ସମୟ ସହିତ ମାନବ ସଭ୍ୟତା, ସଂସ୍କୃତି ଏବଂ ମୂଲ୍ୟବୋଧର ପରିବର୍ତ୍ତନ ଘଟିଥାଏ। ଦେଶପ୍ରେମ ବା ଜାତୀୟତାବୋଧ ଭଳି ଏକ ସଂବେଦନଶୀଳ ବିଷୟ ମଧ୍ୟ ଏହି ପରିବର୍ତ୍ତନରୁ ବାଦ୍‌ ପଡ଼ିନାହିଁ। ଗୋଟିଏ ସମୟ ଥିଲା, ଯେତେବେଳେ ଦେଶପ୍ରେମର ଅର୍ଥ କେବଳ ସୀମାରେ ଦେଶରକ୍ଷା ପାଇଁ ଆତ୍ମବଳିଦାନ, ଜାତୀୟ ପତାକା ଉତ୍ତୋଳନ, କିମ୍ବା ଆଞ୍ଚଳିକ ପ୍ରଗତି ପାଇଁ ସଂଗ୍ରାମ କରିବା ମଧ୍ୟରେ ସୀମିତ ଥିଲା। କିନ୍ତୁ ଆଜିର ଡିଜିଟାଲ୍‌ ଏବଂ ସୋସିଆଲ ମିଡ଼ିଆ ଯୁଗରେ ଦେଶପ୍ରେମର ଏକ ନୂତନ ସଂଜ୍ଞା ସୃଷ୍ଟି ହୋଇଛି। ସୋସିଆଲ ମିଡ଼ିଆ ଆମର ସ୍ୱର, ଏବଂ ଚିନ୍ତାଧାରା ପ୍ରକାଶ କରିବାର ପ୍ରମୁଖ ମାଧ୍ୟମ ହୋଇପାରିଛି।

ଆଜିର ଯୁବପିଢ଼ି ପାଇଁ ସୋସିଆଲ ମିଡ଼ିଆ କେବଳ ମନୋରଞ୍ଜନର ମାଧ୍ୟମ ନୁହେଁ, ଏହା ନିଜର ଦେଶପ୍ରେମ ପ୍ରଦର୍ଶନ କରିବାର ଏକ ଶକ୍ତିଶାଳୀ ମଞ୍ଚ। ଦେଶର ଲୋକକଳା, ସଂସ୍କୃତି, ଭାଷା, ପର୍ଯ୍ୟଟନ ଓ ଐତିହ୍ୟକୁ ବିଶ୍ୱ ଦରବାରରେ ପହଞ୍ଚାଇବା ଆଜିର ସୋସିଆଲ ମିଡ଼ିଆ ଦେଶପ୍ରେମର ଅନ୍ୟତମ ବଡ଼ ଉଦାହରଣ। ଜଳସଂରକ୍ଷଣ, ସ୍ୱଚ୍ଛତା, ପରିବେଶ ସୁରକ୍ଷା, ଏବଂ ସ୍ଥାନୀୟ ଉତ୍ପାଦକୁ ପ୍ରୋତ୍ସାହନ ଦେବା ପାଇଁ ହ୍ୟାସଟ୍ୟାଗ୍‌ (Hashtag) ମାଧ୍ୟମରେ ଚାଲିଥିବା ଅଭିଯାନଗୁଡ଼ିକ ଡିଜିଟାଲ ଦେଶପ୍ରେମର ଏକ ବରଦାନ ସଦୃଶ। କ୍ରୀଡ଼ା କ୍ଷେତ୍ର ହଉ କି ମହାକାଶ ଅଭିଯାନ କ୍ଷେତ୍ର ହଉ ସବୁଥିରେ ଦେଶର ସଫଳତାକୁ ମିଳିମିଶି ପାଳନ କରିବା ଏବଂ ବିଶ୍ୱସ୍ତରରେ ଦେଶର ସୁନାମ ବୃଦ୍ଧି କରିବା ପାଇଁ ସୋସିଆଲ ମିଡ଼ିଆ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଛି।

( ଦେଖାଣିଆ ଦେଶପ୍ରେମ )

ସୋସିଆଲ ମିଡ଼ିଆରେ ଦେଶପ୍ରେମର ବୃଦ୍ଧି ପଛରେ କେତେକ ଗମ୍ଭୀର ସମସ୍ୟା ମଧ୍ୟ ଲୁଚି ରହିଛି:

- ହ୍ୟାସଟ୍ୟାଗ୍ ଓ ଫଟୋ-ଭିଡିଓରେ ସୀମିତ ଦେଶପ୍ରେମ:

- ଜାତୀୟ ପର୍ବଗୁଡ଼ିକରେ ପ୍ରୋଫାଇଲ୍ ଛବି ବଦଳାଇବା କିମ୍ବା ଦେଶାତ୍ମବୋଧକ ଷ୍ଟାଟସ୍‌ ଦେବା ପ୍ରଶଂସନୀୟ, କିନ୍ତୁ କିଛି ଟା ଲାଇକ୍‌ ଏବଂ ଶେୟାର ପାଇଁ ପ୍ରଦର୍ଶନ କରିବା ପ୍ରକୃତ ଦେଶପ୍ରେମକୁ ଆଘାତ ପହଞ୍ଚାଇବା ସହ ସମାନ। ଅନେକ ସମୟରେ ଜାତୀୟତା ନାମରେ ଅପପ୍ରଚାର, ମିଥ୍ୟା ତଥ୍ୟ (Fake News) ଏବଂ ସାମ୍ପ୍ରଦାୟିକ କିମ୍ବା ସାମାଜିକ ଦ୍ୱନ୍ଦ୍ୱ ସୃଷ୍ଟି କରାଯାଉଛି। ଅନ୍ୟ କାହାକୁ ସମାଲୋଚନା କିମ୍ବା ଆକ୍ରମଣ କରି ନିଜକୁ ଶ୍ରେଷ୍ଠ ଦେଶପ୍ରେମୀ ବୋଲି ପ୍ରମାଣିତ କରିବାର କୁପ୍ରଭାବ ବୃଦ୍ଧି ପାଉଛି।

ସୋସିଆଲ ମିଡ଼ିଆ ଯୁଗରେ ପ୍ରକୃତ ଦେଶପ୍ରେମୀ ହେବାକୁ ହେଲେ ଜଣେ ନାଗରିକକୁ କେତେକ ଦାୟିତ୍ୱବାନ କାର୍ଯ୍ୟ କରିବାକୁ ପଡ଼ିବ :-

- ଯେକୌଣସି ଜାତୀୟ ଖବର ଶେୟାର କରିବା ପୂର୍ବରୁ ସତ୍ୟାସତ୍ୟ ପରଖିବା।

- ଦେଶର ବିବିଧତା, ଏକତା ଓ ଭାଇଚାରାକୁ ପ୍ରୋତ୍ସାହିତ କରିବା।

- ସାମାଜିକ ଏବଂ ଜାତୀୟ ସମସ୍ୟାର ସକାରାତ୍ମକ ସମାଧାନ ପାଇଁ ସ୍ୱର ଉତ୍ତୋଳନ କରିବା।

ସୋସିଆଲ ମିଡ଼ିଆ ଯୁଗରେ ଦେଶପ୍ରେମର ସଂଜ୍ଞା କେବଳ କଥା କିମ୍ବା ଡିଜିଟାଲ ପ୍ରଦର୍ଶନରେ ସୀମିତ ରହିବା ଉଚିତ୍ ନୁହେଁ।ଦୁନିଆର ସ୍ୱର ଯେତେବେଳେ ବାସ୍ତବ ଦୁନିଆର କର୍ମ ସହ ଯୋଡ଼ିହୁଏ, ସେତେବେଳେ ପ୍ରକୃତ ଦେଶପ୍ରେମର ଜନ୍ମ ହୁଏ।"

ସୋସିଆଲ ମିଡ଼ିଆକୁ ଏକ ଶକ୍ତିଶାଳୀ ଅସ୍ତ୍ର ଭାବରେ ବ୍ୟବହାର କରି ଦେଶର ଅଗ୍ରଗତି, ସାମାଜିକ ସଂସ୍କାର, ଏବଂ ଜାତୀୟ ସଂହତି ପ୍ରତିଷ୍ଠା କରିବା ହିଁ ଆଜିର ଯୁଗରେ ପ୍ରକୃତ ଦେଶପ୍ରେମ। ଡିଜିଟାଲ ସ୍ପେସ୍‌ରେ ଜଣେ ଦାୟିତ୍ୱବାନ ଏବଂ ସଚେତନ ନାଗରିକ ହେବା ହିଁ ଏହି ସମୟର ସର୍ବୋତ୍ତମ ଦେଶସେବା।

ସୋସିଆଲ ମିଡ଼ିଆ ଯୁଗରେ ଦେଶପ୍ରେମର ନୂଆ ସଂଜ୍ଞା

ସୋସିଆଲ ମିଡ଼ିଆ ଯୁଗରେ ଦେଶପ୍ରେମର ନୂଆ ସଂଜ୍ଞା