ଭାରତର ସ୍ୱାଧୀନତା ସଂଗ୍ରାମ ଆମ ଇତିହାସର ଏକ ଗୌରବମୟ ଅଧ୍ୟାୟ। ଦୀର୍ଘ ଦିନର ପରାଧୀନତାରୁ ଦେଶକୁ ମୁକ୍ତ କରିବା ପାଇଁ ଅନେକ ବୀରପୁରୁଷ, ମହିଳା ଓ ସାଧାରଣ ଲୋକ ନିଜ ଜୀବନକୁ ବାଜି ଲଗାଇଥିଲେ। କେହି ଜେଲ୍ ଯାଇଥିଲେ, କେହି ନିର୍ଯାତନା ସହିଥିଲେ ଓ ଆଉ କେହି ଦେଶ ପାଇଁ ନିଜର ପ୍ରାଣ ଦେଇଥିଲେ। ସେହି ସଂଗ୍ରାମରେ ଆଜାଦ୍ ହିନ୍ଦ୍ ଫୌଜର ଭୂମିକା ଏକ ଅଲଗା ସ୍ଥାନ ରଖେ।

ଆଜାଦ୍ ହିନ୍ଦ୍ ଫୌଜର ନାମ ମନେ ପଡ଼ିଲେ ଆମ ଆଖି ଆଗରେ ଦେଶପ୍ରେମୀ ନେତାଜୀ ସୁଭାଷ ଚନ୍ଦ୍ର ବୋଷଙ୍କ ଚିତ୍ର ଭାସି ଉଠେ। ନେତାଜୀ ଥିଲେ ଜଣେ ଅଦମ୍ୟ ସାହସୀ ଓ ଦୃଢ଼ ଇଚ୍ଛାଶକ୍ତିର ମଣିଷ। ଭାରତକୁ ପରାଧୀନତାର ଶୃଙ୍ଖଳରୁ ମୁକ୍ତ କରିବା ଥିଲା ତାଙ୍କ ଜୀବନର ମୁଖ୍ୟ ଲକ୍ଷ୍ୟ। ସେ ଭାବୁଥିଲେ, ସ୍ୱାଧୀନତା କେବଳ ଅନୁରୋଧ କରି ପାଇ ହେବ ନାହିଁ; ଏଥିପାଇଁ ସାହସ, ସଂଗଠନ ଓ ତ୍ୟାଗ ଆବଶ୍ୟକ।

ଆଜାଦ୍ ହିନ୍ଦ୍ ଫୌଜର ଗଠନ ଭାରତର ସ୍ୱାଧୀନତା ଆନ୍ଦୋଳନକୁ ଏକ ନୂଆ ଦିଗ ଦେଇଥିଲା। ୨୧ ଅକ୍ଟୋବର ୧୯୪୩ ରେ ନେତାଜୀ ସୁଭାଷ ଚନ୍ଦ୍ର ବୋଷ ସିଙ୍ଗାପୁରଠାରେ 'ଆଜାଦ୍ ହିନ୍ଦ୍ ସରକାର' ପ୍ରତିଷ୍ଠା କରିଥିଲେ । ନେତାଜୀଙ୍କ ନେତୃତ୍ୱରେ ଏହି ସେନା ଦେଶର ସ୍ୱାଧୀନତା ପାଇଁ ଲଢ଼ିବାର ସଂକଳ୍ପ ନେଇଥିଲା। ତାଙ୍କର ଆହ୍ୱାନରେ ଅନେକ ଭାରତୀୟ ଏହି ସଂଗ୍ରାମ ସହ ଯୋଡ଼ି ହୋଇଥିଲେ। “ଦିଲ୍ଲୀ ଚଲୋ” ଆହ୍ୱାନ ସେତେବେଳେ ଅନେକ ଦେଶପ୍ରେମୀଙ୍କ ମନରେ ନୂଆ ଉତ୍ସାହ ଭରିଥିଲା। ନେତାଜୀଙ୍କ “ଜୟ ହିନ୍ଦ୍” ଧ୍ୱନି ମଧ୍ୟ ଦେଶବାସୀଙ୍କ ମନରେ ଏକତା ଓ ଦେଶପ୍ରେମର ଭାବନା ଜାଗ୍ରତ କରିଥିଲା।

ଆଜାଦ୍ ହିନ୍ଦ୍ ଫୌଜର ସୈନିକମାନେ ଅନେକ କଷ୍ଟ ଓ ବିପଦ ମଧ୍ୟରେ ନିଜ କର୍ତ୍ତବ୍ୟ ପାଳନ କରିଥିଲେ। ତାଙ୍କ ପାଖରେ ବ୍ୟକ୍ତିଗତ ସୁଖ ଅପେକ୍ଷା ଦେଶର ସ୍ୱାଧୀନତା ବଡ଼ ଥିଲା। ଭୋକ, ତୃଷ୍ଣା, ରୋଗ, ଯୁଦ୍ଧର ଭୟ ଓ ଜୀବନର ଅନିଶ୍ଚିତତାକୁ ସେମାନେ ଭୁଲି ଦେଶ ପାଇଁ ଆଗକୁ ବଢ଼ିଥିଲେ। ସେମାନଙ୍କ ତ୍ୟାଗ ଆମକୁ ଶିଖାଏ ଯେ ଦେଶ ପାଇଁ କରାଯାଇଥିବା ନିଷ୍ଠା ପୂର୍ଣ୍ଣ ସେବା କେବେ ବ୍ୟର୍ଥ ଯାଏ ନାହିଁ।

ଆଜାଦ୍ ହିନ୍ଦ୍ ଫୌଜରେ ମହିଳାମାନଙ୍କର ଭୂମିକା ମଧ୍ୟ ଆମ ପାଇଁ ପ୍ରେରଣାଦାୟକ। ନେତାଜୀ ମହିଳାମାନଙ୍କୁ ମଧ୍ୟ ଦେଶର ସ୍ୱାଧୀନତା ସଂଗ୍ରାମରେ ସକ୍ରିୟ ଭାବେ ଯୋଗଦେବାର ସୁଯୋଗ ଦେଇଥିଲେ। ରାଣୀ ଝାନ୍ସୀ ରେଜିମେଣ୍ଟ ଏହାର ଏକ ଉଜ୍ଜ୍ୱଳ ଉଦାହରଣ। ଏଥିରୁ ପ୍ରମାଣ ମିଳେ ଯେ ଦେଶର ସ୍ୱାଧୀନତା ପାଇଁ ପୁରୁଷ ଓ ମହିଳା ସମସ୍ତେ ଏକାଠି ହୋଇପାରନ୍ତି।

ଆଜି ଆମେ ସ୍ୱାଧୀନ ଦେଶର ନାଗରିକ। ନିଜ ଭାଷାରେ କଥା କହିବା, ନିଜ ମତ ପ୍ରକାଶ କରିବା ଓ ନିଜ ଭବିଷ୍ୟତ ଗଢ଼ିବାର ସୁଯୋଗ ଆମ ପାଖରେ ଅଛି। ଏହି ସ୍ୱାଧୀନତା ପଛରେ ଅସଂଖ୍ୟ ବୀରଙ୍କ ତ୍ୟାଗ ରହିଛି। ତେଣୁ ସ୍ୱାଧୀନତାର ମୂଲ୍ୟ ବୁଝିବା ଓ ଦେଶର ଏକତା, ଶାନ୍ତି ଏବଂ ଭାଇଚାରାକୁ ରକ୍ଷା କରିବା ଆମର କର୍ତ୍ତବ୍ୟ।

ଆଜାଦ୍ ହିନ୍ଦ୍ ଫୌଜର ପ୍ରତିଷ୍ଠା ଦିବସରେ ମୁଁ ନେତାଜୀ ସୁଭାଷ ଚନ୍ଦ୍ର ବୋଷଙ୍କ ସହ ଆଜାଦ୍ ହିନ୍ଦ୍ ଫୌଜର ସମସ୍ତ ଦେଶ ଭକ୍ତି ସୈନିକଙ୍କୁ ଅନ୍ତରରୁ ଅସଂଖ୍ୟ ପ୍ରଣାମ ଜଣାଉଛି। ସେମାନଙ୍କର ସାହସ, ତ୍ୟାଗ ଓ ଦେଶପ୍ରେମ ଆମ ହୃଦୟରେ ସଦା ଜୀବନ୍ତ ରହୁ। ତାଙ୍କର ଆଦର୍ଶ ଆମକୁ ନିଜ ଦେଶ, ନିଜ ମାଟି ଓ ନିଜ ଲୋକଙ୍କ ପାଇଁ ସତ୍ୟନିଷ୍ଠ ଭାବେ କାମ କରିବାର ପ୍ରେରଣା ଦେଉ।

!! ସୁଶାନ୍ତ କୁମାର ସାସମଲ

ବ୍ରହ୍ମପୁର ଗଞ୍ଜାମ!!

ସ୍ୱାଧୀନତା ସଂଗ୍ରାମରେ ଆଜାଦ୍ ହିନ୍ଦ୍ ଫୌଜ

ସ୍ୱାଧୀନତା ସଂଗ୍ରାମରେ ଆଜାଦ୍ ହିନ୍ଦ୍ ଫୌଜ