖରେ ଅପେକ୍ଷା କରି ରୁହନ୍ତି। ଠାକୁର ଯେଉଁ ଯେଉଁ ନୀତି ପାଇଁ ବାହାରକୁ ବିଜେ କରନ୍ତି, ସେତେବେଳେ ଠାକୁର ଙ୍କ ସହ ରହି ସବୁ ନୀତି କୁ ସ୍ବଚକ୍ଷୁରେ ଦେଖନ୍ତି।

ଆପଣ ମାନଙ୍କ ଅବଗତି ନିମନ୍ତେ କେଉଁ ସାହି କେଉଁ ଲୀଳା ପାଇଁ ପ୍ରସ୍ତାବ କରନ୍ତି ତାହାର ସମ୍ୟକ୍ ସୂଚନା ଦେବାକୁ ଚେଷ୍ଟା କରୁଛି।

ପୁତନା ବଧ ଲୀଳା (ମାର୍କଣ୍ଡେଶ୍ୱର ସାହି)

ବକାସୁର ବଧ ଲୀଳା (ବାଲିସାହି)

ଅର୍ଘାସୁର ବଧ ଲୀଳା - ହରଚଣ୍ଡୀ ସାହି

ଧେନୁକାସୁର ବଧ ଲୀଳା (କୁଣ୍ଢେଇବେଣ୍ଟ ସାହି)

ପ୍ରଳମ୍ବାସୁର ବଧ ଲୀଳା (ଦୋଳମଣ୍ଡପ ସାହି)

ଅନ୍ନପ୍ରଥା ପ୍ରସ୍ତାବ ଲୀଳା (ଗୌଡବାଡ ସାହି)

ଦାବାଗ୍ନୀ ଲୀଳା (ମାଟିମଣ୍ଡପ ସାହି)ଏନ

ଅନ୍ଧହାତୀ ଲୀଳା (ବାସେଳୀ ସାହି)

ବିମ୍ଵାସୁର ବଧ ଲୀଳା (ମାର୍କଣ୍ଡେଶ୍ୱର ସାହି)

କେକଶୀ ବଧ ଲୀଳା (କାଳୀକାଦେବୀ ସାହି)

ଏଥିସହିତ କେଳିବିକା , ଲବଣୀଖିଆ ନୀତି, କାଳୀୟଦଳନ ନୀତି, ନିକୁଞ୍ଜ ଲୀଳା, ଦାହଲୀଳା,କୁବ୍ଜା ଉଦ୍ଧାର ନୀତି,କଂସ ବଧ ଆଦି କିଛି ନୀତି ରେ କୌଣସି ସାହିର ସଂପୃକ୍ତି ନାହିଁ ,ଏହିସବୁ ନୀତି ଶ୍ରୀମନ୍ଦିର ର ସେବକ ମାନଙ୍କ ଦ୍ବାରା ହୋଇଥାଏ।

ଆଗରୁ ମଥୁରା ହାଟ ଯୁର ସମୟରେ ମରିଚି କୋଟ ତରଫରୁ ପହେଲମାନ ମାନେ କୁସ୍ତି ପ୍ରଦର୍ଶନ କରୁଥିଲେ ଓ ଯାତ୍ରା ର ପଟୁଆର ରେ ସାମିଲ୍ ହେଉଥିଲେ।

ଆସନ୍ତୁ, ଏ ବର୍ଷ ମଧ୍ୟ ଲୀଳାମୟ ଙ୍କ ର ଏହି ଅପୂର୍ବ ବାଲ୍ୟଲୀଳା ରେ ଯୋଡି ହେବା ଏବଂ

ବିଭିନ୍ନ ସାହିରୁ ବାହାରୁଥିବା ରାକ୍ଷସ ମାନଙ୍କର ସଂହାର ବିଷୟରେ ପ୍ରତ୍ୟକ୍ଷ ଓ ପରୋକ୍ଷ ଭାବରେ ଜାଣିବା।

ଐତିହ୍ୟ ପ୍ରେମୀ ମାନଙ୍କ ପାଇଁ ଏହା ଏକ ସୁବର୍ଣ୍ଣ ସୁଯୋଗ।

ଶ୍ରୀକ୍ଷେତ୍ର ର କୃଷ୍ଣଲୀଳା

ଚୈତ୍ରରେ ରାମଲୀଳା ପରି ଭାଦ୍ରବରେ କୃଷ୍ଣଲୀଳା କୁ ନେଇ ପୁରୀର ପାରମ୍ପରିକ ସାହିଯାତ